1. Ngoeak a ngera el rolel e a Kristiano kirel mo ua kerrekar? (Dirrek el momes er a siasing.)

 “A EOLT a diak lechemur a kerrekar el sebechel medeu.” Tia el belkul a tekoi a ochotii a klungel a ultutelel a lsebechel medeu me a lechub e ngmo flexible a kerrekar me lolemolem el mesisiich el dechor. Kid me ngdirrek el kired el mo flexible sel bo lemeringel a tekoi er a klengar er kid me bo lsebeched el melemolem el mesiou er a Jehovah loba deurreng. Ngoeak a ngera el rolel? Ngkired el moba tabesul uldasu loeak a dekengei omelodech el duubech er a klengar er kid, e bo dongull a uldesuir a rechad me a omelilt el tir.

2. Ngera el blekeradel a mo ngosukid el outekangel sel lemengodech a blekeradel er a klengar er kid, e ngera kede mo mesaod er tia el suobel?

² Kid el mesiungel a Jehovah a soad el moba tabesul uldasu. Ngdirrek el soad el mo ngariou a rengud e melatk er a rebebil. Ngar tia el suobel e kede mesaod er a rolel e aika el blekeradel a ngilsuterir a rebebil Kristiano el outekangel a omelodech er a klengar er tir. Kede dirrek el mo mesaod er a rolel e aika el blekeradel a sebechel ngosukid. Engdi kot e dengai a klubeled er a Jehovah me a Jesus, el tir a cherrungel el kerebai er a oba tabesul uldasu.

3. Kede mekera medengei el kmo a Jehovah oba tabesul uldasu?

³ A Jehovah okedongall el “Risois” e le ngii a mesisiich el dechor e diak lemesim. (Dut. 32:4, NW) Me nguaisei, engdi ngdirrek el tabesul a uldesuel. Chelecha el lemengedengodech a blekeradel er a beluulechad e a Jehovah melodech er ngii me bo lsebechel lotaut a rokui el telbilel. A Jehovah milebeterir a rechad el okesiul me ngngar ngii a duch er kid el melodech er kid el mo oltirakl a ngeldechel a blekeradel. Ngar er a Biblia e kede metik omellach el sebechel ngosukid el mo ungil melilt sel bo dechelebangel a ngii di el tekoi. A kerebil a Jehovah me a omellach  el bla lebeskid a olechotel a kmo, alta ng “Risios,” engdi ngdirrek el oba tabesul uldasu.

4. Mouchais er a ta er a olechotel a kmo Jehovah oba tabesul uldasu. (Levitikus 5:7, 11)

⁴ A rolel a Jehovah cherrungel e tabesul. Ngika diak lemeringel a tekingel el mora rechad. Molatk er a rolel e ngulechotii a tabesul uldasu el mora rechad er a Israel. Ngdimlak el longerechir osisiu el tenget er a rokui el chad, a lemerau me a lemechebuul. Ngar er a bebil blekeradel, e ngkilengei er a derta el chad me lolenget loltirakl er sel sebechir.​—Monguiu er a Levitikus 5:7, 11.

5. Mouchais er a ta er a olechotel a klengariourreng me a klechubechub er Jehovah.

⁵ A klengariourreng er a Jehovah me ngii el melatk er a rechad a odbechii el moba tabesul el uldasu. El ua tiang, a klengariourreng er a Jehovah bleketakl el meues er sel taem er a bo lolekngemed er a remekngit el chad er a Sodom. Ngoeak a rechanghel er ngii e ngdilu er a melemalt el chad el Lot me lechiis el mora bukl. Engdi Lot a mle medakt el mo er tiang. Me ngullengit el kmo lsebechel ngii me a telungalek er ngii el chemiis el mora Soar, el kekerei el beluu el Jehovah tilbir el mo okngemedii. A Jehovah mle sebechel dmu er a Lot el kmo ngkirel loltirakl a tekingel. Engdi ngkilengei er a ongtil a Lot alta tia mle belkul a kmo ngdikea lolekngemed er a beluu er a Soar. (Gen. 19:18-22) Betok el dart el rak er uriul e a Jehovah ulechotii a klechubechub el mora rechad er a Ninive. Ngulderechii a profet Jona el mo ouchais el kmo tir me a mats er tir a mo nguemed. Engdi sera lobult a rechad er a Ninive, e a Jehovah mlo chubteterir me ngdimlak lokngemedii ngii el beluu.​—Jon. 3:1, 10; 4:10, 11.

6. Mouchais a rolel e a Jesus uluukerebai er a tabesul uldasu lobang a Jehovah.

⁶ A Jesus uluukerebai er a tabesul uldasu loba Jehovah. Ngika mlei er tia el chutem el mo omerk el mora “ririid el sib er a re chad er a Israel.” Engdi ngulechotii a tabesul uldasu er a loruul er tia el ngerechelel. A ta el taem, e a redil el dimlak lechad er a Israel ullengit er ngii me lomekungil er a ngelekel el redil el “ngar ngii a mekngit el chelid er ngii me ng kmal chuarm.” Klechubechub er a Jesus a uchul me ngultutii a ongtil ngii el redil e ulemekungil er a ngelekel. (Mt. 15:21-28) Dirrek el molatk er a lmuut el ta er a olechotel. A Jesus a dilu er a uchelel a omesiungel el kmo: “A ngii di el chad el choitak . . . , a bo kchitii.” (Mt. 10:33, NW) Engdi ngika ngchilitii a Petrus, lultngeklii el edei el taem? Ngdiak. A Jesus a millatk er a bulterreng er a Petrus me a klaumerang er ngii. Uriul er a lebekiis a Jesus, e ngmlo duum el mora Petrus e locha kmal ulterekokl er a rengul el kmo ngmla ousubes er ngii e kmal dirk betik a rengul er ngii.​—Lk. 24:33, 34.

7. Ngua losaod a Filipi 4:5 (NW), ngsoad a bo le uangerang a chised?

⁷ Kede mesa el kmo a Jehovah me a Jesus a oba tabesul uldasu. E kid? A Jehovah mengerechir er kid el moba tabesul uldasu.  (Monguiu er a Filipi 4:5, NW. b) A ta el Biblia oliuid er tia el bades el kmo: “Bo lechisem el kmo koba tabesul uldasu.” Ngsebeched el di kid el oker: ‘A rechad te omes er ngak, el tabesul a uldesuek e beot er ngak a kongei a uldesuir a rechad? Me a lechub e te omes er ngak el meringel a tekingek e mesisiich a uldesuek? Ngak ak insist er a rechad el meruul a tekoi el ngar er a rolel kumdasu el kmo ngkirel uaisei? Me a lechub a kurrenges er a rechad e kongei a uldesuir a lsekum e ngsebechel?’ Sel bo deblechoel el oba tabesul uldasu e kede mo oukerebai er a Jehovah me a Jesus. Me dosaod a eru el tekoi lousbech er kid el mo olecholt er a tabesul uldasu. Aikang a sel lemengodech a blekeradel er a klengar er kid me a sel lengodech a uldesuir me a omelilt er a rechad er kid.

8. Ngera sebechel ngosukid el moba tabesul uldasu sel lemengodech a blekeradel er a klengar er kid? (Dirrek el momes er a footnote.)

⁸ A uldimukl er a tabesul uldasu a mo flexible sel lemengodech a blekeradel er a klengar er kid. Chouaika el omelodech a sebechel mo uchul a ringel el dimlak dolatk el kmo kede mo chobangel. Nglocha di kiul el mo er ngii a oberaod el secherel a bedenged. Me a lechub ngdi kiul mengodech a keizai me a lechub e ngkabelment er a beluu el dekiei er ngii, e rullii a klengar el mo meringel el kired. (Oli. 9:11; 1 Ko. 7:31) Mo lmuut er a ngeldechel a assignment er kid er a cheldebechelel a Jehovah me ngsebechel mo uchul a ringel. A ngii di el omelsemai el bo dechebengelii a sebeched el mo mesisiich er ngii a lsekum e kede oltirakl aika el eua el tekoi: (1) kongei er a blekeradel el dengar ngii, (2) omes el bedul uchei, (3) focus aike el ungil tekoi er a klengar er kid, e (4) meruul a tekoi el kirir a rebebil. c Ka me dosaod a rolel e a rudam me a rudos el mirruul aikang a mla ngmai a klungiolir.

9. Ngmilekera ta el obekel el missionari e outekangel a ringel el di mle kiul el duubech?

⁹ Mkengei er a blekeradel el omngar ngii. A Emanuele me a Francesca ble le assign er tir el mo missionari er a ngodech el beluu. Te dirk melasem el mesuub er a omelekoi er tia el beluu e mo medengelterir a rudam me a rudos er a ongdibel, e ngmo er ngii a COVID-19 pandemic me ngmlo kirir el mengeroid er tir er a rechad. E a delal a Francesca di kiul mad. A Francesca kmal mle soal mo obengkel a telungalek er ngii, engdi pandemic a uchul me ngdimlak el sebechel mo er tir. Ngera ngilsuir el outekangel? A kot e a Emanuele me a Francesca a mle dmak el meluluuch lolengit er a llomeserreng el mo outekangel er a bek el sils. A Jehovah ulenger a nglunguchir er a melemalt el taem loeak a cheldebechelel. El ua tiang, ngkmal millisiich er tir a tekingel a odam el ngar er a video interview el dilu el kmo: “Sel recheded el kongei er a beches el blekeradel el bo dulsiseb er ngii, a rechedel lmuut el mo er ngii a deurreng er kid, me kid a mo sebeched el mo ungil lousbech er a beches el blekeradel el dengar ngii.” d Ongerung, te millilt el mo olengeriakl er a rolel a lomerk er a klumech lousbech a dengua e ulemuchel er a omesubel a Biblia lobengkel a chad. Ongedei, te kilengei a omelisiich me a support er a rudam me a rudos. A ta el odos a mle bek el sils el le message er tir a bades er a Biblia el ta el  rak. A lsekum kede dirrek el mo kongei er a blekeradel el dengar ngii, e ngmo dmeu a rengud el meruul aike el sebeched.

10. Ngmilekera ta el odos e mirruul omelodech loltirakl er a klou el tekoi el dilubech er a klengar er ngii?

¹⁰ Momes el bedul uchei, em focus er aike el ungil tekoi er a klengar er kau. A Christina el redil er a Romania el kiei er a Siabal a kmal mlo mekngit a rengul er a lemeterakl a ongdibel el melekoi a tekoi er a Merikel el ble leteloi er ngii. Me nguaisei engdi ngika dimlak lolemolem el melatk er tiang. E ngbai rirellii er a rengul el mo meruul aike el rokui el sebechel el chedal a ongdibel el melekoi a tekoi er a Siabal, e omerk er a klumech el ngar tia el omelekoi. Ngullengit er a redil el ledilak loureor me lengesuir el mo ungil melekoi a tekoi er a Siabal. Ngika el redil a kilengei lousbech er a Biblia me a Mkiei el Mo Cherechar! el brochure lolisechakl er ngii a tekoi er a Siabal. Me a Christina dimlak di lolengeriakl er a omelekingel el tekoi er a Siabal, ngdirrek el ngika el redil a mlo soal mo medengelii a klemerang. Sel domes el beduluchei e de positive, e a omelodech el dimlak de expect a sebechel mo uchul a klengeltengat.

11. Ngera ngilsuir a ta obekel er a leduubech a ringelel a udoud?

¹¹ Moruul a tekoi el kirir a rebebil. A obekel el kiei er a beluu el merrob er a urered a mlo chuarm er a ringelel a udoud er a lemetemall a keizai er a beluu. Te milekerang? A kot, e te ulemekbeot a klengar er tir. Ongingil, e te dimlak di lolatk a mondai er tir, e bai mlo osiik a rolel e te olengeseu er a rebebil loeak a lolemolem el mechesang lomerk er a klumech. (Rel. 20:35) A bechiil el sechal a kmo, “Kemam el mechesang el omerk er a klumech a uchul me ngdimlak el klou a temam el melatk a mondai er kemam e bai klou a temam el meruul er a soal a Dios.” Sel lemengodech a blekeradel er a klengar er kid, e ngkired el diak dobes er a klungel a ultutelel a dolemolem lolengeseu er a rebebil, tokubets loeak a berkel a klumech.

12. Ngmekera sebeched loukerebai er a apostol Paulus e mo flexible er a rolel a domerk er a klumech?

¹² Ngkired el mo flexible sel domerk er a klumech. Kede mo medengelterir a rechad el kakerous a klaumerang er tir me a blekerdelir e kakerous a siukang er tir me a ulekurulir. A apostol Paulus a mle flexible, e kmal sebeched el ngmai a klubeled er a kerebai er ngii. A Jesus a tiltkii a Paulus el mo “apostol er a re Chisentael.” (Rom 11:13) Me a Paulus ulemerk el mora Rechijudea, rechad er a Grik, rechad el ngar ngii a skulir, rekuk di chad er a beluu, rechad er a kabelment me a reking. Me a Paulus a “mlo uar bek el chad el bedul ar bek el chad.” (1 Ko. 9:19-23, BT) Ngmilsuub a siukang, blekerdelel a klengar, me a klaumerang er a rechad lulemerk el mo er tir e ulemerk el ngar er a rolel e ngmo sorir el mesuub el kirel a Dios. Kid me ngdirrek el sebeched lolengeriakl er a rolel a berkel a klumech a lsekum e kede mo flexible e melasem el melatk el kmo ngngera kot el ungil rolel e kede remutech a rengrir a rurrenges er kid.

13. Ngera el tellemall el losaod er ngii a 1 Korinth 8:9 (BT) a sebeched loibngid er ngii sel bo dongull a uldesuir a rechad?

¹³ A tabesul uldasu a dirrek el ngosukid el mo mengull a uldesuir a rechad. El ua tiang, a rebebil er a rudos a sorir el ousbech a makeup, e a rekuk bebil a diak. A rebebil Kristiano a melim el ngar er a tabesul el rolel engdi rebebil a melilt el diak lolim. A rokui el Rekristiano sorir a bo lungil a health er tir engdi ngkakerous a rolel a lomekerreu a health er tir. A lsekum e ngkmal mesisiich a uldesued me  kede melasem el meruul er a rechad er a ongdibel el mo oltirakl, e ngsebeched el soibesengeterir a rebebil e muchel a klekakeakl. Ngkmal diak el soad el meruul er tiang! (Monguiu er a 1 Korinth 8:9, BT; e 10:23, 24) Me dosaod eru el tekoi el ngii ochotii el kmo a doltaut omellach er a Biblia e ngsebechel ngosukid el mo oba tabesul uldasu e mo melisiich er a budech.

14. Ngera el omellach er a Biblia kirel lomekrael er a rolel a doubail e dongetmokl er kid?

¹⁴ Biled me a omengetmekled. A Jehovah diak louchais el kmo ngngera sebeched el oubail engdi ngmla meskid a omellach el kired loltirakl. Ngkired loubail el ngar er a rolel e ngmengebkall er a Dios, tabesul, e ‘ulengeasek a teletelel.’ (1 Ti. 2:9, 10; 1 Pe. 3:3) Me ngdiak el soad loubail a bail el ochau osengir a rechad el mei er kid. Omellach er a Biblia dirrek el mo ngosuterir a remechuodel me ngdiak loruul a llach el kirel a rolel a doubail e dongetmokl er kid. El ua tiang, a remechuodel er a ongdibel a mle sorir lolengeseu er a rebebil ngeasek el odam el chiurir oltirakl er a haeri el style el mekedeb engdi ngdiak el selongd. Ngmekera remechuodel e sebechir el ngosuterir e a osisiu el taem e ngdiak loruul a llach? A circuit overseer a mle advice er a remechuodel me ledu er tir el kmo, “A lsekum e ke ngar er a stage e a rechad omes a omengetmekliu er a bai lorrenges omolekoi, e ngngar ngii a mekngit er a rolel omongetmokl er kemiu.” Tia ngilsuterir tirka el odam el mo medengelii a kirir el meruul, e diak loruul a llach. f

15. Ngera el llach me a omellach er a Biblia omekrael er kid sel doruul omelilt el kirel a health er kid? (Rom 14:5)

¹⁵ Kirel a health er kid. A derta el Kristiano  kirel el melilt el kmo ngmekera omekerreu er a health er ngii. (Gal. 6:5) Ngdi kesai el ileakl el llach er a Biblia a kirir a Rekristiano el oltirakl el ua, omekiai a rasech me a rolel a ukeruul el chelsechusem er a remekngit el anghel. (Rel. 15:20; Gal. 5:19, 20) Engdi oumesingd el taem a derta el chad a sebechel melilt el kmo ngmo kongei er choua ngerang el rolel a ukeruul. A rebebil a mora osbitar el kirel a ukeruul e a rekuk bebil a sorir a kuk ngodech el rolel a ukeruul. Alta ngkmal mesisiich a uldesued el kirel a ileakl el bedengel a ukeruul, engdi ngkired el mengull er a llemeltir a rudam me a rudos el meruul omelilt er tir. Ngkired el mo melatk aika el eua el tekoi: (1) Ngdi ta el Rengedel a Dios a mo omekungil a rokui el secher me ngmo diak el mo cherechar. (Isa. 33:24) (2) Derta el Kristiano kirel el “mo bleketakl er a rengul” el kmo ngngera ungil kirel. (Monguiu er a Rom 14:5.) (3) Ngdiak doukerrekeriil er a rechad me a lechub e doruul a tekoi el mo melibas er tir. (Rom 14:13) (4) Rekristiano olecholt a bltikerreng e mtebengii el kmo a kltarreng er a ongdibel a lmuut el klou a ultutelel er a ilmeklir el melilt. (Rom 14:15, 19, 20) A lsekum e kede mo blechoel el melatk aikang, e ngmo melemolem el ngar ngii a kmes el deleuill er kid me a rudam me a rudos er kid, me kid a mo melisiich er a budech er a chelsel ongdibel.

16. Ngmekera sebechel a mechuodel lolecholt er a tabesul uldasu el ngar omerellel el mo er tirke el kuk bebil er a remechuodel? (Dirrek el momes a siasing.)

¹⁶ A remechuodel a kirir el kutmeklii a ungil kerebai el kirel a mo oba tabesul uldasu. (1 Ti. 3:2, 3, NW) El ua tiang, a mechuodel a diak el bo el expect el kmo te mo kongei a uldesuel le ngii el klou er tirke el kuk bebil er a remechuodel. Ngmtebengii el kmo a Jehovah sebechel lousbech er a chedaol reng er ngii lomekrael er a ngii di el mechuodel el mo dmu aike el mo ngosuterir el mo ungil melilt. A lsekum e ngdiak el omtok omellach er a Biblia, e a remechuodel el oba tabesul uldasu a support er a omelilt el lekengei er ngii a ruumesingd el chedal a chelechad er a mechuodel, mo lmuut me a lsekum ngmle sorir a kuk ta er a tekoi.

17. Ngera el klengeltengat a loldeu a rengrir er ngii a Rekristiano el oba tabesul uldasu?

¹⁷ A Rekristiano ngmai a betok el klengeltengat sel loba tabesul uldasu. Ngngar ngii a ungil deleuill er kid me a rudam me a rudos er kid, me a ongdibel a melechesuar er a budech. Ngkmal soad a klebekelel a ongdibel, el kakerous a blekerdelir a rechad er ngii me a siukang er tir. Me alta kede kakerous engdi kede mesiou er a Jehovah el ngar er a kltarreng. E a ngaruchei er ngii, ngkmal dmeu a rengud el medengei el kmo kede oukerebai er a Dios er kid el Jehovah el ngii a oba tabesul uldasu.