1-2. Ngera ngouchais a Biblia el kirir a rebebil el king er a Israel?

 A BIBLIA ouchais el kmo te betok er a 40 el chad a mle king er a Israel. a Ngouchais er kid a komakai el tekoi el lurruul a rebebil er tir. El ua tiang, mo lmuut er tirke el mle ungil king me te riruul a kmal mekngit el tekoi. Molatk er a ungil el King David. A Jehovah dilu el kmo: “Mesiungek er a David [a mle] . . . oltirakl er ngak el oba rengul el rokir, me ng di mirruul a ikel mle melemalt er medak.” (1 Ki. 14:8) Me nguaisei engdi ngika rirebet er a laokreng lobengkel a redil el bechiil, e kiltmeklii a rolel e a bechil ngii el redil a mad er a mekemad.—2 Sa. 11:​4, 14, 15.

² A Biblia dirrek louchais er kid el kmo a rebetok er tirke el king el mle mekngit a mla er ngii a ungil el tekoi el leriruul. Molatk er a Rehoboam. Ngar osengel a Jehovah e ng “mirruul a mekngit.” (2 Kr. 12:14) Me nguaisei engdi ngullengesenges er a Dios er a lolekoi el kmo a reteruich el kebliil a mo diak el ngar cheungel a omengederederel. Ngdirrek el tileketek a mesisiich el cheotelel a beluu el omekerreu er a rechedal a Dios er a recheraro.—1 Ki. 12:​21-24; 2 Kr. 11:​5-12.

 3. Ngera el klou a ultutelel el ker a duubech, e ngera kede mo mesaod er tia el suobel?

³ Me ngduubech a klou a ultutelel el ker. A lsekum a reking er a Israel a mla er ngii a ungil me a mekngit el leriruul, e ngmilekera Jehovah olterekokl er a rolel e a king a melemalt er osengel? A nger er tia el ker a mo ngosukid el mo medengelii a losiik er ngii er kid a Jehovah. Kede mo mesaod a edei el tekoi el  lullatk a Jehovah er a lorriter er a reking er a Israel: rengul a chad, bulterreng er ngii, me a otireklel er a mera el omengull.

NGMLE CHERRUNGEL A RENGRIR EL MORA JEHOVAH

 4. Ngera ta er a klekakerous er a reblak a rengrir el king er tirke el dimlak loba blakerreng el king?

⁴ Tirke el king el uldeuir a rengul a Jehovah a milengull er ngii loba rengrir el rokir. b A ungil el King Jehosafat “ulsiik er a Jehovah el loba rengul el rokir.” (2 Kr. 22:​9, NW) A Biblia melekoi el kirel a Josia el kmo: “Ngdirkak a king er a ngar er a mong el uai ngii el liluut el mei er a Jehovah el loba rengul el rokir.” (2 Ki. 23:​25, NW) E kuk mekerang a Salomon, el ngii a uriul er a leklunga el chad e ngmirruul a mekngit? “Ngdimlak el cherrungel a rengul.” (1 Ki. 11:​4, NW) Me a Biblia mesaod er a Abia el dirrek el ta er a king el dimlak loba blakerreng el kmo: “Ng dimlak le cherrungel a rengul el mor a RUBAK.”—1 Ki. 15:3.

 5. Msodii a belkul a bo lecherrungel a rengud el mesiou er a Jehovah.

⁵ Me a leuaisei, e ngera belkul a bo lecherrungel a rengud el mesiou er a Jehovah? A chad el cherrungel a rengul el mora Jehovah diak di losiou er a Dios le ngmedengei el kmo ngkirel meruul er ngii. E ngbai mesiou er a Jehovah e le ngkmal betik a rengul er ngii e respect er ngii. Me a lmuut kung, ngmelemolem el dmolech a bltkil a rengul me a respect er ngii el mora Jehovah er a klemengetel a klengar er ngii.

 6. Ngmekera sebechel a rengud el melemolem el cherrungel? (Osisechakl 4:​23, NW; Mateus 5:​29, 30, BT)

⁶ Ngmekera doukerebai er tirke el mle blak a rengrir el king e melemolem el cherrungel a rengud el mora Jehovah? Ngoeak a dongeroid er kid er a mekngit el influence. El ua tiang, a diak el klikiid el rolel ongelaod a rullid el mo teloadel a rengud. A mekngit el klausechelei me a ilad er a kerruul me ngdirrek el rullii a rengud el mo uaisei. A lsekum e kede mtebengii a tekoi el mla omuchel el mengitechut er a bltkil a rengud el mora Jehovah, e di demereched el choridid er ngii.—Monguiu er a Osisechakl 4:​23, NW; c Mateus 5:​29, 30, BT. d

 7. Ngera uchul me ngkmal klou a ultutelel a dongeroid er kid er a mekngit el influence?

⁷ Ngkmal diak el kired el mecherei a rengud me ngmo teloadel. A lsekum e ngdiak dekerekikl e ngsebeched el di mo kid el mengeblad er kid el kmo, kid el mechesang el mesiou er a Jehovah a uchul me a mekngit el influence a diak a ngera el bo lerellii el mei er kid. Ngsebeched el lomekesiu er ngii er tiang. Kam imagine er kau el ngar rikl e kmal mekeald. Me a obo mrei e ke on er a air-condition. Engdi ngngar ngii a klungiolel tiang obecherei a chesimer me ngdi open? A kleald a mo soiseb er a chelsel a blai. Me ngngera point? Ngdiak di dolai a kall er a klereng el melisiich er a deleuill er kid me a Jehovah. Ngdirrek el kired el chosmerii a chesimer me ngdiak el be lsiseb a mekngit el influence me a “eltel” tia el beluulechad lak lsiseb er a rengud e lerellii el mo teloadel.—Efe. 2:​2, NW.

TE ULEBULT ER A KNGTERIR

8-9. Ngmilekera King David me a King Hesekia er a lengai omesmechokl? (Momes er a siasing .)

⁸ Ngua dulsaod er ngii er a uchei, a King David a riruul a kmal oberaod el klengit. Me nguaisei engdi sera louchais er ngii a Nathan er  a uldesuel a Jehovah el kirel a kngtil, e ngmle ngariou a rengul lobult er a kngtil. (2 Sa. 12:13) A David a dimlak el pretend el kmo ngouuchel a rengul er a kngtil el meruul er a Nathan el mo omdasu el kmo ngmla obult me lak lobals. A David a mera el ulebult. Sel donguiu a tekingel el ngar er a Psalm 51, e ngsebeched el feel el kmo ngkmal uluuchel er a rengul er a kngtil.—Psa. 51:​3, 4, 17, superscription.

⁹ King Hesekia a dirrek el mlora klengit lomtok er a Jehovah. A Biblia kmo: “Hesekia a mlo kedidai a rengul . . . Ma kerior a mlor ngii e dirrek el mlor a Juda ma Jerusalem.” (2 Kr. 32:25) Ngera uchul me ngmlo kedidai a rengul? Nglocha iltetel, ngii el mlo mesisiich er a rechad er a Asiria, me a lechub e ngii luleak a mengasireng el rolel e ngmlo mesisiich er a rektel. Kldidairreng a locha uchul me ngmlo olecholt a kerruul er ngii el mora rechad er a Babilon, el luchul me a Isaia milsmechokl er ngii. (2 Ki. 20:​12-18) Me nguaisei engdi Hesekia a ua David el lulebult er a kngtil. (2 Kr. 32:26) Me a Jehovah ngmle uangerang osengel el bedul a Hesekia? Ngulemes er ngii el blak a rengul el king el “melemalt a omerellel er medal.”—2 Ki. 18:3.

10. Ngmilekera Amasia er a lengai omesmechokl?

¹⁰ Me nguaisei engdi a King Amasia er a Juda mirruul a llemalt “engdi ngdimlak loba rengul el rokir.” (2 Kr. 25:​2, NW) Ngera el cheleuid a lerirellii? Uriul er a Jehovah er a lengesuir a Amasia el mo mesisiich er a rechad er a Edom, e ngmlo mengull a bleob el chedrir. e Me a Jehovah ulderchii a profet er ngii el mo mengedecheduch er ngii, engdi Amasia a dimlak lorrenges er ngii e bai uldikii.—2 Kr. 25:​14-16.

11. A doltirakl er a 2 Korinth 7:​9, 11, (BT) e ngera kired el meruul er ngii a lsoad el nguu a klausubes er a Jehovah? (Dirrek el momes a siasing.)

¹¹ Ngera kede suub er tirka el king? Ngkired el lobult er a kngtid e meruul aike el rokui el sebeched me ngdiak deluut el mo meruul er ngii. E kuk mekerang a lsekum a remechuodel er a ongdibel a mesmechokl er kid el kirel a tekoi el domdasu el kmo ngkmal di kekerei el tekoi? Ngdiak el soad el mo feel el kmo a Jehovah diak el betik a rengul er kid me a remechuodel a omtok er kid. Mo lmuut er tirke el ungil king er a Israel me te uluusbech omesmechokl. (Heb. 12:6) Sel dengai omesmechokl e ngkired el (1) moriou rengud el kongei ngii el omesmechokl, (2) meruul omelodech el kired el remuul, e (3) move on e melemolem el mesiou er a Jehovah loba rengud el rokir. A lsekum kede obult er a kngtid e a Jehovah mo ousubes er kid.—Monguiu er a 2 Korinth 7:​9, 11, BT. f

TE MILENGULL ER A JEHOVAH ER A MELEMALT EL ROLEL

12. Ngera sel ileakl el rolel e a reblak a rengrir el king a ngodech er tirke el king el dimlak loba blakerreng?

¹² Tirke el king el Jehovah ulemes er tir el blak a rengrir a uleltirakl er a mera el omengull, e millisiich er a rechedal a Dios el mo mengull er ngii el uaisei. E ua bla desuubii, ngmla er ngii a chelitecheterir. Engdi te milengull er a Jehovah el di ngii el tang e mle blak a rengrir el mengikiid er a beluu er a omengull el bleob. g

13. Ngera uchul me a Jehovah ulemes er a King Ahab el kmo ngdimlak loba blakerreng?

¹³ E mekera tirke el king el Jehovah ulemes er tir el kmo te dimlak loba blakerreng? Ngdiak el  rokui el tekoi el lurruul a mle mekngit. Mo lmuut er a mekngit el King Ahab me ngulechotii a klengariourreng e mlo ouuchel a rengul er a chesechesemel er a kodellel a Naboth. (1 Ki. 21:​27-29) Ngdirrek el tileketek a mats er a Israel e uluumekemad e mlo kats el kirel a Israel. (1 Ki. 20:​21, 29; 22:39) Me nguaisei engdi bechil a Ahab a mle influence er ngii el mo melisiich er a rechad el mo mengull a bleob. Tiakid a dimlak lobult er ngii.—1 Ki. 21:​25, 26.

14. (a) Ngera uchul me a Jehovah ulemes er a King Rehoboam el kmo ngdimlak loba blakerreng? (b) Ngera sel klaisisiu er a delongelir a ruumesingd el king er a Israel el dimlak loba blakerreng?

¹⁴ Molatk er a Rehoboam el lmuut el ta er a king el dimlak el loba blakerreng. Ngua dulsaod er ngii er a uchelel, e ngriruul a betok el lungil er a temel omengederederel. Engdi sera bo lultebechel omengederederel e ngchilitii a Llach er a Jehovah e mlo mengull a klsuul chelid. (2 Kr. 12:1) Uriul e ngmlo diak lulterekokl omengull er ngii el mora Jehovah me a klsuul chelid. (1 Ki. 14:​21-24) Ngdiak el di el Rehoboam me a Ahab a reking el mlo cheroid er a mera el omengull. Oumesingd er tirke el king el dimlak loba blakerreng a mle support a klsuul omengull. Me ngbleketakl el kmo ngar osengel a Jehovah e a otireklel a chad er a mera el omengull a klou el tedebechel a lolilt el kmo a king ngungil me a lechub e ngmekngit.

15. Ngera uchul me a otirekled er a mera el omengull a kmal klou a ultutelel er a Jehovah?

¹⁵ Ngera uchul me a rolel omengull a kmal klou a ultutelel el mora Jehovah? A ta er ngii a reking er a Israel a mle ngerechelir el olengeseu er a rechedal a Dios el mo mengull er ngii er a rolel el bla loterekeklii. Me a dirrek a klsuul omengull a uchul oberaod el klengit me a diak el melemalt el omeruul el mora rebebil. (Hos. 4:​1, 2) Me a lmuut kung, a reking me a rechad er a Israel a mle telbiil el mora Jehovah. Sei a uchul me a Biblia omekesiu er a osisebellir er a klsuul omengull el mora laokreng. (Jer. 3:​8, 9) A chad el mora laokreng a rullii a klengit lomtok er ngike el kirel loba blakerreng el mo er  ngii e kmal tomellii a rengul a bechil. Ngdi osisiu, a chad el telbiil el mesiungel a Jehovah e mengull a klsuul chelid a mora klengit lomtok er ngii e kmal tomellii a rengul. h—Dut. 4:​23, 24.

16. Ngar osengel a Jehovah e ngngera kmal eklii a melemalt el chad er a chebirukel el chad?

¹⁶ Ngera sebeched el suub? Ngkmal kired el mengeroid er kid er a ngii di el tekoi el chelsechusem er a klsuul omengull. Engdi ngdirrek el kired el mengull er a Jehovah er a melemalt el rolel e blak a rengud el mesiou er ngii. A profet Malakai a bleketakl el smodii a klekakerous er a ungil el chad me a mekngit el chad. Ngkmo: “Kom lmuut el mesa klekakerous er a melemalt ma chebirukel chad, ma klekakerous er a chad el mesiou er [a Dios] ma chad el diak losiou er [ngii].” (Mal. 3:18) Ngkmal soad a Jehovah bo lomes er kid el melemalt el chad. Me kede kerekikl me ngdiak a ngii di el ngerang, mo lmuut er a chelitechetud, el rullid el mo stob el mesiou er a Dios. Ngoberaod el klengit a destob el mesiou er a Jehovah.

17. Ngmekera ngike el chad el dengiltii el mo bechid e ngar ngii a lerellii er a blakerreng er kid el mora Jehovah?

¹⁷ A lsekum ke mesobil e melatk el mo bechiil, e ngsebechem el mesa rolel e a tekingel a Malakai el kirel a mesiou er a Dios a ngngar ngii a lerellii er a chad el molilt el mo bechil? A chad a locha ngar ngii a ungil blekerdelel engdi a lsekum ngdiak losiou er a mera el Dios, e a Jehovah ngomes er ngii el kmo ngmelemalt? (2 Ko. 6:14) A lsekum ke mo bechil ngii el chad, e ngii ngmo ngosukau el melemolem loba blakerreng el mora Jehovah? Molatk er tiang: A rebechil a Salomon el milengull a klsuul chelid a locha mla er ngii a ungil blekerdelir, engdi te dimlak losiou er a Jehovah me a cherengel a taem e te  mileltii a rengul a Salomon el mo mengull a klsuul chelid.—1 Ki. 11:​1, 4.

18. Ngera kirir a ruungalek el losisecheklii er a rengelekir?

¹⁸ Ruungalek, ngsebechiu el dolemii er a rengrir a rengelekiu a blakerreng er a omengull el mora Jehovah lousbech a cheldecheduch er a Biblia el kirir a reking er a Israel. Mngesuterir el mo understand el kmo a Jehovah ulemes er a king el ungil me a lechub e ngmekngit a lsekum e ngmillisiich er a mera el omengull me a lechub e ngdiak. Mosisecheklterir a rengelekem loeak a tekingem me a omerellem el kmo a tekoi er a klereng el ua mesuub er a Biblia, ngar er a miting, e oldingel a kot el meklou a ultutelel el tekoi er a klengar. (Mt. 6:33) E le lak e a rengelekem a locha mo omdasu el kmo, a mo ta er a Sioning er a Jehovah a di mo chedal a klechelid er a telungalek. Me nglocha diak el feel el kmo omengull el mora Jehovah a klou a ultutelel me a lechub e te stob el mesiou er ngii.

19. Ngera el omelatk a ngar ngii el kirel a ngii di el chad el mla stob el mesiou er a Jehovah? (Momes er a baks el “ Ngsebechem el Lmuut el Mei er a Jehovah!”)

¹⁹ A chad el mla stob el mesiou er a Jehovah ngdikea omeltkel? Ngdiak el uaisei, ngkmal dirk sebechel lobult e lmuut el mo mengull er a Jehovah. A loruul er tiang e nglocha kirel moriou rengul e kongei er a ngelsurir a remechuodel er a ongdibel. (Jak. 5:14) A ngii di el tekoi el kirel meruul a kmal worth er ngii a lsekum e tia belkul a kmo nglmuut el nguu a kengei er a Jehovah!

20. A lsekum kede mo oukerebai er tirke el blak a rengrir el king, e ngngera mo osengel a Jehovah er kid?

²⁰ Me ngngera kede mla suub er a reking er a Israel? Ngsebeched el mo uai tirke el blak a rengrir el king a lsekum ngmelemolem el cherrungel a rengud el mora Jehovah. Dengai a klubeled er a cheleuid el deriruul, e dobult, e deruul a omelodech el dousbech. E lak dobes er a klungel a ultutelel a bo dongull er a di ta el mera el Dios er a rolel el bla loterekeklii. A lsekum ke melemolem loba blakerreng el mora Jehovah e ngmo omes er kau el chad el meruul a llemalt er osengel.