1. Ngera sel luchul me ngdmeu a rengud?

 NGKMAL dmeu a rengud el mo medengelii a rolel e a remesiungel a Dios a dmiich el ua llomes! Ngar tia el mlo merek el rak, e a rechedal a Jehovah a milsuub a Biblia el obengterir a rekuk betok er a 10,000,000 el chad. E a rebetok el miliol el semeriar a mlei er a Chedaol Belsoil e mlo mesuub el kirel a sengk el mlara Jehovah el ngii a olubet el tenget el olechotel a bltkil a rengul.​—1 Johanes 4:9.

2, 3. (a) Ngera el tekoi a diak leterebengid me lak ‘dediich el ua llomes’? (b) Ngera kede mo mesaod er tia el suobel?

² Meliuekl er a beluulechad el rokir, e a Resioning er a Jehovah a melekoi a betok el kakerous el omelekoi, engdi tia diak lerelleterir me lemeterob el oldanges er a Jehovah el ua ta el telungalek. (Ocholt 7:9) Me kid a sebeched el “dmiich el ua llomes” er a beluulechad el diak el ior er a omelekinged me a lechub e ngbasio el dekiei er ngii.​—Filipi 2:15.

³ A omesiunged me tia el kltarreng er a delongeled a Rekristiano, me sel klemedengei er kid el kmo ngorechudel el taem er  chelechang, a rokui el mo uchul a odanges el mora Jehovah. Me kede mekera rullid el mo dmiich er a chelsel aika el edei el blekeradel?​—Monguiu er a Mateus 5:14-16.

4, 5. (a) Nguldimukl er a berkel a klumech e kede mekera e mo dmiich er mederir a rechad? (b) Ngera el klungiaol a mo er ngii el lungil omerelled a uchul? (Momes er a siasing er a uchelel a suobel.)

⁴ A berkel a klumech, me sel doruul er a remo disaiplo a kmal klou a ultutelel el rolel a bo dediich. (Mateus 28:19, 20) Ngar er a rak er a 1925, e a suobel el “Light in the Darkness” a millekoi el kmo ngar er a taem er a uriul sils, e ngdiak a chad el sebechel el mo oba blakerreng el mora Rubak a lsekum e ngdimlak el “ousbech er a techellel el mo dmiich er a mederir a rechad.” E dirrek el millekoi el kmo: “Ngkirel el meruul er tiang lokiu sel lomerk er a ungil chais el mora rechad er a beluulechad, e melisiich er ngii er aike el rolel e ngmo dmiich.” (The Watch Tower, June 1, 1925) Me nguldimukl er a berkel a klumech, e a omerelled a dirrek el uchul a odanges el mora Jehovah. Te betok el chad a medengelkid sel domerk er a klumech. Me sel deklikmechur e doutkeu er tir, e ngrulleterir el mo oba ungil uldasu el bedul kid me a Dios el dongull er ngii.

⁵ A Jesus a dilu er a redisaiplo er ngii el kmo: “Sel bo mtuu er a blai e kom dmu el kmo, ‘A budech lekor kemiu.’” (Mateus 10:12) Ngar er aike el basio el lulemerk er a klumech er ngii a Jesus e ngmle siukang er a rechad el outkeu er a rengodech el chad el mora blirir. Engdi ngar er a betok el beluu er chelechang, e ngdikea el siukang er a rechad el meruul el uaisei. A rechad a blechoel el medakt me a lechub ngseselk a rengrir sel lesterir a rengodech el chad el mo duum er a blirir, engdi a lsekum kede olecholt a ungil el blekeradel e meruul a ungil, e nglocha mo chelellakl a rengrir. Me kau, ke mla mtebengii el kmo sel bom klikmechur e mungil el outkeu er a rechad, e ngmo beot er tir el eko melai a babier sel mousioning er a buai el ousbech a cart? Sel moruul el uaisei e te dirrek el locha mo sorir el mengedecheduch er kau!

6. Ngera ngilsuterir a ta el obekel me te melemolem er a omesiungir?

⁶ A ta el mechudela el obekel el ngar er a beluu er a England a dikea el sebechir el meruul a kmal betok el kirel a odngelir el ua uchei e le ngsecherir a uchul. Me te kutmeklii a tebel el ngar ngii a babilenged er medal a blirir. A blirir a kmeed er a skuul me te ngmai aike el babier el omeksemeriar er a ruungalek el tir a mo oltak er a rengelekir. Te ngar ngii a rebebil loungalek el mla ngmai a babier el uldimukl er a Questions Young People Ask​—Answers That Work, Volumes 1 me a 2. A ta el pioneer el odos a blechoel el obengterir tirka el obekel. A ruungalek a miltebengii el kmo ngika el odos a blechoel lungil a omerellel, me tirka el lobekel a kmal sorir el ngosuterir a rebebil. Me ngokiu tiang, e a ta er a oungalek a mla omuchel el mesuub a Biblia.

7. Ke mekera ngosuterir tirke el chiliis er a belurir el ngar er a beluam?

⁷ Te betok el chad a mle kirir el chemiis er a belurir e chelechang e te kiei a bebil el beluu. Me ngera sebechem el meruul el mo ngosuterir tirke el chiliis er a belurir el ngar er a beluam el mo medengelii a Jehovah? Ngsebechem el mesuub el mo outkeu er tir el ousbech a tekingir. Ngdirrek el sebechem el ousbech er  a JW Language app, el mo mesuub a bebil el tekoi el locha rulleterir el mo mengedecheduch er kau. E a uriul e ngsebechem el olecholt a video me aike el babilenged el mla moiuid el mora omelekingir el ngar er a jw.org.​—Duteronomi 10:19.

8, 9. (a) Ngmekera lengesukid sel Miting el Kirel a Klengar me a Omesiunged? (b) Te mekera ruungalek e ngosuterir a rengelekir el mo onger er a miting?

⁸ A Jehovah meskid aike el dousbech el mo ungil omerk er a klumech. El ua tiang, aike el desuub er a Miting el Kirel a Klengar me a Omesiunged a lmuut el ngosukid el mo omes er a resemeriar e omuchel a omesubel a Biblia el obengterir.

⁹ A rechad a blechoel el mo mechas a rengrir er a nger er a rengeleked sel lemei er a miting. Me ngsebechem el osisecheklii a ngelekem el ousbech a di tekingel sel longer er a miting. A rebebil a mlo semeriar er a klemerang er sera lerengeseterir a rengalek el mesaod a klaumerang er tir.​—1 Korinth 14:25.

10. Ngmekera temel a omengull el telungalek e ngosuir a telungalek el mo oba kltarreng?

¹⁰ Sel debo er a tkurrebab el sebeched el mo olisechakl er a telungalek er kid el mo dmak el oureor el ngar er a kltarreng me a budech, e ngmo uchul a odanges el mora Jehovah. El ua tiang, a lsekum koungalek e mketmeklii a taem el mo blechoel el meruul er a omengull el telungalek er kemiu. A bebil el telungalek a dmak el omes er a JW Broadcasting, e a uriul e te mesaod er a rolel e ngsebechir el mo ousbech aike el lesiluub. Lak mobes el kmo a ulekrael lousbech a kekerei el ngalek a kuk ngodech er aike el ulekrael el ousbech a ngeasek. Me moruul aike el sebechem el mo ngosuterir a bek el chedal a telungalek er kau me bo el sebechir el mera el mo  ngmai a klungiolir er a temel a omengull el telungalek.​—Psalm 148:12, 13.

11-13. Ngmekera dengesuir a ongdibel el mo oba kltarreng?

¹¹ Ngmo lmuut me a lsekum ke kekerei el chad me kau a sebechem el ngosuterir a rokui el chad el ngar er a ongdibel el mo melechesuar el kmo te usbechall. E a ta er a rolel a omoruul er tiang a okiu sel momak a klausechelei er kau el obengterir a remeklunga el odam me a odos. Ngsebechem el oker er tir el kmo, ngera ngilsuterir el melemolem el mesiou er a Jehovah el betok el rak. E seikid e ngsebechir el osisecheklau er a meklou a ultutelel el suobel. E tiang a sebechel el mo smisicheterir me kau el dirrek! Kid el rokui a remekekerei me a remeklou a sebeched el rulleterir tirke el mei er a Blil a Ongdibel el mo ungil a rengrir. Me ngsebechem el outkeu er tir loeak sel mdu el kmo alii, e bom klikmechur el mo er tir, e mngesuterir el smiik a kingellir, e mngititerir el mora rebebil me bo lekaodengei. Mrelleterir el mo sorir el teloi er kid.

¹² A lsekum ke mlukngerachel el mo oltobed er a miting el kirel a odingel, e ngsebechem el ngosuterir a remechudela el mo melemolem el dmiich. Besterir a ungilbesul el basio el bo loldingel er ngii, e dirrek el msikii a ta er a kekerei el chad el mo oureor el obengterir. A remechudela el rudam me a rudos me tirke el ngar ngii a secherir a blechoel el mo mechitechut a rengrir el omdasu el kmo ngdikea el sebechir el menglou er a omesiungir el ua ngar er a mong. Engdi te mo mechelaod a rengrir sel lodengei el kmo ke omekerreu er tir, e ungil medengelii a tekoi el chelebangel er ngii. Me ngkmal sebechel a ungil omerellem el smisicheterir el mo melemolem el oba blakerreng el omerk er a klumech el diak el ior er a meklungir, me a lechub e ngklemengetel a taem el lengar er a klemerang.​—Levitikus 19:32.

¹³ A rechad er a Israel a uleldeu a rengrir el dmak el mengull er a Jehovah. A ta er a milluches er a psalm a kmo: “Ng meral ungil, e deurreng sel le dak el kiei a rudam el ta rengrir!” (Monguiu er a Psalm 133:1, 2.) Ngulemekesiu er tia el rolel a kltarreng el mora mekreos el cheluch el ngii a ungil er a bedenged e ungil a bul. Me ngdi osisiu, ngsebeched el smisicheterir a rudam me a rudos lokiu a ungil omerelled el mo er tir. E tiang a mengal rullii a ongdibel el mo oba kltarreng. Me kau, ngsebechem el lmuut el mo ungil medengelterir a rudam er kau er a ongdibel?​—2 Korinth 6:11-13.

14. Ngmekera sebechem el dmiich el ua llomes er a basio el mkiei er ngii?

¹⁴ Ngsebechem el mo dmiich el ua llomes er a ngii di el ker. A ungil omerellem a sebechel rulleterir a retonari er kau el mo sorir el mo medengei a lmuut el betok el kirel a Jehovah. Me di lekau el merriter el kmo: ‘Ngua ngera uldesuir a retonari er ngak el kirek? A blik, ngungil kltmokl? Ngrullii a basio el kiei er ngii el mo ungil er osengir a rechad? Ngak a kulengeseu er a retonari er ngak?’ Ngdirrek el sebechem el oker er a rebebil el Sioning er a rolel e a ungil el omerellir me a kerebai er tir a mla er ngii a lerellii el mora rechederir, me a retonari er tir, me tirke ledak loureor, me a lechub tirke el ledak el ngar er a osisiu el skuul.​—Efesus 5:9.

15. Ngera me ngkired el melemolem el di klekar?

¹⁵ A lsekum ngsoad el melemolem el dmiich el ua llomes, e ngkired el mo kerekikl er a taem el  dekiei er ngii. Bebil er a taem, e a Jesus a dilu er a redisaiplo er ngii el kmo molemolem el di ‘klekar.’ (Mateus 24:42; 25:13; 26:41) Me a lsekum kede omdasu el kmo a “kloul ringel” a dirk cheroid, e ngmo diak dolatk el kmo ngorechudel el taem el bo dengesuterir a rebebil el mo medengelii a Jehovah. (Mateus 24:21, BT) E sel bo domdasu el uaisei e ngsebechel a llemesed el mo mechitechut e dirrek el sebechel el mo dibus.

16, 17. Ngera sebechem el meruul me lak mobes el kmo ngkmal orechudel el taem er chelechang?

¹⁶ Ngkmal kired el melemolem el di klekar er chelecha el taem. A blekeradel er tia el beluulechad a di merael el mo mekngit, engdi kede medengei el kmo a ulebongel a mei er sel taem el Jehovah a mla oterekeklii. (Mateus 24:42-44) Me chelecha el dirk ngar ngii a taem e ngkired el mo oba kllourreng e omes el bedul a ngar medad el taem. Monguiu er a Biblia er a bek el sils e lak meterob el meluluuch el mora Jehovah. (1 Petrus 4:7) Mngai a klubelem er a rudam me a rudos el mla mesiou er a Jehovah el betok el rak. El ua tiang, ngsebechem el menguiu a chisel a klengar er a rechad, el ua suobel el “Seventy Years of Holding On to the Skirt of a Jew,” el ngar er a The Watchtower er a April 15, 2012, er a 18-21 el llel.

¹⁷ Me molemolem el mechesang el meruul er a omesiungem el mora Jehovah, e moruul a  ungil el mora rebebil, e mongoit a taem el obengterir a rudam me a rudos er kau. Seikid e ngmo dmeu a rengum e dirrek el mo melechesuar el kmo a taem a kmal mereched. (Efesus 5:16) A Resioning er a Jehovah a mla remuul a kmal betok el tekoi er aika el mla mo merek el dart el rak. E chelecha el taem e kede lmuut el kmal mechesang. A urerel a Jehovah a mla mukeroul el diak el ua sel dullatk er ngii. Me a llemesed a mera el mla dmiich el ua llomes!

18, 19. Te mekera remechuodel e ngosukid el mo oba blakerreng el mesiou er a Jehovah? Mosaod.

¹⁸ Me alta kede remuul a betok el cheleuid, engdi Jehovah kongei er kid el mesiou er ngii. Me ngosukid lokiu sel lebeskid a “sengk” el tir a remechuodel er a ongdibel. (Monguiu er a Efesus 4:8, 11, 12.) Me a remechuodel sel bo loldingel er kau, e mousbech er ngii el techall el mo ngmai a klubelem er a llomeserreng me a ulekrael er tir.

¹⁹ El ua tiang, a ta el obekel el ngar er a beluu er a England a mla er ngii a mondai er a chebechiielir me te ulengit a ngeso er a reteru el mechuodel. Ngika el bechiil el redil a mlo melechesuar el kmo a bechil a dimlak lolisiich er a rolel a omesiungir el mora Jehovah. E ngika el bechiil sechal a kuk mlo melechesuar el kmo ngdiak lungil lolisechakl e kilengei el kmo ngdimlak longetmokl er a rolel a omengull el telungalek er tir. Me tirka el mechuodel a ngilsuterir el mo omdasu er a kerebil a Jesus. Te millisiich er ngika el bechiil el sechal el mo oukerebai er a rolel a Jesus a lomekerreu er a redisaiplo er ngii. E kuk millisiich er ngike el bechiil el redil el mo oba kllourreng el bedul a bechil. Te dirrek el ulecholt a bebil el uldasu er a rolel e ngsebechir el meruul er a omengull el telungalek er tir el obengterir a reteru el ngelekir. (Efesus 5:21-29) Me ngika el bechiil el sechal a mle blak a rengul el oureor el mo ungil bdelul a telungalek. Me tirka el mechuodel a millisiich er ngii el mo blak a rengul e mo melemolem el ultuil er a chedaol reng er a Jehovah. Me a bltkil a rengrir me a ungil omerellir tirka el mechuodel el mlocholt a uchul me tia el telungalek a mlongeseu!

20. Ngmo uchul a ngera el klungiaol a lsekum ke mo dmiich el ua llomes?

²⁰ “Te ngeltengat a re meluu er a RUBAK, el tirkel merael er a rolel.” (Psalm 128:1) Me sel bom diich el ua llomes e ngmo dmeu a rengum. Me a leuaisei, molemolem el olisechakl er a rebebil el kirel a Dios, e bo er a tkurrebab el sebechem el mo ngosuir a telungalek er kau me a ongdibel el mo oba kltarreng, e mo melemolem el di klekar. Seikid e a rebebil a mo mesa ungil el kerebai er kau me te mo sorir el oldanges er a Demad el Jehovah.​—Mateus 5:16.