1. Ngera ta er a tekoi el kmal ileakl el rullid el mo ngarbab er a charm?

 A JEHOVAH milsterir a rechad a ta er a tekoi el kmal ileakl el ngii a ukltkir. E tiang a rullid el lmuut el mo ngarbab er a charm. Me kede mekera medengei el kmo Adam me a Eva a mla er ngii a ukltkir? A uriul er a bo lak lolengesenges er a Dios, e te mlo merterir e le ngmlo mengesang er a ukltkir.

2. Ngmekera ukltked e ua compass? (Momes er a siasing er a uchelel a suobel.)

² A ukltked a sel uldesued el rullid el mo sebeched el kutukel a melemalt me a cheleuid el tekoi el sebechel el omekrael er a klengar er kid. Me a chad el ukltkel a dirkak lemuksau a di ua diall el telemall a compass er ngii. A eolt me a berius a sebechel mekrolii a diall el mo ngodech a omerolel, engdi compass lungil loureor a ngosuir a captain me ngsebechel el mekelii a diall el merael er sel kirel el merael er ngii. Me ngdi osisiu, a lsekum kede meksongii a ukltked el ngar er a melemalt el rolel e ngsebechel mo ungil mekrolid.

3. Ngera sebechel duubech a lsekum ngdiak doksongii a ukltked el ngar er a melemalt el rolel?

³ A lsekum a ukltked a diak lemuksau el ngar er a melemalt el  rolel, e ngmo diak el sebechel el omeklatk er kid er a uchei er a bo derellii a cheleuid. (1 Timothy 4:1, 2) Nglocha dirrek el rullid el mo omes a “mekngit el kmo ng ungil.” (Isaia 5:20) A Jesus a dilu er a rultirakl er ngii el kmo: “A sikang a mei el tirikel omekoad er kemiu a mo omdasu el kmo, ngomesiungir ra Dios.” (Johanes 16:2, BT) E tiakid a mle uldesuir tirke el milekodir a Stefanus. (Rellir 6:8, 12; 7:54-60) Me ngar er a reksi, e a rebetok el chedal a klechelid a mla remuul a meklou el telemall el ua lomekoad er a rechad, e melekoi el kmo te mirruul er ngii el kirel a Dios. Engdi mera er ngii a tekoi el lurruul a omtok a llechul a Dios. (Exodus 20:13) Me ngbleketakl el kmo a ukltkir a dimlak lomekrael er tir el ngar er a melemalt el rolel!

4. Ngmekera mo ulterekokl a rengud el kmo a ukltked a ungil loureor?

⁴ Me ngmekera mo ulterekokl a rengud el kmo a ukltked a ungil loureor? A llach me a omellach el ngar er a Biblia a dousbech el “olisechakl a klemerang, e mellach, e mesmechokl, e olecholt a meral rolel a ungil klengar.” (2 Timothy 3:16) Me ngkmal kired el mesuub er a Biblia er a bek el sils, e mo dmolech el melebedebek aike el losaod, e mo oltaut er a klengar er kid. E ngokiu tiakid el rolel e kede mesuub el lmuut el mo omdasu el ua Jehovah. E seikid e ngsebechel el mo ulterekokl a rengud el kmo a ukltked a dirrek el mo ungil lomekrael er kid. Me chelechang e bo dosaod a rolel e ngsebeched el ousbech a llechul a Jehovah me a omellach er ngii el meksongii a ukltked.

5, 6. Ngmekera llechul a Dios e ngosukid?

⁵ A lsekum ngsoad a llechul a Dios a lengesukid e ngkmal kired el meruul a lmuut el betok er a di donguiu me a lechub e di dodengei. Ngkired el mo betik a rengud er a llechul, e mo oba omengull el kirel. A Biblia a melekoi er kid el kmo: “Mouketui a mekngit, e le betik a rengmiu er a ungil.” (Amos 5:15) Engdi ngmekera doruul el uaisei? Ngkired el mesuub el mo omes a tekoi el ua osengel a Jehovah. Ka molatk er tiaikid el rolel, ngkora diak lungil a cheliuem me a toktang a dmu er kau el kmo ke mo menga ungil er a bedenged el kall, e mo exercise, e meruul a bebil el omelodech er a klengar er kau. Me kultirakl a tekingel e mlo mesa klungiolel! Me ngua ngera uldesuem el kirel a tekingel ngika el toktang?

⁶ Me ngdi osisiu, ngike el Ulemeob er kid a mla meskid a llach el mo omekerreu er kid er a telemellel a klengit, e rullii a klengar er kid el mo ungil. El ua tiang, a Biblia osisecheklid el kmo ngdiak el kired el omulak, e mengeblad, e merechorech, e meruul a deleboes me a tekoi er a uldikel me a koadelchad, me a lechub e ngtekoi er a olai. (Monguiu er a Osisechakl 6:16-19; Ocholt 21:8) Me sel bo desa klungiolel a dolengesenges er a Jehovah, e a bltkil a rengud el mo er ngii me a llechul a mukeroul.

7. Ngmekera cheldecheduch er a Biblia e ngosukid?

⁷ A klemedengei er kid er a ungil me a mekngit a diak lebelkul a kmo, ngkired el mo tomall a lechul a Dios e mochu medengei. Me ngsebeched el ngmai a klubeled er a cheleuid el omerellir a rebebil el ngar er a Biblia. A Osisechakl 1:5 a melekoi el kmo: “A . . . osisechakl a dirrek el sebechel dochel a klemedengei er a re mellomes a rengrir el chad.” E tia el kmal ungil el ulekrael a ngar er a Dios el mei er kid! El ua tiang, ka molatk a ringel el blo lechebangel a David er a uriul er a bo lak lolengesenges er a Jehovah, e lebo er a deleboes el obengkel a Bathseba. (2 Samuel 12:7-14) Sel  monguiu er tia el cheldecheduch, e di lekau el merriter el kmo: ‘Ngera mle sebechel a David el remuul el mo oibngii er aika el mondai? Ak mo mekerang sel bok chelebangel er a osisiu el blekeradel? A lsekum e ak mekesuseu el mora deleboes, e ak mo ua David me a lechub ak mo ua Josef?’ (Genesis 39:11-15) A lsekum kede mo ungil melebedebek el kirel a mo telemellel a debo er a klengit, e kede mengal mo ‘ouketui a mekngit.’

8, 9. (a) Ngera ngosukid el mo meruul er ngii a ukltked? (b) Ngmekera ukltked me a omellach er a Jehovah e dmak loureor?

⁸ Kede mengeroid er kid er aike el tekoi louketui a Dios. Engdi ngkired el mekerang a lsekum kede chelebangel er a blekeradel el diak a ulterekokl el llach er a Biblia el kirel? Kede mekera medengei aike el soal a Dios a doruul? A lsekum kede mechere Biblia me ngmeksongii a ukltked e kede mo ungil melilt a tekoi.

⁹ A Jehovah el betik a rengul er kid a uchul me ngmla meskid a omellach el sebechel lomekrael er a ukltked. Ngmesaod el kmo: “Ngak a RUBAK el Dios el olsisechakl er kemiu el mo ungilbesmiu, ak ngikel omekrael er kemiu er sel rael el kiriu el okiu ngii.” (Isaia 48:17, 18) Me sel bo dedmolech el melebedebek a omellach er a Biblia, e debechei me lolisiich er a rengud, e ngmo sebeched el sumechokl e meklemalt a ukltked. E tiakid a ngosukid el mo ungil melilt a tekoi.

10. Ngera omellach, e milekera Jesus e ousbech a omellach el olisechakl?

¹⁰ A omellach a omekrael a uldesued, e ngosukid el mo ungil melilt a tekoi. E sel bo dodengei a omellach er a Jehovah e ngosukid el mo medengei a soal, me sel luchul me ngomeskid a llechul. A Jesus a uluusbech a omellach el olisechakl er a redisaiplo er ngii el kmo a blekerdelel a chad me a omerellel a ngar er ngii a lerellii er a klengar er ngii. El ua tiang, ngullisechakl el kmo a ngasecherreng a sebechel el mo uchul a uldikel me a koadelchad, e a uldasu el kirel a deleboes a sebechel el mo uchul e kede mora laokreng. (Mateus 5:21, 22, 27, 28) Me sel debechei a omellach er a Jehovah me lomekrael er kid, e a ukltked a muksau, me kid a mo ungil melilt a tekoi el mo uchul a klebkall el mora Dios.​—1 Korinth 10:31.

11. Ngmekera sebechel el mo kakerous a ukltkir a rechad?

¹¹ Alta e a Rekristiano a meksau a ukltkir el ousbech er a Biblia, engdi ngsebechel mo kakerous a uldesuir el kirel a bebil el tekoi el ua omelim el rrom. A Biblia diak ledu el kmo ngmekngit a omelim el rrom engdi ngbai omeklatk er kid el kmo, ngdiak el kired el mo imis el melim a rrom me a lechub e kede mechetelaol. (Osisechakl 20:1; 1 Timothy 3:8) Engdi tia ngbelkul a kmo, a Kristiano a sebechel el mo imis el melim a rrom e diak lomdasu el kirel a ngii di el tekoi sel loruul a omelilt er ngii? Ngdiak. Ngmo lmuut me a lsekum a ukltkel a mecherei me ngmelim me ngii a dirk kirel melatk el kirel a ukltkir a rebebil.

12. Ngmekera Rom 14:21, BT e ngosukid el mo olecholt a omengull el bedul a ukltkir a rebebil?

¹² A Paulus a ulechotii el kmo ngkired el olecholt a omengull el bedul a ukltkir a rebebil er a ledu el kmo: “Ngungil tekoi a lak monga techel a charm, ma lak molim a bilong, ma lak moruul a ikel bebil ra melibas er chodam er kau.” (Rom 14:21, BT) Me alta ngar ngii a llemelted el melim a rrom engdi kede kongei el mo mecherei tia el llemelted a lsekum kede medengei el kmo ngmo melibas er a ukltkel a ta er a Kristiano. El ua tiang, a odam a mle smecher er a omelim el rrom er a uchei er a bo lodengelii a klemerang, e tilbir el diak el lluut el mo melim a rrom. Me kid a diak el soad el mo meruul a ngii di el tekoi el mo uchul me ngika el odam a lmuut el mo meruul aike el lurruul er a ngar er a mong. (1 Korinth 6:9, 10) Me a lsekum ngii el odam a doltuchakl er ngii el mei er a blid, e kede mo melasem el meruul er ngii el mo melim alta ngdiak el kengei el mo melim? Ngkmal diak!

13. Ngmilekera Timothy e olecholt a omengull el kirel a ukltkir a rebebil me bo el sebechel el ngosuterir el mo kongei er a ungil chais?

¹³ A Timothy er a lekekerei el chad e ngkilengei el mo obotk alta ngkmal mle meringel. Ngmle medengei el kmo a botk a mle klou a ultutelel el mora rechad er a Judea el bo lomerk er a klumech el mo er tir. A Timothy a di mle ua Paulus el dimlak el soal el melibas er a ngii di el chad. (Rellir 16:3; 1 Korinth 9:19-23) Me kau, ke kongei el mo meruul a omelodech er a klengar er kau el mo ngosuterir a rebebil?

14, 15. (a) Kede mekera mo ultebechel a rengud? (b) Ngua ngera omerellir a rultebechel a rengrir el Kristiano el mora rebebil?

¹⁴ Ngsoad el rokui el ‘ngosechekl el mor a osisechakl el kirir a re ultebechel el chad, e lak di de ngar a uchelel osisechakl el kirel a Kristus.’ (Hebru 6:1) Ngdiak lebelkul a kmo ngmla mo betok el rak el dengar er a klemerang me ngmla mo ultebechel a rengud el Kristiano. E tiang a ousbech er a klou el blakerreng. Ngkired el melemolem el omekeroul er a klemedengei me a sekutaberreng a uchul me ngkired el menguiu er a Biblia er a bek el sils. (Psalm 1:1-3) Me sel doruul el uaisei e kede mo ungil medengei a llechul a Jehovah me a omellach er ngii.

¹⁵ Ngera kot el klou a ultutelel el llach el kirir a Rekristiano? Ngllach er a bltikerreng. A Jesus a dilu er a redisaiplo er ngii el kmo: “Cho bo mkaubltikerreng, e a rokui el chad a mo medengei el kmo kom obengkek.” (Johanes 13:35) A bltikerreng a lomekedong er ngii el “kebkall el llach” e dirrek el “cherrengellel a llach.” (Jakobus 2:8, BT; Rom 13:10, BT) Me ngdiak lemechas a rengud er a klungel a ultutelel a bltikerreng e le Biblia a melekoi el kmo a “Dios a bltikerreng.” (1 Johanes 4:8) Me ngar er a osengel a Dios e a bltikerreng a diak di luldasu e lemerekong. Ngolecholt er a bltkil a rengul el okiu a omerellel. A Johanes a milluches el kmo: “A Dios a ulechotii a bltkil a rengul er a loderchii a di tal Ngelekel el mer a beluulchad, me bo dokiu ngii el mo nguu a klengar.” (1 Johanes 4:9) Me sel dochotii a bltkil a rengud el mora Jehovah, me a Jesus, me a rudam er kid me a rebebil e kede ochotii el kmo kede mla mukeroul el mo ultebechel a rengud el Kristiano.​—Mateus 22:37-39.

16. Ngera me kede mengal mo mengreos a omellach er a Jehovah sel demukeroul el mo ultebechel a rengud el Kristiano?

 ¹⁶ Me sel demukeroul el mo ultebechel a rengud el Kristiano, e kede mengal mo mengreos a omellach er a Jehovah. A llach a blechoel el motaut el mora mla moterekokl el blekeradel engdi omellach a motaut el mora betok el kakerous el blekeradel. El ua tiang, a kekerei el ngalek a diak lodengelii a telemellel a bo lomak a klausechelei el obengterir a remekngit el chad, me a demal me a delal a kirir el remuul a llecherir el mo omekerreu er ngii. (1 Korinth 15:33) Engdi sel lemukeroul a ngalek el mo ultebechel a rengul e ngmesuub el mo omtab a omellach er a Biblia. E aika el omellach a mo ngosuir el mo ungil melilt er a rungil sechelil. (Monguiu er a 1 Korinth 13:11; 14:20.) Me sel deblechoel el omtab a omellach er a Biblia e kede mo ungil ousbech er a ukltked, e mo ungil medengelii a soal a Dios a doruul er a chelsel a ngii di el blekeradel.

17. Ngera me ngsebeched el melekoi el kmo ngar ngii aike el rokui el dousbech el mo ungil melilt a tekoi?

¹⁷ Ngar ngii aike el rokui el dousbech el mo meruul a omelilt er kid el mo odeuir a rengul a Jehovah. Ngar er a Biblia e kede metik a llach me a omellach el ngosukid el mo “ungil kldmokl e ulsemuul el kirel a bek el ungil ureor.” (2 Timothy 3:16, 17) A omellach er a Biblia a ngosukid el mo medengei a soal a Jehovah engdi tia ousbech er a klou el blakerreng. (Efesus 5:17) Ngar ngii a ngeso el sebeched el ngmai el okiu a Watch Tower Publications Index, me a Research Guide for Jehovah’s Witnesses, me a Watchtower Library, me a Watchtower ONLINE LIBRARY, me a dirrek el JW Library app. Me sel dousbech aika el klekedall e kede ngmai a klungioled sel di lekid el tang el mesuub me sel dosuub el telungalek.

18. Ngera mo duubech a lsekum kede oltaut a llechul a Jehovah me a omellach er ngii er a klengar er kid?

¹⁸ Ngmera el mo ungil a klengar er kid a lsekum kede oltaut a llechul a Jehovah me a omellach er ngii! A Psalm 119:97-100 a melekoi el kmo: “Ng meral betik a renguk er a llechum! Ak melebedebek er ngii er a tutau el mo klebesei. A llechum a di kubang er a bek el taem, me ng rullak el kuk mo mellomes a renguk er a rokui el cherrouek. Ak mtab a kuk betok er a rokui el sensei er ngak, ele uchul e ak melebedebek osisecheklem. Ng kuk ngarbab a llemesel a renguk er a llemesir a re mechuodel chad, ele uchul e ak ulengesenges a llechum.” Me sel bo dongoit a temed el mo dmolech el melebedebek a llechul a Dios me a omellach er ngii, e kede mo blechoel el olecholt er a llomeserreng me a klemedengei. E sel dousbech a llechul me a omellach er ngii el mo omeksau er a ukltked e kede mo “cherrungel el ua teletelel a Kristus.”​—Efesus 4:13.