1. Ngmekera doukerebai er a betik a rengul el Demad el Jehovah?

A JEHOVAH a kmal betik a rengul er kid. (Jn. 3:16) Me ngsoad loukerebai er ngika el betik a rengul el Demad. Me kede melasem el olecholt er a ‘klechubechub, e mo kaubltikerreng e mo bekokuii’ er a delongeled el ileakl el bedul “tirkel bebil er kid el oumerang.” (1 Pe. 3:8; Gal. 6:10) Me a lsekum a rudam me a rudos er kid er a klereng a mo chuarm a meringel blekeradel, e ngsoad lolengeseu er tir.

2. Ngera kede mo mesaod er tia el suobel?

² Tirke el rokui el sorir el mo chedal a telungalek er a Jehovah a mo chelebangel a meringel blekeradel. (Mk. 10:29, 30) Nglocha mo kired loutekangel a lmuut el betok el ringel sel lorael a ulebongel er tia el beluulechad el lolekeed. Me ngmekera e mo sebeched el kaingeseu? Me bo dosaod a tekoi el sebeched el suub er a cheldecheduch er a Biblia el kirel a Lot me a Job me a dirrek el Naomi. Kede dirrek el mo mesaod a bebil lomelsemai el rudam me a rudos er kid a chuarm er chelechang, e mo mesa rolel e ngsebeched lolengeseu er tir loutekangel ngii el mondai er tir.

3. Ngera el mekngit lomelilt a lerirellii a Lot el ua losaod er ngii a 2 Petrus 2:7, 8, me ngera mlo rsel?

³ A Lot a mlo mekngit a omelilt el lerirellii er sera lengiltii el mo kiei el teloi er tirke el kmal mekngit a omerellir el chad er a Sodom. (Monguiu er a 2 Petrus 2:7, 8.) Tiang a mle ungilbesul el beluu, engdi a Lot a kmal mlo chuarm er sera lolukl el mo kiei er ngii. (Gen. 13:8-13; 14:12) A bechil a locha kmal mlo soal kiei er tia el mats, me a lechub e ngmlo betik a rengul er a rebebil el kiliei er ngii el mlo uchul me ngmlo diak lolengesenges er a Jehovah.  Me ngmlad er sel taem el Dios a ultengelii a chull el ngau me a sulfur er ngii el beluu. E ka di molatk er a reteru el ngelekel a Lot el redil. Tirkang a mle kltmokl el mo becherir a resechal el tir a mlad er a beluu er a Sodom. Me a Lot a urriid a blil me a kloklel, e sel kot el mle meringel er ngii el rokui, a ngii el urridii a bechil. (Gen. 19:12-14, 17, 26) Me a Jehovah, ngmlo diak loba kllourreng el bedul a Lot er a chelsel tia el meringel el taem er a klengar er ngii? Ngdiak leuaisei.

4. Ngmilekera Jehovah e ochotii a kllourreng el bedul a Lot? (Momes er a siasing er a medal tia el babier.)

⁴ Alta e a Lot a ngileltii el mo kiei er a Sodom, engdi a Jehovah a ulechotii a klechubechub er a lodercheterir a rechanghel el mo olsobel er ngii me a telungalek er ngii. Me nguaisei, engdi a Lot a dimlak lemereched el mo olengesenges er a rechanghel e bai “mirrus er a rengul.” Me a rechanghel a di mlo mesuch a chimorir el olengeseu er ngii me a telungalek er ngii el chemiis er tia el mats. (Gen. 19:15, 16) Tirka el anghel a dilu er ngii me lechiis el mora bukl el beluu. Engdi Lot a dimlak lolengesenges er a Jehovah e bai ullengit me lebo er sel kekerei el beluu. (Gen. 19:17-20) A Jehovah a rirengesii ongtil a Lot e kilengei er ngii me ngmlo er tia el beluu. A uriul e a Lot a kmal mlo medakt el kiei er ngii el beluu me ngmillukl el mora bukl el beluu, el ngii sel basio el Jehovah a dilu er ngii me ngmo er ngii er a kot luchul. (Gen. 19:30) Tiang a kmal klou lolechotel a kllourreng er a Jehovah! Me ngmekera e mo sebeched loukerebai er ngii?

5-6. Ngoeak a ngera el rolel e kede oukerebai er a Dios el otutii a 1 Thesalonika 5:14?

⁵ Alta e a ta er a chedal a telungalek er kid er a klereng, a mo mekngit a omelilt el loruul er ngii, e dirrek el ngii el omelilt a mo uchul a meringel el mondai er ngii. Me ngmo uangera uldesued sel bo leuaisei? Kede locha mo dmu er ngii el kmo ngmeridm aike el lullalem, e tiang a mera el tekoi. (Gal. 6:7) Engdi ngbai sebeched el rullii a lmuut lungil tekoi. Ngsebeched loukerebai a omerellel a Jehovah er sera lolengeseu er a Lot. Lokiu a ngera el rolel?

⁶ A Jehovah a dimlak di loldurech er a rechanghel el mo omeklatk er a Lot, e te dirrek el mlo olengeseu er ngii el chemiis er a tellemall el mo er ngii er a beluu er a Sodom. Me ngdi osisiu, nglocha mo kired el omeklatk er a odam er kid a lsekum kede omes er ngii el merael bedul a telemall. Engdi ngdirrek el kired el olengeseu er ngii. Ngmo lmuut me a lsekum ngmeoud loltaut a ulekrael el mengai a uchetemel er a Biblia, me kid a di kired el mo oba kllourreng el bedul ngii. Ngkired el mo ua tirke el teru el anghel. Ngkired losiik a rolel e kede olengeseu er ngii, e bai diak el kired el mengeroid er kid er ngii. (1 Jn. 3:18) Nglocha mo kired el ua dongetakl er a chimal e dongedecheduch er ngii e ngosuir me bo lsebechel loltaut aike el ungil ulekrael el lengai.​—Monguiu er a 1 Thesalonika 5:14.

7. Ngoeak a ngera el rolel e ngsebeched loukerebai er sel osengel a Jehovah el bedul a Lot?

⁷ A Jehovah a mle sebechel di omes a chelitechetul a Lot. Engdi uriul e ngulemekrael er a apostol el Petrus el mo mesaod er a Lot el kmo ngmelemalt el chad. Me ngkmal dmeu a rengud e le Jehovah a ousubes a kngtid! (Psa. 130:3) Me kid, ngsebeched loukerebai er sel osengel a Jehovah el bedul a Lot? A lsekum kede mo blechoel melatk a klungiolir a rudam me a rudos er kid, e kede mo oba kllourreng el bedultir. E tiang a rulleterir el mo beot er tir el kongei a ngeso el domesterir.

8. A klechubechub, ngrullid el mo mekerang?

⁸ A Job a kuk dimlak leua Lot el mlo chuarm el mekngit el omelilt el lurruul a uchul. Me nguaisei, engdi ngmlo chuarm er a betok el ringel. Ngurriid a betok el kloklel, e miltemall a chisel er a beluu, e dirrek el mlo smecher. E sel kot el mle meringel el tekoi, a ngii me a bechil a urrideterir a rokui el ngelekir er a kodall. E dirrek, tirke el  tedei el leko te sechelil a Job a ultelecheklii er a mekngit el tekoi. Ngera sel chimo el uchul me tirke el tedei el leko te sechelil a Job a dimlak lolecholt er a klechubechub el bedul ngii? Ngdimlak lekerekikl el omtab el kmo ngkmal uangera el blekeradel a lecharm er ngii a Job. Tiaikid a mlo uchul me ngmlo cheleuid a uldesuir e mlo meringel loukerrekeriil er a Job. Me ngmekera e diak bo derellii a osisiu el cheleuid? Sel lak dobes el kmo ngdi ta el Jehovah a medengei a rokui el tekoi el lechelebangel a chad. Me bo dekerekikl lorrenges a tekoi el lolekoi a chad el chuarm a rengul. Lak di dorrenges a tekoi el lolekoi, e bai bo dekerekikl lomtab me bo dungil medengelii a ringelel. Sel doruul uaisei, e ngmo sebeched lolecholt er a klechubechub el mora odam me a lechub odos er kid.

9. A klechubechub, ngrullid me ngdiak dokerang? E ngera uchul?

⁹ A klechubechub a rullid me ngdiak doutulechoid el kirel a mondai el rebebil a chelebangel. A tulechoid a diak lolisiich er a ongdibel, e ngbai mridii a ongdibel. (Osi. 20:19; Rom 14:19) A chad el tulechoid, a mekngit a blekerdelel e diak lomdasu a tekoi, e a tekingel a sebechel lmuut el tomellii a rengul a chad el chuarm. (Osi. 12:18; Efe. 4:31, 32) Me ngbai kmal ungil tekoi a lsekum kede omes a klungiolel a chad, e dolatk el kmo ngmekera e mo sebeched el ngosuir loutekangel a mondai er ngii!

10. Ngera ngosisecheklid er ngii a bades er a Job 6:2, 3, NW?

¹⁰ Monguiu er a Job 6:2, 3, NW. * A lebebil er a taem e a Job a mlo “terrekakl” a cheldechedechal. E a uriul e nguluuchel er a rengul er a tekoi el ledilung. (Job 42:6) Me a chad el chuarm er a meringel mondai er ngii er chelechang, a di ua Job el mo meterekakl a longedecheduch, me  ngdmu tekoi el bo louuchel a rengul er ngii er a uriul. Me ngmekera donger er ngii? Ngbai ungil a bo dolecholt er a klechubechub er a bai bo lemekngit a tekinged. Lak dobes, ngdimlak lemoktek er a Jehovah el soal a bo dechuarm er a mondai me a ringelel a uldasu el kid a chelebangel er chelechang. Me kede ungil medengei el kmo a blak a rengul mesiungel a Jehovah a sebechel mo mekngit a tekingel er sel taem el lechuarm a uldesuel. Ngmo lmuut me a lsekum ngmo dmu cheleuid el tekoi el kirel a Jehovah me a lechub e ngkired, me ngdiak el kirel di mereched el mo kesib a rengud er ngii me a lechub e kede oukerrekeriil er ngii el kirel a tekoi el ledilung.​—Osi. 19:11.

11. Te mekera remechuodel e mo sebechir loukerebai er a Elihu sel lomeklatk er a chad?

¹¹ A lebebil er a taem e a chad el chuarm er a meringel mondai a mo kirel nguu a uleklatk me a lechub e ngomellach el mo ngosuir. (Gal. 6:1) Me a remechuodel, te mekera loruul er tiang? Ngkirir loukerebai er a Elihu, el uleba klechubechub e mle kerekikl lorrenges er a Job. (Job 33:6, 7) A Elihu a mlo sebechel lomeklatk er a Job er a uriul er a bo lodengelii a uldesuel a Job. Me a remechuodel el oltirakl er a kerebil a Elihu, a kerekikl el lorrenges e dirrek el melasem el mo medengelii a blekeradel el lechelebangel er ngii a chad. Seikid e ngmo sebechir lomeklatk, e dirrek el mo sebechir el rutechii a rengul a chad lorrenges er tir.

12. Ngmlo uangerang a uldesuel a Naomi er sel taem er a lemad a bechil me a reteru el ngelekel sechal?

¹² A Naomi a mle blak a rengul el redil el mle betik a rengul er a Jehovah. Engdi uriul er a lemad a bechil me a reteru el ngelekel sechal, e ngmlo soal melodech er a ngklel el mo diak el Naomi e ngbai mo “Mara” el belkul a kmo “Ngikel telirm a rengul.” (Rut 1:3, 5, 20, 21) A Ruth el bechil a ta er a ngelekel a di millemolem lobengkel er a chelsel a ringelel. A Ruth a dimlak di lullengeseu er ngii er aike el luluusbech e ngdirrek el mle ungil mengedecheduch er a Naomi. Ngii el Ruth a ulechotii a bltkil a rengul me a ulekerreuil el mora Naomi, lokiu a beot e ungil cheldecheduch.​—Rut 1:16, 17.

13. Ngera uchul me a chad el mad a bechil a kmal ousbech a ngeso?

¹³ A lsekum a ta er a chedal a telungalek er kid er a klereng a mad a bechil, e ngkmal ousbech a ngeso. A rubekel a sebeched lomekesiu er tir el mora teblo el mla mukeroul el kerrekar el kmal kaiuekeed. Cherengel a rak, e a risel ngii el kerrekar a mla mo kadibuk. Me sel lobadel a risel a ta er ngii e lemad, e tiang a kmal klou a letemellii er sel ta er a kerrekar. Me ngdi osisiu, sel lemad a bechil a tang, e ngike el tang a kmal mo mekngit a rengul el kemanget el taem. A Paula * el bechil a kmal di mle kiul mad a kmo: “Ngkmal di mle mereched el mengodech a blekerdelel a klengar er ngak, e ngak a mlo omdasu el kmo ngkmal diak a ngera el sebechek el rullii. Ak mla oridii a kmal kmeed el sechelik. Ak di ouchais a rokui el tekoi el mora bechik. E ngii a obengkek er a bek el deuil a renguk e dirrek el melisiich er ngak er a chelsel a meringel taem er a klengar er ngak. Ngii ngike el orrenges a mondai er ngak. Ngkmal di ua bla bo ledibus a bita er ngak.”

14-15. Ngmekera mo sebeched el mengelaod er a chad el mla mad a bechil?

¹⁴ Ngmekera dongelaod er a chad el mla mad a bechil? A kot el tekoi el sebeched el rullii a mo mengedecheduch er ngii, alta e ngdiak dodengei el kmo kede mo kmo ngera er ngii. A Paula el dulsaod er ngii er a uchei a kmo: “Ak medengei el kmo a kodall a rulleterir a rechad el mo meringel er tir el mengedecheduch. Te bekikl e le te omdasu el kmo te mo dmu tekoi el diak lungil er a oderengesed. Engdi ngbai lmuut el meringel sel sekum ngdiak a chad el mengedecheduch er kid.” A chad el ngar a klengiterreng a diak longerechir  er kid el mo dmung a mellomes el tekoi. A Paula a kmo: “Ak kmal mereng a sulir a resechelik sel lolekoi el kmo, ‘Ngkmal mekngit a renguk er kau el kirel tia el ringel el mchelebangel er ngii.’”

¹⁵ A William el mlad a bechil er a sesei el rak er a uchei a kmo: “Ngkmal mo ungil a renguk sel sekum a rechad a mesaod a ungil tekoi el lodengei el kirel a bechik; ngoterekeklii a renguk el kmo a rechad a uleba omengull el bedul ngii e dirrek el mle betik a rengrir er ngii. Tiaikid el rolel a ngeso a kmal klou a lengesuir er ngak. Ngkmal mengelaod er ngak, e le bechik a kmal mle mekreos er a renguk e dirrek el kmal mle klou el tedebechel a klengar er ngak.” A melakl dil el Bianca a mesaod el kmo: “Ngkmal mo mechelaod a renguk sel sekum a rebebil a meluluuch lobengkek e dirrek el menguiu er a tang me a lechub eru el bades lobengkek. Ngkmal ngosukak sel losaod el kirel a bechik me a dirrek sel lorrenges er ngak el mesaod er ngii.”

16. (a) Ngera sebeched el rullii el mora chad el mla mad a bechil? (b) A doltirakl er a Jakobus 1:27, e kede mukngerachel el mo mekerang?

¹⁶ Ngkired el melemolem lolengeseu er tirke el mla mad a rebecherir, el ua omerellel a Ruth el mora melakl dil el Naomi. A Paula el dulsaod er ngii er a uchei a kmo: “Ngkmal mle betok a ngeso el kngilai er sera lemad a bechik. Engdi cherengel a taem, e a rechad a liluut el mo remei e lmuut er a smechir er a chelsengrir er a bek el sils. Me nguaisei, engdi ngkmal mlengodech a rolel a klengar er ngak. Ngkmal klou el ngeso a meketmokl sel sekum a rechad a mo mtebengii el kmo a chad el ngar a klengiterreng a kmal dirk ousbech a ngeso el betok el buil me a dirrek el betok el rak er a uriul er a lemad a betik er a rengul.”  Me nguaisei, engdi a derta el chad a kakerous a blekerdelir. A rebebil a kora mereched el sumechokl a blekerdelel a klengar er tir. E a rekuk bebil sel loruul a bek el tekoi e te di mo melatk a tekoi el lurruul tir me a rebetik er a rengrir el di rulleterir el mo omdasu er ngika el mla remiid el betik er a rengrir. Me ngkakerous a blekerdelir a rederta el chad. Me lak dobes, a Jehovah a meskid a ileakl el techall me a ngerachel el mo olengeseu er tirke el mla mad a rebecherir.​—Monguiu er a Jakobus 1:27.

17. Ngera uchul me tirke el mechoit er a rebecherir a kmal ousbech a ngeso er kid?

¹⁷ A rebebil bechiil chad a mo chuarm er a meringel el uldasu me a blekeradel e le rebecherir a choititerir e merael. A Joyce el bechil a chilitii e mlo obengkel a ta er a redil a kmo: “Sel ringel el blo kchelebangel er ngii, a kuk meringel er a lemlad a bechik. Oleko bechik a mle accident e mad me a lechub e ngmlo smecher, e ngtekoi el ngii a dimlak lsebechel mtebechelii. Engdi a bechik a millilt el merael e mengoit er ngak. Me ak kmal imis el merur e ua lak a ultutelek el chad.”

18. Ngera sebeched el remuul el ngosuterir tirke el dikea rebecherir?

¹⁸ Sel doruul a ungil tekoi el bedul tirke el dikea rebecherir, e kede ochotii el kmo ngbetik a rengud er tir. Chelecha el taem el bla bo di ltir el tang, e te kmal ousbech er a rungil sechelirir. (Osi. 17:17) Me ke mekera e ochotii el kmo kau ngike el ungil sechelirir? Ngsebechem el lomekedong er tir el mo omengur lobengkem. Ngdirrek el sebechem el mengoit a sesei el temem lobengterir el milil me a lechub e kom dmak loldingel obliil. A ta er a ungil rolel a sebechem lomekedong er tir el mo obengkem el mengetmokl er a omengull el telungalek. A lsekum ke meruul uaisei, e ke rullii a Jehovah el mo dmeu a rengul, e le ngii ngike el “kmeed er tirkel chelam a rengrir,” e dirrek el “osebecheklir a re melakl dil.”​—Psa. 34:18; 68:5.

19. A 1 Petrus 3:8, ngmengelechel er kid el mo mekerang?

¹⁹ Ngkmal di kmedung e a Rengedel a Dios a mo mengedereder er tia el chutem, me seikid e a rokui el “di mla ngar ngii el chelebuul a mo diak e diak a melatk.” Me kede kmal omes el beduluchei el kirel sel taem el “ikel dilubech el tekoi er a ngar a mong a kmal di mo diak a melatk.” (Isa. 65:16, 17) Me chelecha el mo lmuut er seikid el taem, e bo dekaingeseu er a delongeled, e dirrek el dochotii el kmo ngbetik a rengud er a rokui el chedal a telungalek er kid er a klereng, lokiu a tekinged me a omerelled.​—Monguiu er a 1 Petrus 3:8.