KID el rokui a oumerang el kmo a Jehovah a omekrael er a rechedal e omesterir a kall er a klereng er aika el “uriul sils.” (2 Ti. 3:1, BT) Me nguaisei, engdi ngdi mo ultuil er a rederta er kid el mo oltirakl. Ngsebeched el omekesiu er tia el tekoi el mora rechad er a Israel er a lengar er a ked. Ngmla er ngii a kirir el meruul sel lerengesii a ngerel a trombetang.

A Jehovah a dilu er a Moses me bo loruul a teblo el teleot el silber el trombetang el ‘lousbech el omekedong er a re beluu el me kldibel, me sel lolukl a kiamp er tir.’ (Ule. 10:2) A reprist a mle kirir el melodech er a ngerel a trombetang el mesubed er a rechad aike el kirir el meruul. (Ule. 10:3-8) Chelecha el taem, e a rechedal a Dios a melai a ulekrael el okiu a kakerous el rolel. Ka momtab a edei er aike el rolel e kede mukrael el ngii a mekltkid er a ngerel a trombetang er a irechar. Aika el edei el rolel a sel demokedong el mora meklou el ongdibel, me sel lengai a osisechakl a remechuodel, me sel lengar ngii a omeldechel a tekoi er a ongdibel.

A Jehovah sel bo el soal a “beluu el rokui” a bo lekldibel er a medal a chedaol tento er a mo bedul a ongos, e ngmo er ngii a ngerel ngii el teblo el trombetang. (Ule. 10:3) Me a rokui el kebliil el mle kiamp el meliuekl er a tento, a rirengesii tia el okedong. Tirke el kmeed a mle sebechir el di mereched el mei. Engdi tirke el mla er cheroid a uluusbech a klou el temir me a klisichir el mengetmokl er tir el mei. Me alta te mla er cheroid me a lechub e te mle kmeed, engdi Jehovah a mle soal tir rokui a bo el kldibel e lengai a klungiolir.

Chelecha el taem, e ngdiak bo dekldibel er a chedaol tento, engdi kede mokedong el mora ike el lekldibel er ngii a rechedal a Dios. E aikang a uldimukl er a meklou el ongdibel me a lmuut el bebil er a ileakl el ongdibel, el dengar ngii e kede ngmai a meklou a ultutelel el tekoi me a ulekrael. Meliuekl er a beluulechad, e a rechedal a Jehovah a oldeu a rengrir er a osisiu el prokuram. Me tirke el mora ika el ongdibel a dmeu a rengrir el dmak el ua ta el cheldebechel. A rebebil a ngar cheroid el mei. Me nguaisei engdi te rokui el medengei el kmo ngmo uchul a klungiolir.

E kuk mekerang tirke el ngar er a mekekerei el group el cheroid er aika el meklou el ongdibel? A technology er chelecha el taem a uchul e ngsebechir el ngmai a klungiolir er a osisiu el prokuram e mo teloi er tirke el ngar er a meklou el ongdibel. El ua tiang, ngar er a ta el odngelel ngike el omtechei  er a headquarter er kid, e a obis er a Benin a rirellii me bo el sebechir tirke el ngar er a Arlit, Niger el ta er a mats er a omengiis er a Sahara Desert el mesa tia el prokuram. Tirke el lluich me a ta el chad el mlo kldibel, alta te mle cheroid er tia el klou el ongdibel, engdi te mlo melechesuar el kmo te teloi er tirke el 44,131 el mla er isei. A ta el odam a milluches el kmo: “Kom mera el mlo mesaul el rirellii tia el prokuram me ngmlo sebecham el mesang. Ngochotii el kmo ngkmal betik a rengmiu er kemam.”

Me a prist sel dokouii a di chimong el trombetang, e te di “re mengeteklel a kebliil” a mora tento er a ongdibel. (Ule. 10:4) Seikid e ngmo sebechir el ngmai a omesodel a tekoi me a osisechakl er a Moses. E tiang a ngosuterir el mo ungil kutmokl a ngerechelir el omekerreu a kleblillir. Me a lsekum e ke mle ta er tirka el mengeteklel a kebliil, e kau, ke mo remuul aike el rokui el sebechem el mong me bo mngai a klungiolem?

Chelecha el taem, e a remechuodel a diak el “mengeteklel a kebliil” me a ka lorreder er a delebechel er a Dios el mla moterekokl er tir. (1 Pe. 5:1-3) Engdi te mora tkurrebab el sebechir el omekerreu er a delebechel. Sei a uchul me te kongei sel lemokedong el mo melai a lmuut el bebil er a osisechakl, el ua Skuul el Kirir a Rudam el Oldingel a Ongdibel me a Remechuodel me a Remesiou er a Ongdibel. Ngar tia el skuul, e te mesuub a rolel e ngsebechir el lmuut el mo ungil kutmokl a ngerachel er a ongdibel. E tia mo uchul a klungiolir a rokui el chad. Me alta ngdirkak bo er a ta er aika el skuul, engdi ke melai a klungiolem er tirke el mla mong.

A lebebil er a taem e ngmo er ngii a medbedeb el ngerel a trombetang. E tiang a milsubed el kmo a Jehovah a soal a rokui el chad a lolukl. (Ule. 10:5, 6) Me a omelukl el lurruul er ngii a kmal mle chelderoder, engdi ngdirrek el uluusbech er a klou el ureor. Me nguaisei engdi a rebebil a locha dimlak el sorir el melukl. Ngera uchul?

A rebebil a mle sebechir el omdasu el kmo ngbeteknga okedong el mo melukl e diak lulterekokl a temel. A “le bebil e sel eabed a di medechel el tal kesus.” E a lekuk bebil, e ngmle ‘erul sils, . . . tal buil, ma lechub e ng tal rak’ el di lemedechel. (Ule. 9:21, 22) Ngmle tela el taem el lolukl tia el kiamp? A Ulecherangel er a 33 el bliongel a mesaod a bekord el 40 el basio el ble lekiamp er ngii a rechad er a Israel.

A lebebil, e te locha miltik a mechuu el basio el sebechir el kiamp er ngii. E tia mle ungil e le te mla er a “klou e kdekudel el oreomel.” (Dut. 1:19) Me ngmle sebechir el omdasu el kmo a lsekum e te lmuut el melukl e ngdiak bo lebetik er a ungil basio.

Me sel lomuchel el melukl, e a rebebil a locha mle meringel er tir el mengiil. Te rokui el rirengesii sel medbedeb el ngerel a trombetang, me nguaisei engdi ngdiak el sebechir el di ta melukl er a osisiu el taem. Tia el ngerel a trombetang a kot e ngmilsubed aike el kebliil el ngar ongos, el kebliil er a Juda, Isakar, me a Sebulun, el kmo ngkirir el merael. (Ule. 2:3-7; 10:5, 6) E a uriul, e ngliluut el mo er ngii a ongeru el medbedeb el ngerel a trombetang el mesubed aike el edei el kebliil er a dimes. Me a reprist a millemolem el meruul er tiang el mo lmuut er a lorael a rokui el kebliil.

Nglocha mla ta el bo el meringel er kau a kongei a bebil omeldechel a tekoi er a cheldebecheled. Ke locha millatk el kmo ngkmal mla mo betok a omelodech el ngar ngii. Me a lechub e ngkuk ungil a rengum er aike el mla meketmokl me ngsoam a di lolemolem el uaisei. Ke locha milsa el kmo ngmle meringel er kau a oba kllourreng el mo smau aika el omelodech. Nguaisei engdi a bo doltirakl aika el omelodech, e kede mo mesa el kmo a Dios a omekngeltengat er kid.

Sera taem er a Moses, e a Jehovah ulemekrael er a rebetok el miliol el sechal, redil me a rengalek er a lengar er a ked. Ngdimlak el sebechir el suobel a lemlak a ulekerreuil me a ulekrael er a Dios. Chelecha el taem, e kede mesisiich er a tekoi er a klereng e le Jehovah omekrael er kid. Me ngsoad el rokui el mo bekongesenges el di uai tirke el blak a rengrir el chad er a Israel el uleltirakl aike el kakerous el ngerel a trombetang!