1. Ngua ngera uldesuel a Jehovah a lsekum a ta er a mesiungel a lmuut el mo mesiou er ngii?

NGDI uaike el dulsaod er sel mlo merek el suobel, a Jehovah omekesiu er ngii el mora ungil mengkerengel a sib el kerekikl el omekerreu er a derta el sib. Ngosiik er tirke el mla mo cheroid er ngii. A rechad er a Israel er a bo el cheroid er ngii, e ngdilu er tir el kmo: “Mluut el mer ngak, e ak mo chemau kemiu.” Ngdirk osisiu a uldesuel e le ngmelekoi el kmo: “Ng diak kmengodech.” (Mal. 3:6, 7) A Jesus a dilu el kmo a Jehovah me a rechanghel a kmal mo dmeu a rengrir a lsekum a ta er a mesiungel a Jehovah a lmuut el mei er Ngii.​—Lk. 15:10, 32.

2. Ngera kede mo mesaod er tia el suobel?

² Me bo dosaod a edei el okesiu el luluusbech a Jesus el ngii a olisechakl er a rolel a dolengeseu er tirke el mla mo cheroid er a Jehovah. Kede mo mesaod a blekeradel el dousbech el mo ngosuir a ririid el sib el lmuut el mei er ngii. E mo omes er a uchul me ngar ngii a klungiolel a dolengeseu er tirka el mla mo inactive.

3-4. Ngera uchul me ngike el redil el ngar er a Lukas 15:8-10 a kmal mle blak a rengul losiik er sel ririid el udoud?

³ Ngkired el meringel el oureor el osiik er tirke el sorir el lmuut el mei er a Jehovah. Ngar sel cheldecheduch el ngar er a Ebangkelio er a Lukas, e a Jesus a milsaod er a redil el osiik er a mekreos el klalo el ririid, el ngii a udoud el silber. Me a klou a ultutelel el tekoi er tia el okesiu a sel siik el lurruul er ngii.​—Monguiu er a Lukas 15:8-10.

⁴ A Jesus a milsaod er a uldesuel ngika el redil el miltik er tia el mekreos el udoud el silber. Sel taem, e a rebebil el chedil er a Judea ulemesterir a rengelekir redil a tacher el udoud el silber er a sils er a chebechiielir. Tia locha mle ta er aike el udoud. Ngii el redil a ulemdasu el kmo tia el udoud a rirebet er a ulaol. Me ngmekerdii a olbidel e omes el meliuekl engdi ngdiak lesang.  Tia el olbidel a mechitechut a kerdel me ngdiak el sebechel el mesa tia el kekerei el udoud. Me ngmocha mekekokil riekii a blil, e seikid e ngmesa tia el udoud el mengchecheldoech er a kerdel tia el olbidel. Ngmera el mlo ungil a rengul! Me ngomekedong er a resechelil me a retonari er ngii el mei e ouchais er tir er tia el ungil chais.

5. Ngera me ngsebechel mo meringel er kid a metik er tirke el mla mo cheroid er a ongdibel?

⁵ Sel domes er a okesiu er a Jesus, e ngkired el meringel el oureor el osiik er a mla remiid el klalo. Me ngdi osisiu, nglocha kired el mo meringel el oureor el osiik er tirke el mla mo cheroid er a ongdibel. Nglocha mla mo kemanget el taem el cheroid er a ongdibel. Te locha mla melukl el mora basio el diak a rudam el medengelterir. Engdi chelecha el taem e ngulterekokl el ngar ngii a rebebil er tir el kmal oureng el lmuut el mei er a Jehovah. Ngsorir el mesiou er a Jehovah lobengterir a rudam me a rudos er tir, engdi te ousbech a ngelsuid.

6. Te mekera rokui el chedal a ongdibel e mo teloi er a ureor el osiik er tirke el mla mo inactive?

⁶ Te rua techang a sebechir el mo teloi er tia el siik? A rokui el publisher er a ongdibel a sebechir el mo teloi er ngii, el uldimukl er a remechuodel, re pioneer, me tirke el ngar ngii a inactive er a telungalek er tir. Kau ngar ngii a sechelim me a lechub e ngchedam el mla mo inactive? Ngmla ta el mongedecheduch er a chad el mla mo inactive sel moldingel obliil me a lechub e ke ousioning er a buai? Mouchais er ngii el chad el kmo a lsoal a bo loldingel er ngii, e ngsebechem el nguu a address me a lechub e ngdengua er ngii el msa remechuodel.

7. Ngera kede suubii er a tekingel a ta er a remechuodel el Thomas?

⁷ Ngera sebechir a remechuodel el meruul me bo el betik er tirke el sorir el lmuut el mei er a Jehovah? Momtab a tekingel a ta er a remechuodel el ngklel a Thomas, * el kiei er a Spain. Ngmla ngosuterir a rekuk betok er a 40 el Sioning el lmuut el mei er a ongdibel. A Thomas a kmo: “A kot, e a kuker er a rudam me a rudos a lsekum e te medengei basio el lekiei er ngii tirka el chad. Me a lechub e a kuker er tir el kmo te rua techang a mla er a miting er a ngar er a mong. A ruumesingd er tir a semeriar lolengeseu e le ngsorir el teloi er a ureor. Me sel bo kuldingel er tirka el mla mo inactive, e a kuker el kirir a rengelekir me a rechederir. A rebebil er tir a ulebetiterir a rengelekir el mei er a miting, me tirka el ngalek a locha mle publisher er a ta el taem. Tir me te dirrek el sebechir el mongeseu el lmuut el mei er a Jehovah.”

8. Ngar sel okesiu el kirel a ririid el ngalek el llechukl er a Lukas 15:17-24, e ngmle uangera omerellel ngike el chedam el mora ngelekel el ulebult er a kngtil?

⁸ Ngera el blekeradel a kired el olab me bo dengesuterir tirke el sorir el lmuut el mei er a Jehovah? Momtab a sebeched el suub er a okesiu er a Jesus el kirel a ngalek el mirrael el mora cheroid el beluu. (Monguiu er a Lukas 15:17-24.) A Jesus a mesaod el kmo ngii el ngalek a mlo melechesuar a klebelngul me ngliluut el me remei. Me a demal er a lesang, e ngrirurt el mong e mechulii, el olechotel a kmo ngdirk betik a rengul er ngii. Ngika el ngalek a kmal uluuchel er a rengul e ulemdasu el kmo ngdikea el kirel el okedongall el ngelekel ngii el rubak. Me a demal a kmal mlo chubur er a louchais a ngar er a rengul. Me ngriruul a tekoi el ochotii er a ngelekel el kmo ngoutkeu er ngii el diak el ua chad er a ureor, e ngbai mekreos el chedal a telungalek. Ngkiltmeklii a blengur e msang a kot el ungil bail.

9. Ngera el blekeradel a kired lolab me bo el sebeched el ngosuterir tirke el mla mo inactive el lmuut el mei er a Jehovah? (Momes er a baks el “ Rolel a Dolengeseu er Tirke el Sorir el Lmuut el Mei.”)

 ⁹ A Jehovah a di ua ngika el chedam. Ngbetik a rengul er tirke el mla mo inactive el rudam me a rudos e soal a lluut el mei er ngii. A doukerebai er ngii, e ngsebeched el ngosuterir el lmuut el mei. E tia ousbech er kid el olecholt a kllourreng me a klechubechub me a bltikerreng. Ngera me ngkired el olecholt aika el blekeradel, e mekera doruul uaisei?

10. Ngera me ngkired el moba kllourreng sel dolengeseu er a chad el lmuut el mo mesisiich er a tekoi er a klereng?

¹⁰ Ngkired el moba kllourreng, e le chad a ousbech a taem el lmuut el mo mesisiich er a tekoi er a klereng. A rebetok el mle inactive a kmo te liluut el mei er a Jehovah e le remechuodel me a rebebil el ngar er a ongdibel a mle blechoel loldingel er tir. A odos el Nancy er a Southeast Asia a meluches el kmo: “A kmeed el sechelik er a ongdibel a kmal ngilsukak. Ngmle betik a rengul er ngak el ua lechudelek. Ngulemeklatk er ngak er aike el ungil temam er a irechar. Nguleba kllourreng lorrenges sel kuuchais a ngar er a renguk, e dimlak el medakt el omeskak a ulekrael. Ngmera el mle ungil sechelei, el mle kltmokl el olengeseu er ngak er a ngii di el taem.”

11. Ngera me kede ousbech a klechubechub lomkar a telemall el reng?

¹¹ A klechubechub a di ua mesisiich el kar el sebechel mekerur a telemall el reng. A rebebil el mla mo inactive a dirk olab a ngesechel a rengrir el bedul a chad el ngar er a ongdibel. Sei a uchul me ngmeringel er tir el lmuut el mei er a Jehovah. A rebebil a omdasu el kmo te mlo chobangel a diak lemelemalt el omeruul. Me te ousbech er a chad el orrenges er tir  e mo medengei a ngar er a rengrir. (Jak. 1:19) A Maria el mle inactive er a ta el taem a kmo, “A kuluusbech er a chad el orrenges er ngak, e mengelaod er ngak, e omeskak a ungil ulekrael me a ngeso.”

12. Momekesiu er a rolel e a bltikerreng er a Jehovah a mengurs er tirke el mla mo inactive el lmuut el mei er a ongdibel.

¹² A Biblia omekesiu er a bltikerreng er a Jehovah el mora rechedal el ua ekil. Ngoeak a ngera el rolel e a bltikerreng er a Dios a ua ekil? Ka molebedebek okmo ke rosngang er a meringel el daob e a chad a mideklii a life jacket el eko er kau. Ke locha kmal moba omereng el saul el kirel tia el ngeso e le ngosukau me ngdiak mrros. Engdi a life jacket a diak el sebechel osobelii a klengar er kau. A ralm a mekelekolt me a lak mngasech er a chert e ke mad. Ke ousbech er a chad el mideklii a ekil el eko er kau e kursau el mora chert. A Jehovah a millekoi el kirir a rechad er a Israel el mlo cheroid er ngii el kmo: “Ak mle blechoel el mengurs er tir el oba bltikerreng.” (Hos. 11:4, NW) Me a Dios a osisiu a uldesuel el kirir tirke el mla mo diak losiou er ngii me tirke el mla meieleb er a mondai me a sebekreng. Ngsoal a bo lodengei el kmo ngbetik a rengul er tir, e soal a lluut el mei er ngii. A Jehovah a sebechel el ousbech er kau el mo ochotii a bltkil a rengul el mo er tir.

13. Ngmilekera tekoi el dilubech el mora Pablo e ochotii el kmo a bltikerreng er kid a sebechel ngosuterir a rebebil el lmuut el mei er a Jehovah?

¹³ Ngklou a ultutelel a doterekokl a rengrir tirke el mla mo inactive el kmo, a Jehovah a betik a rengul er tir me kid me kede dirrek. A Pablo el dulsaod er ngii er sel mlo merek el suobel el mle inactive el kuk betok er a 30 el rak a kmo: “A ta el tutau er a ktobed er a blik, e a  ta el chuodel el odos el kmal ungil a blekerdelel a mle mengedecheduch er ngak. Me ak di lilangel. Ak dilu er ngii el kmo a Jehovah a ua luleldurech er kau el me mengedecheduch er ngak. Seikid e ak tilbir el lmuut el mei er a Jehovah.”

14. A doltirakl er a okesiu el ngar er a Lukas 15:4, 5, e ngmilekera mengkerengel a sib er a uriul er a lebetik er a ririid el sib?

¹⁴ Tirke el mla mo inactive a ousbech er kid el mo blechoel lolengeseu er tir. Te di uai ngike el ririid el ngalek er a okesiu er a Jesus, el locha ngar ngii a ringelel a uldesuir. Me nglocha dirk mechitechut a klereng er tir e le tir el mla er a beluulechad er a Satan. Ngkired el ngosuterir el lmuut el mekurulii a klaumerang er tir er a Jehovah. Ngar sel okesiu er a ririid el sib, e a Jesus a milsaod er a mengkerengel a sib el chillengii a sib el lmuut el mora delebechel. Ngika el mengkerengel a sib a mla choitii a klou el temel me a klisichel el osiik er a ririid el sib. Engdi ngmedengei el kmo ngkirel cholngii el lmuut el mora delebechel e le ngdiak el sebechel el di ngii.​—Monguiu er a Lukas 15:4, 5.

15. Ngmekera dolengeseu er tirke el mechitechut el sorir el lmuut el mei er a Jehovah? (Momes er a baks el “ A Klou a Ultutelel el Dongu.”)

¹⁵ Nglocha mo kired el mengoit er a klou el taem me a klisiich el olengeseu er tirke el mla mo inactive el mo mesisiich er a chelitecheterir. Engdi ngokiu a ngelsuil a chedaol reng er a Jehovah, Tekingel, me a babier el lomeskid a ongdibel, e ngsebeched el ngosuterir el lmuut el mo mesisiich. (Rom 15:1) Ngmekera doruul er tiang? A odam el mla mesiou el ta er a remechuodel el betok el rak a kmo, “A ruumesingd er tirke el mla mo inactive a kirir el mesuub er a Biblia er a uriul er a letibir el kmo ngmera el  sorir el lmuut el mei er a Jehovah.” * Me a lolengit er kau el mo mesuub el obengkel a chad el mle inactive, e a lsebechem e ngungil omkengei er tia el ongit. A odam a dirrek el melekoi el kmo, “A publisher el mo meruul er tiang a kirel mo ungil sechelei, el sebechel ngika el inactive el ouchais er ngii a ngar er a rengul.”

16. Kede mekera medengei el kmo a rechanghel a olengeseu er kid?

¹⁶ Ngbetok el experience a ochotii el kmo a rechanghel a oureor el obengked el osiik er tirke el mla mo inactive el tir a kmal oureng a lmuut el mei er a Jehovah. (Och. 14:6) El ua tiang, a Silvio er a Ecuador, a mle blak a rengul meluluuch el olengit a ngeso el lmuut el mei er a ongdibel. Me ngdirk milluluuch, e rongesii a chad er a tuangel. A reteru er a remechuodel a mlei er a blil. Me ngmlo dmeu a rengrir lomuchel el olengeseu er ngii.

17. Ngera el klungiaol a bo denguu sel dengesuterir a remechitechetong er a klereng?

¹⁷ Kede metik a klou el deurreng sel dengesuterir tirke el mechitechut er a tekoi er a klereng el lmuut el mei er a Jehovah. A ta er a pioneer el Salvador, el kmal kerekikl el olengeseu er tirke el mla mo inactive a melekoi el kmo: “A lebebil er a taem e ngmo merael a iuechel a medak. Ngkmal dmeu a renguk sel kudengei el kmo a Jehovah a mla osebelii a ta er tirka el betik er a rengul el sib er a beluulechad er a Satan e ngak a mla er ngii a ileakl el techellek el oureor el Obengkel.”​—Rel. 20:35.

18. A lsekum e ke inactive, e ngera sebechel mo ulterekokl a rengum er ngii?

¹⁸ Me a lsekum e ngmla mo diak omteloi er a rechedal a Jehovah, e bo lulterekokl a rengum el kmo ngdirk betik a rengul er kau. Ngsoal a omluut el mei er ngii. E a omluut el mei, e ngar ngii a kirem el mo meruul. Me nguai ngike el chedam er a okesiu er a Jesus, e a Jehovah a mad el tmuil er a lluut er kau, e kmal dmeu a rengul loutkeu er kau el lmuut el me remei.