“A ta el chedal a delak er a lsoal lokoad er ngak, e ak di urrekedii a omerkolel e ochechii. Ngdi mle soak el mekodir.”​—Paul.

“Sel kngar er a blik, e ngdi telkib el tekoi e ongesechii a renguk. Me ak mo melemall a klalo, me a omotsia, me a ngii di el ngerang el kbetik.”​—Marco.

Nglocha diak bo doruul uaisei. Engdi lebebil er a taem e ngmeringel el domtebechel er kid. E tiang a uaisei e le kede mludiukes er a klengit el mla er a kot el chad el Adam. (Rom 5:12) A rebebil el ua Paul me a Marco a meringel er tir el omtebechel a ngesechel a rengrir. E a rekuk bebil a meringel er tir el omtebechel a uldesuir. Te di melatk aike el lemedakt er ngii me a lechub e ngmekngit el uldasu. E dirrek el ngar ngii a remeringel er tir el omtebechel a urungulir el kirel a deleboes, me a omelmir er a rrom, me a usbechel a mekngit el kar.

Tirke el diak lomtebechel a uldesuir, urungulir, me a omerellir a sebechir el tomall a klengar er tir. Engdi ngsebeched el mengeroid er kid er aika el tekoi. Ngokiu a ngera el rolel? Sel domekeroul er a ulserechakl el reng. Ka me dosaod a edei el ker el mo ngosukid el kirel tiang: (1) Ngerang a ulserechakl el reng me a lechub e ngomengerem? (2) Ngera me ngklou a ultutelel? (3) Ngmekera domekeroul er tia el blekeradel, el ngii a uldimukl er a “rodech ra Reng”? (Gal. 5:22, 23, BT) E a uriul e kede mo mesaod aike el sebeched el meruul a lsekum ngmo diak doba ulserechakl el reng.

A chad el ulserechakl a rengul a diak di lemereched el meruul a tekoi. Ngdiak bo lolekoi me a lechub e loruul a tekoi el chetil a Dios.

A Jesus a mle ungil kerebai el kirel a ulserechakl el reng. A Biblia a melekoi el kmo: “Ser a le motuub e ng dimlak lolaitechei el oltuub; me ser a bo lecharm, me ng dimlak lorrouk er a ngii di le chad, e bai di ultuil omeltkel er a Dios el melemalt a loukerrekeriil.” (1 Pe. 2:23) Nguleba ulserechakl el reng er a lengar er a teluo el kerrekar e lolenguul er ngii a rumtok er ngii. (Mt. 27:39-44) E a uchei, e ngdirrek el mle ulserechakl a rengul er a longarm er ngii a remengeteklel a klechelid el mo melekoi a cheleuid el tekoi. (Mt. 22:15-22) Ngmilecherei a kmal ungil kerebai er a lometech er ngii er a bad a rekesib a rengrir el chad er a Judea. Ngdimlak bo lolaitechei, e ngbai “milertii e tilobed er a Templo el merael.”​—Jn. 8:57-59.

Me kid, ngsebeched loukerebai er a Jesus? Ngsebeched el melasem. A apostol Petrus a dilu el kmo: “Kristus a dirrek el mlo chuarm el kiriu, e milechere kerebai el kiriu el mesuub er ngii.” (1 Pe. 2:21) Me alta ngdiak demecherrungel, engdi ngsebeched el  mesuub el mo oukerebai er a ulserechakl el reng el luleba Jesus. Ngera me ngklou a ultutelel a doruul uaisei?

Ngkired el mo oba ulserechakl el reng a lsoad el nguu a kengei er a Jehovah. Me alta kede mla mesiou er a Jehovah el kemanget el taem, engdi ngsebechel metemall a klausechelei er kid lobengkel a lak domtebechel a omerelled me a tekinged.

Ka molatk er a Moses, el “mle ngariou a rengul chad, ng kuk ngariou a rengul er a re bek el chad el ngar a beluulchad.” (Ule. 12:3) Ngmle betok el rak el loba kllourreng lorrenges er a rechad er a Israel el mengeremrum, engdi ta er a klebesei e ngmlo diak lorekedii a rengul. Ngilasech a rengul er a lluut el mengeremrum el kmo ngdiak a ralm. Me ngmlo terrekakl a tekingel el mora rechad el kmo: “Morrenges, kemiu el omtok el chad! Ng kiram el oltobed a ralm er tial risois el kiriu?”​—Ule. 20:2-11.

A Moses a dimlak loba ulserechakl el reng. Ngdimlak lebsa chetengakl a Jehovah el Ngii a uleak a ongasireng e ngmilsterir a ralm. (Psa. 106:32, 33) Sei a uchul me a Jehovah dimlak lebecherei me lesiseb er a Beluu er a Nglat. (Ule. 20:12) Me a Moses a locha uluuchel er a rengul el kirel tia el tekoi er a klemengetel a klengar er ngii.​—Dut. 3:23-27.

Ngera klubeled er tiang? Alta ngmla mo betok el rak el dengar er a klemerang, engdi ngdiak el kirel mo terrekakl a tekinged el mo er tirke el ongasech a rengud me a lechub e te ousbech a omesmechokl. (Efe. 4:32; Kol. 3:12) Nguaisei, sel dorael el mo meklou el chad, e ngmo meringel er kid loba ulserechakl el reng. Engdi bo dolebedebek er a Moses. Lak debecherei a di telkib el tekoi me bo el temellii a ungil chised er a omesiou. Me ngmekera domekeroul er tia el klou a ultutelel el blekeradel?

Moluluuch el olengit er a chedaol reng. E ngera uchul? E le ulserechakl el reng a uldimukl er a rodech er a chedaol reng er a Dios, me ngmesterir a chedaol reng tirke el olengit er ngii. (Lk. 11:13) Me ngokiu tia el chedaol reng, e a Jehovah meskid a klisiich el dousbech. (Fil. 4:13, NW) Ngdirrek el sebechel ngosukid el omekeroul a lmuut el bebil er a rodech er a reng, el ua bltikerreng, el rullid me ngmo beot er kid lolecholt er a ulserechakl el reng.​—1 Ko. 13:5.

Mcheridau er a tekoi el rullii el mo meringel er kau lolecholt er a ulserechakl el reng. El ua tiang,  mongeroid er kau er a website me a ongelaod el melisiich a mekngit el omeruul. (Efe. 5:3, 4) Ngkired el mengeroid er kid er a ngii di el ngerang el sebechel choitikikid el mora klengit. (Osi. 22:3; 1 Ko. 6:12) El ua tiang, a chad el beot er ngii el mechetikaik el mo meruul a mekikiongel el omeruul, a mo kirel mengeroid er ngii er a babier me a mubi el melisiich a tekoi er a ultoir.

Kede locha mo omdasu el kmo tia meringel er kid el otireklii. Engdi a bo dolasem er a tkurrebab el sebeched, e a Jehovah mo meskid a klisiich el dousbech er ngii el mtebechelid. (2 Pe. 1:5-8) Ngmo ngosukid el omtebechel a uldesued, cheldechedechad, me a omerelled. A tekoi el dilubech el mora Paul me a Marco a ochotii tiang, e le ngmlo sebechir el mesuub el mo diak di lemereched el ngmasech a rengrir. Ka molatk er a kuk ta er a odam el di mle blechoel mo kesib a rengul sel lomekall, e dirrek el uluutoketok er a rebebil lomekall. Me ngmilekerang? Ngmelekoi el kmo: “Ngblak a renguk el meluluuch er a bek el sils. Ak milsuub a suobel el mesaod el kirel a ulserechakl el reng e mlo medengei a bades er a Biblia el kirel. Me alta ngmla mo kemanget el taem el kuureor el kirel tiang, engdi ngkirek el dirk omeklatk er ngak sel tutau el kmo, ngkirek el melasem el mo chelellakl a renguk. E sel lengar ngii a appointment er ngak, e ak mereched el tuobed er a blik.”

A lebebil er a taem, e ngmo diak doba ulserechakl el reng. Me kede locha mo merur el meluluuch el mora Jehovah. Engdi seikid el taem e ngkmal kired el meluluuch. Me a leuaisei, e mereched el meluluuch el mora Jehovah. Molengit a klausubes me a ngelsuil, e mrellii er a rengum el diak omluut el mo meruul er a osisiu el mekngit el tekoi. (Psa. 51:9-11) Lak momdasu el kmo a Jehovah a diak bo lorrenges er a nglunguchem a omolengit a klechubechub. (Psa. 102:17) A apostol Johanes a omeklatk er kid el kmo a rsechel a Ngelekel a Dios a “kikidid ra bek el klengit.” (1 Jn. 1:7; 2:1; Psa. 86:5) Lak mobes el kmo a Jehovah a melekoi er a remesiungel me bo leblechoel el ousubes. Me ngsebechel mo ulterekokl a rengud el kmo ngdirrek el mo meruul uaisei.​—Mt. 18:21, 22; Kol. 3:13.

A Jehovah a dimlak ledeu a rengul er a Moses er a bo lak lorekedii a rengul. Engdi nguluusubes er ngii. A Tekingel a mesaod er a Moses el kmo ngkmal ungil kerebai er a klaumerang. (Dut. 34:10; Heb. 11:24-28) A Jehovah a dimlak lebecherei a Moses me bo el siseb er a Beluu er a Nglat, engdi ngmo outkeu er ngii el mo kiei er a Baradis er tia el chutem e msang a techellel el kiei el diak a ulebengelel. Ngsebeched el mo oba osisiu el techall a lsekum ngblak a rengud el omekeroul er a ulserechakl el reng.​—1 Ko. 9:25.