A RECHAD er a Israel a mle siukang er tir a harau a tax el olengeseu er a mera el omengull. Me nguaisei engdi sera bo el taem er a Jesus e ngmlo betok a sodel a omelai el tax el mlo uchul a berraod el kirir a rechad.

A remeklou el Chijudea a mle kirir el harau a tedobech el silber el udoud el shekel el mo olengeseu er a ureor er a chedaol tento. Ngar er a taem er a Jesus e te uluusbech er tia el udoud el kirel aike el mo tenget me a dirrek el kirel oketmeklel a templo el lebilkedecherur a Herodes. A rebebil Chijudea uleker er a Petrus er a uldesuel a Jesus el kirel tia el tax. A Kristus a dimlak lomtok er tia el tekoi. Ngbai dilu er a Petrus me bo el harau er ngii.​—Mt. 17:24-27.

A rechedal a Dios er seikid el taem a dirrek el mle kirir el melenget a ongeltacher er a dellemelir me a lechub e ngkerekerengir. (Lev. 27:30-32; Ule. 18:26-28) A remengeteklel a klechelid a milengerechir el kmo ngkirir el kerekikl el melecha ongeltacher er a derta el dellomel, el mo lmuut er a “mint ma dill ma cumin.” A Jesus a dimlak el du el kmo ngmekngit a doruul ongeltacher ngbai ulemeketakl er a klebelengerir a resensei er a Llach me a Refarisi.​—Mt. 23:23.

Me tir a mla er cheungel a Rom a uchul me ngdirrek el mle kirir el harau a tax el mora beluu er a Rom. Ngmla er ngii a tax el kirir tirke el ouklalo a chutem. Ngmle sebechir el harau lousbech a udoud me a lechub e ngklalo. A cheral tia el tax a mle 20 el mora 25 el basent er a dbechel a chetemir. Ngdirrek el mla er ngii a tax el kirir a rederta el Chijudea el harau er ngii. Tiakid sel tax el Refarisi uleker er a Jesus el kirel. Ngulechotii a kirel osengir a rokui el chad el kirel a omengkad el tax er a ledu el kmo: “Bsa merreder er a Rom a kloklel, ma kloklel a Dios, bsa Dios.”​—Mt. 22:15-22.

Te dirrek el mle tax a klalo el me soiseb me a lechub ngmo tuobed er a beluu. Te millai er tia el tax er a olekerodel me a did er a beluu me a dirrek aike el intersection er a rael me a siseball er a beluu me a lechub e ngmakit.

Ngkmal mlo meringel er a rechad el harau a tax. A doltirakl a tekingel a Tacitus el chad er a reksi er a Rom, e sera temel a omengederederel a Emperor Tiberius er a lengar tia el chutem a Jesus, e a “beluu er a Syria me a Judæa a kmal ullengit me lekesadel a ildisel a tax el ngar ngii le ngkmal merengela er tir a harau.”

Ngdirrek el rolel a lolai aika el tax me ngmle ta er a berraod. Te mle blechoel el auction el kmo ngtecha mo collect aika el tax. Ngike el mle kot el ngarbab a bid er ngii a mlo er ngii a llemeltel el mo collect aikang. Tirka el chad er omelai el tax a ngilai a kerrekerengir er aike el tax receipt el lengilai, e mla er ngii a ruderechelir el mirrael el collect el kirir. A Sakeus a mle ta er a chad er omelai el tax el mla er ngii a ruderechelel. (Lk. 19:1, 2) A rechad a kmal mle chetirir tia el omeruul e miltengel osengir er tirke el millai a tax er tir.