1. Ngera ngmla rullii a Jehovah el kirel a derta er kid?

A JEHOVAH a mla omekrael er a rederta er kid el mo er ngii. (Jn. 6:44) Ka molatk er a belkul tiang. A Jehovah a tiriter a rengrir a rebetok el biliol el chad er a beluulechad e milsa el kmo kau a sebechem el mukeroul el mo betik a rengum er ngii. Tia kmal mekreos er osengel a Jehovah. (1 Kr. 28:9) Ngmedengelkau, medengei aike el ngar er a rengum me a uldesuem e betik a rengul er kau. Tia el tekoi a kmal melisiich er kid!

2. Ngmilekera Jesus e ngosukid el mo mtebengii a bltkil a rengul a Jehovah el kirel a derta er kid?

² A Jehovah a kmal betik a rengul er kau, e dirrek el kmal betik a rengul er a rokui el odam me a odos er kau. A Jesus a milskid a okesiu el ngosukid el mo mtebengii tiang. Ngulemekesiu er a Jehovah el mora mengkerengel a sib. Ngmo mekera mengkerengel a sib a lsekum ngremiid a ta er tirke el 100 el sib er ngii? “Ng mo meche ikel 99 el sib me ng menga er a tkul a ked e ngii a mo osiik er ngikel ririid el sib.” Sel lebetik er ngika el sib e ngdiak bo el kesib a rengul er ngii. Ngbai kmal mo dmeu a rengul. Tia ngngera ngomeketakl er ngii? A derta el sib a klou a ultutelel er a Jehovah. A Jesus a dilu el kmo: “Demmiu el ngar a eanged a diak el soal a tar tirkal mekekerel ngalek a bo leriid.”​—Mt. 18:12-14.

3. Ngera kede mo mesaod er tia el suobel?

³ Me ngkmal diak el soad el mo uchul me a odam me a lechub a odos er kid a mo mechitechut a rengul. Ngmekera e diak bo doruul er tia el tekoi? E ngera sebeched el meruul a lsekum e ngngar ngii a tomellii a rengud? Kede mo onger aika el ker er tia el suobel. Engdi kot e me bo dosaod el kmo te rua techang “tirkal mekekerei” el losaod er tir a 18 el bliongel er a Mateus.

4. Te rua techang “tirkal mekekerei”?

⁴ “Tirkal mekekerei” a rokui el disaiplo er a Jesus. A alta te meklou me a remekekerei me nguaisei engdi te ‘ua re ngalek’ e le  te kongei el mosisechakl er a Jesus. (Mt. 18:3) E alta te chad er a kakerous el beluu el kakerous a ulekurulir me a siukang er tir, e kakerous a rolel a lomes a tekoi e kakerous a blekerdelir, engdi te rokui el oumerang er a Kristus. E a Kristus a kmal betik a rengul er tir.​—Mt. 18:6; Jn. 1:12.

5. Ngua ngera uldesuel a Jehovah sel sekum a chad a soibesengii me a lechub e ngtomellii a rengul a ta er a rechedal?

⁵ “Tirkal mekekerei” el rokui a kmal mekreos er a Jehovah. Ngsebeched el mtebengii a uldesuel a Jehovah el kirir loeak sel dolatk er a osenged el kirir a rengalek. A rengalek a kmal mekreos er osenged. Ngkmal soad el omekerreu er tir e le te diak lolab a klisichel a bedengir, klemedengei, me a llomeserreng er a remeklou el chad. E alta ngkmal diak el soad el mesa chad el metemall engdi sel desa ngalek el metemall e nglmuut el mekngit a rengud er ngii, e sebechel ngmasech a rengud er ngike el millemall er ngii. Me ngdi osisiu, a Jehovah a soal omekerreu er kid. Ngkmal mo mekngit a rengul e kesib a rengul sel sekum a chad a soibesengii me a lechub e ngtomellii a rengul a ta er a rechedal!​—Isa. 63:9, NW; Mk. 9:42.

6. A doltirakl er a 1 Korinth 1:26-29, e ngua ngera osengir a rechad er a beluulechad el kirir a redisaiplo er a Jesus?

⁶ Ngera dirrek el ta er a rolel e a redisaiplo er a Jesus a ua re “mekekerei”? Ka molatk er tiang. A rechad er a beluulechad te omes er a rua techang el meklou a ultutelir? Tirke el merau, merael chisir, e olab a klisiich. E a redisaiplo er a Jesus a lomes er tir el “mekekerei” el diak a ultutelir. (Monguiu er a 1 Korinth 1:26-29.) Me nguaisei engdi Jehovah a kmal diak lomes er tir el uaisei.

7. A Jehovah ngsoal a bo le uangerang a uldesued el kirir a rudam me a rudos er kid?

⁷ A Jehovah a betik a rengul er a rokui el mesiungel, el tirke el mla ngar er a klemerang el kemanget el taem me tirke el beches el dirk mlei. Tirka el rokui el odam me a odos a meklou a ultutelir er a Jehovah me ngkirir el dirrek el mo meklou a ultutelir er kid. Ngkmal kired el mo ‘betik a rengud er a re chedal a Dios el dedak el oumerang.’ Me ngtir el rokui el diak el di el bebil er tir. (1 Pe. 2:17) Ngkired el mo meruul aike el rokui el sebeched el mo olengeseu e omekerreu er tir. A lsekum e kede mo medengei el kmo kede mla tomellii a rengul a chad, e ngdiak el soad el mo omdasu el kmo ngika kmal sensitive. Ngika bai kirel lousubes e obes. Ngera uchul me a rebebil a locha mo metemall a rengrir? A ulekurulir a locha uchul me ngdiak lungil a uldesuir el kirir. A rekuk bebil a dirk beches el mei er a klemerang, e dirkak el suubii el kmo ngkired el ousubes a telemellir a rebebil. A ngii di luchul me a chad a metemall a rengul me ngii a ngerecheled el mo sumechii a delongeled. Me a lmuut kung, a chad el blechoel metemall a rengul er a rebebil a kirel mtebengii el kmo tia el blekerdelel a kmal diak lungil me ngkirel melodech er ngii. Ngkirel meruul uaisei me bo le budech a uldesuel e bo lebudech a delongelel ngii me a rebebil.

8. Ngera el uldasu er a taem er a Jesus a ngar ngii lerirellii er a redisaiplo er ngii?

⁸ Ngera rirellii a Jesus el mo mesaod er “tirkal mekekerei”? A redisaiplo er ngii a uleker el kmo: “Ng techa kot el ngarbab er a Rengedel a eanged?” (Mt. 18:1) A rebetok el Chijudea er a taem er ngii a ulemes a deruchall el kmal klou a ultutelel. A ta el chellimosk a melekoi el kmo: “A kot el mle klou a ultutelel tekoi er a klengar er tir a melai chetengakl e mo merael a chisir.”

9. Ngera mle kirir el meruul er ngii a redisaiplo er a Jesus?

⁹ A Jesus a mle medengei el kmo a redisaiplo er ngii a mle kirir el meringel loureor el melodech er a blekerdelir el sorir el mengaiuechit er a rebebil, el ngii el blekeradel a kmal  mesisiich er a delongelir a Rechijudea. Ngdilu er tir el kmo: “Ngikel kot el ngarbab er a delongeliu a bai kirel el mo kot el ngariou, me ngikel mengitikaik a kirel mo ua mesiou.” (Lk. 22:26) Kede meruul er kid el mo “kot el ngariou” sel bo domes er a “re bebil er a re chad el kmo te kuk ungil er [kid].” (Fil. 2:3) Sel bo domekeroul er tiakid el blekeradel e ngngosukid me ngdiak bo duchul me a rebebil a mesibas.

10. Ngera el ulekrael er a Paulus a kired el sichedekl er a rengud?

¹⁰ A rokui el odam me a odos a ngar ngii a rolel e te kuk ungil er kid. Ngmo beot er kid a omes er tir el uaisei sel sekum kede mo blechoel lomes aike el ungil blekerdelir. Ngkired el sichedekl er a rengud a ulekrael er a apostol Paulus el mora rechad er a Korinth el kmo: “Ng techa rirellemiu el mor bab er a re bebil er a re chad? A ikel ngar ngii er kemiu ng diak le bilskemiu a Dios? Ma le ua isei, e kom mekera e olengesechekl er kemiu, el ua di ble le kemiu a uchul e ng ngar ngii er kemiu?” (1 Ko. 4:7) Me ngkmal diak el soad el meruul er a rebebil el mo sorir kid me a lechub e bo domes er kid el kuk ungil er a rebebil. A lsekum a odam a meduch loltobed a cheldecheduch me a lechub a odos a kmal meduch el omuchel a omesubel a Biblia, e ngkirel ngmai a rokui el chetengakl el msa Jehovah.

11. Ngera mle belkul a okesiu er a Jesus el kirel a king me a mesiungel?

¹¹ Kedeb el taem er uriul er a Jesus a lomeklatk er a redisaiplo er ngii me lak bo lolibas er a rebebil e ngmilsterir a okesiu el kirel a king me a mesiungel. A king a chiloit a belsel ngika el mesiou el kmal dimlak el sebechel el mo kokad. Uriul e ngika el osisiu el mesiou a dimlak el kengei el mo chemoit a belsel a ta er a mesiou el mle belsel er a di kesai el udoud. A king a kilebsengii ngika el mesiou. Ngera klubeled er tiang? A Jesus a dilu el kmo: “Ng mo ua isei omerellel a Demak el ngar a eanged el mor a derta er kemiu a lsekum ng diak mousubes a kngtil a tar kemiu er a rengmiu.”​—Mt. 18:21-35, BT.

12. Kede mekera tomelleterir a rebebil sel lak dekengei el ousubes?

¹² A omerellel ngika el mesiou a mlo uchul a tellemall el mora rebebil. A kot e ngika dimlak lochotii a klechubechub el mo er ngike el ta er a mesiou e bai “dilu me ng mlor a kelebus el dimerkmo bo le kekad a belsel.” Ongerung, ngtilemall a rengrir tirke el bebil er a mesiou el ulemes a omerellel. “Tirikal le dak el mesiou ra lesa tial blekeradel, e te kmal mlo mekngit a rengrir.” Ngdi osisiu, a omerelled a ngar ngii a lerellii el mora rebebil. Ngera sebechel duubech a lsekum e ngdiak dekengei lousubes er a chad el mlo mekngit a omerellel el mei er kid? A kot e kede tomellii a rengul ngika el chad e le ngdiak dekengei lousubes er ngii, e mengeroid er kid er ngii, e diak doubltikerreng el mo er ngii. Ongerung e kede rulleterir a rechad er ongdibel el mo metitur le te mesa el kmo ngdiak el lungil a delongeled kid me ngika el chad.

13. Ngera ke suubii er a experience er a ta el pioneer?

¹³ Ngmo uchul a klungioled kid me a rebebil sel dousubes er a rudam me a rudos er kid. Tiakid a mle experience er a ta el pioneer el odos el bo domekedong er ngii el Crystal. A ta er a odos er ongdibel a tilemellii a rengul. Ngmelekoi el kmo: “A lebebil e ngkmal mo meringel a tekingel el di ua lorus er ngak er a oles. Ngkmal dimlak el soak el mo ngar er a osisiu el car group lobengkel sel ki bo moldingel. Ngmlo diak a deurreng er ngak el omerk er a klumech.” A Crystal a ulemdasu el kmo ngmla er ngii a ungil luchul me ngkesib a rengul. Me nguaisei engdi ngdimlak longemekl er a ngesechel a rengul me a lechub e di blo lolatk er a uldesuel. Ngbai uleba klengariourreng e uleltaut a ulekrael er a suobel el “Mousubes el Ngar er a Rengum” el  mlara Ongkerongel er a March 1, 2000. Nguluusubes er a odos er ngii. A Crystal a kmo: “Ak mla mo mtebengii el kmo kede rokui el melasem el omekbail er kid er ngike el beches el chad e a Jehovah a kltmokl el ousubes er kid e bek el sils el loruul el uaisei. Ak kmal omelechesiu er ngak el mla mo kebekakl a renguk e mla lmuut el mo er ngii a deurreng er ngak.”

14. A doltirakl er a Mateus 18:21, 22 e ngera locha mle mondai er a apostol Petrus, e ngera kede suub er a tekingel a Jesus el mo er ngii?

¹⁴ Kede medengei el kmo ngkired el ousubes. Tia melemalt el tekoi el kired el meruul er ngii. Me nguaisei engdi nglocha dirk meringel er kid a meruul er tiang. A apostol Petrus a locha mlo uaisei a uldesuel a lebebil er a taem. (Monguiu er a Mateus 18:21, 22.) Ngera sebechel ngosukid? A kot e molebedebek er a rolel a Jehovah a mla ousubes er kau. (Mt. 18:32, 33) Ngkmal diak derredemelel a klausubes er ngii engdi ngkmal lousubes er kid. (Psa. 103:8-10) Osisiu el taem ng “kired el mo kaubltikerreng.” Me a klausubes a diak el choice. Ngngerecheled el lousubes er a rudam me a rudos. (1 Jn. 4:11) Ongerung, molebedebek aike el mo duubech sel mousubes. Kede locha mo ngosuir ngike el chad el tilemellii a rengud, ongdibel a mo ngar er a kltarreng, mekerreuii a deleuill er kid me a Jehovah, e kobekeklii a berraod el de chellungel. (2 Ko. 2:7; Kol. 3:14) A ulebongel e moluluuch el mo er ngike el soal a dousubes. Lak becherei Satan me letemellii a budech er a delongelem kau me a rekldemem er a klaumerang. (Efe. 4:26, 27) Kede ousbech er a ngelsuil a Jehovah a lsekum ngsoad el mo oibngid er a bedeklel a Satan.

15. Ngera sebeched el meruul sel bo longesang er a uldesued a omerellel a odam me a lechub e ngodos er kid, el ua lolekoi a Kolose 3:13, BT?

¹⁵ E kuk mekerang a lsekum a ta er a kldemem er a klaumerang a rullii a tekoi el kora kmal mengesang er a uldesuem? Ngera ungil moruul er ngii? Bora tkurrebab el klisichem el meruul a budech. E mouchais er a Jehovah el kirel.  Molengit er ngii me lomekngeltengat er ngike el chad el silebesengau e molengit er ngii me lengesukau el mes aike el ungil blekerdelel, el ike el blekerdelel el uchul me a Jehovah a kmal betik a rengul er ngii. (Lk. 6:28) A lsekum e ngdiak el sebechem el obes er a lerirellii e molatk er a ungil rolel e ngsebechem el mengedecheduch er ngii. Ngkmal ungil a obo molatk el kmo ngika dimlak er a rengul a tomellii a rengum. (Mt. 5:23, 24; 1 Ko. 13:7) E sel mongedecheduch er ngii e bo molatk el kmo ngika mle ungil a moktek er ngii. E a lsekum e ngdiak el soal el meruul er a budech? “Mkaberekakl a chetimiu rar chad.” Molemolem loba kllourreng el bedul ngii. (Monguiu er a Kolose 3:13, BT. *) E sel kot el klou a ultutelel a lak mongemekl er a ngesechel a rengum e le tia sebechel tomellii a deleuill er kau me a Jehovah. Lak becherei a ngii di el ngerang me lesoibesengau. Sel moruul el uaisei e ke ochotii el kmo ngbetik a rengum er a Jehovah el ngaruchei er a ngii di el tekoi.​—Psa. 119:165.

16. Ngera ngerechelel a derta me a derta er kid?

¹⁶ Kede kmal mengreos er a ileakl el techelled el sebeched el mesiou er a Jehovah el “tal delebechel” el ngar cheungel a “tal mengkerengel a sib”! (Jn. 10:16) A book el Organized to Do Jehovah’s Will er a 165 el llel a melekoi el kmo: “Kid el melai a klungioled er tia el kltarreng a ngerecheled el meleketek er ngii.” Me a leuaisei e ngkired el mesuub el “mo omes er a rudam me a rudos er kid el ua lomes er tir a Jehovah.” Kid el “mekekerei” el rokui a mekreos er osengel a Jehovah. Kau, nguaisei a osengem el kirir a rudam me a rudos er kau? A Jehovah a mes e dirrek el oba omereng el saul el kirel aike el bek el moruul el olengeseu e omekerreu er tir.​—Mt. 10:42.

17. Ngera kede mla tibir a rengud el mo meruul er ngii?

¹⁷ Ngbetik a rengud er a rekldemed er a klaumerang. Me kede mla ‘tuib a rengud el diak deluut el mo meruul olibesongel ma lechub e ng mo uchul e ng ruebet er a klengit a tar kid.’ (Rom 14:13) Kede omes er a rudam me a rudos er kid el lmuut el ungil er kid, e soad el mo ousubes er tir el ngar er a rengud. Me lak debechititerir a rebebil me bo luchul e kede mesibas. Bai dengiltii el mo “blechoel el telbiil er a rengud a meruul a ikel mo uchul a budech ma olisichel a delongeled.”​—Rom 14:19.