Ak mlechell er a May 19, 1940, er a Amioûn, Lebanon. Sesei el rak er uriul e a telungalek er ngak a millukl el mora beluu er a Tripoli. Ak mlukeroul er a telungalek el mla er ngii a deurreng er ngii el medengelii e mesiou er a Jehovah el Dios. Aki mle teim el ngalek. Tedei el redil me a reteru el sechal, e ngak a mle kot el kekerei. A udoud a dimlak lekot el klou a ultutelel el tekoi er a rechad er a blik. Sel kot el klou a ultutelel el tekoi er a klengar er kemam a omesubel a Biblia, miting, e olengeseu er a rebebil el mo medengelii a Dios.

Te mla er ngii a rengellitel el Kristiano er a ongdibel er kemam. A Michel Aboud a mle ta er tir. Ngika uluungerachel er a book study. Ngsilubii a klemerang er a New York e ulemuchel el omerk er a klumech er a Lebanon er a 1921. Ak melatk omerellel el mora reteru el odos el tilobed er a skuul er a Gilead el Anne me a Gwen Beavor. Ngkmal ullecholt omengull el mo er tir e ullengeseu er tir. Tirka kmal mlo ungil sechelimam. Betok el rak er uriul e ak milsa Ann er a Merikel. Ak dirrek el milsa Gwen. Ngika mlo bechil a Wilfred Gooch e mlo mesiou er a Bethel el ngar er a London, England.

Te di mle mekesai a Resioning er a Lebanon er a kkekerei. Engdi ngkmal mle ungil a rengmam louchais er a rebebil el kirel a Biblia. Aki mirruul el uaisei alta ki mlo chobangel a odechelakl er a remengeteklel a klechelid. Ak dirk melatk a ileakl el tekoi el dilubech.

A ta el taem e ngak me a ochedak er a Sana a ulemerk er a klumech er a ta el apartment building. Ngar ngii a ta el prist el mlei er sel ki mulengedecheduch er a rechad er ngii. Ngar ngii a chad el locha ulekerir. Ngika millekoi mekngit er a ochedak e ultbechii el ruebet er a stairs me ngmiltemall. Ngar ngii a ulemekedong er a bulis. Ngika el bulis a kmal mle ungil a blekerdelel e ngilsuir a ochedak el mukerreu er a telemellel. Te ngiluu ngike el prist el mora blil a bulis e miltik el kmo nguleba boes. Me a chief er a bulis a uleker er ngii el kmo: “Kau ke ngerang? Ke mengeteklel a klechelid, ke mengeteklir a redengerenger?”

A ta er a tekoi el dilubech a sel taem el ongdibel er kemam a mle rent er a bus el mo omerk er a klumech er a cheroid el basio. Ngkmal mle dmeu a rengmam el omerk er a klumech e a prist a mengideb er a rechad el me oldechelakl er kemam. Te ulemecheracheb er kemam e ometech er kemam er a bad. A demak a miltemall. Ak dirk melatk er a medal el di mle merserasech. Ngliluut el mora bus ngii me a delak e kemam a di mle mereched el okiuellir. Me nguaisei engdi ngkmal diak kubes a tekingel a delak er a lomekerreu a telemellel a demak. Ngdilu el kmo: “Jehovah mousubes er tir. Te diak lodengei a loruul.”

A kuk ta er a taem e aki mlo oldingel er a rechedemam er a belumam. A ta el ngarbab el mengeteklel a klechelid, el bisop a mlara blil a demak el rubak. Ngika el bisop a mle medengei el kmo a rechad er a blik a mle Sioning er a Jehovah. Alta ak mle elolem a rekik, ngulengengak e kmo, “Kau ngngera uchul me ngdiak mtelecholb?” Me ak dilu er ngii el kmo ngak a dirk ngalek, e a bo demetecholb e ngkired el mo medengelii a Biblia e mo oba mesisiich el klaumerang. Ngika dimlak el soal a nger er ngak me ngdilu er a demak el rubak el kmo ngkmal diak kulecholt a omengull.

Me nguaisei ngdimlak el betok a mekngit el tekoi el ki blo mchebangel. A oumesingd el chad er a Lebanon a ungil a rengrir e ungil a blekerdelir. Ngmle sebecham el mengedecheduch er a rebetok el chad el kirel a Biblia e mle betok aki mulsuub el obengterir.

Ngmla er ngii a ta el odam er a Venezuela el mle oldingel er a Lebanon er a kdirk ngar er a skuul. Ngika mlei er a miting er kemam e ulemuchel el kasisiik ngii me a ochedak er a Wafa. Cherengel a taem e te mlo bechiil e mlo kiei er a Venezuela. Sel loluches a Wafa e ngdi olengit er a demak el kmo ki molukl el mora Venezuela e le ngkmal mle miss er kemam. Omerolel a taem e aki kilengei e millukl el mong!

 Aki mlora Venezuela er a 1953 e mlo kiei er a Caracas er bita er a blil a president. Ak kmal dirk mle ngalek me a kmal uluusemeriar sel lengelakl a president el ngar er a ungil mlil. Me nguaisei engdi ngdimlak lebeot er a rechad er a blik el mo smau er a beches el beluu, omelekoi, siukang, kall, me a eltel a beluu. Te dirk ulemeksau er tir er tia el beches el klengar e ngii a duubech a kuk ta er a tekoi.

A demak a kora mlo diak lungil a tsios er ngii. Tia rirellemam el kora mo rrau a rengmam e le ngkmal mesisiich a bedengel. Ngkora diak el sebecham el lotkii a taem el demak a mle smecher. Te miltik el kmo ng pancreatic cancer, me ngmlora botk. Ngklengiterreng e le ta el sandei er uriul e ngmlo smecher.

Ngkmal meringel a dosaod er a klengiterreng el ki blo mchelebangel er ngii. Ngmle 13 a rekik er seikid el taem. Ngkmal dimlak ki momdasu el kmo a ta er a klebesei e ngmo mad a demak, e dimlak ki momdasu el kmo ngsebecham el lmuut el mo dmeu a rengmam. Ngmle telkib el taem el meringel er a delak el kongei el kmo ngmla mo dibus a bechil. Engdi ngmle kiram el melemolem er a klengar er kemam, e oeak a ngelsuil a Jehovah e ngmlo sebecham el meruul el uaisei. Sera le 16 a rekik e ak tilobed er a high school e kmal mle soak el olengeseu el mesiou er a telungalek er ngak.

A ochedak er a Sana a mlo bechil a Rubén Araujo, el ngii a tilobed er a skuul er a Gilead e liluut el mei er a Venezuela. Tirka ngileltii el mo melukl el mora New York. A telungalek er ngak a dilu el kmo ngkirek el mora skuul er a daingak me ak millukl el mora New York el mo obengkel a ochedak me a bechil e ngar er a skuul. A ochedak me a bechil a kmal ngilsukak el mukeroul er a tekoi er a klereng. Ngdirrek el mla er ngii a rudam el kmal mesisiich a klaumerang er tir el mlara ongdibel er kemam er a tekoi er a Sebangiol er a Brooklyn. Reteru er tir el blo kudengelterir a Milton Henschel me a Frederick Franz. Tirka milsiou er a Brooklyn Bethel.

Sera bocha el merek a kot el rak er ngak er a daingak e ak mlo melatk er a klengar er ngak. Ak milenguiu a suobel er a Ongkerongel el milsaod er a Rekristiano el mla er ngii a turrekong er tir el ngar er a omesiungir el mora Jehovah. Ak milseterir a re pioneer me a remesiou el ngar er a Bethel er a ongdibel er kemam el kmal dmeu a rengrir, e kmal mle soak el mo uai tir. Me nguaisei engdi ngak a dirkak metecholb. Ak mlo mtebengii a klungel a ultutelel a detengetengii a klengar er kid el mora Jehovah. Me ak miltecholb er a March 30, 1957.

Uriul er a kmetecholb e ak mlo melatk a mo pioneer. Ngkmal mle soak el mo pioneer, me nguaisei engdi ak milsa el kmo tia diak bo lebeot el tekoi. Ak mekera e pioneer e a osisiu el taem e a kngar er a skuul? Ngak me a telungalek er ngak er a Venezuela a mle blechoel el keluches el mesaod a mo diak kngar er a skuul e lmuut el mo remei el mo pioneer.

 Sera June 1957 e ak liluut el mora Caracas. Me nguaisei engdi ak milsa el kmo a telungalek er ngak a uluusbech a ngeso. Te uluusbech er a chad el mo oureor el mesiou er tir. Ak mekera e ngosuterir? Ngmlo er ngii a urerek er a bank me nguaisei engdi ngkmal mle soak el mo pioneer. Tiakid a uchul me ak liluut el me remei. Ak rirellii er a renguk a mo meruul el teblong. Me a kuluureor el mui el taem er a bank e a osisiu el taem e ak mle pioneer. Ak kmal mle mechesang engdi ngdirrek el kmal mle dmeu a renguk!

Ngliluut el kmal mo dmeu a renguk er a bo kudengelii a Sylvia, e a uriul e aki mlo bechiil. Ngika redil er a Dois el kmal mle betik a rengul er a Jehovah. Ngmillukl el mei er a Venezuela ngii me a rechad er a blil. Cherengel a taem e ngmlo er ngii a reteru el ngelekam el Michel (Mike) me a Samira. Ngdirrek el mlo ngerechelek el omekerreu er a delak el ngii a mlo kiei el obengkemam. Me alta ngmle kirek el mo stob el pioneer me bo el sebechek el kutmokl a ngerechelek er a telungalek er ngak, engdi ak di millemolem el blak a renguk el omerk er a klumech. Ngak me a Sylvia a mle auxiliary pioneer sel sebecham.

A rengelekek a dirk mlara skuul er a bok chelebangel er sel tekoi el dulsaod er ngii er a uchelel. Ngmle ungilbesul a klengar er kemam e tirke el kuluureor el obengterir er a bank a kmal milengull er ngak. Me nguaisei engdi ngmle soak sel lesekak a rechad e te mesa mesiungel a Jehovah. Aike el tekoi el mlara uldesuek er seikid el sils a kmal di milengesang er ngak. Me ak mlo dengchokl ngak me a bechik e mesaod a ududam. A lsekum ak mo merek el oureor er a bank e te mo meskak a klou el udoud sel kurael. Ngdimlak a belsam me a lsekum e aki omekbeot er a klengar er kemam, e aika el udoud a sebechel mesiou er kemam el kemanget el taem.

Ngdimlak el beot el tekoi engdi a bechik me a delak a kmal kilengei er a uldesuek. Ak luueta el mo pioneer. Ngmera el mle dmeu a renguk! Ak mle kltmokl el mo omuchel el pioneer e ngii a kuk duubech a ta er a tekoi.

A toktang er kemam a dilu el kmo a Sylvia a dioll. Ngkmal mle mechas a rengmam! Ngmle dmeu a rengmam engdi ak mlo omdasu er a omelilt er ngak el mo pioneer. Tia ngngera ngmo rullii er a omesiungek? Cherengel a taem e ngmlo sebecham el mo chelellakl a uldesuam me a rengmam e mlo omes el bedul uchei el kirel ngika el beches el chedal a telungalek er kemam. Engdi ngmekera omesiungek el pioneer?

 Uriul er aki mosaod a turrekong er kemam e aki tilbir el mo melemolem el oltirakl er a di mla telbilam. A ngelekam er a Gabriel a milechell er a April 1985. Ak mlo merek loureor er a bank e ulemuchel el pioneer er a June 1985. A uriul e ak mlo mesiou el lolengeseu er a Branch Committee. Engdi a branch a dimlak el ngar er a Caracas, me ngmle kirek lomekall el 50 el mael el mong el eru me a lechub e ngedei el taem er a ta el sandei.

A branch office a mlara La Victoria, me a ki tilbir el mo melukl el mo er tiakid el basio me bo lsebecham el mo kmeed er a Bethel. Tia kmal mle klou el omelodech. Ak mera el oba omereng el saul el kirel a telungalek er ngak. A ungil uldesuir a kmal ngilsukak. A ochedak er a Baha a kilengei el mo oba delak. E a Mike a mla mo bechiil me ngdi mle Samira me a Gabriel a kiei el obengkemam. Tia belkul a kmo te mo cheroid er a resechelirir er a Caracas. E a bechik er a Sylvia a mle kirel mo smau er a kekerei el beluu el kmal ngodech er a capital el kim kiliei er ngii el kmal di mle mechesang a blekeradel er ngii. E kemam el rokui a mle kiram el mo smau el kiei er a blai el kmal kekerei er sel di mla blimam. Chochoi, ngkmal mle betok a kiram el meruul el mo melukl el mora La Victoria.

Me nguaisei engdi a blekeradel a liluut el mengodech. A Gabriel a mlo bechiil e a Samira a mlo ileakl el kiei. E ngak me a Sylvia a mlo mesiou el ngar er a Bethel er a 2007 el me lmuut er chelechang. A kot el klou el ngelekam er a Mike a ta er a remechuodel e mesiou el pioneer ngii me a bechil er a Monica. A Gabriel me ngdirrek el ta er a remechuodel e ngii me a bechil er a Ambra a mesiou el ngar er a Italy. E a Samira a pioneer e dirrek el lolengeseu a ureor er a Bethel.

Nguaisei, ngmle kirek el meruul a meklou a ultutelel omelilt er a klengar er ngak. Engdi ngkmal diak kuuchel er a renguk el kirel. Ak mo lmuut el meruul a osisiu el omelilt. Ak mera el oba omereng el saul el kirel a ngerachel me a ileakl el techall er omesiou el ngar omesiungek el mora Jehovah. Ak mla mesa el kmo ngkmal klou a ultutelel a lolemolem el ngar ngii a mesisiich el deleuill er kid me a Jehovah. Alta omelilt el doruul a mekekerei me a lechub e ngmeklou, a Jehovah a sebechel meskid a budech el “diak el sebechel a chad el mo cherrungel el medengelii.” (Fil. 4:6, 7) Ngkmal dmeu a renguk ngak me a Sylvia el mesiou el ngar er a Bethel. Aki mesa el kmo a Jehovah a mla omekngeltengat a omelilt er kemam, e le ki melatk er ngii sel ki moruul omelilt.