1. Ngera uchul me a remesiungel a Jehovah a lebebil e te mo omdasu el kmo ngkmal di tir el tang?

A OUMESINGD er kid a lebebil e kede mo omdasu el kmo ngkmal di kid el tang. Di ngdi telkib e ngkuk mo ungil a rengud. Me nguaisei engdi te ngar ngii a blechoel el oldechelakl a uldesuir el kirel tia el tekoi. Te locha iliuekl er a rechad engdi te omelechesiu er tir el di tir el tang. A rebebil a meringel er tir a mo smau er a beches el ongdibel. A rekuk bebil a mle blechoel el meruul a rokui el tekoi lobengkel a telungalek er tir, engdi te mocha omelechesiu er tir el di tir el tang sel lolukl el mo cheroid er tir. Te ngar ngii a rebebil el mla orideterir a rebetik a rengrir er a kodall. E a Rekristiano el dirk mlei er a klemerang a kmal mo omdasu el kmo ngdi tir el tang sel bo lechebangel a ultok er a telungalek er tir me a lechub a resechelirir el diak el ngar er a klemerang. Te dirrek el mo omdasu el uaisei sel sekum te otngeklterir.

2. Ngera el ker a bo donger?

² A Jehovah a kmal ungil medengelkid. Ngmedengei sel bo domdasu el kmo ngkmal di kid el tang, e kmal soal ngosukid me ngmo diak domdasu el uaisei. Ngmekera e olengeseu er kid? Ngera sebeched el meruul sel bo domdasu el uaisei? Kede mekera ngosuterir tirke el ngar ongdibel el omdasu el uaisei? Ka me bo dosaod a nger er aika el ker.

3. Ngmilekera Jehovah e ochotii el kmo ngomekerreu er a Elias?

³ A Jehovah a kmal soal tirke el mengull er ngii a bo el deu a rengrir. Ngkmeed er a derta er kid e medengei sel de meeleb er aike el uldasu el rullid el mo mechitechut a rengud. (Psa. 145:18, 19) Ka molatk a blekerdelel el mora profet er ngii er a Elias. A Elias a kiliei er a ta er aike el kot el meringel el taem er a reksi er a rechad er a Israel. A rengarbab el chad er a Israel el dimlak  el betik a rengrir er a Jehovah a uleldechelakl er a remengull er ngii e kmal mle ileakl el sorir lomekoad er a Elias. (1 Ki. 19:1, 2) Ngdirrek el kmal mlo mechitechut a rengul a Elias e le ngulemdasu el kmo ngkmal di ngii el ta el profet a mengull er a Jehovah. (1 Ki. 19:10) A Jehovah a kmal di mle mereched el mo ngosuir a Elias. Ngulderechii a anghel el mo olterekokl er a rengul a Elias el kmo ngdiak di le ngii el tang. Te dirk mla er ngii a betok el chad er a Israel el mesiou er a Jehovah!​—1 Ki. 19:5, 18.

4. Ngmekera Markus 10:29, 30 e olecholt er a ulekerreuil a Jehovah el mora remesiungel el tir a mla mo diak lengai a ngelsurir a rechederir me a resechelirir?

⁴ A Jehovah a medengei el kmo sel dengiltii el mo mesiou er ngii e ngngar ngii a bebil el tekoi el bo dongoit. Nglocha mo diak lolengeseu er kid a rechedad me a resechelid el diak le ngar er a klemerang. A apostol Petrus a mle ta el loker er a Jesus el kmo: “Mesang, aki mla chemoit a rokui el tekoi e oltirakl er kau. Ng ngera bo kimngai?” (Mt. 19:27) A Jesus a ulelterekokl a rengrir a redisaiplo er ngii el kmo ngmo er ngii a klou el telungalek er tir er a klereng. (Monguiu er a Markus 10:29, 30.) E a Jehovah el bdelul tia el telungalek er a klereng a tibir el kmo ngmo olengeseu er tirke el sorir el mesiou er ngii. (Psa. 9:10) Molatk a bebil el tekoi el sebechem el meruul el mo nguu a ngelsuil a Jehovah sel bo loldechelakl er kau a uldesuem el kmo ngkmal di kau el tang.

5. Ngera klungiolel sel bo dolatk a rolel e a Jehovah a olengeseu er kid?

⁵ Molatk er a rolel e a Jehovah a olengeseu er kau. (Psa. 55:22) Tia mo ngosukau el mo tabesul osengem. A Carol * el mesobil el odos el diak a telungalek er ngii el ngar er a klemerang a kmo: “Sel kulebedebek er a rolel e a Jehovah a ngilsukak er aike el ringel el blo kchebangel, e ngngosukak el mo medengei el kmo ngkmal diak di lengak el tang. Ngdirrek el olterekokl er a renguk el kmo a Jehovah a mo olengeseu er ngak er a ngar medak.”

6. Ngmekera 1 Petrus 5:9, 10 e sebechel melisiich er tirke el omdasu el kmo ngkmal di tir el tang?

⁶ Molatk a rolel e a Jehovah olengeseu er a rekldemem er a klaumerang el tir omdasu el kmo ngdi tir el tang. (Monguiu er a 1 Petrus  5:9, 10.) A odam el Hiroshi el mla mo betok el rak el Sioning e diak a chedal a telungalek er ngii el ngar er a klemerang a kmo: “Ngar ongdibel e ngkmal sebeched el mesang el kmo kede rokui el di ngar ngii a tekoi el dechebangel. Sel dodengei el kmo kede rokui el melasem er a tkurrebab el sebeched el mesiou er a Jehovah, e ngkmal melisiich er tirke el diak a telungalek er tir el ngar er a klemerang.”

7. Ngmekera nglunguuch e ngosukau?

⁷ Mblechoel el meluluuch, menguiu er a Biblia, e mngar er a miting. Tia uldimukl er ngii a omouchais er a Jehovah aike el ngar er a rengum. (1 Pe. 5:7) A ngeasek el odos el Massiel er a lengiltii el mo mesiou er a Jehovah e ngmlo omelechesiu el kmo ngkmal di mle ngii el tang e le telungalek er ngii a diak losiou er a Jehovah. Ngmelekoi el kmo: “A ta er a klou a ultutelel el tekoi el kmal ngilsukak er sera bo kumdasu el kmo ngkmal di ngak el tang, a ngak el mle blak a renguk el meluluuch el mora Jehovah. Ak mlo melechesuar el kmo ngika Demak. Ak milluluuch el mo er ngii er a bek el sils, el betok el taem er a chelsel a ta el sils louchais er ngii aike el ngar er a renguk.”

8. Ngmekera sel monguiu er a Biblia e molebedebek e ngosukau?

⁸ Monguiu er a Tekingel a Dios er a bek el sils e molebedebek aike el cheldecheduch el lochotii el kmo a Jehovah a betik a rengul er kau. A odos el Bianca el ngii a kirel loutekangel a tekingir a rechedal a telungalek er ngii el mengitechut, a melekoi el kmo: “Ngkmal ngosukak sel kunguiu e kulebedebek a cheldecheduch er a Biblia me a klengar er a remesiungel a Jehovah el tir a mlo chobangel a osisiu el blekeradel el kchelebangel.” A rebebil er a Rekristiano a mla memorize a bades el kmal melisiich er tir el ua Psalm 27:10 me a Isaia 41:10. A rebebil a metik el kmo sel lorrenges a recording er aike el suobel el bo dosuub er a miting me a omengiuel a Biblia el mengetmokl er tir el kirel a miting, e ngngosuterir el mo diak lomelechesiu el kmo ngdi tir el tang.

9. Ngmekera sel obo er a miting e ngosukau?

⁹ Bora tkurrebab el sebechem el mora bek el miting. Ngmo smisichau. Ngdirrek el mo sebechem el mo medengelterir a rudam me a rudos er kau. (Heb. 10:24, 25) A Massiel el dulsaod er ngii er a uchei a kmo: “Alta ak kmal mle sekemerur, ak rirellii er a renguk el mora bek el miting e dirrek el mo onger. Tia ngilsukak el mo melechesuar el kmo ak chedal a ongdibel.”

10. Ngera uchul me ngklou a ultutelel el domak a klausechelei er kid lobengterir a reblak a rengrir el Kristiano?

¹⁰ Momak a klausechelei er kau lobengterir a reblak a rengrir el Kristiano. Mosiik er a resechelim er a ongdibel el sebechem el ngmai a klubelem er tir. Tirka sebechir el meklou, mekekerei, me a lechub e te chad er a ngodech  el beluu. A Biblia omeklatk er kid el kmo a “re mechuodel a mellomes a rengrir.” (Job 12:12, 13) A remeklou a dirrek el sebechir el ngmai a klubelir er a remekekerei. A David a kmal mle kekerei er a Jonathan engdi ngmla er ngii a kmes el deleongel er tir. (1 Sa. 18:1) A David me a Jonathan a mle kaingeseu el mesiou er a Jehovah er a chelsel a betok el meringel el blekeradel. (1 Sa. 23:16-18) A Irina el di ngii el tang a Sioning er a telungalek er ngii a kmo: “A rudam me a rudos er kid a mera el sebecherir el mo delad, demad, e ta er kid. A Jehovah a sebechel rulleterir el mo sel telungalek el dousbech er ngii.”

11. Ngera kirem el meruul er ngii a lsekum e ngsoam el omak a mesisiich el klausechelei er kau me a rebebil?

¹¹ Ngsebechel mo meringel er kid a omak a klausechelei er kid me a rebebil, tokubets a lsekum e kede sekemerur. A Ratna el kmal sekemerur el odos el silubii a klemerang alta ngmlo chobangel a ultok a kmo: “Ngmle kirek el kongei el kmo ak kuusbech er a ngelsuil a telungalek er ngak er a klereng.” Ngsebechel el mo meringel er kid ouchais aike el ngar er a rengud, me nguaisei engdi a kmes el deleongel a mouak loeak a ungil cheldecheduch. A resechelim a kmal sorir el melisiich e olengeseu er kau, me nguaisei engdi ngkirem el louchais er tir er a rolel e ngsebechir el meruul el uaisei.

12. Ngmekera berkel a klumech e ngosukau el mo er ngii a rungil sechelim?

¹² A ta er a kot el ungil rolel e ngsebeched lomak a klausechelei er kid me a rebebil a sel domerk er a klumech el obengterir. A Carol el dulsaod er ngii er a uchei a kmo: “Ngkmal mla mo er ngii a rungil sechelik e le kmilengoit a taem el obengterir el oldingel e meruul a tekoi el ngar omesiungam el mora Jehovah. Ngar aika el mereko el rak e a Jehovah a mla ngosukak el oeak tirkaikid el sechelik.” Ngsebeched el mesa el kmo ngkmal mo uchul a klungioled sel domak a klausechelei er kid lobengterir a reblak a rengrir el Kristiano. A Jehovah ousbech er tiakid el klausechelei er kid me a rebebil el olengeseu er kid el mo mesisiich a mengitechut el uldasu, el uai sel bo domdasu el kmo ngkmal di kid el tang.​—Osi. 17:17.

13. Ngera ngerechelir a rokui el chedal a ongdibel?

¹³ A rokui el chedal a ongdibel a ngerechelir el rullii a ongdibel el mo basio el dolechesuar a ulekerreu me a bltikerreng er ngii, el sel lebo er ngii a rechad e te diak lomelechesiu el kmo ngdi tir el tang. (Jn. 13:35) A tekoi el dolekoi me a doruul a kmal klou a lerellii! Molatk a tekingel a ta el odos: “Sera ksuubii a klemerang e a rechedal a ongdibel a mlo telungalek er ngak. Ngkmal dimlak el sebechek el mo ta er a Sioning er a Jehovah a lemlak tir.” Ngera sebechem el meruul el ngosuterir tirke el diak a telungalek er tir er a klemerang el mo omelechesiu el kmo te chedal a ongdibel?

14. Ngera sebechem el meruul el mekur a klausechelei er kau me tirke el beches el mei er a ongdibel?

¹⁴ Mosiik a techall el mo omak a deleuill er kau me tirke el beches el mei er a ongdibel. Ngsebeched el outkeu er tirke el beches el mei er a ongdibel. (Rom 15:7) Me nguaisei, ngdiak di doutkeu er tir e ngsoad el mekekokid el mekurulii a kmes el klausechelei er kid me tir. Me molecholt er a klemeriarreng er tirke el beches el mei er a ongdibel. Molasem el mo medengei a tekoi el lechelebangel e a osisiu el taem e lak mrelleterir el mo merur. A rebebil a meringel er tir ouchais aike el ngar er a rengrir me bom kerekikl me lak bo morrimel er tir. Bai oeak a ungil el omerellem e mokekokau loker er tir a ker e moba kllourreng el orrenges er tir. El ua tiang, moker er tir er a rolel e te mlo medengelii a klemerang.

15. Te mekera Rekristiano el mesisiich a klaumerang er tir e ngosuterir a rengar er a ongdibel?

 ¹⁵ A rokui el ngar er a ongdibel a mukeroul er a tekoi er a klereng a lsekum a Rekristiano el mesisiich a klaumerang er tir a ochotii el kmo te kmal omekerreu er tir, tokubets a lsekum a remechuodel a meruul el uaisei. A Melissa el delal a milekurulii er a klemerang a kmo: “Ak kmal oba omereng el saul el kirir tirke el odam el mlo ua le demak er a klemerang. Sel bo kuusbech el mengedecheduch er a chad, e ngmla er ngii a blechoel el kongei lorrenges er ngak.” A Mauricio, el kmal mlo mekngit a rengul e omdasu el kmo ngkmal di mla mo ngii el tang e le ngike el milsuub lobengkel a chilitii a klemerang, a melekoi el kmo: “A remechuodel a ulechotii el kmo te kmal omekerreu er ngak. Tia kmal ngilsukak. Te mle blechoel el mengedecheduch er ngak. Te uleldingel el obengkek e uluuchais aike el lesiluub er a loruul a omesubir el di tir el tang. Te dirrek el uluusekool a sports el obengkek.” A Melissa me a Mauricio a mesiou el mui el taem.

16-17. Ngoeak a ngera el rolel e ngsebeched el ngosuterir a rebebil?

¹⁶ Molengeseu er tir. (Gal. 6:10) A Leo el missionari el cheroid er a telungalek er ngii a kmo: “A oumesingd el taem e kede kmal di ousbech er a ungil omeruul er a melemalt el taem. Ak melatk er sel taem er ak accident er a mlai. Ak mera el mle stress er a bo krei engdi ngngar ngii a obekel el mle invite er ngak el mo omengur er a blirir. Ak mla obes aike el ki mulengang, engdi ngkmal diak kubes er tir el kmal di ulerrenges er ngak. Ngkmal mlo ungil a renguk er a uriul!”

¹⁷ Ngkmal dmeu a rengud sel lengar ngii a ta el sils el ongdibel me a meklou el ongdibel e le kede mo dmak el obengterir a rebebil e mesaod a prokuram el ngar ngii. Me nguaisei engdi a Carol el dulsaod er ngii er a uchei a kmo: “Ngkmal meringel er ngak aike el ta el sils el ongdibel me a meklou el ongdibel.” E ngera uchul? Ngmelemolem el melekoi el kmo: “Alta ak iliuekl er a rebetok el dart me a lechub te telael el rudam me a rudos engdi tirka blechoel el obengterir a retelungalek er tir. Ngar aikakid el taem e ak kmal mo melechesuar el kmo ngkmal di ngak el tang.” A rebebil a tokubets el meringel er tir a mora meklou el ongdibel me a ta el sils el ongdibel sel lemad a becherir. Kau, ke medengelii a chelebangel a chouaika el omelsemai? Ngsebechem el invite er ngii el mo teloi er a telungalek er kau?

18. Ngmekera sebeched el oltaut er a 2 Korinth 6:11-13, NW sel domtechakl er a rechad?

 ¹⁸ Mongoit a taem el obengterir. Molasem el melai er a rekakerous el odam me a odos el mo teloi er kau sel moruul a rolel ongelaod, tokubets tirke el lomdasu el kmo ngkmal di tir el tang. Ngkmal soad el ‘mok a rengud’ el mo er chouai tirkang. (Monguiu er a 2 Korinth 6:11-13, NW. *) A Melissa el dulsaod er ngii er a uchei a kmo: “Ngkmal mle dmeu a renguk sel le invite er ngak a rudam me a rudos el mora blirir me a lechub e ak kubengterir el ngar er a omerael.” Ngngar ngii a chad er a ongdibel el sebechem el lomtechakl er ngii?

19. Ngoingera el taem e a rekldemed er a klaumerang a locha kmal mo ousbech er kid el mo obengterir?

¹⁹ Ngngar ngii aike el ileakl el taem el rekldemed er a klaumerang a locha kmal mo ousbech er kid el mengoit a taem el obengterir. A rebebil a locha meringel er tir a obengterir a telungalek er tir el diak el ngar er a klemerang er a temel a holidays. A rekuk bebil a locha kmal meringel er tir a sils er a kodellel a betik er a rengrir. Sel dolengit el mo obengterir a rudam me a rudos el chelebangel aika el tekoi, e kede ochotii el kmo kede “meral omekerreu” er tir.​—Fil. 2:20.

20. Ngmekera tekingel a Jesus el ngar er a Mateus 12:48-50 e ngosukid sel bo domdasu el kmo ngkmal di kid el tang?

²⁰ Ngar ngii a betok el uchul me a Kristiano a mo omdasu el kmo ngkmal di ngii el tang. Engdi ngkmal diak el kired lobes el kmo a Jehovah a kmal ungil medengei sel bo domdasu el uaisei. Ngblechoel el meskid aike el dousbech, el oumesingd el taem e ngoeak a rekldemed er a klaumerang. (Monguiu er a Mateus 12:48-50.) Mochotii er a Jehovah el kmo ke kmal oba omereng el saul el kirel a telungalek er kau er a klereng loeak sel bora tkurrebab el sebechem el olengeseu er a rudam me a rudos er kau. Me alta ngbetok a mora uldesued engdi lak dobes el kmo ngkmal diak di lekid el tang e le Jehovah a blechoel el obengked!