A LISA kmo: “A ungil omerellir a rudam me a rudos iseikid a kmal riretechii a renguk.” * Ngika mesaod er sel uchul me ngmlo soal a klemerang. Tia osisiu el kirel a Anne el ngii a melekoi el kmo: “Ngdimlak el osisechakl e ngbai ngmlo soak a klemerang e le tir el kmal mle ungil omerellir el mei er ngak.” Tirka el teru el odos er chelechang a kmal sorir el menguiu er a Biblia e melebedebek a longuiu, me nguaisei engdi ungil omeruul a kmal klou a lerirellii el mo er tir.

Ngmekera doruul a ungil er a rolel e ngmo remutech a rengrir a rechad? Ka me dosaod eru el rolel: oeak a tekinged me a omerelled. E a uriul e kede mo mesaod el kmo te rua techa dolecholt er tia el blekeradel el mo er tir.

Ngike el ungil bechiil el redil losaod er ngii a 31 el bliongel er a Osisechakl a oba “llach er omeruul el ungil” el ngar omelekingel. (Osi. 31:26, NW) Ngmecherei tia el “llach” me ngomekrael er a delecherul a ngerel me a tekoi el lolekoi. A rechedam me ngkirel tia el “llach” el ngar omelekingir. A ruungalek a kmal ungil medengei el kmo a lemekngit el mengedecheduch e loldiu e medecherecher a ngerir el mora rengelekir e ngngar ngii a mekngit el bo lerellii el mo er tir. A ruungalek sel lungil mengedecheduch e ngmo beot er a rengelekir el mo orrenges e olengesenges er tir.

Me a omoungalek me a lak, e ngmekera sebechel mo ungil a rolel omongedecheduch? Kede metik er a nger er ngii er sel kot el tedebechel a Osisechakl 31:26, NW: “Ngmengedecheduch loeak a llomeserreng.” Tia uldimukl er ngii a mo ungil melilt a tekoi el dolekoi me a dirrek el delecherul a ngered. Ngmo ngosukid sel di lekid loker, ‘Aika el bo kulekoi e ngmo omuchel a ngasecherreng me a lechub e ngmo olleklii a blekeradel?’ (Osi. 15:1) Chochoi, ngolechotel a llomeserreng sel dolatk a tekinged er uchei er a dongedecheduch.

A lmuut el ta er a osisechakl a kmo: “A lak dungil el dobedebek a tekoi e dolekoi e ng ua saider el merus.” (Osi 12:18) Sel dolatk er a bo lerellii el mora rechad a tekinged me a delecherul a ngered e ngmo beot er kid el mo omtebechel aike el me tobed er a ngered. Chochoi sel bo doltirakl er a “llach er omeruul el ungil” e ngmo ngosukid me a delecherul a ngered me aike el dolekoi a diak bo lolemall er a rebebil. (Efe. 4:31, 32) Kede mo mtechei a diak lungil uldasu me a cheldecheduch lolab a ungil e melisiich e medemedemek el cheldecheduch. A Jehovah kiltmeklii a ungil kerebai er a longedecheduch er a mesiungel er a Elias er a lemedakt. Ngike el anghel el ulemtechei er a Jehovah er a longedecheduch e ngmle “kekerekel mengelulau.” (1 Ki. 19:12) Me nguaisei a bo doruul a ungil e ngdiak di lengar er a rolel a cheldecheduch. Ngdirrek el kirel ngar er a omerelled. Ngmekera doruul el uaisei?

Sel doukerebai er a Jehovah e kede mo odekiar a ungil omelekinged er a ungil omeruul. (Efe. 4:32; 5:1, 2) A Lisa el dulsaod er ngii er a uchei a mesaod el kirel a ungil omerellir a Resioning el kmo: “Sera di lemereched el dmu  er kemam el mo melukl el tuobed er a blimam e a reteru el obekel er a ongdibel a ngila off er tir er a ureor e me olengeseu er kemam el pack a kloklam. Tiakid el taem e ngdirkak bo kusuub er a Biblia!” Aika el ungil omerellir a rirellii a Lisa el mo dmolech el merriter er a klemerang.

Anne el dulsaod er ngii er a uchelel me ngdirrek el kmal oba omereng el saul kirel a ungil omerellir a Resioning el mo er ngii. Ngkmo: “Beluulechad el uaisei a uchul me ngmeringel er ngak oumera er a rechad. Ak uluumededenger er a Resioning er ak kkot el mo medengelterir. Ak mlo melatk, ‘Ngera uchul me te olecholt er a klemeriarreng el mei er ngak?’ Me nguaisei engdi a ungil omerellel ngike el milsuub a Biblia lobengkek a rirellak el mo oumerang er ngii.” Me ngera dilubech? Ngmelemolem el melekoi el kmo: “A uriul e ngmlo sebechek el mo ungil melatk a tekoi el kusuub.”

Mutebengii el kmo a ungil omerellir a rechedal ongdibel a kmal rirutech a rengrir e ngilsuterir el mo sorir el mo medengelii a klemerang. A ungil omerellir a rechedal ongdibel el mo er tir a ngilsuterir el mok a rengrir.

A rebebil a locha blekerdelir el klikmechur e ungil mengedecheduch le ngsiukang er tir a uchul. Kede chemat er a chad el meruul el uaisei loltirakl er a siukang er ngii me a lechub a lsekum e ngkuk di blekerdelel. Engdi a lsekum e ngdi aikakid a uchul me kede meruul a ungil e tia diak lebelkul a kmo kede oukerebai er a Jehovah.​—Momekesiu er a Rellir 28:2.

A mera el ungilreng a ta er a rodech er a chedaol reng er a Dios. (Gal. 5:22, 23) Me a bo domekeroul er tia el blekeradel e ngbelkul a kmo kede mecherei a chedaol reng er a Dios me ngomekrael er a uldesued me a omerelled. Sel doruul uaisei e kede oukerebai er a Jehovah me a Jesus. E kid el Kristiano a kmal omekerreu er a rechad. Ngbetik a rengud er a Jehovah el Dios me a rechad. Sel bo leuaisei e tiakid el blekeradel a mo mesisiich el blekerdeled el mera el ngar er a rengud, e odeuir a rengul a Dios.

Nglocha beot er kid olecholt er tia el blekeradel e oba omereng el saul el mora rechad el ungil mei er kid me tirke el dodengelterir. (2 Sa. 2:6; Kol. 3:15) Engdi kede mo mekerang a lsekum e kede mo omelechesiu el kmo a chad a diak el rredemelel a mocholt er tia el blekeradel?

Molatk er tiang: a Jehovah ngike el kot el ngarbab lolecholt er a ungilreng el mei er kid alta ngdiak derredemelel. Ngar er a Tekingel e ngosisecheklid er a klou ultutelel el tekoi el kirel olecholt er tia el blekeradel. Ngar er aike el Bades el tekoi er a Grik e ngousbech er tia el tekoi el “ungilreng el diak derredemelel” el betok el taem. Ngmekera Dios e olecholt er tia el blekeradel el mei er kid?

Molatk er a rolel e a Jehovah mla meruul a ungil el mora rokui el chad loeak a lomesterir aike el lousbech el mo melemolem el ngar. (Mt. 5:45) Me a lmuut kung, a uchei er a bo dodengelii a Jehovah e ngulechotii tia el blekeradel el mei er kid. (Efe. 2:4, 5, 8) El ua tiang, ngmilsterir a rechad ngike el kot el ungil er ngii, el di ta el mera el Ngelekel. A apostol Paulus a milluches el kmo a Jehovah milskid a olubet el “iltetel a grazia [er ngii] a uchul.” (Efe. 1:7, BT) Me a dirrek sel derebet er a klengit e dekingtir a rengul a Jehovah e ngdirk melemolem el omekrael e olisechakl er kid. A ulekrael er ngii me a tekingel a ua “mechitechut el chull.” (Dut. 32:2) Ngkmal diak el sebeched el mtechei aike el rokui el ungil el bla lebeskid a Jehovah. E a mera er ngii kede ultuil er a ungilreng er ngii el kirel a klengar er a ngar medad.​—Momekesiu er a 1 Petrus 1:13.

Tia el blekerdelel a Jehovah a kmal locheuir a rengud el mo er ngii e odbechid el mo olecholt er ngii. Me ngdiak di dolecholt er ngii el mora re ileakl el chad, e kede bai mora tkurrebab el sebeched el mo oukerebai er a Jehovah loeak sel dolecholt er ngii el mora rechad er a bek el sils. (1 Th. 5:15) Sel bo leblekerdeled lolecholt er tia el blekeradel e kede mo ua ngau el mengeald er a blsechel a kelekolt. Kede ungil omelisiich el mora rechedal a telungalek er kid, rudam me a rudos er kid, rechad el dedak loureor, rengalek el dedak el ngar er a skuul, me a retonari er kid.

Molatk er a klungiaol el bo lengai er a ungil omelekingem me a omerellem a rechedal a telungalek er kau me a lechub e ngongdibel. Te locha ngar ngii tirke el ngar ongdibel el kmal ousbech a ngeso el mengetmokl er a blirir me a maori er tir me a lechub e te ousbech a ngeso er a ua mo shopping. Me a dirrek sel moldingel e bo modengelii a chad lousbech a ngeso, e ngngar ngii a sebechem el meruul el ngosuir?

Me doukerebai er a Jehovah loeak sel bo doltirakl er a “llach er omeruul el ungil” el ngar er a omelekinged me a omerelled.