A Biblia diak lolekoi. Engdi ngouchais a ileakl el tekoi el locha ngar ngii a lerirellii er a omelilt er tir.

A anghel a dilu er a Maria el kmo ngmo dioll e mechellii a ngalek. A anghel er a louchais er tia el klumech e a Maria me a Josef a dirk kiliei er a Nasareth, el belual a Josef el ngar er a Galilea. (Lk. 1:26-31; 2:4) Uriul er a lemei el ngar er a Ekipten, e te liluut el mora Nasareth. A Jesus a mlukeroul er tiang e mlo okedongall el chad er a Nasareth. (Mt. 2:19-23) Me a uchul me sel deletkii a Nasareth e kede melatk er a Jesus, Josef, me a Maria.

A Maria mla er ngii a chedal el ngklel a Elisabeth el kiliei er a Juda. Ngika mle bechil a prist Sekaria e mle delal a Johanes el Chad er a Techolb. (Lk. 1:5, 9, 13, 36) Maria mlo odngelii a Elisabeth e kiliei lobengkel er a Juda el edei el buil. A uriul e ngliluut el mora Nasareth. (Lk. 1:39, 40, 56) Me a Maria mla er ngii a klemedengei er ngii er a beluu er a Juda.

Cherengel a taem e a Josef a mle kirel el mo ‘meluches er a ngklel’ er a belual. Me a Josef a mlara Nasareth e mirrael el mora Bethlehem, el beluu el “mlechell er ngii a King David.” A doltirakl er a ulaoch, e tia dirrek el sel beluu el bo lemechell er ngii a Mesias. (Lk. 2:3, 4; 1 Sa. 17:15; 20:6; Mik. 5:2) A uriul er a lebechellii a Jesus er tia el beluu a Maria, e a Josef a dimlak loba el lmuut el merael er tia el kemanget lomerael el mora Nasareth loba tolechoi. Te millemolem el kiei er a Bethlehem, el ngii a bekord el 6 el mael a cherridel er a Jerusalem. Me ngbeot er tir oba ngalek el mora templo e melenget loltirakl er a Llach.​—Lev. 12:2, 6-8; Lk. 2:22-24.

A anghel er a Dios uluuchais er a Maria er a uchei el kmo a ngelekel a mo nguu a “kingall ra demal el David, e ngii a mo mengedereder.” Me a Josef me a Maria te mlo mtebengii a ileakl luchul me a Jesus a mlechell er a belual a David? (Lk. 1:32, 33, BT; 2:11, 17) Te locha millatk el kmo ngolechotel a llomeserreng a lolemolem el ngar tiang e longiil er a ulekrael er a Dios el kmo ngera ongingil bo loruul er ngii.

Ngdiak dodengei el kmo ngmle ua klteketel a ngerang el lengar er a Bethlehem e a remilsuub a btuch a duum. Engdi ngar tiakid el taem e te mla mo kiei er a blai me a ngelekir a dikea el tolechoi, ngmla mo “ngalek.” (Mt. 2:11, BT) Me te dimlak lluut el mora Nasareth, te bai rirellii a delengcheklir er a Bethlehem.

Herodes ultebedii a tekingel el “mo omekoad er a re bek el ngalek el sechal er a Bethlehem . . . el ngar eru rekrir el mor iou.” (Mt. 2:16) A anghel uluuchais er a Josef el kirel tiang, me ngchiliis ngii me a Maria me a Jesus el mora Ekipten, e millemolem el kiei er isei el mo lmuut er a kodellel a Herodes. Uriul e a Josef a ngiluu a telungalek er ngii el mora Nasareth. Ngera uchul me te dimlak el lluut el mora Bethlehem? Le ngelekel a Herodes el Arkelaus a mlara Judea e kmal mle mekngit el chad, me a anghel a dirrek luluuchais er tir el kmo ngkengaol a lluut el mong. Ngmle sebechir el omekeroul er a Jesus el mo mengull er a Dios er a Nasareth e diak lemekesakl.​—Mt. 2:19-22; 13:55; Lk. 2:39, 52.

Engdi a Josef a mlad er uchei er a bo lsebechir a rebebil el mora eanged. Me ngika mo mekiis el mei er tia el chutem. A rebetok a mo er ngii a techellir el mo medengelii e suub a lmuut el betok el kirel a uchul e ngii me a Maria millemolem el ngar er a Bethlehem er a uriul er a cherellel a Jesus.