A rechad er a blik a tilobed er a Estonia er a temel Ongeru el Mekemad e mlora Germany, el beluu el kmlechell er ngii. Uriul er a kmechell e te milengetmokl er tir el mo melukl el mora Canada. A kot el blimam a mlara bita er a beluu er a Ottawa, Canada. Tia mle kekerei el blai el dirrek el mle blil a malk. Aki kmal mle chebuul, me nguaisei ngmle sebecham el menga ngais a letutau.

A ta er a klebesei, e a Resioning er a Jehovah chiliuii el mora delak a Ocholt 21:3, 4. Tia kmal riretechii a rengul me nglilangel. A tane er a klemerang a mlukeroul me a delak me a demak a ulengeriakl el mo nguu a techolb.

Alta rechad er a blik a dimlak el sal medengei a tekoi er a Merikel, engdi ngkmal mle blak a rengrir. Ngbekord el bek el Sebadong el demak a ulebekak ngak me a kekerei el ochedak er a Sylvia el mo omerk er a klumech, mo lmuut er a luluureor el mo klebesei er a factory el melt a kleim el sens. E bek el sandei el ki mdak el mesuub er a Ongkerongel el telungalek. A delak me a demak a dillemii a bltikerreng el mora Dios er a chelsel a renguk. Tia uldbechak el mo tongetengii a klengar er ngak el mora Jehovah er a 1956 er a leteruich a rekik. Ngmesisiich el bltkil a rengrir el mora Jehovah a mla melisiich er ngak el mo melemolem el mesiou er ngii.

Uriul er a ktobed er a high school, e ngngar ngii a kora mlo mengesang er ngak. A kulemdasu el kmo a bok pioneer e ngdiak el sebechek el mengereker a enough el udoud el suebek el mo omes a beluu er a beluulechad. Ak miltik er a urerek er a ta el radio station el orrael ongngak, e kmal mle soak tia el ureor. Engdi kuluureor a leklebesei me ak mle blechoel el miss a miting e ulebengterir a rechad el dimlak el betik a rengrir er a Dios. Cherengel a taem e a ukltkek a rirellak el mo meruul omelodech er a klengar er ngak.

Ak millukl e mora Oshawa, Ontario. Ngar tiang e ak mlo medengelii a Ray Norman me a ochedal er a Lesli me a lmuut el bebil er a re regular pioneer. Tirka rirellak el mo omelechesiu el kmo ak ta er tir. A deurreng el kilsang er tir a rirellak el lmuut el mo merriter a turrekong er ngak. Te millisiich er ngak el mo pioneer, me a kulemuchel er a September 1966. Ngkmal mle dmeu a renguk me a klengar a kora kmal mle ungil. Me nguaisei engdi mla er ngii a meklou a ultutelel omelodech el mengiil er ngak.

Sera kdirk ngar er a high school e ak mle apply el mora Bethel el ngar er a Toronto, Canada. Uriul er  a kumuchel el pioneer e te mle invite er ngak el mora Bethel el eua el rak. Engdi ngkmal mle soak a Lesli me ak mle bekikl el kmo a kkengei er tiang e ngdiak lluut el mo mesang. Uriul er a betok e kemanget el nglunguuch, e ak kilengei el mora Bethel alta ngkmal mle mekngit a renguk el silmesmechii a Lesli.

A kuluureor er a blil omesilek er a Bethel e a uriul e ak mlo secretary. E a Lesli mlo special pioneer er a Gatineau, Quebec. Ak mle blechoel el melebedebek el kmo ngngera ngmeruul er ngii me ngak, ak mle ungil melilt. Engdi ngdilubech a kmal ungil tekoi er a klengar er ngak. Ochedal a Lesli er a Ray a mlei e mesiou el ngar er a Bethel e mlo roommate er ngak! Tia uchul me ngmlo sebechek el lmuut el mo chadecheduch ngak me a Lesli. Aki mlo bechiil er a February 27, 1971, el ngii a ulebongel el sils er a eua el rak er omesiungek er a Bethel.

Te mle assign er kemam el mo mesiou er a ongdibel el ngar er a Quebec el melekoi a tekoi er a French. Sesei el rak er uriul e te mle invite er kemam el mo mesiou el oldingel ongdibel. Ngmle 28 a rekik. A kulemdasu el kmo ak kmal dirk kekerei e diak rredemelel, engdi bades er a Jeremia 1:7, 8 a kmal millisiich er ngak. Me nguaisei a Lesli mle meringel er ngii a mechiuaiu e le ngmle tela lengar a accident er a mlai. Me aki ulemdasu el kmo ngkmal mo meringel tia el omesiou. Me nguaisei a Lesli dilu el kmo, “A lsekum a Jehovah olengit er kid el mo meruul er a tekoi, e ngdiak bai lungil a dolasem el meruul er ngii?” Me aki kilengei er tia el assignment e mirruul er ngii el 17 el rak.

Ak mle mechesang er a ngerechelek el circuit overseer me ngdimlak leblechoel el ngar ngii a temek el mengoit er ngii lobengkel a Lesli. Me ngngar ngii a lmuut el ta er a tekoi el mle kirek el suubii. Ng Monday er a kmal dirk tutau e ngii ouring a chesimer. Ngdimlak a chad er a tuangel, ngdi mle sualo el ngar ngii a dekedekel a tebel, rodech, cheese, blauang, bilong, kob, me a note el kmo, “Mnguu a bechim el mo ou picnic.” Ngkmal mle ungil a eanged. Engdi ak dilu er a Lesli el kmo ngmla er ngii a cheldecheduch el kirek loureor me ngdiak el sebechek el mong. Ngmle telkib el mekngit a rengul engdi ngmle understand. Ak mlo dengchokl er a tebelek e a ukltkek a mocha mengesang er ngak. Ak mlo melatk er a Efesus 5:25, 28. Aika el tekingel a Jehovah, ngmillisiich er ngak el mo melatk aike el lousbech a bechik? Uriul er a kululuuch, e ak dilu er a Lesli el kmo, “Dorael.” Ngkmal mlo ungil a rengul. Aki mlora basio el ngar bita er a omoachel e mirrekii ngii el dekedek, e milengoit er a ta er aike el kot lungil sils er kemam el dmak. E dirk mle sebechek el kutmokl a cheldechedechak.

Ngkmal mle dmeu a rengmam er a omesiungam loldingel ongdibel, el betok er ngii a mlara British Columbia el mora Newfoundland. Me ngak a ulemais a beluu el ua urungulek er a kkekerei. Ak millatk el kirel a skuul er a Gilead engdi ngdimlak el soak el mo missionari er a ngodech el beluu. A remissionari a mle ileakl el chad, e ngak a dimlak kumdasu el kmo ak rredemelel. Ak dirrek el mle medakt el kmo te mo  el oldurokl er kemam el mora Africa el mlara er ngii a rakt me a mekemad er ngii. Ngkmal mle dmeu a renguk el ngar er a Canada.

Sera 1992 e a bebil er aike el beluu el mlara cheungel a Soviet Union a mlo sebeched el lmuut el omerk er ngii me te ulengit er kemam el melukl el mo missionari er a Estonia. Ngkmal mle mechas a rengmam engdi ki milluluuch el kirel. E liluut el melatk, ‘A lsekum a Jehovah olengit er kid el mo meruul er a tekoi, ngdiak lungil dolasem el meruul er ngii?’ Me aki kilengei e mlo melatk, ‘Ngdiak debora Africa.’

Me aki di mle mereched el mo mesuub a tekoi er a Estonia. Sesei el buil er kemam el ngar tia el beluu e tullengit er kemam el mo mesiou el oldingel ongdibel. Te ullengit er kemam el mo oldingel a kmeed el 46 el ongdibel me a group el ngar er a Estonia, Latvia, me a Lithuania, me a dirrek el Kaliningrad, Russia. Tia mle belkul a kmo ngkiram el mesuub a bebil tekoi er a Latvia, Lithuania, me a Russia. Tia kmal mle meringel. Engdi rudam me a rudos a kmal mle dmeu a rengrir e millasem el olengeseu er kemam el mo medengei a tekingir. E a 1999 e ngmlo er ngii a branch office er a Estonia, e ngak a mlukngerachel el mo mesiou el ta er a chedal a Branch Committee lobengkel a Toomas Edur, Lembit Reile, me a Tommi Kauko.

Aki mlo medengelterir a rebetok el Sioning el luldiketerir el mora Siberia. Alta te mlo chobangel a ringel er aike el blil a kelebus e mlo cheroid er a telungalek er tir engdi ngdimlak bo lekesib a rengrir e mekngit a rengrir. Te millemolem loba deurreng me a blakerreng el omerk er a klumech. Tia ngilsukemam el mo mesa el kmo ngsebeched loutekangel e dmeu a rengud er a chelsel a meringel el blekeradel.

Aki kmal mle meringel loureor el betok el rak e dimlak ki mongoit a taem el olengull me a Lesli a mlo omelechesiu er ngii el kmal di mesaul a bedengel. Me aki millatk a lmuut el mora Canada. Ngdimlak ki modengei el kmo ngmle uaisei e le ngii el smecher er a secher el okedongall el fibromyalgia. Sera le invite er kemam el mora skuul er a branch el ngar er a Patterson, New York er a Merikel e ngdimlak ki momdasu el kmo ngsebecham el mong. Uriul er aki blak a rengmam el meluluuch el kirel e aki kilengei el mong. A Jehovah kmal ulemekngeltengat er tia el omelilt. Sera ki mngar tia el skuul e a Lesli mlo sebechel nguu a ukeruul lousbech er ngii. Me ngmle sebecham el lmuut el mo meruul a ngerechelam el ua ngar er a mong.

A ta er a klebesei er a 2008 er aki mngar er a Estonia, e aki ngiluu a dengua el mlara headquarters lolengit er kemam el kmo ngsebecham el mora Congo. Ngkmal mle mechas a renguk, tokubets e le ngkirek longer er tir er a ongingil sils. Uchelel e ngdimlak kuuchais er a Lesli le kmedengei el kmo ngmo diak el sebechel mechiuaiu. Ngak a dimlak kmechiuaiu e mle meringel el meluluuch louchais er a Jehovah er a uchul me ak mle bekikl el mora Africa.

A tutau er a kuuchais er a Lesli e aki mlo melatk: “A Jehovah olengit er kid el mora Africa. Kede mekera medengei el kmo ngdiak el sebeched me a ka bo ledeu a rengud a lsekum e ngdiak dolasem er ngii?”  Me a uriul er a 16 el rak el ngar er a Estonia e aki silebek el mora Kinshasa, Congo. Obis er a branch a mla er ngii a klebokel el sers er ngii e kmal mle budech. A ta er a tekoi lengiluu a Lesli loia er a room er kemam a card el lulebang er a ki mtobed er a Canada. Tia el card a kmo, “Bo ledeu a rengum el ngar sel omngar ngii.” Uriul er a ki bo modengelterir a rudam, ki momuchel a omesubel a Biblia, e ki moldeu a rengmam el mesiou el missionari, e ngliluut el mukeroul a deurreng er kemam er a omesiungam. Cherengel a taem e ngmlo er ngii a ileakl el techellam el oldingel a 13 el beluu er a Africa lomtechei er a branch. Ngmlo sebecham el mo medengelterir a rebetok el bedengir a rechad. Ngmlo diak sel sebekreng er ngak el kirel a Africa, me aki kmal mirreng a sulel a Jehovah el ngilikemam el mora Africa.

Ngar er a Congo e te milskemam a kakerous el bedengel a kall el ki mulemdasu el kmo ngdiak el sebecham el kmang, el ua insects. Engdi sera ki meseterir a rudam el kmal sorir el mengang e aki milengarm e kmal mlo somam.

Ngmle sebecham el mora ike el beluu el ngar er a ongos e melisiich er tir e omesterir aike el lousbech. Aika mla er ngii a mekekerei el delebechel er a rechad el omtok a kabelment er ngii el uleldechelakl er a rechad e melemall er a redil me a rengalek. Oumesingd er a rudam a dimlak a kmal kloklir. Engdi a mesisiich el klaumerang er tir er a okiis, bltkil a rengrir el mora Jehovah, me a blakerreng er tir el mora cheldebechel a kmal rirutech a rengmam. A kerebai er tir a rirellemam el lmuut el mo merriter er kemam e melisiich er a klaumerang er kemam er a Jehovah. A rebebil er a rudam a letilemall a blirir me a dellemelir. Tia ulechotii er ngak el kmo a klalo a kmal di sebechel remiid me a ilteet er a klereng a kmal mekreos. Alta rudam a kmal mle chelebangel a meringel el blekeradel engdi te dimlak longeremrum. A osengir el kirel a tekoi a millisiich er kemam el mo oba blekeu loutekangel a mondai er kemam me a secheram.

Ngkmal mle mechas a rengmam le te ullengit er kemam el mora branch office er a Hong Kong. Ngkmal dimlak ki molatk el kmo a ta er a klebesei aki mo kiei er a Asia! Engdi ki kmal mla experience er a chimal a Jehovah er a klengar er kemam el ngar er a bek el assignment er kemam, me aki kilengei. Me  sera 2013 e aki di mle delelualu a iuechel a medemam e merael el choititerir a resechelimam me a klebokel el beluu er a Africa, el dimlak ki modengelii a ngar medemam.

Ngkmal mle klou el omelodech omelukl er kemam el mora Hong Kong el beluu el meseked er a rechad er a kakerous el beluu. A tekoi er a Cantonese a meringel el omelekoi. Engdi rudam a kmal uluuetkeu er kemam me kemam a kmal mle somam a kall er tia el beluu. A ureor a kmal di milleketek engdi ocheral a blai a kmal mlo meringel a cheral. Me a Governing Body millilt el mo olterau a oumesingd er aike el kloklel a branch. Kedeb el taem er uriul er tiang, e aki millukl er a 2015 el mora South Korea. Aki dirk mesiou el ngar tia el beluu. A omelekingir me ngdirrek el meringel me kemam a mo ousbech er a kmal klou el taem el suubii, engdi ngkmal melisiich a rengmam sel ledu er kemam a rudam el kmo aki mla olengeriakl el ngar er a omelekingam.

Ngdiak lebeot a domak a beches el klausechelei engdi ki mla metik el kmo sel domtechakl er a rechad, e kede mereched el mo medengelterir. Ki mla mesa el kmo a rudam a betok a lekaisisiu er ngii er aike el lekakerous er ngii, me a Jehovah milebid el sebeched el mok a rengud e mo sebeched el mo sechelirir a rebetok el chad.​—2 Ko. 6:11, NW.

Aki mla suubii el mo omes er a rechad el ua Jehovah e mo osiik olechotel a bltkil a rengul el mei er kemam me a ulekrael er ngii. Aike el taem el leblo lemechitechut a rengmam me a lechub ki blo molatk el kmo a rudam te sorir kemam me a lechub e ngdiak, e aki liluut el menguiu a card me a letter er a resechelimam. Aki mla experience a nger er a Jehovah el kirel a nglungucham, el ngii olterekokl a rengmam e melisiich er kemam.

Chelsel aika el betok el rak e ngak me a Lesli a mla suubii a klungel a ultutelel a ki mongetmokl a temam el mo mengoit el dmak, aki msal mechesang me a lak. Aki dirrek el mla mesa el kmo ngungil docherchur sel deruul a cheleuid, tokubets sel dolasem el mesuub er a beches el omelekoi. E a bek el kesus aki melatk er a tekoi el ki muleldeu a rengmam er ngii e mereng a sulel a Jehovah el kirel.

Ngkmal dimlak kumdasu el kmo ngsebechek el mo missionari me a lechub e bo kkiei a ngodech el beluu. Engdi ak mla mesa el kmo a rokui el tekoi a sebeched el remuul loeak a ngelsuil a Jehovah. Ak mo lmatk a tekingel a profet Jeremia: “RUBAK, kau a chilebeldkak.” (Jer. 20:7) Chochoi ngmla meskemam a betok el lungil tekoi me a klengeltengat el dimlak ki molatk a kmo ngsebecham el mo ngmai, e dirrek el ultutii a urungulek el mo omais a beluu el ngar er a skoki. Aki mla mora lmuut el betok el beluu er aike el kullatk er a kkekerei, e omtechei er a branch loldingel a beluu el meliuekl er a beluulechad el rokir. Ngar er aika el rokui el assignment er kemam e ak kmal el oba omereng el saul el kirel a support er a Lesli.

Aki blechoel el di omeklatk er kemam el kmo ngtecha ki moruul aika el ureor el kirel me a uchul me aki meruul. Aike el klengeltengat el ki moldeu a rengmam er ngii er chelechang a di olechotel a mo klengar el mo cherechar, el sel taem el Jehovah mo “omok er a [chimal] e omotech a rengrir a rokui el di ngar.”​—Psa. 145:16, NW.