1-2. A Rekristiano te di ua Lot el chelebangel er a ngera el omelsemai?

 KID a oba uldesuel a Lot el kirel a blekeradel el lolisiich er ngii tia el beluulechad. Ngika “kmal mlo chuarm er a delengerenger ma deleboes el di le ngar ngii a re diak le llechuul chad,” e le ngmle medengei el kmo a Demal el ngar er a eanged ouketui a mekngit el blekeradel. (2 Pe. 2:7, 8) A omeluu er a Lot el mora Dios me a bltkil a rengul el mo er ngii a uchul me nguluuketui aika el mekngit el omerellir a rechad el mle iliuekl er ngii. Kid me kede dirrek el iliuekl er a rechad el diak omengull er tir er a llechul a Jehovah. Me nguaisei engdi ngsebeched el melemolem el klikiid a lsekum ngmelemolem el betik a rengud er a Dios e omekeroul er a omeluu er kid el mo er ngii.​—Osi. 14:2.

² A Jehovah olengeseu er kid el meruul er tiang loeak omelisiich el debetik er a babier er a Osisechakl. Rokui el Kristiano, el sechal me a redil, remeklou me a remekekerei, sel lorriter er tia el babier e ngsebechir el ngmai a klungiolir er a mellomes el ulekrael el debetik er ngii.

3. A doltirakl er a Osisechakl 17:3, e ngera ta er a uchul me ngkired el omekerreu er a rengud? (Dirrek el momes er a siasing.)

³ A klou a ultutelel luchul me kede omekerreu er a rengud, a Jehovah a merriter a reng. Tia belkul a kmo ngomes lengelakl er aike el lomes a rechad e medengei el kmo kede mera el uangerang er a chelsel. (Monguiu er a Osisechakl 17:3.) Ngmo betik a rengul er kid a lsekum kede omekeek a uldesued er a llomeserreng er ngii, el ngii a meskid a klengar. (Jn. 4:14) Seikid e ngmo diak a basio er a uldesued el kirel a mekngit el uldasu me a blulak er a Satan me a beluulechad er ngii. (1 Jn. 5: 18, 19) Sel deluut el mo kmeed er a Jehovah e a bltikerreng me a omengull er kid el mo er ngii a mukeroul. Kid el diak el soad el tomellii a rengul a Demad a uchul me kede kmal ouketui a ngii di el uldasu el mo meruul a klengit. Sel demekesuseu el mo meruul er a mekngit, e kede di kid el oker, ‘Ngmekera sebechek el melemall er a rengul Ngike el mla ochotii er ngak a kmal klou el bltikerreng?’​—1 Jn. 4:9, 10.

4. Ngmilekera omeluu er a Jehovah e mekerreuii a ta el odos me ngdimlak el lebora klengit?

⁴ A Marta el odos er a Croatia el mlekesuseu el mo meruul a deleboes a kmo: “Ngmle meringel er ngak a ungil el omdasu e omtok er a renguk el soal mo meruul er a klengit. Engdi omeluu er a Jehovah a ulemekerreu er ngak.” b Omeluu er a Dios ngmilekera mekerreuii? Marta kmo ngmillebedebek a mo rsel omerellel. Kid me ngdirrek el sebeched el meruul er osisiu el tekoi. Sel kot el mekngit el rsel omerelled, a kid el mo kingtir a rengul a Jehovah e mo diak el sebeched el mesiou er ngii el mo cherechar.​—Gen. 6:5, 6.

5. Ngera sebechem el suub er a experience er a Leo?

⁵ Sel doluu er a Jehovah, e ngkmal diak bo dousechelei er a rechad el meruul a mekngit. A Leo el kiei er a Congo, siluubii tiang er a meringel el rolel. Eua el rak er uriul er a lemetecholb e ngmlo chelsechusem er a mekngit el klausechelei. Ngulemdasu el kmo ngdimlak a kngtil a lsekum e ngdiak loruul aike el mekngit loruul. Engdi ngdi mle telkib e tirka el sechelil a rirellii el mo melim a rrom e meruul a deleboes. Ngika mlo melatk aike el lullisechakl er ngii a rechad er a blil el tir a Kristiano, me a deurreng el lulebang. Ngera dilubech? Ngmlo melodech er a klengar er ngii. Ngoeak a ngelsurir a remechuodel, e ngliluut el mei er a Jehovah. Chelecha el taem e ngkmal dmeu a rengul el mesiou el ta er a remechuodel e special pioneer.

6. Ngera el okesiu er a reteru el redil a bo dosaod er ngii er chelechang?

 ⁶ Chelecha me dorriter er a 9 el bliongel er a Osisechakl. Tia mesaod el kirel a llomeserreng me a klebelung, e omekesiu er ngii el mora reteru el redil. (Momekesiu er a Rom 5:14; Galatia 4:24.) Sel dorriter er ngii e lak mobes el kmo, a beluulechad er a Satan a kmal soal a deleboes me a siasing er a remeau. (Efe. 4:19) Me ngkmal klou a ultutelel el dolemolem lomekeroul er a omeluu er a Dios e dongeroid er kid er a mekngit. (Osi. 16:6, NW) Me kid el rokui, el sechal me a redil, a sebeched el ngmai a klungioled er tia el bliongel. Derta er tirka el redil el losaod er ngii a mengemedaol er a re “diak a ngeral lodengei” el mora blil. Ngua lolekoi el kmo, ‘Me mtuu e momengur.’ (Osi. 9:1, 5, 6, 13, 16, 17, NW) Engdi ngkmal klou a klekakerous er a tekoi el duubech el mo er tirke el kongei a okedongir.

7. A doltirakl er a Osisechakl 9:13-18, e ngera duubech el mo er tirke el kongei er a okedongel a kebelung el redil? (Dirrek el momes er a siasing.)

⁷ Molatk er a okedongel ngike el ‘kebelung . . . el redil.’ (Monguiu er a Osisechakl 9:13-18.) Ngika klou a ngerel loleker er tirke el mekebelung el kmo, “Be mtuu” e momengur. Ngera duubech el mo er tirke el kongei er a okedongel? “A re chad el mor a blil ngiil redil a mad.” Ke locha mo lmatk a bebil er a osisiu el okesiu el ngar er aike el oeak uchei el bliongel er a Osisechakl. Ngomeklatk er kid el kirel a “dengerenger el redil” el “mengoit er a bechil.” Ngdmu er kid el kmo: “Cho bong (er a blil), e ke mocha er a belurir a re mla mad.” (Osi. 2:11-19) Osisechakl 5:3-10 a dirrek el mesaod er a “chelsengsang el redil” el “ochil a merael el mor iou el mor a kodall.”

8. Ngera el omelilt a kired el meruul er ngii?

⁸ Tirke el nguu okedongel a ‘kebelung . . . el redil’ a kirir el melilt: Te mo kongei el mong me a lechub e ngdiak? Kid me kede dirrek el locha mo kired el meruul er a osisiu el omelilt. A lsekum a chad a melasem el meruul er kid el mo meruul a deleboes me a lechub kede mesa siasing er a remeau, e kede mo mekerang?

9-10. Ngera bebil er a uchul me ngkired el mengeroid er kid er a deleboes lomeruul?

⁹ Ngar ngii a ungil luchul me kede mengeroid er kid er a deleboes el omeruul. Ngike el ‘kebelung . . . el redil’ a losaod er ngii el kmo ngmelekoi el kmo: “A rrechorech el ralm a merekos.” Ngngera “rrechorech el ralm”? A Biblia omekesiu er a cheliuaiu el loruul er ngii a bechiil el sechal me a redil el mora ralm el mengelekolt er a rengud. (Osi. 5:15-18, NW) A sechal me a redil el bechiil er a llach a sebechir  loldeu a rengrir er a cheliuaiu el mora rebechiil el chad. Ngdi tia ngodech er a “rrechorech el ralm.” Tiang a melutk el kirel a deleboes. A rechad a blechoel el omart er tir e meruul er tiang, el di ua omerellel a chad el merechorech. “A rrechorech el ralm” a locha merekos e le tirke el meruul er tia el tekoi omdasu el kmo ngdiak a chad el medengei a loruul. Engdi te kmal di tir lomulak er tir! A Jehovah mes a rokui el tekoi. Sel kot el mekngit el tekoi el sebechel duubech el mei er kid a oridii a kengei er a Jehovah, e tia kmal diak le “merekos.” (1 Ko. 6:9, 10) Engdi ngar ngii a lmuut el bebil er a mekngit el duubech.

¹⁰ A deleboes a sebechel mo uchul a rur, rullid el mo feel el kmo ngdiak a ultuteled, mo dioll, e tomall a telungalek. Me ngbleketakl el kmo ngolechotel a llomeserreng a dongeroid er kid er a “blil” ngika el kebelung el redil e dotngeklii okedongel. Me a rechad el meruul a deleboes a diak di loriid a deleuill er tir me a Jehovah te dirrek el mla ngmai a betok el rakt el sebechir el mad er ngii. (Osi. 7:23, 26) A 18 el kekerei el bades er a 9 el bliongel a kmo: “Tirkel di mla mong a meketeket er a le mad.” Me ngera uchul me a rebetok a kongei er a okedongel er a telemall?​—Osi. 9:13-18.

11. Ngera uchul me ngkmal klou a telemellel a osengel a siasing er a remeau?

¹¹ A bedikl el betok obedikl er ngii a siasing er a remeau. A rebebil omdasu el kmo tiang a diak a ngera el letemellii. Engdi a siasing er a remeau a tomelleterir a rechad, rulleterir el mo diak lungil a uldesuir el kirir, e meringel er a rechad a stob el meruul er ngii. A rechad a meringel er tir otobed a siasing er a remeau er a uldesuir. Me a siasing er a remeau a diak lomekoad a mekngit el ngibes e ngbai remuul el mo mesisiich. (Kol. 3:5; Jak. 1:14, 15) Tirke el omes a siasing er a remeau a mo meruul a deleboes.

12. Ngmekera dochotii el kmo kede klekar el kirel aike el tekoi el sebechel rullid el mo melatk a diak el klikiid el tekoi?

¹² Kid el Kristiano, ngera kired el meruul er ngii a lsekum e kede di kiul mesang a siasing er a remeau? Ngkired el di mereched el ochebir osenged er ngii. Ngmo beot er kid a meruul er tiang a lsekum e ngdiak dobes el kmo sel kot el mekreos el tekoi el dobang a deleuill er kid me a Jehovah. Mo lmuut er a siasing el diak el siasing er a remeau me ngsebechel rullid el mo melatk me a lechub e kede oureng a diak el klikiid el tekoi. Me ngera uchul me ngkired el mengeroid er kid er a ikang? Le ngkmal diak el soad el mo rullii a laokreng er a chelsel a rengud. (Mt. 5:28, 29) A David el ta er a remechuodel er a Thailand a kmo: “Ngdi ngak el oker el kmo: ‘Alta ika el kumes a diak el siasing er a remeau, me nguaisei ngak ak oldeu er a rengul a Jehovah a kulemolem lomes?’ Tia el rolel a kullatk a tekoi a ngosukak el mo ungil el melilt.”

13. Ngera sebechel ngosukid el mo ungil el melilt?

¹³ Kede mongeseu el mo ungil el melilt loeak sel debekurulii a dekted el medakt el tomellii a rengul a Jehovah. Tiakid el omeluu er a Dios a “uchelel” me a lechub e nguchetemel “a llomeserreng.” (Osi. 9:10) Tia desa er aike el oeakuchei el bades er a 9 el bliongel er a Osisechakl, el omekesiu er a “mera el llomeserreng” el mora kuk ta er a redil.

14. Ngera kuk ta er a okedong el donguiu el kirel er a Osisechakl 9:1-6 (NW)?

¹⁴ Monguiu er a Osisechakl 9:1-6 (NW). c Ngar tiang e kede menguiu el kirel okedongel Ngike el Uchul e Uchetemel a mera el llomeserreng, el ngii Ulemeob er kid. (Osi. 2:6; Rom  16:27) Tia meskid a siasing er a klou el blai el kleuid a tengal. Ngochotii el kmo a Jehovah a kmal bekururau, e mengemedaol er a rokui el sorir el mo oltaut er a llomeserreng er ngii er a chelsel a klengar er tir.

15. Ngera ngmengemedaol er kid a Jehovah el mo meruul er ngii?

¹⁵ A Jehovah bekururau e omeskid a kmal betok. Aika el blekeradel a deues er ngike el redil lomekesiu er a “mera el llomeserreng” el losaod er ngii a 9 el bliongel er a Osisechakl. Tia el cheldecheduch a mesaod er ngii el kmo ngmla rullii a odoim, mrechemii a bilong, e mla kutmeklii a tebel. (Osi. 9:2) Me a lmuut kung, a 4 me a 5 el kekerei el bades a kmo: “[Mera el llomeserreng a] dmu er a kebelung el chad el kmo, ‘Mei me mongang er a kelek el blauang.’” Ngera uchul me ngungil a dekengei er a okedongel ngika el redil? A Jehovah soal a rengelekel a bo lemellomes a rengrir e ulekerreu. Ngdiak el soal a desuub a tekoi er a meringel el rolel, el mo chuarm a mekngit el experience e ouuchel a rengud er a omerelled. Sei a uchul me “ng omesterir a ngesou tirkel melemalt.” (Osi. 2:7) Sel lengar ngii omeluu er kid el mora Jehovah e ngmo soad lodeuir a rengul. Kede orrenges a mellomes el ulekrael er ngii e dmeu a rengud el oltirakl.​—Jak. 1:25.

16. Ngmilekera omeluu er a Dios e ngosuir a Alain el mo ungil melilt, e ngera dilubech?

¹⁶ Molatk er a rolel e a omeluu er a Alain el mora Dios a ngilsuir el mo ungil melilt. Ngika el Kristiano el ta er a remechuodel e dirrek el sensei er a skuul a kmo, “A rebetok el kldemek er a ureor omdasu el kmo aike el film er a siasing er a remeau a ta er a rolel e kede olisechakl a tekoi er a cheliuaiu.” Engdi Alain a mle medengei el kmo tiang a cheleuid el tekoi. Ngkmo: “Omeluu er ngak el mora Dios a uchul me ngkmal dimlak kkengei el mo omes aika el film. Ak dirrek el silodii el mo er tir er a uchul me ngdiak kumes.” Ngika uleltaut a ulekrael er a “mera el llomeserreng” e ‘uleltirakl er a rolel a klemedengei.’ (Osi. 9:6) A rebebil er a sensei a kmal chilat er ngii e kilengei el mesuub a Biblia, e mla mo ngar er a miting.

17-18. Ngera el klengeltengat a loldeu a rengrir er ngii tirke el kongei er a okedongel a “mera el llomeserreng,” e ngera sebechir lomes el beduluchei el kirel? (Dirrek el momes er a siasing.)

¹⁷ A Jehovah ousbech er tirka el teru el okesiul a redil lochotii er kid a rolel e ngsebechel mo ungil a klengar er kid. Tirke el kongei er a okedongel ngike el klou a ngerel e ‘kebelung . . . el redil’ a di sorir aike el “merekos” e blart el tekoi. Te kiei el kirel chelecha el taem e diak lolatk er a ngar mederir. A omerellir a mo uchul e te “mad.”​—Osi. 9:13, 17, 18.

 ¹⁸ Tirke el kongei er a okedongel a “mera el llomeserreng” a kmal ngodech a klengar er tir! Ngkmal dmeu a rengrir e le te melai aike el rokui el lousbech el mo melemolem el kmeed er a Jehovah. (Isa. 65:13) Ngoeak a profet Isaia e a Jehovah dilu el kmo: “Morrenges er ngak e mruul a ikel kdung, e ng mo ungil a rengum er a kot el ungil er a bek el kall.” (Isa. 55:1, 2) Kede mesuub er chelechang el mo betik a rengud er aike el betik er a rengul a Jehovah e ouketui aike el louketui. (Psa. 97:10) E kmal dmeu a rengud e le ngsebeched el mengemedaol er a rechad el me melai a klungiolir er a “mera el llomeserreng.” Kede di uai tirke el mesiou el “omekedong er a re ngar a mekedidai er a beluu el kmo: ‘Mei er tiei kemiu el diak a ngeral modengei el chad!’” Aike el klungiaol el dengai kid me tirke el kongei er okedong a diak di lekirel chelecha el taem. Aikang a diak a ulebengelel, nguchul me ngsebeched el ‘ngar’ el mo cherechar el ‘oltirakl er a rolel a klemedengei.’​—Osi. 9:3, 4, 6.

19. Ngua losaod a Olisechakl 12:13, 14, ngera kired el rullii er a rengud el mo meruul er ngii? (Dirrek el momes er a baks el “ Omeluu er a Dios a Uchul a Klungioled.”)

¹⁹ Monguiu er a Olisechakl 12:13, 14. A omeluu er a Dios lolemolem el omekerreu er a rengud e lengesukid el mo melemolem el klikiid e kmeed er a Jehovah er chelecha el mekngit luriul sils. Tia el omeluu er kid a mo odbechid el mo melemolem el mengemedaol er tirke el rokui el sebeched el mo osiik er a “mera el llomeserreng” e lolai a klungiolir er ngii.