1-2. A doltirakl er a Psalm 25:14, e ngera kired el meruul er ngii a lsekum e ngsoad a lebo er ngii a mesisiich el deleuill er kid me a Jehovah?

 NGERA EL blekeradel omomdasu e ngmeklou a ultutelel a lsekum ngmelemolem el ngar ngii a deleuill er kau me a chad? Kede locha mo kmo a rungil sechelei a kirir el kaubltikerreng e support er a tang me a tang. Nglocha diak molatk el kmo a dakt a klou a ultutelel er a deleuill er kid me a chad. Ngdi ngua lolekoi a bades lemlengai er ngii tia el suobel, tirke el sorir el mo er ngii a mesisiich el deleuill er tir me a Jehovah kirir el oba dakt el mo er ngii me a lechub e ng “meluu er ngii.”​—Monguiu er a Psalm 25:14.

² A bla dosiou er a Jehovah el meketeket el taem me a lak me kid el rokui a kirel melemolem el dmolech omeluu er kid el mo er ngii. Engdi ngera belkul a doluu er a Dios? Ngmekera sebeched el suubii el mo oba dakt el mora Jehovah me a lechub e kede meluu er ngii? E ngera sebeched el suub er a Obadia, Ngarbab el Prist Jehoiada, me a King Joas el kirel omeluu er a Dios?

3. Mosaod aike el mo uchul e kede mo medakt me a lerellii el mei er kid.

³ A omeluu er a Dios a belkul a kmo kede medakt el meruul a tekoi el ngii a mo tomellii a rengul. Tia el bedengel a dakt a ungil kired le ngngosukid el mo ungil melilt. Kid el medakt el ruebet a uchul me ngdiak dorael er bita er a dellas. Kede medakt el metemall me kede chemiis a kengaol el blekeradel. Kede medakt el tomellii a deleuill er kid me a chad el betik a rengud er ngii a uchul me ngdiak bo dolekoi me a lechub e doruul a tekoi el diak lungil.

4. Ngera el dakt el mora Jehovah soal a Satan a bo dobang?

⁴ A Satan a soal a rechad a bo lemedakt er a Jehovah. Satan a omerk er a uldasu luleba Elifas el kmo, a Jehovah kesib a rengul  el Dios el soal lomals er kid, me kid a kmal diak el sebeched lodeuir a rengul. (Job 4:18, 19) A Satan a soal a bo de imis el medakt er a Jehovah me destob el mesiou er Ngii. Engdi ngdiak el kired el medakt er a Jehovah e ngbai kired el suubii el mo meluu er ngii e diak el soad el melemall er a rengul.

5. Ngera belkul a bo doluu er a Dios?

⁵ A chad el meluu er a Dios a betik a rengul er ngii e diak el soal meruul er a ngii di el tekoi el mo tomellii a deleuill er ngii lobengkel. A Jesus uleba tia el “omeluu . . . ra Dios.” (Heb. 5:7, BT) Ngika dimlak el medakt er a Jehovah. (Isa. 11:2, 3) E ngbai kmal mle betik a rengul er ngii e mle soal lolengesenges er ngii. (Jn. 14:21, 31) Ngdi ua Jesus, kede oba dmolech el omengull me a omeluu el mora Jehovah le ngii el bltikerreng, mellomes, melemalt, e mesisiich. Kede dirrek el medengei el kmo a Jehovah kmal betik a rengul er kid e omekerreu a lsekum kede oltirakl a ulekrael er ngii me a lechub e ngdiak. Me ngsebeched el omekringel er ngii me a lechub e kede rullii el mo dmeu a rengul.​—Psa. 78:41; Osi. 27:11.

6. Ngera ta er a rolel e ngsebeched el mesuub el mo oba omeluu er a Dios? (Psalm 34:11)

⁶ Kid a diak demechell loba omeluu er a Jehovah, ngkired el mekurulii. (Monguiu er a Psalm 34:11.) A ta er a rolel a domekeroul er ngii a domtab a blebelel a Dios. Sel bo domtab er a llomeserreng, klisichel, me a bltikerreng er a Dios er a “ikel le bileob” e nglmuut el mo dmolech omengull er kid me a bltkil a rengud el mo er ngii. (Rom 1:20) A odos el Adrienne a melekoi el kmo, “A llomeserreng er a Jehovah el kisa er a blebelel a mera el ocheuir a renguk e ngosukak el mo mesa el kmo ngii a medengei aike el kot lungil kirek.” Omelebedebekel er a blebelel a uchul me ngmelekoi el kmo, “Ngera uchul me ak mo meruul a tekoi el mo uchul me ngchoridak er a Jehovah, el ngike el luchul a klengar er ngak?” Mongoit er a telkib el taem er chelecha el week el melatk er a ta er a blebelel a Jehovah. Sel moruul el uaisei, e nglmuut el mo dmolech a omengull er kau me a bltikerreng er kau el mora Jehovah.​—Psa. 111:2, 3.

7. Ngmekera nglunguuch e ngosukid el mekurulii omeluu er kid el mora Jehovah?

⁷ A lmuut el ta er a rolel e kede mekurulii a omeluu er a Dios a bo deblechoel el meluluuch. Bek el taem el doluluuch e kede lmuut el mo ungil medengelii a Jehovah. Bek el taem el dolengit er ngii me lsisichid loutekangel er a tekoi el dechelebangel er ngii, e kede muklatk er a klungel a klisichel. Sel doreng a sulel er a sengk er a Ngelekel, e kede omeklatk er kid er a bltkil a rengul a Jehovah el mei er kid. E sel leblak a rengud el meluluuch el lolengit a ngelsuil a Jehovah el kirel a mondai er kid, e ngmeluches er a rengud el kmo ngkmal mellomes. Chouaika el nglunguuch a rullii el lmuut el mo dmolech omengull er kid el mora Jehovah. Me kid a rullii a rengud el mo mengeroid er kid er a ngii di el tekoi el sebechel tomellii a deleuill er kid me ngii.

8. Ngera sebeched el meruul er ngii me dolemolem el meluu er a Dios?

⁸ Ngsebeched el melemolem el meluu er a Dios sel dosuub er a Biblia, el moktek er kid a melai a klubeled er a rungil me a remekngit el kerebai er a rechad er ngii. Me dosaod er a reteru el blak a rengrir el mesiungel a Jehovah el Obadia luluungerachel er a blil a King Ahab me a Ngarbab el Prist Jehoiada. E a uriul e kede mo mesaod a sebeched el suub er a King Joas er a Juda, el ulemuchel lungil er a uchelel engdi uriul e ngchilitii a Jehovah.

9. Ngerang ngrirellii el mora Obadia omeluu er a Dios? (1 King 18:3, 12)

⁹ A kot el taem el losaod er a Obadia b Biblia e ngkmo: “A Obadia a mle blak a rengul el mengull el meluluuch er a RUBAK.” (Monguiu er a 1 King 18:3, 12.) Ngerang ngrirellii el mora Obadia omeluu er a Dios? A ta er ngii a ngika mle honest e sebeched loumerang er ngii. Sei a uchul me a king a rirellii el mo oungerachel er a blil. (Momekesiu er a Nehemia 7:2.) Omeluu er ngii er a Dios a dirrek el milsang a blekengel, el blekeradel el kmal luluusbech er ngii. Ngika kiliei er a temel a omengederederel a mekngit el King Ahab el “mlor a klengit el omtok er a RUBAK el kuk mekngit er tirkel rokui el uleak uchei er ngii el king.” (1 Ki. 16:30) Me a dirrek el bechil a Ahab er a Jesebel el milengull a bleob a kmal mle chetil a Jehovah e millasem loltobed er a mera el omengull er aike el teruich el kebliil er a Israel. (1 Ki. 18:4) A Obadia milengull er a Jehovah er a chelsel tia el kmal meringel el taem.

10. Ngmilekera Obadia olecholt er a ileakl el blekeu?

¹⁰ Ngmilekera Obadia ochotii a ileakl el blekeu? A Jesebel er a losiik er a reprofet er a Dios lomekoad er tir, e a Obadia ngiltiterir a re 100 er tir e milerteterir “er a ii, el mle erul bliongel el dersokeim a re chedal e milsterir a kall ma ralm.” (1 Ki. 18:13, 14) A lsekum ngulebdechem, e te mo mekodir. A Obadia di chad me ngdiak el soal el mad. Engdi ngmle betik a rengul er a Jehovah me tirke el milsiou er ngii el kuk ngaruchei er a klengar er ngii.

11. Te mekera remesiungel a Jehovah er chelecha el taem e ua Obadia? (Dirrek el momes er a siasing.)

¹¹ Chelecha el taem e te betok er a Resioning er a Jehovah a kiei a beluu el merrob a urered. Te olecholt omengull el mora remerreder er a beluu, engdi tirka el mekreos el odam me a odos a kmal di ua Obadia el omsang a Jehovah a cherrungel el blakerreng er tir! (Mt. 22:21) Te ochotii omeluu er tir er a Dios loeak sel lolengesenges er ngii el kuk ngaruchei er a rechad. (Rel. 5:29) Te meruul er tiang loeak a lolemolem lomerk er a klumech, e omart er tir e mo dmak el kldibel. (Mt. 10:16, 28) Te kmal melatk a kall er a klereng lousbech a rudam  me a rudos er tir. Molatk er a Henri, el kiei er a beluu er a Africa el lulerrob er a urered el telkib el taem. Taem er a terebengel a urered e ngmle volunteer el mo merous a kall er a klereng el mora rekldemel Sioning. Ngkmo: “Ak sekemerur el chad. Me ngmera el ulterekokl a renguk el kmo ngdmolech lomengull er ngak el mora Jehovah a milskak a blekeu el kuluusbech er ngii.” Ngsebechem lomes er kau loba blekeu luleba Henri? Ngmo sebechem a lsekum ke mekurulii a omeluu er kau el mora Dios.

12. Ngmilekera Ngarbab el Prist Jehoiada me a bechil e ochotii a blakerreng er tir el mora Jehovah?

¹² A Ngarbab el Prist Jehoiada milluu er a Jehovah, e tia rirellii el mo oba blakerreng e melisiich er a rechad el mo mengull er a Jehovah. Tia bleketakl el moues er sel taem er a lenguu omerreder er a Juda a ngelekel a Jesebel er a Athalia. Ngmla er ngii a ungil luchul me a rechad a mle medakt er a Athalia. Ngika mle mekngit a blekerdelel e kmal mle soal a klisiich me ngmillasem lolekngemed er a rokui el ngelekel a rengelekel el sechal me lsebechel el mengedereder. (2 Kr. 22:10, 11) A Joas el ta er tirka el ngalek a silobel e le bechil a Jehoiada er a Jehoseba milertii. Ngii me a bechil a ulemart er a Joas e ulemekerreu er ngii. Ngoeak tiakid el rolel e a Jehoiada me a Jehoseba millemolem er a klengelakel er a David el kirel a kleking. A Jehoiada dimlak lemedakt er a Athalia e millemolem loba blakerreng el mora Jehovah.​—Osi. 29:25.

13. Ngmilekera Jehoiada e liluut lochotii a blakerreng el mora Jehovah er a bo el euid a rekil a Joas?

¹³ A Joas er a lebo el euid a rekil e a Jehoiada liluut lochotii a blakerreng er ngii el mora Jehovah. Ngchilderoder a tekoi. A lsekum e ngmo ungil, e a Joas el llemeltel a nguu omerreder a mo king. A lsekum ngdiak el bo lungil, e a Jehoiada mo oridii a klengar er ngii. Ngoeak a klengeltengat er a Dios e ngdi mlo ungil a rokui el tekoi. Ngoeak a ngelsurir a remengeteklir a resoldau me a re Levait, e a Jehoiada mle sebechel rullii a Joas el mo king e mekodir a Athalia. (2 Kr. 23:1-5, 11, 12, 15; 24:1) Ngdirrek el “rirellii a telbiil er a delongelel a king ma re chad el kmo te mo chedal a RUBAK.” (2 Ki. 11:17) A Jehoiada “dirrek el millecha er a re mengkar er a siseball er a Templo me lak bo le siseb er ngii a di chad el diak le klikiid.”​—2 Kr. 23:19.

14. Ngoeak a ngera rolel e a Jehoiada mlukngeltengat er a Jehovah?

¹⁴ A Jehovah dilu el kmo: “Ngak a . . . mo mengull er a re mengull er ngak.” Nguaisei, a Jehoiada mlukngeltengat. (1 Sa. 2:30) El ua tiang, omerellel a Jehoiada milluches er a Biblia me lsebeched el ngmai a klubeled er ngii. (Rom 15:4) E sera lemad, e ngngiluu a ileakl el chetengakl el mildakl er a “belual a David el teloi er a re king, ele ng mle ungil a omerellel el mor a beluu er a Israel, e ungil omerellel el mor a Dios ma Templo.”​—2 Kr. 24:15, 16.

15. Ngera sebeched el suub er a cheldecheduch el kirel a Jehoiada? (Dirrek el momes er a siasing.)

¹⁵ A cheldecheduch el kirel a Jehoiada sebechel ngosukid el rokui el mo mekurulii a omeluu er a Dios. Remechuodel oukerebai er a Jehoiada loeak a leblechoel klekar e lomekerreu er a delebechel er a Dios. (Rel. 20:28) A remeklou a sebechir el ngmai a klubelir er a Jehoiada el kmo sel loluu er a Jehovah e lolemolem loba blakerreng el mo er ngii, e ngsebechel lousbech er tir el mo otutii a soal. A Jehovah diak loltngakl er tir. Rengalek a sebechir el melatk er a omerellel a Jehovah el mora Jehoiada e mo oukerebai er ngii el ngar  omerellir el mora remeklou, el mo olecholt omengull, tokubets el mo er tirke el mla mesiou er a Jehovah el betok el rak. (Osi. 16:31) E a ulebongel, kid el rokui a sebeched el ngmai a klubeled er a remengeteklel a soldau er a Israel me a re Levait el mle support er a Jehoiada. Me doba blakerreng el support er “tirke el omekrael” loeak a dolengesenges er tir.​—Heb. 13:17, NW.

16. Ngera ochotii el kmo a Joas a mle mechitechut a rengul?

¹⁶ A Jehoiada ngilsuir a Joas el mo ungil el chad. (2 Ki. 12:2) Me ngika er a lengeasek e ngmle soal odeuir a rengul a Jehovah. Engdi uriul er a lemad a Jehoiada, e a Joas a mlo orrenges er a remengeteklel a Israel el ulemtok a mera el ulekrael. Ngera dilubech? A Joas me a rechad a “mlo mengull el meluluuch er a bleob el okesiul a Aserim ma bleob el chelid.” (2 Kr. 24:4, 17, 18) Alta tia kmal tilemellii a rengul a Jehovah engdi ng “uldercheterir a re profet el mo olluut er tir . . . , e ngdi tir a dimlak lorrenges.” Te dirrek el dimlak lorrenges er a ngelekel a Jehoiada er a Sekaria c el mle ta er a profet er a Jehovah e prist, e dirrek el ta er a Joas. A King Joas a dimlak lochotii omereng el saul er ngii el mo er tia el telungalek el kmal mesaul er ngii, e bai milekodir a Sekaria. ​—2 Kr. 22:11; 24:19-22.

17. Ngmlo uangerang a blekeradel el kirel a Joas?

 ¹⁷ A Joas a dimlak lolemolem loba omeluu er a Jehovah me ngmlo mekngit a tekoi er a klengar er ngii. A Jehovah dilu el kmo: “Ak mo orretert e omekrur er tirkel mengemikr er ngak.” (1 Sa. 2:30) A kekerei el cheldebechel er a resoldau er a Siria mlo mesisiich er a “re betok el soldau er a Juda” me a Joas a “kmal mlo meringel el mechetechat.” Uriul er a lorael a rechad er a Siria, e a remesiungel a Joas a milekodir el kirel a kodellel a Sekaria. A rechad a kmal ulemdasu el kmo ngmekngit el king me te dimlak ledeklii er a “olekellir a re king.”​—2 Kr. 24:23-25.

18. A doltirakl er a Jeremia 17:7, 8, ngmekera e mo diak bo deua Joas?

¹⁸ Ngera sebeched el suubii er a kerebil a Joas? Ngika di mle ua kerrekar el dimlak el klou a risel me nguluusbech er a rachel el melkakl er ngii. Sera lemengai a rachel el Jehoiada, e a eltel a klsuul losisechakl a dilekeuii me ngmilukel. Tia mesisiich lochotel a kmo, a omeluu er kid er a Dios a diak el kirel lultuil er a rechad er a ongdibel luldimukl er a rechedal a telungalek er kid. A lsoad el melemolem el mesisiich er a klereng, e ngkired el smisichii a cherrungel el blakerreng me a omeluu er kid el mora Dios loeak a deblechoel el mesuub, melebedebek, e meluluuch.​—Monguiu er a Jeremia 17:7, 8; Kol. 2:6, 7.

19. Ngera ngolengit er ngii er kid a Jehovah?

¹⁹ A Jehovah diak longerechir er kid a betok. Aike el lolengit a medung er a Olisechakl 12:13 el kmo: “Moluu er a Dios e moltaut a llechul; tiaikid ia ngerechelel a chad.” Sel doluu er a Dios, e ngsebeched el chobangel a ringel er a ngar medad el mesisiich el dechor el ua Obadia me a Jehoiada. Ngdiak a sebechel tomellii a deleuill er kid me a Jehovah.