1. A doltirakl er a 1 Petrus 5:2, e ngera el ileakl el techall a loba remechuodel?

 REKRISTIANO el mechuodel a mla mukngerachel el mo omekerreu a sib er a Jehovah. Tirka el odam a kmal mengreos er tia el ileakl el techall el mo mesiou er a rudam me a rudos er tir, e meringel loureor el “mengkerengel a sib . . . el mera el mengkar.” (Jer. 23:4, NW; monguiu er a 1 Petrus 5:2.) Kede mera el oba omereng el saul el kirir tirka el odam er a ongdibel!

2. Ngera el omelsemai a lechelebangel a rebebil er a remechuodel?

² A remechuodel sel loruul a ngerechelir e te mo chobangel a betok el omelsemai. Ngklou a urerir el omekerreu er a ongdibel. Tony el ta er a remechuodel er a beluu er a Merikel, a mle kirel mo oba tabesul el uldasu el kirel a kongei a ildisel a ureor el mo er ngii. Ngmelekoi el kmo: “A uchelel a COVID-19 pandemic e ak kilengei a lmuut el betok el ureor el organize a miting me a berkel a klumech. Engdi alta ak mirruul a betok engdi ngdirk mle lmuut el betok a kirel ruoll. Cherengel a taem e a omengiuek er a Biblia, omesubek el di ngak el tang, me a nglunguchek a blo kungemikr.” A Ilir el ta er a remechuodel er a Kosovo a mlo chobengelii a kuk ta er a omelsemai. Sera leduubech a mekemad e ngmlo meringel er ngii oltirakl a ulekrael er a cheldebechel. Ngkmo: “Ngmle meringel er ngak a moba blekeu er ak nguu a ngerachel er a branch office el mo omekerreu er a rudam me a rudos el kiei er a kengaol el basio. Ak mle medakt, me a ulekrael er tir a dimlak lungil er osengek.” A Tim el missionari er a Asia a mle meringel er ngii a meruul aike el rokui el kirel el meruul er a bek el sils. Ngmelekoi el kmo: “Ngar ngii aike el taem el kmal mlo mesaul a renguk me a bdeluk.” Ngera sebechel ngosuterir a remechuodel el chelebangel chouaika el omelsemai?

3. Ngmekera mo uchul a klungioled sel dorriter er a kerebil a Gideon el mle mengeteklir a rechad er a Israel?

³ A remechuodel a sebechir el ngmai a klubelir er a Gideon el  mle mengeteklir a rechad er a Israel. (Heb. 6:12; 11:32) Ngika ulemekerreu e ulemecheliu er a rechedal a Dios. (Men. 2:16; 1 Kr. 17:6) A remechuodel a di ua Gideon el mla mukngerachel el mo omekerreu er a rechedal a Dios er a chelsel a kmal meringel el taem. (Rel. 20:28; 2 Ti. 3:1) Ngsebeched el ngmai a klubeled er a klengariourreng me a blekongesenges er a Gideon. Ngika er a loruul er a ngerechelel e ngar ngii a taem el mlo meringel er ngii outekangel. Me a dosiou el ta er a remechuodel me a lak, me kid a sebeched el mekurulii a omereng el saul er kid el kirir a remechuodel. Ngkmal sebeched el support er tirka el odam el kmal meringel loureor el kired.​—Heb. 13:17.

4. Ngmilekera Gideon e ochotii a klengariourreng?

⁴ A Gideon a mle ngariou a rengul el chad. b A anghel er a Jehovah er a ledu er ngii el kmo ngmla mengilt el mo olsobel er a Israel er a rechad er a Midian, e ngdilu el kmo: “A kleblillek a kot el mechitechut er a chelsel a klebliil er a Manase, e ngak a kmal diak a belkuk el chad er a blik.” (Men. 6:15) Ngika ulemdasu el kmo ngdiak el sebechel rullii tia el ngerachel, engdi Jehovah mle medengei el kmo ngsebechel. Ngoeak a ngelsuil a Jehovah, e a Gideon a mle sebechel rullii a ngerechelel e mle ungil kutmeklii.

5. Oingerang e nglocha mo meringel er a mechuodel el mo oba klengariourreng?

⁵ A remechuodel a mora tkurrebab el sebechir el olecholt er a klengariourreng er a rokui el tekoi loruul. (Mik. 6:8; Rel. 20:18, 19) Te diak losaod aike el sebechir el meruul me aike el bla leruul. E diak di loldechelakl a rengrir el kirel a chelitecheterir me a cheleuid el omerellir. Me nguaisei engdi a mechuodel a mo measem. El ua tiang, nglocha mo kongei a betok el ngerachel e metik el kmo ngdiak el sebechel kutmokl el rokui. Me a lechub a rechad a mo melekoi a mekngit el kirel a tekoi el lerirellii me a lechub te chemat er ngii er a kuk tang. Ngera sebechir a remechuodel el suub er a Gideon el mo ngosuterir sel leduubech chouaika el blekeradel?

6. Ngera sebechir a remechuodel el suub er a klengariourreng er a Gideon? (Dirrek el momes er a siasing.)

⁶ Molengit a ngeso. A chad el ngariou a rengul a medengei aike el diak el sebechel el remuul. A Gideon ulechotii el kmo ngngariou a rengul er  a lolengit a ngelsurir a rebebil. (Men. 6:27, 35; 7:24) Remellomes a rengrir el mechuodel me te dirrek el meruul el uaisei. A Tony el dulsaod er ngii er a uchei a kmo: “Ulekurulek a uchul me ak blechoel el kongei a betok el lureor er aike el sebechek el remuul. Me aki mlo mesaod er a klengariourreng er a temel omengull el telungalek er kemam e uleker er a uldesuel a bechik. Ak dirrek el mle review er a video er a jw.org el Train, Trust, and Empower Others, as Jesus Does.” A Tony mlo olengit a ngeso er a rebebil. Ngera dilubech? Tony kmo: “A ureor er a ongdibel a meketmeklang, me ngak a mla mo klou a temek el melisiich er ngak er a tekoi er a klereng.”

7. A lsekum a rechad a mo melekoi a mekngit el kirir a remechuodel, e ngmekera sebechir loukerebai er a Gideon? (Jakobus 3:13)

⁷ Lak lengasech a rengum a lsekum te mo melekoi a mekngit el kirem. A lmuut el ta er a omelsemai el mora remechuodel a sel bo lolekoi a mekngit a rechad el kirir. A kerebil a Gideon a dirrek el sebechel ngosuterir. Ngika mle medengei el kmo ngdiak el cherrungel me ngmle ungil mengedecheduch er a rechad er a Efraim er a ledu mekngit el mo er ngii. (Men. 8:1-3) A Gideon a dimlak lengasech a rengul. Ngulechotii a klengariourreng er a lekerekikl lorrenges er tir, e lomudech er a blekeradel. A remellomes a rengrir el mechuodel a oukerebai er a Gideon loeak sel lekerekikl lorrenges, e lungil mengedecheduch sel bo lolekoi a kngterir. (Monguiu er a Jakobus 3:13.) Sel loruul el uaisei e te meleketek er a budech er a chelsel ongdibel.

8. Ngera ungil loruul er ngii a remechuodel sel lengai odanges? Mosaod er a ta er a olechotel.

⁸ Mngai odanges el msa Jehovah. A Gideon er a lechat er ngii le te mlo mesisiich er a Midian, e ngngilai a odanges el msang a Jehovah. (Men. 8:22, 23) Ngmekera sebechir a remechuodel loukerebai er a Gideon? Te msa odanges a Jehovah el kirel aike el rokui el tekoi el bla leruul. (1 Ko. 4:6, 7) El ua tiang, a lsekum te chemat er a ta er a remechuodel el kirel a duch er ngii lolisechakl, e ngmai a rokui el odanges el mora uchetemel a osisecheklel el Tekingel a Dios me a lechub e ngmora training el bla lengai er a cheldebechelel a Jehovah. A remechuodel a dirrek el sebechir el merriter el kmo, tir ngdi tir lolechau a odanges el mo er tir. Molatk er a experience er a Timothy el ta er a remechuodel. Sera lomuchel el mesiou el ta er a mechuodel e ngkmal mle soal loltobed a cheldecheduch. Ngkmo: “Ak uluusbech a kemanget omesodel el tekoi me a okesiu. A rechad a mle blechoel el chemat er ngak. Engdi aika mle bedul ngak el diak el Biblia me a lechub e ng Jehovah.” Cherengel a taem e a Timothy mlo mesa el kmo ngmle kirel melodech er a rolel a lolisechakl me lak lochau a odanges el mo er ngii. (Osi. 27:21) Ngera dilubech? Ngkmo: “Rekakerous el chad a mla melekoi er ngak el kmo a cheldecheduch el kultebedii a mla ngosuterir el outekangel a mondai me a ringel, e lmuut el mo kmeed er a Jehovah. Nglmuut el klou el deurreng a knguu er aika el tekingir er aike el odanges el kngilai el kirek er a ngar er a mong.”

9. Ngmilekera measem a blekongesenges me a blekengel a Gideon? (Momes er a siasing er a medal tia el babier.)

⁹ Uriul er a lemetutk a Gideon el mo mengeteklel a Israel, e ngmleasem a blekongesenges er ngii me a blekengel. Ngika mle kirel mo torudii a olengetongel er a demal el mora Baal. (Men. 6:25, 26) E a uriul er a leketmeklii a urrurt er a soldau e ngmle eru el taem el ledu er ngii me lolengeasek er a ildisir. (Men. 7:2-7) Me ngii a ledilu er ngii el mo oumekemad er a recherrouir er a sueleb er a klebesei.​—Men. 7:9-11.

10. Ngmekera sebechel measem a blekongesenges er a remechuodel?

 ¹⁰ A remechuodel a kirir el “kltmokl el mo olengesenges.” (Jak. 3:17, NW) A bekongesenges el mechuodel a oltirakl aike el lolekoi a Bades me a cheldebechelel a Dios. Ngkutmeklii a ungil kerebai el kirir a rechad. Me nguaisei, a blekongesenges er ngii a sebechel measem. El ua tiang, nglocha ngmai a betok el ulekrael me a lechub a ulekrael a di mengodech me ngmeringel er ngii otirakl. Ngar er a bebil blekeradel e nglocha mo omdasu el kmo a ulekrael a diak lungil. Me a lechub e te olengit er ngii el mo meruul er a ngerachel el sebechel mo uchul e ngmo kelebus. Te mekera remechuodel e sebechir loukerebai er a blekongesenges er a Gideon er a chelsel chouaika el blekeradel?

11. Ngera sebechel ngosuterir a remechuodel el mo oba blekongesenges?

¹¹ Mkerekikl lorrenges a ulekrael, e moltaut. A Dios uluuchais er a Gideon er a rolel e ngmo torudii a olengetongel er a demal, ngar ker a bo lomekedechor er a olengetongel el mora Jehovah, me a ngera el charm a bo lolenget. A Gideon a dimlak lolechedech er a ulekrael, ngdi uleltirakl. Chelecha el taem e a remechuodel a melai a ulekrael er a cheldebechelel a Jehovah loeak a letter, announcement, me a guideline el omekerreu er kid, e mo melemolem el kmeed er a Jehovah. Ngkmal betik a rengud er a remechuodel e le te kerekikl loltirakl a ulekrael er a cheldebechel. Tia uchul a klungiolir a rokui el chad er a ongdibel.​—Psa. 119:112.

12. Te mekera remechuodel e sebechir loltaut er a Hebru 13:17 sel lengai omelodech er a cheldebechel?

¹² Mkengei el mo meruul omelodech. Mutebengii el kmo a Jehovah ullengit er a Gideon me lolengeasek er a klou er a 99 el basent er a resoldau er ngii. (Men. 7:8) Ngika locha millatk, ‘Kede mera lousbech er tia el omelodech? Ngsebechel uaisei?’ Me nguaisei a Gideon ullengesenges. Remechuodel er chelecha el taem oukerebai er a Gideon loeak a loltaut a omelodech el loruul a cheldebechel. (Monguiu er a Hebru 13:17.) El ua tiang, sera 2014 a Governing Body ngilodech a rolel e kede mengkad okedecherul a Blil a Ongdibel me a Assembly Hall. (2 Ko. 8:12-14) A ongdibel a mla mo diak longkad a loan. E ngbai a cheldebechel ousbech a tenget el lolai er a ongdibel el meliuekl er a beluulechad el rokir el omekedechor a blai el kirel omengull, mo lmuut me a lsekum ongdibel lousbech er ngii a di sebechel melenget er a kekerei. A José er a bo lodengelii tia el omelodech e ngdimlak loumerang el kmo ngsebechel meketmokl. Ngulemdasu el kmo: ‘Ngdiak a ngii di el Blil a Ongdibel el mo dechor. Tia diak el rolel a doruul a tekoi er tia el part er a beluulechad.’ Ngera ngilsuir a José el mo support er a ulekrael? Ngkmo: “A Osisechakl 3:5, 6 ulemeklatk er ngak el kmo ngkirek loumerang el ulsirs er a Jehovah. E kmal betok a ungil mla meketmokl! Kede omekedechor a lmuut el betok el Blil a Ongdibel e dirrek el mla suubii el mo melenget el ngar er a kakerous el rolel me  dekaingeseu er aike el mo metacherbesul, me di bo losisiu el rokui.”

13. (a) A Gideon ngmle ulterekokl a rengul er a ngerang? (b) Ngmekera sebechir a remechuodel loukerebai er a Gideon? (Dirrek el momes er a siasing.)

¹³ Moba blekeu el meruul er a soal a Jehovah. A Gideon a millemolem lolengesenges er a Jehovah alta ngmla er ngii a dektel, me a ngerachel el lengiluu a mle kengaol. (Men. 9:17) Sera leues olechotel a kmo Jehovah obengkel, e ngmlo ulterekokl a rengul el kmo a Jehovah mo olengeseu er ngii el omekerreu er a rechedal. A remechuodel el kiei a beluu el merrob a urered oukerebai er a Gideon. Te oba blekeu el omekrael a miting me a berkel a klumech alta ngsebechir el mo kelebus, bo le interrogate er tir, oriid a urerir, me a lechub e te melemall er tir. c Temel a kloul ringel e a remechuodel a mo ousbech er a blekeu el olengesenges a ulekrael el bo lengai, mo lmuut er a bo el kengaol a loruul el uaisei. A ulekrael el bo dengai a locha mo ouchais er a klumech er a kerrekeriil, me aike el kired el meruul me desobel er a odelecheklel a Kok er a Makok.​—Ese. 38:18; Och. 16:21.

14. Ngera uchul e ngmlo meringel er a Gideon a outekangel?

¹⁴ A ngerechelel a Gideon el mengeteklel a Israel a mle meringel lureor. Sera bo loumekemad er a rechad er a Midian er a sueleb er a klebesei, e te chiliis me te uleltoir er tir er a dellas er a Jesreel el mora Omoachel Jordan, el locha kmal mle betok a kerrekar er ngii. (Men. 7:22) A Gideon ngdi mlora Jordan e stob? Ngdiak! Alta ngmlo mechitechut a bedengir, engdi ngii me a re 300 el chedal a mlo imuul e millemolem loltoir er tir. Me te mildechemeterir e mlo mesisiich er tir.​—Men. 8:4-12.

15. Ngera uchul me a lebebil e nglocha mo meringel er a mechuodel a outekangel?

¹⁵ A mechuodel a locha mo meringel er ngii a outekangel er aike el taem el bo lemesaul a bedengel, uldesuel, me a lechub e ngrengul el omekerreu er a ongdibel me a telungalek er ngii. Ngmekera sebechir a remechuodel loukerebai  er a Gideon er a chelsel chouaika el blekeradel?

16-17. Ngera ngilsuir a Gideon el loutekangel, e ngera sebechir a remechuodel el mo ulterekokl a rengrir er ngii? (Isaia 40:28-31) (Dirrek el momes er a siasing.)

¹⁶ Moumera el kmo a Jehovah mo smisichau. A Gideon uluumerang el kmo a Jehovah mo smisichii, e a Jehovah mera el silsichii. (Men. 6:14, 34) A ta el taem e a Gideon me a resoldau er ngii a di ullab ocherir loltoir er a reteru el king er a Midian el locha mlara kiamo. (Men. 8:12, 21) Me nguaisei, engdi nguleak a ngelsuil a Dios e te mildechemeterir. A remechuodel a dirrek el sebechir lultuil er a Jehovah, el ngike el “kmal diak bo le mesaul ma lechub e bo le mechitechut.” Ngmo mesterir a klisiich el lousbech er ngii.​—Monguiu er a Isaia 40:28-31.

¹⁷ Molatk er a experience er a Matthew el ta er a chedal a Hospital Liaison Committee. Ngera olengeseu er ngii loutekangel? Ngkmo: “Ak mera el mla mesa otutel a Filipi 4:13 (NW). Sera lesal mesulang a bedengek e kumdasu el kmo ngkmal dikea el sebechek, e ak kmal mlo blak a renguk el meluluuch lolengit er a Dios me le beskak a klisichel a bedengek me a uldesuek el mo support er a rudam er ngak. Chelsel aikakid el taem e ak mlo melechesuar er a chedaol reng er a Jehovah el melisiich er ngak e olengeseu er ngak loutekangel.” A remechuodel a di ua Gideon el blak a rengrir el omekerreu er a rechedal a Jehovah, alta lebebil er a taem e ngdiak el lebeot er tir a meruul el uaisei. Nguaisei el kirir el mo oba tabesul el uldasu el kmo ngdiak el sebechir el remuul aike el rokui el sebechir. Engdi ngsebechir loumerang el kmo a Jehovah onger ongterir el kirel a ngeso, e mo smisicheterir el outekangel.​—Psa. 116:1; Fil. 2:13.

18. Me a domelekl, e ngmekera sebechir a remechuodel loukerebai er a Gideon?

¹⁸ A remechuodel a kmal sebechir el suub a betok er a Gideon. A remechuodel a kirir lochotii a klengariourreng sel lekengei a ureor, me a dirrek sel lolekoi a rechad a mekngit el kirir me a lechub e lengai a odanges. Ngkirir lochotii a blekongesenges me a blekeu, tokubets sel lekeda ulebongel. E kirir el oumera el kmo a ngii di el omelsemai el bo lechebangel, a Dios a mo smisicheterir. Me ngkmal kired loba omereng el saul er kirir tirka el mengkerengel a sib el kmal meringel loureor e “[mengull] rar uaisel chad.”​—Fil. 2:29, BT.