1. Ngera ngosuterir a rechedal a Jehovah el melemolem el mengull er ngii alta te chelebangel a mondai?

 A BIBLIA mesaod er a taem el dekiei er ngii el kmo ng “blsechel a ringel.” (2 Ti. 3:​1, BT) Me a rechedal a Jehovah diak di lechebangel a omelsemai el lechebangel a rebek el chad te dirrek el mo chobangel a ultok me a odechelakl. Ngera ngosukid el melemolem el mengull er a Jehovah alta kede chelebangel aika el mondai? A ta er a klou a ultutelel luchul a kid el mla mo medengei el kmo a Jehovah a “dingar el Dios.”—Jer. 10:​10, NW; 2 Ti. 1:12.

2. Ngoeak a ngera el rolel e a Jehovah dingar el Dios?

² A Jehovah a mera el chad. Ngmelisiich er kid sel dechebangel a ringel e osiik a techall el lolengeseu er kid. (2 Kr. 16:9; Psa. 23:4) Sel bo domes er ngii el kmo ngdingar el Dios e ngsebechel ngosukid el mtekangel a ngii di el ringel el bo dechebangel. Molatk er a rolel e tia mle klemerang el kirel a King David.

3. Ngera mle belkul a tekingel a David er a ledu el kmo a “Jehovah a ngar”?

³ A David a mle medengelii a Jehovah e mle ultuil er Ngii. A recherrouel el uldimukl er a King Saul er a loltoir el losiik er ngii, e ngmilluluuch el lolengit er a ngelsuil a Jehovah. (Psa. 18:6) Uriul er a Jehovah longer er a nglunguchel e losebelii e ngdilu el kmo: “A Jehovah a ngar!” (Psa. 18:​46, NW) A belkul a tekingel a diak di lolekoi el kmo ngngar ngii a Dios. A ta el reference a melekoi el kmo, a David a milsaod er a klaumerang er ngii er a Jehovah el “dingar el Dios el ngii a blechoel el lolengeseu er a rechedal.” Chochoi, a David a mle experience el kmo a Dios a ngar, e ngii el mle ulterekokl a rengul er tiang a uchul me ngsilsichii  a rengul el mo mesiou e oldanges er a Jehovah.—Psa. 18:​28, 29, 49.

4. Ngera el klungiaol a dengai sel bo domes er a Jehovah el kmo ngdingar el Dios?

⁴ Sel bo lulterekokl a rengud el kmo a Jehovah dingar el Dios e ngngosukid el mo mesiou er ngii loba blakerreng. Ngmo er ngii a klisiched el loutekangel a ringel e odbechid el mo melemolem el meringel el loureor el mesiou er a Dios. Kede dirrek el mo rullii er a rengud el mo melemolem el kmeed er a Jehovah.

A DINGAR EL DIOS A MO SMISICHAU

5. Ngera sebechel meskid a ulterekokl el reng sel dechebangel a ringel? (Filipi 4:​13, NW)

⁵ Ngmo sebeched el loutekangel a ngii di el ringel, mekekerei me a meklou, a lsekum e ngdiak dobes el kmo a Jehovah a ngar, e ngar ngii el blechoel el olengeseu er kid. A Jehovah sebechel lotekur a ngii di el mondai. Ngii Olab a Bek el Klisiich me ngsebechel meskid a klisiich el dousbech er ngii el mo outekangel. (Monguiu er a Filipi 4:​13, NW. a) Me ngngar ngii a ungil luchul me ngsebeched el chobangel a ringel el ulterekokl a rengud. Sel de experience er a ulengeseuil a Jehovah er a chelsel a mekekerei el ringel e ngoterekeklii a rengud el kmo ngmo olengeseu er kid er a temel aike el meklou el ringel.

6. Ngera el experience er a klengar er a David er a lekekerei a killungii a klaumerang er ngii er a Jehovah?

⁶ Molatk a teblo el experience er a David el killungii a klaumerang er ngii er a Jehovah. Sera ledirk kekerei e longkar a sib e a laion me a kuma ngilai a chermel a demal el sib. Ngar er aika el teblo el blekeradel e nguleba blekeu el oltoir aika el charm e osebelii a sib. Engdi ngdimlak lomdasu el kmo ngngii a uchul. Ngmle medengei el kmo a Jehovah milsa klisiich el mo meruul aika el tekoi. (1 Sa. 17:​34-37) A David a dimlak lobes aikang. Omelebedebekel er ngii a killungii a klaumerang er ngii er a Jehovah el dingar el Dios e mlo smisichii er a ngar medal.

7. A David, ngmle ulturk osengel er a ngerang, e tia ngmilekera ngosuir el chobengelii a Goliath?

⁷ Uriul er a locha dirk lengeasek a David e ngmlo oldingel er a kiamp er a resoldau er a Israel. Ngmiltik el kmo a resoldau a kmal medakt e le mekoar el chad er a Filistia el ngklel a Goliath a “melsemai er a re soldau er a Israel.” (1 Sa. 17:​10, 11) A resoldau a mle medakt le tir el ulemes er a klungel a Goliath e ulerrenges a tekingel. (1 Sa. 17:​24, 25) Me nguaisei engdi David a ulemes er a blekeradel el ngar er a kuk ta er a rolel. Ngulemes er ngii el kmo a Goliath a dimlak lolasem er a resoldau er a Israel ngbai millasem er a “re soldau er a di ngar el Dios.” (1 Sa. 17:26) A David a millatk er a Jehovah. Nguluumerang el kmo a Dios el ngilsuir er a longkar a sib a dirrek el mo ngosuir er a chelsel tia el blekeradel. A David el mle ulterekokl a rengul el kmo a Jehovah mo ngosuir a uchul me ngmlo chobengelii a Goliath e mlo kats!—1 Sa. 17:​45-51.

8. Ngmekera sebeched el melatk er a Jehovah sel dechebangel a ringel? (Dirrek el momes er a siasing.)

⁸ Kid me ngdirrek el sebeched el mo mesisiich sel bo dechebangel a ringel a lsekum ngdiak dobes el kmo a dingar el Dios a kltmokl el mo olengeseu er kid. (Psa. 118:6) Ngsebeched el toketekii a klaumerang er kid er tiang loeak a dolatk aike el lurruul er a ngar er a mong. Monguiu a cheldecheduch er a Biblia el remind er kau er a rolel e a Jehovah ulelsobel er a remesiungel. (Isa. 37:​17, 33-37) E mdirrek lomes a report er a jw.org website el ngii ochotii a rolel e a Jehovah olengeseu er a rudam me a rudos er kid er chelecha el taem. Me a lmuut kung, molebedebek aike el taem el Jehovah ngilsukau. Lak obekikl a lsekum e ngdiak el  sebechem el lmatk a kora kmal ileakl el experience el ua odelecheklii a kuma me a laion. E ngerang? E le Jehovah mla remuul a betok el tekoi el kirem er a klengar er kau! Ngmla mekrolau el mei er ngii e mo sechelil. (Jn. 6:44) Mo lmuut er chelechang me ngoeak a ngelsuil e ke dirk ngar er a klemerang. Nglocha ungil omolengit er ngii me lengesukau el mo lmatk aike el taem el lulenger a nglunguchem, ngilsukau er a melemalt el taem, me a lechub e ngsilsichau er a chelsel a kmal meringel el blekeradel. E sel omolebedebek el kirel e ngmo smisichii a klaumerang er kau el kmo, a Jehovah mo melemolem el olengeseu er kau.

9. Ngmekera sebeched el lomes a ringel el dechelebangel? (Osisechakl 27:11)

⁹ Sel bo desa el kmo a Jehovah dingar e mera el chad e ngmo ngosukid el mo omes a ringel el dechebangel loba melemalt el uldasu. Ngoeak a ngera el rolel? Kede mo omuchel lomes a ringel el dechebangel el kmo ng part er a lmuut el klou el mondai er a delongelel a Jehovah me a Satan. A Diabelong a melekoi el kmo sel bo dechebangel a ringel, e kede mo choitii a Jehovah. (Job 1:​10, 11; monguiu er a Osisechakl 27:11.) Me sel dolemolem el loba blakerreng alta kede chelebangel a ringel e kede ochotii a bltkil a rengud el mora Jehovah e meketeklii el kmo a Diabelong a cheblad. Kau, ke chelebangel a ultok er a kabelment, ringelel a keizai er a beluu, rechad el momerk el mo er tir a diak el semeriar, me a lechub e ngkuk ta er a ringel? A leuaisei e lak mobes el kmo a blekeradel el omchelebangel er ngii a meskau a techall el mo rullii a Jehovah el mo dmeu a rengul. E dirrek el lak mobes el kmo ngkmal diak bo lebechikau me bom chuarm lengelakl er sel sebechem. (1 Ko. 10:13) Ngmo meskau a klisiich el mousbech er ngii el loutekangel.

A DINGAR EL DIOS A MO MESKAU OMEKSULLEM

10. Ngera ngmo meruul er ngii a dingar el Dios el kirir tirke el mengull er ngii?

¹⁰ A Jehovah omesterir omeksullir tirke el mengull er ngii. (Heb. 11:6) Ngosuterir el mo ungil a rengrir er aike el ngar ngii er tir e mesterir a budech er chelechang me a diak a ulebengelel el klengar er a ngar medad. Ngkmal sebeched el lotuil omeltked er a Jehovah e  ulterekokl a rengud el kmo ngngar ngii a urungulel me a klisichel el omeskid omeksulled. E tiakid el ulterekokl el reng a odbechid el mo melemolem el mechesang er a omengull er kid el di ua reblak a rengrir el mesiungel a Dios er a irechar. Tiakid a lurruul er ngii a Timothy er a taem er a rekot el Kristiano.—Heb. 6:​10-12.

11. Ngera uldbechii a Timothy el mo meringel el loureor el kirel ongdibel? (1 Timothy 4:10)

¹¹ Monguiu er a 1 Timothy 4:10. A Timothy mle otuil a klaumerang er ngii er a dingar el Dios. Sei a uchul me ngmle meringel loureor el kirel a Jehovah me a rebebil. Ngoeak a ngera el rolel? A apostol Paulus a millisiich er ngii el mo olengeriakl er a rolel a lolisechakl sel lomerk er a klumech me a ongdibel. A Timothy a dirrek el mle kirel kutmeklii a ungil kerebai el kirir a rekldemel er a klemerang el meklou me a mekekerei. Ngdirrek el mlukngerachel el mo meruul a kmal meringel el ngerachel, el ua omesterir a rebebil el ousbech er ngii a mesisiich el omesmechokl engdi ngolechotel a bltikerreng. (1 Ti. 4:​11-16; 2 Ti. 4:​1-5) Timothy a mle sebechel mo ulterekokl el kmo alta lebebil e ngdiak a medengei a urerel me a lechub a rebebil a dimlak el loba omereng el saul el kirel me nguaisei engdi Jehovah mo omekngeltengat er ngii.—Rom 2:​6, 7.

12. Ngera sebechel lodbecheterir a remechuodel el mo mechesang el meruul a ngerechelir? (Dirrek el momes er a siasing.)

¹² Chelecha el taem e a remechuodel me ngdirrek el sebechel mo ulterekokl a rengrir el kmo a Jehovah a mes e mengreos a urerir. A remechuodel a diak di lomecheliu er a resib, lolisechakl, e lomerk er a klumech. Te rebetok er tir a dirrek el olengeseu a ureor el omekedechor me a telemellel a beluu. A rebebil a dirrek el mesiou er cheungel aike el Patient Visitation Group me a lechub e ng Hospital Liaison Committee. A remechuodel el kongei el mo meruul aika el ureor omes el kmo a ongdibel a lekiltmeklii a Jehovah ngdiak el rechad. Sei a uchul me ngblak a rengrir er a ngerechelir e mui el loumerang el kmo a Jehovah mo mesterir a omeksullir.—Kol. 3:​23, 24.

13. Ngngera uldesuel a Jehovah el kirel aike el doruul el kirel?

 ¹³ Ngdiak el rokui el chad a sebechir el mo ta er a remechuodel. Engdi kid el rokui a ngar ngii a sebeched el msang a Jehovah. A Dios er kid a kmal mo ungil a rengul sel debora tkurrebab el klisiched el mesiou er ngii. Ngmes a tengetenged el mora ureor el meliuekl er a beluulechad el rokir mo lmuut me a lsekum e ngdiak el sebeched el melenget a betok. Ngkmal mo ungil a rengul sel lomes er kid el meringel loureor el mo diak demerur el longer er a miting. Ngdirrek el mo dmeu a rengul sel lomes er kid el lousubes er tirke el mlo mekngit el mei er kid. Mo lmuut me a om feel el kmo ngdiak el sebechem el meruul a betok, e moumerang el kmo a Jehovah mengreos aike el moruul. Ngkmal betik a rengul er kau el kirel, e mo meskau omeksullem.—Lk. 21:​1-4.

MOLEMOLEM EL KMEED ER A DINGAR EL DIOS

14. Ngmekera e a dolemolem el kmeed er a Jehovah e ngngosukid el mo oba blakerreng el mo er ngii? (Dirrek el momes er a siasing.)

¹⁴ A lsekum a Jehovah mera el chad er a rengud e ngmo beot er kid a melemolem el oba blakerreng el mo er ngii. Tia mle klemerang el kirel a Josef. Ngika kmal dimlak lekengei el mo meruul a deleboes. A Dios a mle mera el chad er a rengul me ngdimlak el soal el kingtir a rengul. (Gen. 39:9) A lsekum a Jehovah mo mera el chad er a rengud e ngkired el kutmeklii a taem el mo meluluuch el mo er ngii e mesuub er a Tekingel. Seikid e a deleuill er kid me ngii a mukeroul. A lsekum kede mo ua Josef el ngar ngii a kmes el deleuill er kid me a Jehovah e ngkmal diak el soad el mo rullii a ngii di el tekoi el kingtir a rengul.—Jak. 4:8.

15. Ngera sebeched el suub er a dilubech el mora rechad er a Israel er a lengar er a ked? (Hebru 3:12)

¹⁵ Tirke el lobes el kmo a Jehovah a dingar el Dios a sebechel di beot er tir a mo cheroid er ngii. Molatk er a rechad er a Israel er a lengar er a ked. Te mle medengei el kmo ngngar ngii a Jehovah engdi te mlo oumededenger el kmo ngmo mesterir aike el lousbech. Te mlo oker el kmo: “A RUBAK ng obengked ma lechub e ng diak?” (Exo. 17:​2, 7) Sei a uchul me te mlo omtok er a Dios. Ngkmal soad el mengeroid er kid  er a blekerdelir el diak lolengesenges, el ngii a olachidnger el mei er kid.—Monguiu er a Hebru 3:12.

16. Ngera sebechel melasem er a klaumerang er kid?

¹⁶ Tia el beluulechad a rullii el mo meringel er kid a melemolem el kmeed er a Jehovah. A rebetok a diak lekengei el kmo ngngar ngii a Dios. Me a rechad el oltngakl a soal a Dios a kora uai a lungil a klengar er tir. Ngsebechel mo measem a klaumerang er kid sel domes chouaika el tekoi. Me alta kede oumerang el kmo ngmera el ngar ngii a Dios me nguaisei engdi kede locha mo omuchel loumededenger el kmo ngmo ngosukid. Ngike el milluches er a 73 el bliongel er a Psalm a mlo omdasu el uaisei. Ngulemes er a rechad el meliuekl er ngii el oltngakl a llechul a Dios engdi ngkora ua lungil a klengar er tir. Sei a uchul me ngmlo oumededenger el kmo ngngar ngii a belkul a dosiou er a Dios.—Psa. 73:​11-13.

17. Ngera mo ngosukid el melemolem el kmeed er a Jehovah?

¹⁷ Ngera ngilsuir ngika el milluches er tia el Psalm el ngodechii a uldesuel? Ngmillebedebek aike el mo duubech el mo er tirke el lobes er a Jehovah. (Psa. 73:​18, 19, 27) Ngdirrek el millatk a klungiaol el mo er tirke el mesiou er a Dios. (Psa. 73:24) Kid me ngdirrek el sebeched el melatk aike el klengeltengat el bla lebeskid a Jehovah. E omekesiu er ngii er a klengar er kid a lsekum e ngdiak dosiou er a Jehovah. A doruul el uaisei e ngmo ngosukid el mo melemolem el merael el loba blakerreng, e mo melekoi el ua ngike el milluches er tia el Psalm el kmo: “Ngdi kuk le ngak e ng bai ungil a dekeed er a Dios!”—Psa. 73:28.

18. Ngera uchul me ngsebeched el lomes el beduluchei el ulterekokl a rengud?

¹⁸ Ngkmal sebeched el chobangel a ngii di el omelsemai el mei er kid er chelecha el uriul sils e le kid el “mesiou ra dingar el meral Dios.” (1 Th. 1:​9, BT) A Dios er kid a mera el chad el omekerreu er kid e blechoel el olengeseu er kid. Ngulebengkel a remesiungel er a irechar e obengked er chelecha el taem. Ngdi kmedung e kede mo chobengelii sel kot el kloul ringel el mo er ngii er a beluulechad. Engdi ngdiak di bo el kid el tang, a Jehovah obengked. (Isa. 41:10) Mada kid el rokui bo lsebeched el “oumerang e melekoi el kmo, ‘A Rubak a olengeseu er ngak me ng diak bo kmedakt.’”—Heb. 13:​5, 6.