Ngera belkul a Psalm 12:7?

Ngar er a Psalm 12:​1-4 (NW) e a David a kmo a “rechad el oba blakerreng a mla mo dibus er a delongelir a rechad.” E chelechang e ka momes er a Psalm 12:​5-7 (NW).

A 5 el kekerei el bades a mesaod aike el bo loruul a Dios el kirir a remetacherbeserir. Ngmo olsobel er tir.

E a 6 el kekerei el bades a dochelir el kmo a “tekingel a Jehovah bliochel,” “ngdi ua silber el mla obiich.” Tia kmal smodii a uldesued el kirel a tekingel a Jehovah.—Psa. 18:30; 119:140.

Ngar er a bebil el oidel a Biblia e a Psalm 12:7 a moiuid el kmo: “Ke mo mesebechakl er ngii.”

A “tekingel a Jehovah” loeak uchei er a 7 el kekerei el bades a uchul me a rebebil a melekoi el kmo a Dios a mo “mesebechakl er a tekingel.” E kid a medengei el kmo a Jehovah mla mekerreuii a Biblia er a betok el omelasem er a rechad el merrob er ngii me a lechub e te olekngemed er ngii.—Isa. 40:8; 1 Pe. 1:25.

Me nguaisei a Jehovah dirrek el lomekerreu er a rechad el ua lolekoi a 5 el kekerei el bades. Ngmla olengeseu e olsobel er a “remetacherbeserir” me a “remechebuul” e mo melemolem el meruul el uaisei.—Job 36:15; Psa. 6:4; 31:​1, 2; 54:7; 145:20.

Me a leuaisei e ngtecha losebechakl er ngii a Jehovah er a 7 el kekerei el bades, ngrechad me a lechub e ngtekingel?

Sel dorriter er tia el Psalm e ngochotii el kmo ngmelutk er a rechad.

A uchelel a Psalm 12 e a David a mesaod er a reblak a rengrir el mesiungel a Jehovah el lomulak er tir a remedengerenger el chad. E ngar er a 3 el kekerei el bades e kede menguiu el kmo a Jehovah mo mekiis el mo merrob er tirke el melekoi a mekngit. Tia olterekokl er a rengud el kmo ngsebeched el loumerang er a Jehovah el mo olengeseu er a rechedal e le tekingel a bliochel.

Me tirke el bo losebechakl er tir a Jehovah el losaod er ngii a 7 el kekerei el bades, a rechad el remedengerenger omekcharm er tir.

Me ngera uchul me a bebil Biblia oliuid er tia el bades el kmo: “Ke mo mesebechakl er ngii”? Tia oltirakl aike el copy er a Bades el Tekoi er a Hebru el rechad oumerang. Engdi ngar er a Greek Septuagint e ngousbech aika el tekoi: “Ngmo mesebechakl er kid” me a “Ngmo omekerreu er kid.” Tia melutk er tirke el oba blakerreng el remedengerenger omekcharm er tir. Te mo mukerreu er “tia el telecheroll,” el tir tirke el melisiich a mekngit. (Psa. 12:​7, 8, NW) Ngar er a ta er a oidel aike el Bades el Tekoi er a Hebru el mo Aramaic e a uchelel tia el bades a moiuid el kmo: “Kau e RUBAK, a mo omekerreu er a remelemalt. Ke mo mesebechakl er tir el mo cherechar er tia el mekngit el telecheroll.” Tia dirrek el meketeklii el kmo a Psalm 12:7 a diak lolutk el kirel a tekingel a Dios.

Tia uchul me tia el bades a mesterir a “rechad el oba blakerreng” omelatk el kmo a Dios a ngar ngii a bo lerellii.