1. Kede mekera metik er a llomeserreng, e mekera lengesukid?

 A LLOMESERRENG a ngar er a Jehovah el mei, e ngii a kongei el mesterir a rebebil. E ngar er a Jakobus 1:5 e ngkmo: “A le ngar ngii er kemiu olengesonges er a llomeserreng, e lolengit er a Dios, me le bsang; ele Dios a ungil a tekingel el diak a le kiresii er a ngii di le chad.” Me a ta er a rolel e kede nguu tia el llomeserreng a okiu sel dekengei a omellach el mlara Dios. E a doruul el uaisei e ngomekerreu er kid me ngdiak bo doruul a mekngit, e ngosukid el mo melemolem el kmeed er a Jehovah. (Osisechakl 2:10-12) E dirrek el mo er ngii a ungil omeltked er a diak a ulebengelel el klengar.​—Jude 21.

2. Kede mekera mesuub el mo betik a rengud er a omellach er a Dios?

² Kid el diak demecherrungel me a lechub e ngrolel a okuruled a uchul me a lebebil er a taem e ngmo meringel er kid el kongei a omellach me a lechub kede omes er ngii el ungil el tekoi. Engdi sel dechermii a klungiolel a lollach er kid a Dios er a klengar er kid, e kede mo medengelii a klungel a bltkil a rengul el mei er kid. A Osisechakl 3:11, 12 a kmo: “Rungalek, sel losmechokl er kau a RUBAK, e bo le blak a rengum el orrenges” e dirrek el kmo: “A RUBAK a mesmechokl er tirkel betik er a rengul.” Me ngsebechel mo ulterekokl a rengud el kmo a Jehovah a soal aike el mo uchul a klungioled. (Monguiu  er a Hebru 12:5-11.) A Dios a kmal ungil medengelkid a uchul me a omellach er ngii a blechoel el tabesul e tekoi el kmal dousbech er ngii. Me ngar tia el suobel e kede mo mesaod a eua el tekoi el kirel a omellach el kmo: (1) sel di kid el sumechokl a uldesued me a rengud, (2) sel omellach el ruungalek a kirir el omesterir a rengelekir, (3) omellach el dengai er a ongdibel me a (4) tekoi el lmuut el klou a telemellel er a ngii di el omellach el sebeched el nguu.

3. Ngmekera ngalek e di mo ngii el sumechokl a uldesuel me a rengul? Mosaod.

³ A lsekum ngsebeched el di kid el sumechokl a uldesued me a rengud e ngsebeched el mo omtebechel a blekerdeled. E kid a dimlak di demechell e doba tiang e ngbai kired el mesuub er ngii. El ua tiang, a ngalek sel losuub el ourrat, e a demal me a lechub a delal a blechoel lorreked er ngii sel lourrat me ngdiak lemuukel. Engdi cherengel a taem, e a ngalek a mo telkib el meduch me a demal me a delal a sebechel mecherei el telkib, engdi sel bo lulterekokl a rengrir el kmo a ngelekir a mla mo meduch, e te mocha mecherei me ngdi ngii lourrat. Me ngdi osisiu, a ruungalek sel losisecheklterir a rengelekir “el oba omellach ma osisechakl er a Rubak,” e te ngosuterir el mo omekeroul er a llomeserreng e dirrek el di mo tir el sumechokl a uldesuir me a rengrir.​—Efesus 6:4.

4, 5. (a) Ngera me a di lekid el sumechokl a uldesued me a rengud a klou a ultutelel el tedebechel a “beches el klengar”? (b) Ngera me ngdiak el kirel mo mechitechut a rengud el mo lmuut er a taem el derellii a mekngit?

⁴ Me ngdi osisiu el mora rechad el mlo medengelii a Jehovah sel bla bo lemeklou. Alta ngkora sebechir el di tir el sumechokl a uldesuir me a rengrir engdi te dirkak lemukeroul er a tekoi er a klereng. Engdi sel bocha lomelecha er sel “beches el klechad” e melasem el mo ua Kristus, e te lmuut el mukeroul. (Efesus 4:23, 24) Me a lsekum ngdi kid el sumechokl a uldesued me a rengud, e ngmo ngosukid el mo “imikr a blekerdelel a klechad el diak leko Dios, ma ngibeserreng er tial beluulchad, e mo kiei el ultebechel a rengud, e melemalt, e mengull er a Dios er tial beluulchad.”​—Titus 2:12.

⁵ Me nguaisei engdi kid el rokui a ngar er a klengit. (Olisechakl 7:20) Me a lsekum kede rullii a mekngit e ngbelkul a kmo, ngdiak el sebeched el di kid el sumechokl a uldesued me a rengud? Ngdiak leblechoel el uaisei, e le Osisechakl 24:16 a kmo: “Ele melemalt el chad a mo euid el bo lobiou e mekiis.” Me ngera mo ngosukid el lmuut el “mekiis”? Ngokiu a chedaol reng er a Dios el diak di el klisiched. (Monguiu er a 2 Korinth 4:7.) Me a rodech er a reng a uldimukl er a ulserechakl el reng el kmeed losisiu ngii me sel di lekid el sumechokl a uldesued me a rengud.

6. Kede mekera mo ungil el mesuub er a Tekingel a Dios? (Momes er a siasing er a uchelel a suobel.)

⁶ A nglunguuch me a omesubel a Biblia, me a omelebedebek a dirrek el mo ngosukid el di mo kid el sumechokl a uldesued me a rengud. Engdi ngmekerang a lsekum a omesubel a Biblia a kuk meringel er kau me a lechub e ngchetim el mesuub? Lak bo lemechitechut a rengum e bai becherei a Jehovah me lengesukau el mo “songerenger” me a lechub ke mo semeriar er a Tekingel. (1 Petrus 2:2) Molengit er Ngii me lengesukau el di kau el sumechokl a uldesuem me a rengum me bo el ngar er ngii a temem el mesuub er a Biblia. Me nglocha sebechem el me a kot e omuchel el mesuub er a di chelsel a sesei el bung e seikid e ngmo beot er kau e dirrek el dmeu a rengum el mesuub. Ngkmal mo soam aike el taem el diak a cherrodech e ke melebedebek a mekreos el tekingel a Jehovah.​—1 Timothy 4:15.

7. Ngmekera sel di lekid el sumechokl a uldesued me a rengud e ngosukid el mo otutii a turrekong er kid er a omesiunged el mora Jehovah?

 ⁷ Sel di lekid el sumechokl a uldesued me a rengud e ngosukid el mo otutii a turrekong er kid er a omesiunged el mora Jehovah. El ua tiang, a ta el chedam a mlo omdasu el kmo ngmla mo diak leblak a rengul me ngrirellii a turrekong er ngii el mo regular pioneer. Me ngmilekera mlongeseu e le ngdi mle ngii el sumechokl a uldesuel me a rengul? Ngmilenguiu a suobel el ngar er a babilenged el kirel a ureor er a kle pioneer e dirrek el milluluuch. E okiu tiang, e ngrellii a deleuill er ngii me a Jehovah el mo mesisiich. Ngdirrek el mlo auxiliary pioneer er aike el taem el mle sebechel. Ngdimlak lebecherei a ngii di lengerang el mo torebengii, e ngbai millemolem el ultaut a osengel er a turrekong er ngii. Me a uriul, e ngmlo regular pioneer.

8-10. Ngera sebechel ngosuterir a ruungalek el mo omekeroul er a rengelekir el mo mesiou er a Jehovah? Mosaod.

⁸ A Jehovah mla mesterir a ruungalek a ngerachel el mo omekeroul er a rengelekir “el oba omellach ma osisechakl er a Rubak.” (Efesus 6:4) E tiang a kmal meringel er chelecha el beluulechad. (2 Timothy 3:1-5) A rengalek sel lemechell e te diak lodengei a ungil me a mekngit, e a ukltkir a dirkak el muksau a uchul me ngkirir  el mo omeksau er ngii. (Rom 2:14, 15) E a ta er a remerriter er a Biblia a milsaod el kmo a tekoi er a Grik el mloiuid el “omellach” a dirrek el sebechel belkul a kmo “ngokurulel a ngalek” me a lechub e kede mekurulii a ngalek el bo leklou el chad e ngmo bekongerachel.

⁹ A ruungalek sel lollach er a rengelekir loba bltikerreng, e a rengelekir a mo melechesuar a ulekerreu. Te mo medengei el kmo a ilmeklir el melilt a tekoi a ngar er ngii a telkelel, e a rokui el tekoi el loruul a ngar er ngii a lerellii er a klengar er tir. Me ngkmal klou a ultutelel el kirir a ruungalek el Kristiano el mo ultuil er a llomeserreng er a Jehovah el mo ngosuterir el omekeroul er a rengelekir. A uldasu el kirel a okurulel a ngalek a kmal kakerous e le ngultuil er a basio el lekiei er ngii a chad, e dirrek ngii el uldasu a di melemolem el mengodech. Me nguaisei engdi ruungalek el olengesenges er a Dios a diak di lolibech aike el bo loruul me a lechub e di lultuil er a klemedengei me a lechub a uldesuir a rechad.

¹⁰ Ngsebeched el nguu a klubeled er a kerebil a Noah. A Jehovah er a ledu er a Noah el mo meleketek er a arhe, e ngdimlak lodengelii a rolel a bo loruul er ngii me ngmle kirel el mo ultuil er a Jehovah. Me sel donguiu el kirel e ngkmo ‘ngriruul a rokui el tekoi el le dilu er ngii a Dios.’ (Genesis 6:22) Me ngera mlo rsel? A arhe a ulsebelii a klengar er ngii me a telungalek er ngii! A Noah a dirrek el mle ungil oungalek. E ngera uchul? E le ngmle ultuil er a llomeserreng er a Dios. Ngmle ungil olisechakl er a rengelekel e ulechotii a ungil kerebai alta ngdimlak lebeot e le te kiliei er a kmal mekngit el taem er a uchei er a lemei a Ieleb.​—Genesis 6:5.

11. Ngera me a ruungalek a kirir el meringel loureor el olisechakl er a rengelekir?

¹¹ A lsekum koungalek, e ke mekera remuul a ‘rokui el tekoi’? Ngkirem el olengesenges er a Jehovah e mecherei me ngosukau el mo omekeroul er a rengelekem. E ousbech a ulekrael el ngar er a Tekingel me a cheldebechelel, le uriul e a ngelekem a locha mo oureng a sulem le ke mirruul el uaisei! A ta el odam a milluches el kmo: “Ak kmal oba klou el omereng el saul er a rolel a lulemekeroul er ngak a demak me a delak. Te mirruul aike el sebechir el mo rutechii a renguk.” Me ngmillekoi el kmo ngmle demal me a delal a ngilsuir el mo kmeed er a Jehovah. Me nguaisei engdi alta ruungalek a remuul aike el sebechir el mo olisechakl er a ngelekir engdi ngelekir a sebechel el choitii a Jehovah. Engdi a lsekum te melasem el mora tkurrebab el sebechir el osisecheklterir, e ngsebechir el ungil a ukltkir, e melemolem el oumerang el kmo ngmo er ngii a taem e te lmuut el mora Jehovah.

12, 13. (a) Te mekera ruungalek e ochotii el kmo te olengesenges er a Dios a lsekum e ngmesuld a ngklel a ngelekir? (b) Ngmilekera mlo uchul a klungiaol el mora ta el telungalek e le chedam me a chedil a ullengesenges er a Jehovah?

¹² A ta er a kmal meringel lomelsemai el kirel a blekongesenges el bo lechelebangel er ngii a ruungalek a sel lemesuld a ngklir a rengelekir. A odos el ngelekel el redil el milsuld a ngklel me ngmlo diak lekiei el obengterir a melekoi el kmo: “A kulsiik a rolel el ngar er aike el babilenged el mo diak kultirakl er tia el omellach me bo el sebechek el mengoit a taem lobengkel a ngelekek me a ngelekel.” Engdi bechil a ngilsuir el mo mesa el kmo ngmla mo diak a ngerechelir er a ngelekir, e a blakerreng er tir a kirel el mora Jehovah.

¹³ A uriul er a sesei el rak, e a ngelekir a liluut el mei er a klemerang. E a delal a dilu el kmo: “Chelechang e ngomekedong er ngak er a bek el sils e olecholt a omengull el mei er ngak me a bechik e le ngmedengei el kmo aki ullengesenges er a Dios. Me tiakid a uchul me ngungil a deleongel er kemam.” Me kau, ke mo ‘oumera el ulsirs er a RUBAK el oba rengum el rokir’ a lsekum a ngelekem a seluld a ngklel? Ke mo ochotii el mora Jehovah el kmo ngdiak di “mulsirs er  a di llemesel a rengum”? (Osisechakl 3:5, 6) Lak mobes el kmo a omellach er a Jehovah a ochotii a klungel a llomeserreng er ngii me a bltkil a rengul el bedul kid. E kmal diak mobes el kmo ngtilengetengii a Ngelekel el kirel a rokui el chad el ngii a uldimukl er a ngelekem. A Dios a soal a rokui el chad a bo lenguu a diak a ulebengelel el klengar. (Monguiu er a 2 Petrus 3:9.) Me kemiu el oungalek, molemolem el loumera el kmo a omellach er a Jehovah me a ulekrael er ngii a blechoel el melemalt el mo lmuut er a taem el meringel er kemiu el olecholt a blekongesenges. Me molengesenges a omellach er a Dios, e lak momtok.

14. Ngmekera dengai a klungioled er a ulekrael er a Jehovah el “blak a rengul” el mesiou a omeskid?

¹⁴ A Jehovah a tibir el mo omekerreu e olisechakl er a ongdibel er a Rekristiano. E ngii a meruul er tiang lokiu a bebil el rolel. El ua tiang, ngtiltkii a Ngelekel el mo omekerreu er a ongdibel, e a Jesus a ulemekngerachel er a “blak a rengul” el mesiou el mo oltobed a kall er a klereng el mo ngosukid me kede melemolem el blak a rengud. (Lukas 12:42) Ngkaikid el “blak a rengul” el mesiou a meskid a ulekrael me a lechub e ngomellach. Me ngsebechem el melebedebek er aike el taem el mrirengesii a cheldecheduch me a lechub e ke chiliuii a suobel el ngar er aike el babilenged el ngilsukau el mo ngodechii a uldesuem me a lechub e ngomerellem. A lsekum e nguaisei, e ngsebechel el mo dmeu a rengum e le ngolechotel a kmo ke mechere Jehovah me ngmellach er kau​—Osisechakl 2:1-5.

15, 16. (a) Ngmo uchul a ngera el klungioled e le ngmeringel el urerir a remechuodel a uchul? (b) Kede mekera remuul a urerir a remechuodel el mo uchul a deuil a rengrir?

¹⁵ A Kristus a dirrek el mla meskid a remechuodel el mo omekerreu er a ongdibel, e a Biblia mesaod er tir el “sengk el mor a rokui el chad.” (Efesus 4:8, 11-13) Me ngmekera sebeched el ngmai a klungioled er a urerir a remechuodel? Ngsebeched el oukerebai er a klaumerang me a ungil el kerebai er tir, e sebeched el oltirakl a omellach el lomeskid el mengai er a Biblia. (Monguiu er a Hebru 13:7, 17.) A remechuodel a betik a rengrir er kid e sorir a dolekeed er kid er a Dios. Me a lsekum te mtebengii el kmo ngmo diak debo er a miting me a lechub e ngmo diak leblak a rengud, e te mereched el ngosukid. Te mo orrenges er kid e meskid a ungil omelisiich me a ungil omellach el ngar er a Biblia. Me kau, komes a ngelsurir el olechotel a bltkil a rengul a Jehovah el bedul kau?

¹⁶ Lak mobes el kmo ngdiak lebeot er a remechuodel lomeskau a omellach. El ua tiang, ngmlo uangera uldesuel a profet el Nathan er sera bo el kirel el mengedecheduch er a King el David er a uriul er a lolasem a king el omart a oberaod el kngtil? (2 Samuel 12:1-14) E mlo uangera uldesuel a apostol el Paulus er sera bo el kirel el mellach er a Petrus el ta er tirke el 12 el apostol el mle ungil a omerellel el mora Rekristiano el Judea er tirke el dimlak el chad er a Judea? A Paulus a mle kirel oba blekeu el mo meruul er tiang. (Galatia 2:11-14) Me ke mekera rullii el mo beot er a remechuodel el meskau a omellach? Ngkirel el mo ngariou a rengum, e olecholt a omereng el saul, e beot a longedecheduch er kau e omes a ngelsurir el olechotel a bltikerreng er a Dios el bedul kau. E a omoruul el uaisei e ngmo uchul a klungiolem e a remechuodel a mo oldeu a rengrir el meruul er a urerir.

17. Te milekera remechuodel e ngosuir a ta el odos?

¹⁷ A ta er a odos a melekoi el kmo aike el tekoi el dilubech er a klengar er ngii er a ngar er a mong a rirellii el mo meringel er ngii a mo betik a rengul er a Jehovah me ngkmal mlo mechitechut a rengul. Me ngmelekoi el kmo: “Ak mle medengei el kmo ngkirek el mengedecheduch er a remechuodel. Me sera kbong, e te dimlak longokl me a lechub e lolekoi a mekngit el kirek e  te bai millisiich er ngak. Me a uriul er a bek el miting, e a ta er tir a blechoel el me oker er ngak el kmo ak uangera alta te mle mechesang. Me aike el tekoi el dilubech er a klengar er ngak a uchul me ngmle meringel er ngak el mo omdasu el kmo ak rredemelel a nguu a bltikerreng er a Dios. Engdi cherengel a taem, e a Jehovah uluusbech er a ongdibel me a remechuodel el ochotii el kmo ngbetik a rengul er ngak, me ak meluluuch el kmo ngkmal diak a ta el bok chitii.”

18, 19. Ngerang a lmuut meringel er a omellach? Mosaod.

¹⁸ A omellach a locha meringel engdi a lsekum ke otngeklii a omellach er a Dios e nglmuut el mo meringel. (Hebru 12:11) E tiang a sebeched el nguu a klubeled er ngii er a mekngit el kerebil a Kain me a King el Sedekia. A Dios er a lesa Kain el kmal mle chetil a ochellel e soal lomekoad er ngii e ngulemeklatk er ngii el kmo: “Ngera me ng kesib a rengum? E ngera me ng mekngit osengem? Chomko ng mle ungil omerellem e ng blekebek a medam, e ngdi omerellem a mekngit, ma uchul e a klengit a ua tar a tebelik el charm el di mengiil el dimerkmo cho mechitechetong er ngii. Ele ng soal el mengedereder er kau, e ngdi kau a kirem el mesisiich er ngii.” (Genesis 4:6, 7) Me a Kain a ultngeklii a omellach er a Jehovah e milekodir a ochellel me ngmlo chelebangel a kmal meringel el telemellel er a klengar er ngii el rokir. (Genesis 4:11, 12) Engdi omko Kain a ullengesenges er a Dios, e nglocha dimlak bo lechebangel er a chouaika el ringel.

¹⁹ A Sedekia a mle mechitechut e kmal mekngit el king. E sera longedereder, e a rechad er a Jerusalem a kiliei er a kmal mekngit el taem. E a profet el Jeremia a di ulemeklatk er ngii el kmo ngkirel el obult engdi ngultngeklii a omellach er a Jehovah a uchul me ngmlo chelebangel a kmal klou el telemall. (Jeremia 52:8-11) Me a Jehovah a diak el soal a bo dechuarm er a chouaisei el ringel!​—Monguiu er a Isaia 48:17, 18.

20. Ngera mo duubech el mo er tirke el kongei me tirke el oltngakl a omellach er a Dios?

²⁰ Chelecha el taem, e te betok el meliuekl er a beluulechad a melenguul e oltngakl a omellach er a Dios. Engdi ngkmal di kmedung e a ngii di lechad el mo oltngakl a omellach er a Dios a mo chelebangel a meringel el telemellel. (Osisechakl 1:24-31) Me a leuaisei e bai bo ‘dorrenges a ikel demosisechakl er ngii e bo le mellomes a rengud.’ E ua lolekoi a Osisechakl 4:13 el kmo, “di blechoel el melatk a cho bla msuub. A ikel bla msuub a klengar er kau me bo mkerekikl er ngii.”