1. A ruungalek el Kristiano, ngsorir el mo medengei a ngerang el kirir a rengelekir er a uchei er a lemetecholb?

 “NGMLO melai a buil el di kulekoi er a demak me a delak el kmo ngsoak el mo metecholb, me te mle blechoel el mengedecheduch er ngak el kirel tiang e le ngmle sorir a bo kudengelii a berredel tia el omelilt er ngak. Me sera December 31, 1934, e ak rirellii a klou el omelilt er a klengar er ngak el mo metecholb.” Tiakid a mle uldesuel a Blossom Brandt er sera lolilt el mo metecholb. Me ngdi osisiu er chelechang, a ruungalek a sorir el ngosuterir a rengelekir el mo meruul a ungil omelilt. Me a lsekum a ngalek a dirk omai er a rengul a mo metecholb el diak a ungil luchul, e ngsebechel el tomelii a deleuill er ngii me a Jehovah. (Jakobus 4:17) Me a uchei er a lemetecholb a ngelekir, e a rungil loungalek a sorir el mo medengei el kmo a ngelekir ngmla mo kltmokl el mo disaiplo er a Kristus me a lechub e ngdiak.

2. (a) Ngera el mondai a bla lutebengii a rebebil el rudam el oldingel a ongdibel? (b) Ngera kede mo mesaod er tia el suobel?

² A rebebil el rudam el oldingel a ongdibel a mla mtebengii el  kmo, te betok el ngeasek me re 20 me a derengel a rekrir a dirkak lemetecholb alta te mlukeroul er a klemerang. A oumesingd el taem e te mora miting, e mo oldingel, e melekoi el kmo te ta er a Sioning er a Jehovah. Me nguaisei engdi te dirkak letib a rengrir el mora Jehovah e mo metecholb. E a lebebil, e tia uaisei e le redemerir me a rederrir a omdasu el kmo a rengelekir a dirkak bo lekltmokl el mo metecholb. Me ngar tia el suobel e kede mo mesaod a eua el uchul me a rebebil el loungalek a omai er a rengrir el melisiich er a rengelekir el mo metecholb.

3. A demal me a delal a Blossom, te mle bekikl el kirel a ngerang?

³ A demal me a delal a Blossom el dulsaod er tir er a kot el parakurab a mle bekikl el kmo a ngelekir ngmedengelii a belkul me a berredel a bo demetecholb me a lechub e ngdiak. Me ngmekera ruungalek e mo medengei el kmo a ngelekir a kltmokl el mo melib er a rengul el mora Jehovah?

4. Ngmekera sebechel a omengelechel er a Jesus el ngar er a Mateus 28:19, 20 e ngosuterir a ruungalek er chelechang?

⁴ Monguiu er a Mateus 28:19, 20. A Biblia a diak ledu el kmo a chad a kirel el mo tela rekil e mochu metecholb, engdi ngungil a ruungalek a bo lungil lomdasu er a belkul a doruul er a remo disaiplo. Ngar er a tekoi er a Grik, e a tekoi el “moruul er tir el mo obengkek” el ngar er a Mateus 28:19 a belkul a kmo, kede olisechakl er a chad el oba turrekong el olengeseu er ngii el mo disaiplo. Me a disaiplo a chad el mesuub el mo medengei aike el lolisechakl a Jesus e soal lolengesenges er ngii. Me ngar sel taem el lemechell a ngelekir, e a ruungalek a kirir lolisechakl er tir el oba turrekong lolengeseu er tir el mo tuib a rengrir el mora Jehovah e mo disaiplo er a Kristus. Me nguaisei, a retolechoi a diak el sebechir el metecholb engdi Biblia a ochotii el kmo ngmo lmuut er a kekerei el ngalek me ngsebechel mo medengei e mo betik a rengul er a klemerang.

5, 6. (a) A omesodel a Biblia el kirel a Timothy, ngera ngmla meketeklii er a uldesued el kirel a techolb? (b) Ngera kot el ungil rolel el ruungalek a sebechir el ngosuterir a rengelekir?

⁵ A Timothy a mle disaiplo el millilt el mo mesiou er a Jehovah er a ledirk lekekerei el ngalek. A apostol el Paulus a millekoi el kmo, a Timothy a mlo medengelii a klemerang er a Tekingel a Dios er a ‘lekekerei.’ A demal a dimlak losiou er a Jehovah, engdi delal me a delal el mechas a ngilsuir el mo betik a rengul er a Tekingel a Dios, e tiang a mlo uchul e ngmlo mesisiich a klaumerang er ngii. (2 Timothy 1:5; 3:14, 15) Me nglocha mle ngeasek me a lechub e ng 20 me a derengel a rekil, e ngmlo sebechel el ngmai a ileakl el ngerachel er a ongdibel.​—Rellir 16:1-3.

⁶ A rokui el ngalek a kakerous me ngdiak el rokui a mukeroul a klemedengei er tir er a osisiu el taem. A rebebil a medengelii a klemerang, me te meruul a ungil omelilt, e mo metecholb sel dirk lemekekerei. E a rebebil a locha diak lekltmokl el mo metecholb el mo lmuut er a bo lemeklou. Me a rungil loungalek a diak lorrimel er a rengelekir el mo metecholb, e te bai olengeseu er a rederta er tir el mo olengeriakl er sel ungil er tir. Me a ruungalek a dmeu a rengrir a lsekum a ngelekir a mo otutii a Osisechakl 27:11. (Monguiu.) Engdi ngdiak el kirir el obes el kmo a turrekong er tir a olengeseu er a rengelekir el mo disaiplo. Seikid a uchul me ngkirir el di tir el merriter el kmo: ‘A ngelekek, ngungil a klemedengei  er ngii me ngmla mo sebechel el tibir a rengul el mora Dios e mo metecholb?’

7. Ngkirel a chad el mo medengei a rokui el omesodel a osisechakl er a Biblia er a uchei er a bo el sebechel metecholb? Mosaod.

⁷ A ruungalek sel lolisechakl er a rengelekir, e te ngosuterir el mo ungil el medengelii a klemerang. E tia el klemedengei a rulleterir el mo tuib a rengrir el mora Dios. Engdi tia diak lebelkul a kmo, a ngalek a kirel mo medengei a rokui el omesodel aike el osisecheklel a Biblia er a uchei er a bo el sebechel rullii a telbilel a rengul e mo metecholb. A rokui el disaiplo er a Kristus a kirir el melemolem el mesuub el mo lmuut er a uriul er a lemetecholb. (Monguiu er a Kolose 1:9, 10.) Me ngkirel a chad el mo ua ngera klungel a klemedengei er ngii er a uchei er a bo el sebechel metecholb?

8, 9. Ngera dilubech el mo er ngike el mengkar er a rekelebus er a Filipi, e ngera sebeched el suubii er a tekoi el dilubech el mo er ngii?

⁸ A tekoi el dilubech er a ta el telungalek er a irechar a sebechel ngosuterir a ruungalek er chelechang. (Rellir 16:25-33) Ngar er a rak er a 50, e a Paulus a mlo er a beluu er a Filipi er a ongeru el omerolel er a klemissionari. Sera lengar sei, e ngii me a Silas a mlotelechakl me te mlo kelebus. Ngar seikid el kesus, e ngmla er ngii a mesisiich el desiu me ngulebkais a rokui el chesimer er a blil a kelebus. Me ngike el mengkar er a kelebus a ulemdasu el kmo a rokui el kelebus a chiliis me ngmle soal di ngii el melai er a klengar er ngii engdi Paulus a tirrebengii. E seikid e a Paulus me a Silas a ullisechakl er a klemerang el kirel a Jesus el mo er ngii me a telungalek er ngii. Me tuluumerang aike el tekoi el lulsuub el kirel a Jesus e miltebengii a klungel a ultutelel a bo lolengesenges er ngii a uchul me te di mle mereched el mo metecholb. Me ngera sebeched el suubii er tiang?

⁹ Ngike el milengkar er a rekelebus a locha mle soldau er a Rom. Ngdimlak lodengelii a Tekingel a Dios me a bo el Kristiano, e ngmle kirel el mo medengei a uchetemel a klemerang er a Biblia, me aike el tekoi el Jehovah mengerechir er a remesiungel, e mo soal el olengesenges a osisecheklel a Jesus. Me aike el lesiluub er seikid el taem a ngilsuir el mo soal metecholb engdi ngmle kirel el melemolem el mesuub a lmuut el betok er a uriul er a lemetecholb. Engdi ngera sebechem el meruul a lsekum a ngelekem a dmu er kau el kmo ngsoal el mo metecholb e le ngbetik a rengul er a Jehovah e soal olengesenges er ngii? Seikid e ngsebechem el dmu er ngii el mo mengedecheduch er a remechuodel me bo el sebechir el melilt el kmo, ngsebechel mo metecholb me a lechub e ngdiak. * (Momes er a footnote.) Me ngdi ua rokui el Kristiano, ngkirel el melemolem el mesuub a lmuut el betok el kirel a Jehovah el diak a ulebengelel.​—Rom 11:33, 34.

10, 11. (a) Ngera uldesuir a rebebil loungalek? (b) Ngera mera el mo omekerreu er a ngalek?

¹⁰ A rebebil el oungalek a omdasu el kmo, ngmo klungiolir a rengelekir el metecholb er a uriul er a lenguu a ungil skulir me a ungil urerir. Me alta tirka el oungalek a ungil a moktek er tir, engdi ngkirir el di tir el merriter el kmo: ‘Tiang ngosuir a ngelekek el mo ungil a klengar er ngii? Tiang ngoltirakl er aike el bla desuub er a Biblia? A Jehovah ngsoal a dousbech er a klengar er kid el mekerang?’​—Monguiu er a Olisechakl 12:1.

¹¹ Ngklou a ultutelel el diak dobes el kmo tia el beluulechad me aike el tekoi el ngar er a chelsel a omtok aike el soal a Jehovah me aike el lomdasu. (Jakobus 4:7, 8; 1 Johanes 2:15-17; 5:19) A kmes el deleongel lobengkel a Jehovah a kot el ungil lulekerreu el sebechel a ngalek lousbech er ngii el omtok er a Satan, me tia el beluulechad, me a mekngit el uldasu er ngii. Me a lsekum a ruungalek a nguu a tekoi er a skuul me a ungil ureor el mo kot, e a ngelekir a mo oumera el kmo a tekoi er tia el beluulechad a lmuut el meklou a ultutelel er a kmes el deleuill er tir me a Jehovah, e tiang a kmal kdekudel. Me kemiu loungalek, ngsomiu tia el beluulechad a bo lolisechakl er a ngelekiu el kmo aike el lomdasu a mo uchul a deuil a rengrir? A di chimo el rolel e ngmo ungil a klengar er tir, e mera el mo dmeu a rengrir a sel lenguu a Jehovah el mo kot er a klengar er tir.​—Monguiu er a Psalm 1:2, 3.

12. Ngera me a rebebil el oungalek a omdasu el kmo ngungil a lsekum a rengelekir a mengiil el telkib e mo metecholb?

¹² A ta el chedil a mesaod er a uchul me ngdimlak el soal a ngelekel el redil a bo lemetecholb. Ngmelekoi el kmo, “Ak kmal merur el melekoi el kmo a ta er a klou el uchul me ngdimlak el soak a bo lemetecholb a tia el omesuld el ngakl.” Me ngdi ua ngika el odos, a rebebil el oungalek a omdasu el kmo ngungil a lsekum a rengelekir a mengiil e mo metecholb er sel taem el bocha el sebechir el oleiub  er tir er a mekngit lomeruul. (Genesis 8:21; Osisechakl 22:15) E tirkaikid el oungalek a locha omdasu el kmo a lsekum a rengelekir a diak el telecholb, e ngdiak el sebechir el mesuld a ngklir. Engdi ngera kngtil tia el uldasu?​—Jakobus 1:22.

13. A lsekum a chad a dirkak el metecholb, e tia ngbelkul a kmo ngdiak bo losaod er ngii er a Jehovah? Mosaod.

¹³ A ruungalek a diak lekengei er a ngelekir el mo metecholb a lsekum ngdirkak bo lekltmokl el melib er a klengar er ngii el mora Jehovah. Engdi ngcheleuid el tekoi a bo domdasu el kmo ngdi sel metecholb a ngalek e ngkirel el mesaod er ngii er a Jehovah, e le ngalek a mo mesaod er ngii er a Dios sel bo lodengei aike el ledu a Jehovah el kmo ngmelemalt me a cheleuid. (Monguiu er a Jakobus 4:17.) A rungil loungalek a diak longitechut er a rengelekir el mo metecholb. Me alta ngalek a dirk kekerei, engdi ngkirir el osisecheklii el mo uai tir el mo betik a rengul er aike el ledu Jehovah el kmo ngmelemalt, e ouketui aike el ledu el kmo ngcheleuid. (Lukas 6:40) A bltkil a rengul a ngelekem el mora Jehovah a mo omekerreu er ngii me ngdiak bo lerellii a oberaod el klengit, e le ngmo soal el meruul aike el ledu Jehovah el kmo ngmelemalt.​—Isaia 35:8.

14. Te mekera remechuodel e olengeseu er a ruungalek?

¹⁴ A remechuodel a sebechir el olengeseu er a ruungalek sel losaod a ungil tekoi el kirel a turrekong er kid er a omesiunged el mora Jehovah. A ta el odos a dirk melatk er sel taem el Brother Russell a milengedecheduch er ngii er a le elolem a rekil. Ngmelekoi el kmo, “Ngchiloit a 15 el bung el mengedecheduch er ngak el kirel a turrekong er ngak.” Me ngera mlo rsel? A uriul, e ngika el odos a mlo pioneer, e mle pioneer el kuk betok er a 70 el rak! Me ngkmal bleketakl el kmo a ungil tekoi me a omelisiich a ngar er ngii a lerellii er a klengar er a chad. (Osisechakl 25:11) A remechuodel a dirrek el sebechir el mengemedaol er a ruungalek me a rengelekir el mo meruul a ureor er a Blil a Ongdibel. E sebechir el olengit er a  rengalek el mo meruul a ureor el sebechir el meruul.

15. Te mekera rebebil el ngar er a ongdibel e olengeseu er a remekekerei el ngalek?

¹⁵ Te mekera rebebil el ngar er a ongdibel e olengeseu? Ngokiu sel lolecholt a tabesul uldasu el kirir a rengeasek. El ua tiang, ngsebechem el omes aike el mo uchul me a remekekerei el ngalek a sebechir el mo kmeed er a Jehovah. A ngalek, ngmle ungil a nger er ngii er a miting me a lechub e ngmla er ngii a subelel er sel miting el kirel a klengar me a omesiunged? Ngmle ousioning el mora chad er a skuul me a lechub e ngmirruul a melemalt el tekoi er sel taem el mlorimel el mo meruul a mekngit? A lsekum e nguaisei, e mereched el chotengii! Ngsebeched el remuul a turrekong er kid el mo mengedecheduch er a remekekerei el ngalek er a uchei me a uriul er a miting, e sel doruul el uaisei, e a rengalek a mo omdasu el kmo te ngar er a “delongelir a re betok el chad” el chedal a Dios.​—Psalm 35:18.

16, 17. (a) Ngera me ngklou a ultutelel el rengalek a mo metecholb? (b) Ngera sebechel el mo uchul a klou el deuil a rengrir a ruungalek el Kristiano? (Momes er a siasing er a uchelel a suobel.)

¹⁶ A ta er a kmal ileakl el ngerachel el mora ruungalek a sel lolisechakl er a rengelekir el mo betik a rengrir er a Jehovah. (Psalm 127:3; Efesus 6:4) Ngar er a renged er a Israel, e a ngalek a di mechell e chedal a Dios, engdi rengeleked a diak el uaisei. Ngdiak lebelkul a kmo a ruungalek a betik a rengrir er a Jehovah me a klemerang me a rengelekir a mo meruul el uaisei. Sel sils er a lemechell a ngelekir, e a ruungalek a kirir el ngar er ngii a turrekong er tir el mo olengeseu er a rengelekir el mo disaiplo, e tuib a rengrir el mora Dios e mo metecholb. Me tiakid a uchul me a telbilel a rengul a chad, me a techolb, me a blakerreng er ngii er a omesiungel el mora Jehovah a rullii me ngsebechel el mo suobel er a kloul ringel.​—Mateus 24:13.

¹⁷ A Blossom Brandt er sera bo el soal el mo metecholb, e a demal me a delal a mle sorir a bo lekltmokl el kirel tiang. Me sera bo lulterekokl a rengrir el kmo ngmla mo kltmokl, e te kilengei er a uldesuel. Ngmesaod er a omerellel a demal er seikid el kesus er a uchei er a bo lemetecholb el kmo: “Ngdilu er kemam el mo outubuach, e mocha meluluuch. Ngdilu er a Jehovah el kmo, ngmeral dmeu a renguk er a omelilt er a ngelekek el mla tibir a rengul leko er kau.” Me a uriul er a kuk betok er a 60 el rak, e a Blossom a dmu el kmo: “Ngkmal dirkak kubes er seikid el kesus el mei er chelechang!” Me kemiu el oungalek, bo moba deurreng sel mesa ngelekiu el mla tibir a rengul, e mo metecholb el mesiungel a Jehovah.