KID el rokui a soad a rechad a bo lodengelkid el kmo kede ungil a blekerdeled el chad. Me nguaisei, engdi ngmeringel el bo doruul a ungil er chelecha el taem. A ta er a uchul tia el tekoi a kmo, a rebetok el chad a “ouketui a ungil tekoi.” (2 Ti. 3:3) Nglocha ngar ngii a di uldesuir el kirel a ungil me a mekngit, me te mesaod “a mekngit el kmo ng ungil e melekoi a ungil el kmo ng mekngit.” (Isa. 5:20) Ngdirrek el meringel er kid el mo meruul a ungil el locha blekerdelel a klengar er kid er a uchei, e dirrek el diak demecherrungel. Me kede locha mo melatk el ua Anne, * el mla mesiou er a Jehovah el betok el rak el dilu el kmo: “Ngkmal meringel er ngak el omdasu el kmo ak ungil chad.”

Me ngdmeu a rengud, e le kid el rokui a sebeched el mekurulii tia el ungilreng! A ungilreng a mei el okiu a chedaol reng er a Dios, e tia el chedaol reng a kuk mesisiich er a ngii di el omengesuseu er tia el beluulechad me a rechad el iliuekl er kid, me kid el diak demecherrungel me a tekoi el dilubech er a klengar er kid er a uchei. Ka me bo domes el kmo ngera tia el ungilreng e bo dosuub er a rolel e ngsebeched el mo ungil lolecholt er ngii.

A ungilreng a blekeradel el chad a meruul a ungil. Nguldimukl er a ngarbab el olechotel a tekoi er a kldung, el diak a ngii di el mekngit er ngii. A ungil a blekerdelel el chad a blechoel losiik a rolel e ngolengeseu er a rebebil e meruul a ungil tekoi el kirir.

Ke locha mla meseterir a rebebil er a rechad el di mereched el meruul a ungil tekoi el kirel a telungalek er tir me a resechelirir, engdi a ungil a blekerdelel el chad ngdi meruul er tiang e merekong? Ngdiak el uaisei e le ngdiak a ta er kid el blechoel el ungil er a bek el taem, e le Biblia a kmo “ng meral diak a tal chad er a beluulchad el di ungil omerellel el diak a tal le mekngit er ngii.” (Oli. 7:20) A apostol el Paulus a di mle bleketakl el melekoi el kmo: “Ak medengei el kmo ng diak a ungil el ngar a renguk er a di klechad er ngak.” (Rom 7:18) Me ngbleketakl el kmo ngkired el mo er Ngike el uchul a ungilreng me bo el sebeched el mekurulii tia el blekeradel.

A Jehovah a olterekokl a llach el kirel a ungil. A Biblia a melekoi el kirel el kmo: “Kau a meral ungil e ungil a omerellem, mosisecheklak er a llechum.” (Psa. 119:68) Me bo dosaod a eru el tedebechel a ungilreng er a Jehovah el medung er tia el bades.

A Jehovah a ungil. A Jehovah a kmal ungil me ngdiak el sebechel el mo mekngit. A rokui el blekerdelel a obengkel a ungilreng er ngii. Ngulechotii a klebkellel, el uldimukl er a ungilreng er ngii el mora Moses. A Moses a rirengesii a ngor el mesaod er a Jehovah el kmo: “Ngak ngii el RUBAK el Dios el mui er a blekokuii ma klechubechub, el diak le mereched el ngmasech a renguk, e olecholt er a blechoel bltikerreng ma blakerreng. Ak ultaut er a telbilek el mor a re betok el telael el chad e ousubes a chelebirukel, ma teluchakl, ma klengit; e ngdi diak knguu a medak ma lechub e kukor el omals” er a rengar er a klengit. (Exo. 33:19; 34:6, 7) Me ngsebeched el mesang el kmo a Jehovah a ungil er a bek el rolel. Me alta Jesus a kot el ngarbab el olechotel a ungilreng, engdi ngmle sebechel el melekoi el kmo: “Ng diak a chad el ungil ng di tal Dios.”​—Lk. 18:19.

 A urerel a Jehovah a di ungil. A rokui el tekoi el loruul a Jehovah a di ungil. “Ngii a ungil el mor a re bek el chad e ngar ngii a klechubechub er ngii el mor a ikel rokui el le riruul.” (Psa. 145:9) A Jehovah a ungil e diak longetukel a uchul me ngmesterir a rokui el chad a klengar me aike el lousbech me lolemolem a klengar er tir. (Rel. 14:17) A ungilreng er ngii a dirrek el mocholt sel lousubes er kid. Ngike el milluches er a psalm a dilu el kmo: “Kau a ungil, e ousubes a tellemall.” (Psa. 86:5) Me ngsebechel el mo ulterekokl a rengud el kmo a Jehovah a “diak lolechib a ungil tekoi el mor tirkel meruul a melemalt el tekoi.”​—Psa. 84:11.

Kede ulebeob el okesiul a Jehovah me ngsebechel el mo ungil a blekerdeled e dirrek el mo meruul a ungil. (Gen. 1:27) Engdi omeruul el ungil a diak el sebechel el di ngii el duubech. A Jehovah a melekoi er kid el kmo ngkired el ‘mesuub el meruul a ungil.’ (Isa. 1:17) Engdi ngmekera dosuub el mo meruul a ungil? Ka momtab a edei el rolel e ngsebeched el meruul er tiang.

A kot, e ngsebeched el meluluuch el kirel a chedaol reng, el ngii a sebechel ngosuterir a Rekristiano el mo ungil er a osengel a Dios. (Gal. 5:22) Nguaisei, a chedaol reng er a Dios a sebechel el ngosukid el mo betik a rengud er a ungil e oltngakl a mekngit. (Rom 12:9) A Biblia a melekoi el kmo a Jehovah a sebechel el ‘smisiich a rengud me di bo deblechoel el meruul a ungil e dolekoi a ungil tekoi.’​—2 Th. 2:16, 17.

A ongerung, e ngkired el menguiu er a mlukreng el Tekingel a Dios. Sel doruul el uaisei, e a Jehovah a sebechel el osisecheklid el ‘mo medengei a ungil doruul’ e kutmeklid el “kirel a bek el ungil ureor.” (Osi. 2:9; 2 Ti. 3:17) Me sel donguiu er a Biblia e dolebedebek el kirel aike el donguiu, e kede mekekii a rengud er a ungil tekoi el kirel a Dios me aike el soal. E seikid e ngmo sebeched el omekeek er a omsengelel a rengud er a tekoi el sebeched el mo ousbech er a uriul.​—Lk. 6:45; Efe. 5:9.

A ongedei, e kede melasem er a tkurrebab el sebeched el mo ‘meruul a ikel ungil’ el tekoi. (3 Jn. 11) Kede metik a kerebai el ngar er a Biblia el sebeched el oltirakl. Nguaisei, a kot el ungil el kerebai er a ungilreng a Jehovah me a Jesus. Engdi ngdirrek el kired el melatk er a rebebil el ble lodengelterir a rechad el kmo te mirruul a ungil. A reteru el chad el sebeched el mo melatk el kirir a Tabitha me a Barnabas. (Rel. 9:36; 11:22-24) Ngsebechem el ngmai a klungiolem er a kmal ungil kerebai er tir sel mosuub a omesodel a Biblia el kirir. Sel mosuub, e momtab aike el tekoi el lurruul el olengeseu er a rebebil. E molatk el kirel aike el tekoi el sebechem el remuul el mo ngosuterir a rechedal a telungalek er kau me a lechub tirke el ngar er a ongdibel. Ngdirrek el molatk aike el ungil tekoi el dilubech el mora Tabitha me a Barnabas e le tir el mle ungil el mora rechad. Ke dirrek el mo ngmai a klungiolem sel monguiu aika el cheldecheduch el kirir.

Ngdirrek el sebeched el melatk a kerebai er a rechad er chelecha el taem el tir a meruul a ungil tekoi. El ua tiang, ka molatk er a reblak a rengrir el mechuodel er a  chelsel a ongdibel el tir a ‘sorir el meruul a ungil tekoi.’ Ngdirrek el diak mobes er a reblak a rengrir el odos el okiu a omelekingir me a omerellir el “olisechakl a ungil el omeruul.” (Tit. 1:8; 2:3) A odos el ngklel a Roslyn a kmo: “A sechelik a mora tkurrebab el sebechel el olengeseu e melisiich er a rebebil el ngar er a ongdibel. Ngmelatk el kirel a blekerdelel a klengar er tir e blechoel el mesterir a mekekerei el sengk me a lechub e ngosuterir er a kuk bebil er a rolel. Me a kumes er ngii el kmo ngmera el ungil a blekerdelel.”

A Jehovah a melisiich er a rechedal el mo ‘melasem el meruul a ungil.’ (Amo. 5:14) A doruul el uaisei, e ngmo betik a rengud er a llechul e dirrek el mo soad el meruul a ungil tekoi.

Ngdiak el kired el mo omdasu el kmo a doruul a ungil tekoi a belkul a kmo kede meruul a meklou el tekoi el kirir a rechad me a lechub e kede omesterir a meringel a cheral el klalo. El ua tiang: Omomdasu e a chad el ousunga ngdi eru el taem el lousbech er a hake er ngii el mengesbereber? Ngdiak, ngbai mo betok el taem el longesbereber el rullii a klebokel el sunga. Me ngdi osisiu, a lsekum e kede meruul a betok el mekekerei el tekoi el olengeseu er a rebebil, e tiang a mo ochotii el kmo ngungil a blekerdeled.

A Biblia a mengelechel er kid el mo ‘mengetmokl el kirel’ e mo “kldmokl” el meruul a ungil tekoi. (2 Ti. 2:21, BT; Tit. 3:1, BT) A lsekum kede mo kerekikl el melatk aike el tekoi el duubech er a klengar er a chad, e nglocha mo sebeched el mes a rolel e kede olengeseu er ngii “el oltirakl er a ungil er ngii” e mo melisiich er ngii. (Rom 15:2) Tiang a locha uldimukl er a domsang aike el ngar ngii er kid. (Osi. 3:27) Ngsebeched el mengemedaol er ngii el mei er a blid el me omengur me a lechub e kede kasisiich. A lsekum e kede medengelii a chad el smecher, e ngsebeched el luchesii a card, e mo oldingel, me a lechub e kede oudengua el mo er ngii. Nguaisei, ngsebechel el mo betok a techelled el mo melekoi “a ikel ngar ngii a le rellii, el ikel ngosuir a chad e ngar ngii a belkul, me bo le sebechel a ikel molekoi el mor ngii a le rellii er tirkel rongesemiu.”​—Efe. 4:29.

Me kid a ua Jehovah el soad el osiik a techall el mo meruul a ungil tekoi el mora rokui el chad. Me ngdiak dongetukel er a rechad. A ta er a kot el ungil el rolel a doruul er tiang a okiu sel domerk er a ungil chais er a Renged el mora rokui el chad. Ngdi ua lulengelechel a Jesus, kede osiik a techall el meruul a ungil el mo er tirke el chetirir kid. (Lk. 6:27) Ngkmal diak el mekngit el tekoi a doba blekokuii e doruul a ungil el mora rebebil, e le “ngdiak a llach el merrob iaikang.” (Gal. 5:22, 23, BT) Sel doruul a ungil alta rechad a mo mekngit er kid me a lechub e kede chuarm, e nglocha mo sebeched el ngosuterir el mo medengelii a klemerang e mo mengebkall er a Dios.​—1 Pe. 3:16, 17.

“A re ungil chad a mo ngma omeksullir el kirel a urerir.” (Osi. 14:14) Ngera bebil er aika el klungiaol? Sel lungil a omerelled el mora rebebil, e tir me te locha dirrek el mo ungil a omerellir el bedulkid. (Osi. 14:22) Ngmo lmuut me a lsekum e ngdiak lungil a omerellir el bedulkid, me kid a kired el di melemolem el meruul a ungil el mo er tir. Seikid e te locha mo melodech a blekerdelir e mo ungil a omerellir el bedulkid.​—Rom 12:20.

A rebetok a ouchais er a rolel e te ngilai a klungiolir e le tir el mlo meruul a ungil e mlo diak loruul a mekngit el tekoi. Ka molatk er a tekoi el dilubech el mora Nancy. Ngmelekoi el kmo: “Sera kurael el me klou, e ngkmal dimlak kumekerreu a ngii di el ngerang, e mle mekngit a rolel a klengar er ngak, e dimlak kulecholt a omengull. Engdi sera kusuub e bo kultirakl a llechul a Dios, e ngmlo dmeu a renguk. Chelecha el taem, e ngungil a uldesuek el kirek.”

A kot el ngarbab el uchul me kede omekeroul er a ungilreng a ngii el mo uchul a deuil a rengul a Jehovah. Me ngmo lmuut me a lak leues a omerelled a rechad, engdi a Jehovah medengei. Ngkmal ungil medengei a rokui el ungil el omerelled me a uldesued. (Efe. 6:7, 8) Me ngmekera lomeskid a omeksuled? “A RUBAK a dmeu a rengul er a re ungil chad.” (Osi. 12:2) Me bo dolemolem el omekeroul er a ungilreng. A Jehovah a tibir el kmo a “klebkall, ma odanges, ma budech a mor a re bek el chad el meruul a ungil.”​—Rom 2:10.