1. Ngera el ileakl el omengelechel a ledillii a Jesus el mora redisaiplo er ngii? (Momes er a siasing er a medal tia el babier.)

SEL kesus er a uchei er a kodellel a Jesus, e ngmilsterir a redisaiplo er ngii a ileakl el omengelechel. Ngdilu er tir el kmo: “Bo mkaubltikerreng . . . el ua ngak el betik a renguk er kemiu.” E dirrek el dilu el kmo: “Cho bo mkaubltikerreng, e te mo medengelkemiu a rokuil chad el kmo kom Obengkek.”​—Jn. 13:34, 35.

2. Ngera uchul me ngklou a ultutelel el bo dekaubltikerreng er a delongeled?

² A Jesus a dilu el kmo a remera el disaiplo er ngii a mo beot el medangch a lsekum te olecholt er a osisiu el bltikerreng el ngii a ulechotii. Tia el tekoi a mle klemerang er a irechar, e dirrek el klemerang er chelecha el taem. Tiaikid a uchul me ngklou a ultutelel el bo dekaubltikerreng er a delongeled el mo lmuut er a taem el bo lemeringel er kid el meruul uaisei!

3. Ngera kede mo mesaod er tia el suobel?

³ Kid el diak demecherrungel a uchul me ngmo meringel er kid el lolecholt er a bltikerreng er a delongeled. Me nguaisei, engdi ngkired loukerebai er a Kristus. Me ngar tia el suobel e kede mo mesuub a rolel e ngsebeched el mo meleketek a budech, e mo diak dongetukel er a rechad, e dirrek el mo oltuchakl er a remerael. Me sel mosuub er ngii, e bo molatk el kmo: ‘Ngera sebechek el suub er a rudam me a rudos el tir a melemolem lolecholt er a bltikerreng er a delongelir alta e te chelebangel a omelsemai?’

4. A doltirakl er a Mateus 5:23, 24, e ngera uchul me ngkired el meleketek a budech kid me a odam el ngar ngii a chetil er kid?

⁴ A Jesus a ulsisecheklid er a klungel a ultutelel a bo doleketek a budech lobengkel a odam el ngar ngii a chetil er kid. (Monguiu er a Mateus 5:23, 24.) Ngmillisiich el kmo ngkired el melemolem a ungil deleuill er kid me a rebebil a lsekum ngsoad loldeu er a rengul a Dios. A Jehovah a dmeu a rengul a lsekum kede mora tkurrebab el sebeched el meleketek a budech lobengterir a rudam er  kid. Ngdiak lekengei er a omengull er kid a lsekum kede melemolem loba ngasechereng e diak dolasem el meleketek a budech.​—1 Jn. 4:20.

5. Ngera rirellii el mo meringel er a ta el odam el meleketek a budech?

⁵ Nglocha mo meringel er kid el meleketek a budech. E ngera uchul? Me dosaod a tekoi el dilubech el mora Mark. * Ngmlo mekngit a rengul er a taem el ta er a odam a millekoi a mekngit el kirel er mora rebebil er a chelsel a ongdibel. Me ngmilekerang? Ngdilu el kmo: “Ngkmal mlo kesib a renguk e dilu betok el tekoi.” E a uriul e ngii el Mark a mlo ouuchel er a rengul er a blekerdelel, e mlo olengit a klausubes er ngike el odam e millasem el meleketek a budech er a delongelir. Engdi ngike el odam a dimlak lekengei er ngii. Me a cherengel a taem, e a Mark a mlo omdasu el kmo, ‘Ngera uchul me ak melasem a lsekum ngdi chetil?’ Me nguaisei, engdi ngike el odam loldingel a ongdibel a millisiich er a ngii me lak lemeterob el meruul er tia el tekoi. Me ngmilekerang a Mark?

6. (a) Ngoeak a ngera el rolel e a Mark a millemolem el melasem el meleketek a budech? (b) Ngoeak a ngera el rolel e a Mark a uletaut er a Kolose 3:13, 14?

⁶ A Mark a mlerriter a uldesuel e mlo mtebengii el kmo a lebebil er a taem e ngdimlak loba klengariourreng e omdasu el kmo ngkuk ungil er a rebebil. Ngmlo medengei el kmo ngkirel melodech a blekerdelel. (Kol. 3:8, 9, 12) Ngliluut el mo er ngike el odam e uleba klengariourreng lolengit a klausubes er ngii. Ngdirrek el mlo meluches a babilengel el mo er ngii el odam el mesaod el kmo ngkmal mlo mekngit e kmal soal a lluut el mo ungil a deleuill er tir el terung. Ngdirrek el mirruul a mekekerei el gift el lulemdasu el kmo ngsoal ngika el odam. Engdi ngklengiterreng, e le ngika el odam a di millemolem el kesib a rengul. Me nguaisei, engdi a Mark a millemolem lolengesenges er a omellach er a Jesus el mo betik a rengul e ousubes er a odam er ngii. (Monguiu er a Kolose 3:13, 14.) A lsekum a rebebil a diak lekengei er a budech el doleketek er ngii, e a mera el bltikerreng er a Rekristiano a mo ngosukid el melemolem lousubes er tir e meluluuch me bo lebudech  a delongeled kid me tir.​—Mt. 18:21, 22; Gal. 6:9.

7. (a) Ngera ngmengelechel er ngii a Jesus? (b) Ngera el meringel blekeradel a blo lechelebangel er ngii a ta el odos?

⁷ A Jesus a mengelechel er kid el mo melemolem el meruul el mora rechad aike el soad a rechad a loruul el mei er kid. Ngdirrek el dilu el kmo ngdiak el kired el di oubltikerreng el mo er tirke loubltikerreng el mei er kid. (Lk. 6:31-33) Engdi ngmo uangera uldesuem a lsekum a chad el ngar a ongdibel a di oleiub er ngii er kau e diak loutkeu er kau? Tiaikid el tekoi a dilubech el mora Lara. Ngdilu el kmo: “A ta el odos a di uleiub er ngii er ngak, e diak kudengei el kmo ngera uchul me nguaisei. Ngkmal mlo meringel er ngak, e mlo uchul e ngmlo diak ledeu a renguk el ngar a miting.” Me a uchelel, e a Lara mlo omdasu el kmo: ‘Ngdimlak a ngera el ktilemellii. E osisiu el taem e a rebebil el ngar a ongdibel a dirrek el lomdasu el kmo ngika el odos a kora ngodech a blekerdelel.’

8. Ngera ngmirruul a Lara el mo meleketek a budech? E ngera sebeched el suubii er a tekoi el dilubech el mo er ngii?

⁸ A Lara a millasem a rolel e ngmo meleketek a budech. Ngmilluluuch el mora Jehovah e mlo mengedecheduch er ngika el odos. Te milsaod er tia el mondai, e mlo kaiuechull me ngmlo budech a delongelir. Me a rokui el tekoi a mlo ungilbesul. A Lara a dilu el kmo: “Engdi a uriul e ngii el odos a liluut el mo meruul a osisiu el blekeradel el ua lurruul er a uchei. Me ngkmal mlo mechitechut a renguk.” Me ngmlo omdasu a Lara el kmo ngbai mo dmeu a rengul a lsekum ngika el odos a ngodechii a blekerdelel. Engdi cherengel a taem, e a Lara a mlo medengei el kmo ngkirel melemolem loubltikerreng el mo er ngika el odos, e mo ‘ousubes’ er ngii. (Efe. 4:32–5:2) A Lara a melatk el kmo a mera el bltikerreng er a Rekristiano a “diak le bekongesengasech a rengul, e diak longemekl. Ng outekangel el diak le toched er a rokui el tekoi, e oumera rokui el tekoi, e melatk e mengiil el diak louedikel a rengul, e klou a rengul el diak le mesim er a rokui el tekoi.” (1 Ko. 13:5, 7) Me ngmlo budech a uldesuel a Lara. E a cherengel a taem e ngliluut el mo ungil a delongelel ngii me ngike el odos. Me sel moleketek a budech lobengterir a rudam me a rudos e molemolem loubltikerreng el mo er tir, e ngmo ulterekokl a rengum el kmo a ‘Dios er a  bltikerreng ma budech a mo obengkem.’​—2 Ko. 13:11.

9. A doltirakl er a Rellir 10:34, 35, e ngera uchul me ngdiak el kired el mengetukel er a rechad?

⁹ A Jehovah a diak longetukel er a rechad. (Monguiu er a Rellir 10:34, 35.) Kede ochotii el kmo kede ngelekel a lsekum ngdiak dongetukel er a rechad. Kede olengesenges er tia el omengelechel sel lebetik a rengud er a rechad el ua lebetik a rengud er kid, e kede dirrek el olengeseu el meleketek a budech er a delongeled kid me a rudam me a rudos er kid.​—Rom 12:9, 10; Jak. 2:8, 9.

10-11. Ngmilekerang a ta el odos e ngodechii a mekngit luldesuel?

¹⁰ Ngdiak lebeot er a rebebil el mo diak longetukel er a rechad. Ka molatk a tekoi el dilubech el mora odos er kid el Ruth. Sera dirk lengeasek, e ngdilubech a mekngit el tekoi el mo er ngii lobengkel a chad er a ta er a beluu. Tiang ngera ngrirellii el mo er ngii? Ngdilu el kmo: “Ngkmal chetik a rokui el tekoi er sel beluu. A kulemdasu el kmo a rokui el chad er sel beluu a di osisiu el mo lmuut er a rudam me a rudos er kid.” Nguleak a ngera el rolel e a Ruth a mlengodech a uldesuel?

¹¹ A Ruth a mlo melechesuar el kmo ngkirel melodech er tia el mekngit luldesuel. Ngmilenguiu a experience me a reports er a Yearbook el kirel tia el beluu. Ngdilu el kmo: “Ak millasem el mo omdasu a ungil tekoi el kirir a rechad er tia el beluu. E mlo mtebengii el kmo a rudam me a rudos er kid a blak a rengrir el mora Jehovah. Me ngulebeketakl er a renguk el kmo tir me te dirrek el chedal tia el klodam er kid el meliuekl er a beluulechad.” Me a cherengel a taem, e a Ruth a mlo mesang el kmo ngmle kirel meruul a lmuut el bebil er a tekoi. Ngmilsaod el kmo: “Sel taem el kbetik er a rudam me a rudos el chad er ngii el beluu, e ak melasem el mo sechelirir. Ak milengedecheduch er tir me ak mlo ungil medengelterir.” Me ngera mlo rsel? Ngdmu el kmo: “A cherengel a taem e ngmlengodech a uldesuek el kirir.”

12. Ngera mle mondai er a odos el Sarah?

¹² A rebebil a locha mengetukel engdi ngdiak lutebengii el kmo te uaisei. A Sarah a ulemdasu el kmo ngdiak longetukel, e le ngdiak loukerrekeriil er a rechad el ngodech a chiro er a bedengir, me a ildisel a ududir me a ildisel a ngerechelir er a chelsel a cheldebecheled. Engdi ngkilengei el kmo: “Ak mlo mtebengii el kmo ngak a mengetukel er a rechad.” Lokiu a ngera el rolel? A Sarah a mlukeroul el ngelekir a rechad el ngarbab a skulir me ngmle soal di teloi er tirke el ngarbab a skulir el chad. E a ta el taem, e ngdilu er a sechelil el kmo: “Ak di obengterir a rekldemek er a klaumerang el ngarbab a skulir. E mengeroid er ngak er tirke el diak.” Me ngbleketakl el kmo a Sarah a mle kirel melodech er a uldesuel. Lokiu a ngera el rolel?

13. Ngera sebeched el suubii er a rolel e a Sarah a ngildechii a uldesuel?

¹³ A odam loldingel a ongdibel a ngilsuir a Sarah el mo merriter er a uldesuel. Me ngdilu el kmo: “Ngika lodam a chilat er ngak er a blakerreng er ngak er a omesiungek, me a ungil nger er ngak, me a klemedengei er ngak er a Bades. E silodii el kmo sel lemukeroul a klemedengei er kid, e ngdirrek el kired lomekeroul a blekerdelir a Rekristiano el ua klengariourreng, tabesul luldasu me a dirrek el klechubechub.” A Sarah a kmal lilecha er a rengul aika el tekingel ngika lodam. E dilu el kmo: “Ak mlo mtebengii el kmo a klou a ultutelel tekoi a se lungil omerelled e doubltikerreng.” Tiang a mlo uchul e ngulemuchel el mo tabesul a osengel el bedul a rudam me a rudos er ngii. Ngmesaod el kmo: “Ak mlo omtab el kmo ngera el blekeradel a rulleterir me te mekreos er a osengel a Jehovah.” E kid a kuk mekerang? Ngkmal diak el kired el mo omdasu el kmo kede kuk ungil er a rebebil e le ngarbab a skuled! A lsekum e ngmera el “betik a rengmiu er a re  chedal a Dios,” e ngmo diak mongetukel er a rechad.​—1 Pe. 2:17.

14. A doltirakl er a Hebru 13:16, e ngua ngera uldesuel a Jehovah sel doltuchakl er a rechad?

¹⁴ A Jehovah a kmal dmeu a rengul sel doltuchakl er a rechad. (Monguiu er a Hebru 13:16.) Ngomes er tia lomeruul el tedebechel a omengull er kid, el ileakl sel dolengeseu er tirke lousbech a ngeso. (Jak. 1:27; 2:14-17) Me a Bades a melisiich er kid el mo ‘omtechakl rar merael.’ (Rom 12:13, BT) Sel doltuchakl er a rechad e kede ochotii el kmo kede omekerreu er tir e betik a rengud er tir e dirrek el soad el mo sechelirir. A Jehovah a dmeu a rengul sel lomes er kid el merous a sesei el kall, me a ilumel me a lechub e kede mengoit a temed lobengterir tirka el chad. (1 Pe. 4:8-10) Me nguaisei, engdi nglocha mo er ngii a bebil tekoi el sebechel rullii el mo meringel er kid el oltuchakl er a rechad.

15-16. (a) Ngera uchul me a rebebil omai er a rengrir el oltuchakl er a rechad? (b) Ngmilekerang a Edit e mlo sebechel loltuchakl er a rechad?

¹⁵ Kede locha mo omai er a rengud el oltuchakl er a rechad el blekerdelel a klengar er kid a uchul. Ka molatk er a melakl dil el Edit. A uchei er a bo el Sioning, e ngdi mla blekerdelel el diak el soal teloi er a rechad. Ngulemdasu el kmo te ngar ngii a rebebil el lmuut lungil loltuchakl er a rechad.

¹⁶ A uriul er a bo el Sioning, e ngildechii a uldesuel. Ngmillasem a rolel e ngmo meduch loltuchakl er a rechad. Ngdilu el kmo: “Sera lomuchel a okedecherul a beches el Blil a Ongdibel er kemam, e a ta er a remechuodel a uluuchais er ngak el kirir a rubekel el me olengeseu er tia el ureor, e dirrek lullengit me bo lsebechir tirka el lobekel el me kiei lobengkek el eru el sandei. Ak mlo melatk er a rolel e a Jehovah a ulemekngeltengat er ngike el melakl dil er a Sarefath.” (1 Ki. 17:12-16) Me ngii el Edit a kilengei. Me ngmlukngeltengat el kirel tiang? Ngmilsaod el kmo: “A eru el sandei a millemolem el mo eru el buil. Ngar tiaikid el taem, e ngmlukeroul a kmes el deleuill er kemam.” A Edit a dirrek el mlukngeltengat el mlo er ngii a rekmeed el sechelil el ngar a ongdibel. Chelecha el taem e ngmesiou el pioneer e dirrek el kmal dmeu a rengul el loltuchakl er a rudam me a rudos el ledak loldingel el mei er a blil. Ngmelekoi el kmo: “Ngkmal dmeu a renguk  el merous! E a mera er ngii ak bai ngmai a lmuut el betok el klengeltengat sel kuruul uaisei.”​—Heb. 13:1, 2.

17. Ngera temlo mtebengii a Luke me a bechil er a blekerdelir?

¹⁷ Alta kede locha oltuchakl er a rechad, engdi a ker a kmo, ngsebeched el lmuut el mo ungil er tia el tekoi? El ua tiang, a Luke me a bechil a blechoel loltuchakl er a rechad. Ngblekerdelir el blechoel loltuchakl er a rechad er a blirir, rechederir, me a rekmeed el sechelirir, me a dirrek el ngike el odam loldingel a ongdibel me a bechil. Me nguaisei, engdi a Luke a dilu el kmo, “Aki mlo mtebengii el kmo aki di oltuchakl er tirke el kmeed er kemam el chad.” Ngoeak a ngera el rolel, e a Luke me a bechil a liluut el mo ungil oltuchakl er a rechad?

18. Ngoeak a ngera el rolel e a Luke me a bechil a liluut el mo ungil loltuchakl er a rechad?

¹⁸ A Luke me a bechil a ngilodech a uldesuir er a uriul er a lolatk a tekingel a Jesus el kmo: “Ngera ma Dios a mo omeskemiu omeksulliu a lsekum ng di betik a rengmiu er a re chad el betik a rengrir er kemiu?” (Mt. 5:45-47) Te mlo mtebengii el kmo ngkirir loukerebai er a Jehovah, el ngii a bekururau el mora rokui el chad. Me seikid e te tilbir el mo oltuchakl er a rudam me a rudos el dirkak a ta el loltuchakl er tir. A Luke a dmu el kmo: “Chelechang e aki rokui el dmeu a rengmam er aika el temam el dmak. Ngdirrek el rullemam el mo kmes a deleuill er kemam e uchul a omelisiich er a delongelam.”

19. Kede mekerang e ochotii el kmo kede disaiplo er a Jesus? E kau, ke mla mo kltmokl el mo mekerang?

¹⁹ Me kede mla merriter a rolel e kede mo oba dmolech el bltikerreng er a delongeled el ngosukid el mo meleketek a budech, e mo diak dongetukel, e dirrek el mo oltuchakl er a rechad. Ngkmal kired el mengikiid er kid er a mekngit luldasu e mo betik a rengud er a rudam me a rudos er kid el mera el ngar a rengud. A bo doruul uaisei, e ngmo dmeu a rengud e dirrek lochotii el kmo kede mera el disaiplo er a Jesus.​—Jn. 13:17, 35.