A rebebil el chad er a Levi el dimlak losiou el prist a mla er ngii a kuk ngodech el ngerechelir el milsiou el ua bulis. Tirkang a mlara cheungel omengederederel ngike el oungerachel er a templo. A chad er a Judea el chad er a omeluches el Philo a mesaod a urerir tirka el bulis el kmo: “A rebebil er tir [chad er a Levi] a milengkar a chesimer er a siseball el ngar sel kmal medal a beluu, e a rebebil a mlara medal a [templo] el mengkar er ngii me ngdiak a ngii di el chad el diak a llemeltel el mo soiseb er ngii me a lechub e ngmilecheuid e soiseb er ngii. E a rebebil a kuk di merael meliuekl el mengkar er ngii. Te oureor el kaitutechei el ngar ngii a chad er a mellomes me a chad er a klebesei.”

A rechedal a ngarbab el kort er a rechad er a Judea a sebechir lolengit a ngeso er tir. Tirkang a di chimo el cheldebechel el kabelment er a Rom a kongei er tir me te olab a boes.

A chellimosk el chad el Joachim Jeremias a mesaod el kmo “a tekingel a Jesus er sel taem el rebulis a mlo omdechem er ngii e loker er tir er a uchul me ngdimlak le bdechemii er sera lolisechakl el ngar a Templo.” (Mateus 26:55) Ngulterekokl a Jesus el uleker er tia el ker a lsekum tirka el chad a dimlak el bulis. Ngika el osisiu el chad er a omeluches a oumerang el kmo tirke el mlodurech el mo omdechem er a Jesus er a uchei er tia el taem, a dirrek el mle bulis. (Johanes 7:32, 45, 46) A uriul e a re ofiser me a remerredelir a mlo er tir a tekoi me bo lengititerir a redisaiplo er a Jesus el mora medal a ngarbab el kort er a rechad er a Judea. Tirkang a locha bebil er tirke el bulis er a templo el kilersii a Paulus lotebedii er a templo.​—Rellir 4:1-3; 5:17-27; 21:27-30.