1. Ngera kirel a chad el meruul er ngii er a uchei er a lomekedechor er a blil?

KA MOLATK alsekum a chad a melatk lomekedechor er a blil. Ngmedengelii a soal blai. Omomdasu, e ngdi mereched el mora stoang el omechar a bebil klekedall e mei e omuchel el omekedechor er ngii? Ngdiak. A uchei er a lomuchel, e ngar ngii a klou a ultutelel tekoi el kirel meruul er ngii. Ngkirel mo medengei el kmo ngmo tela cheral ngii el blai. E ngera uchul? E le ngkirel mo medengei el kmo ngar ngii a ungil el ildisel a ududel el mo rokir a blil. Me a lsekum ngkerekikl er tiang, e ngulterekokl el mo sebechel rokir tia el beches el blil.

2. A doltirakl er a Lukas 14:27-30, e ngera kirem el melatk er ngii er a uchei er a cho bo metecholb?

² A bltkil a rengum me a omereng el saul er kau el mora Jehovah, ngmla rullau me ke melatk el mo metecholb? A leuaisei, e ngkirem el melilt a tekoi el ua ngike el chad el soal lomekedechor er a blil. Ngera uchul me kede melekoi el uaisei? Molatk a tekingel a Jesus el ngar a Lukas 14:27-30. (Monguiu.) A Jesus a milsaod el kirel a belkul a bo de disaiplo er ngii. Me a lsekum ngsoad el mo oltirakl er ngii, e ngkmal kired el kongei el mo outekangel a omelsemai el bo dechelebangel e dirrek el chemoit a bebil tekoi el soad. (Lk. 9:23-26; 12:51-53) Me a uchei er a cho bo metecholb, e ngkirem el mo ungil melebedebek el kirel a tekoi el bo mchelebangel. Seikid e ke mo ungil kltmokl e melemolem el blak a rengum el mesiou er a Dios el telecholb el Kristiano.

3. Ngera kede mo mesaod er tia el suobel?

³ A techolb el bo mnguu el mo ta er a redisaiplo er a Kristus, ngklou a ultutelel er aike el tekoi el bo mchoit? Ngkmal uaisei! A techolb el bo mnguu a mo uchul a diak lemochur el klengeltengat er chelechang me a ngar medam el taem. Me bo dosaod a bebil meklou a ultutelel ker el kirel a techolb. Tiang a mo ngosukau me ngmo sebechem longer er a ker el kmo, “Ngak ak mla mo kltmokl el mo metecholb?”

4. (a) Ngerang a telbilel a reng? (b) Ngera belkul a tekoi el “obes er a klechad” er kid el ua losaod a Mateus 16:24?

⁴ Ngerang a telbilel a reng? A uchei er a bo lsebechem el mo metecholb, e ngkmal kirem el tibir er a rengum. Me sel moruul er a telbilel a rengum el mora Jehovah, e ke meluluuch el mo er ngii e subedii el kmo ke mo ousbech er a klengar er kau el mesiou er ngii el mo cherechar. Me sel mrellii a telbilem el mora Dios, e ngkirem “el obes er a klechad” er kau. (Monguiu er a Mateus 16:24.) Me chelechang e ke mla mo kloklel a Jehovah, e tiang a kmal ileakl el techall. (Rom 14:8) Ke ochotii er ngii el kmo ngomuchel er tiaikid el sils, e ke mo melemolem el mesiou er ngii, e diak di moruul aike el soam. Me a telbilel a rengum a telbiil el kau a kutmeklii lobengkel a Dios. A Jehovah a diak lorrimel er kid el mo meruul er tia el telbiil. Engdi sel derellii e ngmengerechir er kid el mo oltaut er ngii el telbiled.​—Psa. 116:12, 14.

5. Ngmekerang a telbilel a reng e dmak ngii me a techolb?

⁵ Ngmekerang a telbilel a reng e dmak ngii me a techolb? A telbilel a rengum a di kau el tang a meruul er ngii, tiang a di meketmokl er a delongelem kau me a Jehovah. E a techolb a mocholt el mora buai, ke mo metecholb er mederir a rechad, el blechoel el ngar a temel a ta el sils el ongdibel me a klou el ongdibel. Me sel bo metecholb, e ke ochotii el mora rechad el kmo ke mla tibir a rengum el mora Jehovah. * Me a techolb el mnguu a ouchais er a rebebil el kmo ngbetik a rengum er a Jehovah el Dios er kau er a rengum el rokir me a klengar er kau, me a uldesuem me a dirrek el klisichem el rokir, e mla tibir er a rengum el mo mesiou er ngii el mo cherechar.​—Mk. 12:30.

6-7. A doltirakl er a 1 Petrus 3:18-22, e ngera eru el uchul me ngklou a ultutelel a techolb?

⁶ Ngklou a ultutelel el kired el mo metecholb? Molatk a tekoi el medung er a 1 Petrus 3:18-22, NW. * (Monguiu.) A arhe er a Noah a mle olechotel a klaumerang er ngii, me ngdi osisiu, a techolb el bo mnguu a ochotii el mora rechad el kmo ke mla rullii a telbilem el mora Jehovah. Engdi, ngklou a ultutelel el kired el mo metecholb? Chochoi. A Petrus a silodii a uchul. A kot, e ngrolel a ‘osebelem.’ A techolb a sebechel mo uchul a osebeled a lsekum ngokiu a omerelled e kede ochotii el kmo kede oumerang er a Jesus, e dirrek loumerang el kmo ngmlad el kired, e milekiis el mora eanged, e chelechang e “ngar a kadekmel a Dios.”

⁷ Ongerung, a techolb a mo uchul a “klikiid el uklatk.” Me sel derellii a telbiled el mora Dios e bo demetecholb, e kede mekur a ileakl el deleuill er kid lobengkel. Me kid el mera el mla obult, e dirrek loumerang er a olubet el tenget a mo uchul e a Dios a ousubes a kngtid. Seikid e ngmo ungil a ukltked er medal a Jehovah.

8. Ngera kirel mo uchetemel a omelilt er kau el mo metecholb?

⁸ Ngera kirel mo uchetemel a omelilt er kau el mo metecholb? Ngokiu a blakerreng er kau el mesuub er a Biblia, e ke mla suub a betok el kirel a Jehovah me a blekerdelel me a dirrek el rolel a loruul a tekoi. Me a tekoi el bla msuub el kirel a mla ocheuir a rengum e rullau el kmal mo betik a rengum er ngii. Me a bltkil a rengum el mora Jehovah a kirel mo kot el klou a ultutelel el uchul me ke ngiltii el mo metecholb.

9. Ngera belkul a bo demetecholb loba ngklel a Chedam me a Ngalek me a chedaol reng, el ua losaod er ngii a Mateus 28:19, 20?

⁹ Me a omelilt er kau el mo metecholb a dirrek  lokiu a klemerang er a Biblia el bla bo moumerang. Me bo dosaod a tekingel a Jesus el ledilung er sera loldurech er a rultirakl er ngii el mo meruul er a remo disaiplo. (Monguiu er a Mateus 28:19, 20.) A tekingel a Jesus a kmo tirke el mo metecholb a kmal kirir el meruul er tiang “loba ngklel a Chedam, ma Ngalek, ma Chedaol Reng.” Ngera mle belkul tiang? Ngkmal kirem el mo oumerang a klemerang er a Biblia el kirel a Jehovah me a Ngelekel el Jesus, me a chedaol reng er a rengum el rokir. Aika el klemerang a kmal mesisiich e dirrek el sebechel locheuir a rengum. (Heb. 4:12) Me bo dosaod a bebil er ngii.

10-11. Ngera el klemerang el kirel a Demad cho bla msuub e kongei el mo oumerang?

¹⁰ Ka di molatk er sel taem er a cho msuub aika el klemerang el kirel a Demad: A ‘ngklel a Jehovah,’ e ngii a “Kot el Ngarbab er a beluulechad el rokir,” e dirrek el di ngii el tang a “meral Dios.” (Psa. 83:18, NW; Jer. 10:10) Ngii ngike el Ulemeob er kid, e dirrek a “osobel a kloklel a RUBAK.” (Psa. 3:8; 36:9) Ngmla kutmokl a tekoi el mo uchul e ngsebeched el mengubet er a belsel a klengit me a kodall, e dirrek el mla meskid a omelatk el mo kiei el mo cherechar. (Jn. 17:3) Me a telbilel a rengum me a techolb el bo mnguu a meketeklii el kmo ke ta er a Sioning er a Jehovah. (Isa. 43:10-12) Ke mo chedal a telungalek el tir a mengull er a Jehovah, e dmeu a rengrir el mokedong el Sioning er ngii e dirrek lomerk a chisel el mora rechad.​—Psa. 86:12.

¹¹ Ngkmal ileakl el techall a dobang el mo medengei a tekoi el lolisechakl a Biblia el kirel ngika el Demad! Me sel mkengei e bo moumerang aika el klemerang, e ngrullau el mo soam el tibir a rengum el mora Jehovah e mo metecholb.

12-13. Ngera el klemerang el kirel a Ngelekel a Dios cho bla msuub e kongei el mo oumerang?

¹² Ngmlo uangera uldesuem er sera cho msuub aika el klemerang el tekoi el kirel a Ngelekel a Dios? A Jesus a ongeru el klou a ultutelel el chad el ngar a eanged me a chutem. Ngkilengei el tongetengii a klengar er ngii el olubet el kirel a kngtid. Me sel dochotii lokiu a omerelled el kmo kede oumerang er a olubet, e ngsebechel musubes a kngtid, e toketekii a deleuill er kid me a Dios, e dirrek el mo nguu a diak a ulebengelel klengar. (Jn. 3:16) A Jesus a Ngarbab el Prist er kid. Ngsoal lolengeseu er kid el mo ngmai a klungioled er a olubet el tenget e lebo er ngii a kmes el deleuill er kid me a Dios. (Heb. 4:15; 7:24, 25) Ngii el King er a Rengedel a Dios, a uchul me ngokiu ngii e a Jehovah a mo chemedolii a Ngklel, e mo okngemed a rokui el mekngit, e dirrek el mo uchul a diak a ulebengelel klengeltengat er a chelsel a Baradis. (Mt. 6:9, 10; Och. 11:15) A Jesus a kerebai el kired loltirakl er ngii. (1 Pe. 2:21) Ngkiltmeklii a kerebai el kired er a lousbech er a klengar er ngii el meruul a soal a Dios.​—Jn. 4:34.

¹³ Sel taem er cho mkengei a tekoi el lolisechakl a Biblia el kirel a Jesus, e ngmlo betik a rengum er ngika el Ngelekel a Dios. Tia el bltkil a rengum a rirellau el mo kongei lousbech er a klengar er kau el meruul a soal a Dios, el ua omerellel a Jesus. Tiaikid a rirellau el mo soam el tibir er a rengum el mora Jehovah e mo metecholb.

14-15. Ngera el klemerang el kirel a chedaol reng a cho bla msuub e kongei el mo oumerang?

¹⁴ Ngmlo uangera uldesuem er sera cho msuub a klemerang el kirel a chedaol reng? Tiang a diak el chad, e ngbai klisichel a Dios. A Jehovah a uluusbech er a chedaol reng er ngii lulemekrael er a remilluches er a Biblia, e ngii el chedaol reng a ngosukid el mo medengei a tekoi el dechuiu er a Biblia e doltaut er a klengar er kid. (Jn. 14:26; 2 Pe. 1:21) Ngokiu tia el chedaol reng er ngii, e a Jehovah a meskid a “diak le metuk el klisiich.” (2 Ko. 4:7, BT) Tia el chedaol reng a smisichid el mo omerk er a ungil chais, e oltngakl a omengesuseu, e outekangel a chelitechetul a rengud, e dirrek el mo mesisiich a omelsemai el bo dechelebangel. Ngdirrek el ngosukid el mo olecholt a ungil blekeradel el “rodech er a Reng.” (Gal. 5:22, BT) A Dios a mimokl el  merous er a chedaol reng er ngii el mo er tirke el oumerang er ngii e blak a rengrir lolengit er ngii.​—Lk. 11:13.

¹⁵ Ngkmal mengelaod a rengud sel dodengei el kmo a remengull er a Jehovah a sebechir lultuil er a chedaol reng el ngosuterir el mo mesiou er Ngii! Me sel mkengei a klemerang el kirel a chedaol reng, e ngrullau el mo soam el mo mesiou ra Dios e mo metecholb.

16. Ngera kede mla suub er aika el tekoi el bla desaod?

¹⁶ Me a bakes el kau a mla rullii el tibir er a rengum el mora Dios e mo metecholb a kmal klou a ultutelel tekoi. Me ngua ike el bla msuub, ngkirem el kongei el chemoit a bebil tekoi el soam e dirrek el outekangel a ngii di el ringel el bo mchelebangel. Engdi a klengeltengat el bo mngai a lmuut el betok er a ngii di el tekoi el mchiloit. A techolb a sebechel mo uchul a osebelem, e dirrek el rullau el mo klikiid a ukltkem er medal a Dios. Me ngkirel a bltkil a rengum el mora Jehovah el Dios el mo uchul e ke ngiltii el mo metecholb. Ngdirrek el kmal kirem el mo oumerang aika el klemerang el bla msuub el kirel a Chedam me a Ngalek me a dirrek el chedaol reng. Me chelecha el bla desaod aika el tekoi, e ngmo uangera nger er kau er tia el ker el kmo, “Ngak ak mla mo kltmokl el mo metecholb?”

17. Ngera bebil tekoi el kirel a chad el meruul er a uchei er a bo lemetecholb?

¹⁷ A lsekum ke melechesukau el mla mo kltmokl el mo metecholb, e kulterekokl el mla remuul a betok el tekoi el toketekii a deleuill er kau me a Jehovah. * Ngokiu a omesubem er a Biblia, e ke mla mo medengei a betok el tekoi el kirel a Jehovah me a Jesus. E mla mekurulii a klaumerang er kau. (Heb. 11:6) Ke mla mo cherrungel loumerang a telbilel a Jehovah el ngar a Biblia, e dirrek el mla oterekeklii el kmo a olubet el tengetengel a Jesus a sebechel el osebelau er a blsel a klengit me a kodall. Ke mla obult er a kngtim, e ouuchel a rengum er a cheleuid el murruul, e dirrek el mla olengit a klausubes er a Jehovah. Ke mla ngodechii a blekerdelel a klengar er kau, e oltngakl a mekngit el blekeradel, e mla omuchel el kiei loldeu er a rengul a Dios. (Rel. 3:19) Ke semeriar louchais er a rechad el kirel a klaumerang er kau. E mla mo rredemelel a ta er a dirkak el metecholb el publisher, e dirrek el mla mo oldingel obliil el teloi er a ongdibel. (Mt. 24:14) A Jehovah a kmal ungil a rengul e le ke mla remuul aika el meklou a ultutelel tekoi. Ke mla rullii el kmal mo dmeu a rengul.​—Osi. 27:11.

18. Ngera lmuut el bebil er a tekoi el kirem el meruul er a uchei er a bo lsebechem el mo metecholb?

¹⁸ A uchei er a bo lsebechem el mo metecholb, e ngar ngii a bebil tekoi el kirem el meruul. Ngkirem el tibir er a rengum el mora Dios, el ua dulsaod er a uchei. Moluluuch el mo er ngii e mtibir el kmo ke mo ousbech er a klengar er kau el meruul a soal. (1 Pe. 4:2) E bo msbedii a tebechelel a chelechad er a remechuodel el kmo ngsoam el mo metecholb. Ngmo olengit er a rebebil el remechuodel me te mo mengedecheduch er kau. E  lako medakt el mo mengedecheduch er tir. Tirka el rudam a ulterekokl el mla mo medengelkau, e dirrek el betik a rengrir er kau. Te mo omelekl a bebil osisecheklel a Biblia el bla msuub. Ngsorir el mesang el kmo ke mla mo medengei aika el osisechakl e dirrek el medengelii a klungel a ultutelel a telbilel a reng me a techolb. Me a lsekum te mesang el kmo ke mla mo kltmokl, e te subedau el kmo ngsebechem el mo metecholb er a ongingil el ta el sils el ongdibel me a lechub e ngklou el ongdibel.

19-20. Ngera kirem el meruul er a uriul er a cho metecholb? E mekerang e mo sebechem el meruul er ngii?

¹⁹ A uriul er a cho metecholb, e ngera kirem el meruul? * Lak mobes el kmo a telbilel a rengum a telbiil el mrirellii, e a Jehovah a mengerechir er kau el loltaut er ngii. Me a uriul er a cho metecholb, e ngkirem el kiei loltirakl er a telbiil el mrirellii. Me ngmekerang a cho moruul er tiang?

²⁰ Molemolem el teloi er a ongdibel er kau. Sel cho metecholb el mo Kristiano, e ke mo chedal a ‘klodam’ er a Rekristiano. (1 Pe. 2:17, BT) Me a rudam me a rudos el ngar a ongdibel a mo telungalek er kau. Me sel bo blechoel el ngar a miting, e ngmelisiich er a deleuill er kau me tir. Monguiu er a Tekingel a Dios, e molebedebek er ngii er a bek el sils. (Psa. 1:1, 2) Me sel mchiuii a telkib er a Biblia, e mongoit a temem el melebedebek er ngii. Seikid e ngii el tekoi a mo rutechii a rengum. Molemolem el ‘meluluuch.’ (Mt. 26:41) A nglunguchem el mera el ngar a rengum a lmuut lokesengii a delongelem kau me a Jehovah. “Momuchel losiik ra rengedel a Dios.” (Mt. 6:33, BT) Ngsebechem el rullii tiang sel mrellii a omesiungem el mora Dios el mo kot er a klengar er kau. Me sel bo blechoel loldingel a obliil, e ngmelisiich er a klaumerang er kau, e dirrek el ngosuterir a rebebil el mo sorir el merael er a rael el mora diak a ulebengelel el klengar.​—1 Ti. 4:16.

21. A techolb el bo mnguu, ngmekengii a techall el kirel a ngerang?

²¹ A omelilt el bo mrellii el mo mesiou er a Jehovah e mo metecholb a kot el klou a ultutelel. Ngmera el tekoi ngar ngii a kirem el mengoit. Engdi a ker a kmo aika ngdi ungil a lemechoit? Ngkmal di ungil! A ngii di el ringel el bo mchelebangel er a chelsel tia el beluulechad a “di kekerei e di tedeb.” (2 Ko. 4:17) A techolb el bo mnguu a mekengii a techall el kirel a lmuut el ungil klengar er kau er chelechang me a “meral klengar” el dirk merael mei. (1 Ti. 6:19) Me bo mungil melebedebek e moluluuch el kirel a nger er kau er a ker el kmo, “Ngak ak mla mo kltmokl el mo metecholb?”