A Jack me a Marie-Line a mla dmak el mesiou el mui el taem el ulemuchel er a rak er a 1988. Ngbeot er tir el melodech a blekerdelel a klengar er tir e dirrek el mla kongei el meruul a kakerous el rolel a omesiou er a beluu er a Guadeloupe me a French Guiana. Aika el eru el beluu er chelchang a ngar cheungel a branch obis er a France. Me bo doker er a Jack me a Marie-line a bebil ker.

Ngera rirellau el mo soam el teloi er a mui el taem lomesiou?

Marie-Line: Ngar a beluu er a Guadeloupe, er a dirk kekerei e ak mle blechoel lobengkel a delak el ngii a dirk mle blak a rengul el Sioning el oldingel el ta el sils. Ngkmal soak a rechad, me sera ktobed er a skuul er a rak er a 1985, e a kulemuchel el pioneer.

Jack: Sera dirk kekerei, e ak mle blechoel el teloi er a remesiou el mui el taem el tir a kmal mle sorir a tekoi er a odingel. Me ak mle blechoel el auxiliary pioneer sel lolengull a skuul. E sel bo el weekend, e a lebebil e aki ngar a bus el mo teloi er a rudam me a rudos el pioneer el oldingel er a territory er tir. Me aki oldingel el ta el sils, e a uriul e aki mo milil er a kederang. Ngkmal mle soak aike el taem!

Telkib el taem er a uriul er a bok bechil a Marie-Line er a rak er a 1988, e ak mlo melatk el kmo, ‘Aki mededaes el terung, ngera me ngdiak ki mluut el kilungii a omesiungam?’ Me ak mlo obengkel a Marie-Line el mesiou el pioneer. A ta el rak er a uriul er aki bora skuul er a pioneer, e aki mlodurech el mo mesiou el special pioneer. Ngkmal mle dmeu a rengmam er a betok el ngerechelam er a beluu er a Guadalupe er a uchei er aki mokedong el mo mesiou er a French Guiana.

Ko mla ngmai a betok el kekerous el ngerachel er a chelsel aika el mereko el betok el rak. Me ngera ngosukemiu el mo mereched el melodech a blekerdelel a klengar er kemiu?

Marie-Line: A rudam el ngar a Bethel er a French Guiana a medengelii sel kot el somam el bades el Isaia 6:8. Me sel lomekedong er kemam e te blechoel el oungelakel e oker el kmo, “Kom dirk medengelii sel kot el somiu el bades?” Seikid e aki medengei el kmo ngar ngii a beches el ngerechelam, me aki melekoi el kmo, “Kemam tiang! Moderchemam!”

 Aki kerekikl me ngdiak ki momekesiu aike el dimla omesiungam el mo uchul e ngmo diak ledeu a rengmam er a beches el omesiungam. Aki dirrek el kmal melasem el mo ungil medengelterir medengelterir a rudam me a rudos.

Jack: A uchei, e a rebebil el ungil a uldesuir el sechelimam a melasem lorreked er kemam me lak ki molukl. Engdi sera ki mtobed er a Guadalupe, e a ta el odam a ulemeklatk er kemam er a tekingel a Jesus el ngar a Mateus 13:38 el kmo: “Ma sers a beluulchad.” Me sel lemengodech a omesiungam, e aki blechoel el melatk el kmo aki dirk mesiou er a chelsel a osisiu el sers, el diak lultuil er a kmo aki ngar ker el beluu. E le rechad me a territory a kot el meklou a ultutelel!

Sel ki bora beches el territory, e aki mesa el kmo a rebebil a dmeu a rengrir er a delengcheklir. Me seikid e aki melasem el mo kiei el ua rechad er ngii el beluu. Alta ngkora ngodech a kall er ngii, engdi aki menga ike el longang e melim aike el lolim, engdi aki kerekikl me ngdiak ki bom secher. Aki melasem el mo ungil a tekingam el kirel a bek el rolel a omesiungam.

Marie-Line: Aki dirrek el suub a betok er a rudam me a rudos er tia el beluu. Ak melatk er a kot el taem er aki mei er a French Guiana. Ngkmal mle klou a chull, me aki ulemdasu el kmo aki mo mengiil me sel bo lak a chull e aki mochu oldingel. Me ak kmal kilebetiekl er a ledu er ngak a odos el kmo, “Ngdiak dorael?” Me ak uleker er ngii el kmo, “Kede mekerang?” Me ngdilu el kmo, “Mnguu a bailengem, e kede mo ngar a rrat er kid.” Seikid e ak milsuub el mlo meduch lorreked er a bailengek e ngar a rrat er a osisiu el taem. Oleko ngdimlak bo kmeduch, e ngdiak a ta el bo kuldingel er a temel a chull!

Ko mla melukl el bekord el 15 el taem. Ngdiak a kora ungil luldasu el sebechir a rebebil el melukl el mo medengei?

Marie-Line: A omelukl a diak lebeot el tekoi. Me nguaisei, engdi ngklou a ultutelel el kirel ngar ngii a ungil basio el sebechem el mo er ngii e olengull er a uriul er a odingel.

Jack: Ak blechoel el chosberberii a kboub er a chelsel a blimam. Engdi a lsekum a rudam er a branch a medengei el kmo ngdiak bo lekemanget a delengcheklam er ngii el beluu, e a lebebil e te melekoi el kmo, “Jack, ngdiak a belkul mongesbereber er chelechang!”

A Marie-Line a kmal mla mo meduch el pack a klalo! Ngsmuk a rokui el klalo er a baks e lmuches a ikrel el “olechelubel,” “delemerab” “uum” me a lmuut el bebil. Me sel ki bora beches el blimam , e ngbeot er kemam el mo medengei el kmo ngera el baks a mora ngera el basio. Ngrullii a list er a klalo el ngar a  chelsel a derta er ngii el baks me ngsebecham el mereched el metik aike el ki mousbech.

Marie-Line: Aki mla mo meduch er tiang, me nguchul e ngsebecham el mereched lomuchel el meruul er a omesiungam.

Ngmekera cho moterekokl a temiu me bo lsebechiu el ‘churrengelii chomesiungiu’?​—2 Ti. 4:5.

Marie-Line: Sel Kot el Ureor, e aki olengull e mengetmokl er kemam el kirel a miting. E omuchel er a Ongeru el Ureor, e aki mo oldingel.

Jack: Alta e ngar ngii a telkael el sikang el kiram el meruul er a bek el buil, engdi ngdiak di lultaut a osengam er tia el tekoi. A berkel a klumech a kot el klou a belkul er a klengar er kemam. Me ngomuchel er sel taem el ki mtobed er a blimam el mo lmuut er aki bo mrei, e aki melasem el mengedecheduch er a rokui el chad el ki betik er tir.

Marie-Line: Sel ki bo picnic, e ak blechoel lolab a tract. A rebebil a me mengedecheduch er kemam e olengit a babier, alta e ngdirkak ki mouchais er tir el kmo aki Sioning er a Jehovah. Tiaikid a uchul me aki kerekikl a blekerdelam me a rolel aki moubail. E le rechad a omtab chouaika el tekoi.

Jack: Aki dirrek el ousioning sel kimungil el tonari. Ak meruu a babier, e mengoit a komi, e meriik er a mekesekesam. A rechad er a tonari er kemam a omes aika el tekoi, e a lebebil e te oker el kmo, “Ngar ngii a Biblia el sebechem el meskak?”

Ko blechoel loldingel er aike el basio el ngar a mesechesechel a beluu. Ngar ngii a kora ileakl el tekoi el molatk er kirel aika el taem?

Jack: Ngar a beluu er a Guiana, e ngmeringel er kid el mora bebil beluu. Aki blechoel el merael el bekord el 370 el mael er a mekngit el rael. A odingel er kemam el mora St. Élie, el ngar a chereomel er a Amazon, a kmal mle somam. Ngmle betok el sikang a omerollam el mong el ngar aike el mlai el lousbech el off-road me a chert. A ruumesingd er a rechad el kiliei er ngii a chad er a omengiis el kolt. Ngokiu a omereng el saul er tir, e a rebebil a meskemam a bebil kolt el tengetengir! E sel lekebesengei, e aki olecholt a video el kirel a cheldebecheled. Me a rebetok er tir a mle omes.

Marie-Line: Telkib el taem er a uchei, e a Jack a mlo oltobed er a cheldecheduch er a Chedaol Belsoil er a beluu er a Camopi. Me aki mlara chert el eua el sikang el okiu a Oyapock River. Aki kmal mle semeriar er tia el omerael.

Jack: Sel bo el meched a omoachel, e ngkmal mo mesisiich a berius me ngmo kdekudel omerael. Ngmo mechas a rengud sel domes er a mesisiich el berius el merael mei e dengar a chert lolsiuekl er ngii. Ngkmal kirel ngike el omekall er a chert el medengelii a loruul er ngii. Engdi tiang a kmal mle ungil tekoi el ki blo modengelii. Alta e aki di mle 6 el Sioning, engdi te bekord el 50 el chad a mlei er a Chedaol Belsoil, el uldimukl er a rebebil el Amerindians!

Marie-Line: Chouaika el tekoi a kmal ungil kirir a remekekerei el chad el sorir el lmuut el menglou a omesiungir el mora Jehovah. Ngkirem el mo ultuil a klaumerang er kau er a Jehovah er a chelsel a chouaika el taem, e seikid e a klaumerang er kau a lmuut el mo mesisiich. Aki blechoel el mesang a chimal a Jehovah lolengeseu er kemam er aika el taem.

Ko mla suub a betok el bedengel a omelekoi. Ngkora beot er kemiu el mesuub aika el omelekoi?

Jack: Ngdiak leuaisei. Ak milsuub aika el tekoi me bo lsebechek lomerk er a klumech e kulengeseu er a ongdibel. Ngmle kirek el oungerachel er a omesubel a Ongkerongel el tekoi er a Sranantongo * er a uchei er a bo kuruul er a kot lomengiuek er a Biblia! A kuleker er a odam er a uriul el kmo ak mlo uangerang. E ngdilu el kmo, “A lebebil e ngdiak ki modengei a tekingem, engdi ngkmal mle ungil.” A rengalek a kmal ngilsukak. Sel bo lecheleuid a tekingek, e te ouchais er ngak, engdi a remeklou el chad a diak. Ngkmal betok ak siluub er a remekekerei.

Marie-Line: Ngar er a ta el territory, e ngmla er ngii a rechad el kusuub a Biblia lobengterir el melekoi a tekoi er a French, Portuquese, me a Sranantongo. A ta el odos a dilu el kmo ngungil a kumuchel el mesuub er sel kot el meringel er ngak el tekoi e bo kurekui er ngii loba sel bla bo kudengelii. Ak mlo mesang a klungiolel tia el ulekrael.

A ta er a taem, e ak milsuub a Biblia el ngar a tekoi er a Sranantongo, e a uriul e ak mlo mesuub el ngar a tekoi er Portuquese. Me sera kumuchel er sel ongeru  el omesuub, e a odos a dilu el kmo, “Marie-Line, a kumdasu e ngkora ngodech tia el tekoi!” Seikid e ak mlo medengei el kmo ak mengedecheduch er a redil er a Brazil lousbech a tekoi er a Sranantongo el diak el Portuquese!

Tirke el mdilak el mesiou a kmal betik a rengrir er kemiu. Ko milekerang e kmal mlo kmeed el sechelirir?

Jack: A Osisechakl 11:25 a kmo: A ‘bekerurau a mo ungilbesul.’ Aki semeriar el mengoit a temam lobengterir a rechad. Sel kuruul a bebil lureor er a Blil a Ongdibel, e a rebebil el rudam a kmo: “Ngsebechir a re publisher el meruul aikang.” Engdi ak dmu er tir el kmo: “Ngak me ak dirrek el publisher. Me a lsekum e ngar ngii a ureor el ketmekill, e ngdirrek el soak el meruul.” Me kede rokui el soad el mengoit a taem el di kid el tang, engdi ngdiak ki becherei tiaikid luldasu me lorrob er kemam me lak ki moruul a ungil el mora rechad.

Marie-Line: Aki melasem lolecholt a klemeriarreng el mora rudam me a rudos. Ngokiu tiang, e ngsebecham el mo medengei el kmo ngtechang a ousbech a ngeso el omes er a rengelekir me a lechub e ngmo melai er tir er a skuul. Seikid e aki remuul a rokui a chelsengmam me ngmo sebecham lolengeseu. Tiaikid a rolel e aki omak a ungil klausechelei er kemam, e mo blechoel kltmokl el kirir sel lousbech a ngeso.

Ngera el klengeltengat cho bla mngai er tia el omesiungiu el ngar a beluu lousbech a ngeso?

Jack: A mui el taem lomesiou a mera el uchul a betok el klengeltengat el mei er kemam. Aki blechoel loldeu a rengmam er a betok el kakerous el blebelel a Jehovah. Alta e aki mlo chelebangel a omelsemai, engdi ngbudech a uldesuam e le ki medengei el kmo ngar ngii a ngeso el ki mngai lokiu a rechedal a Dios el ngar a bek el basio el ki bo er ngii.

Sera dirk kekerei el chad, e ak mlo kelebus er a beluu er a French Guiana el klaumerang er ngak a uchul. Ngdimlak a ta el kumdasu el kmo ak lmuut el mong er a ta er a klebesei el missionari e mo sebechek el mo oldingel er a blil a kelebus. Ngmera el tekoi, a Jehovah a kmal bekururau sel bo el temel lomekngeltengat!

Marie-Line: A kot el klou el deurreng er ngak a sel kulengeseu er a rebebil. Ngkmal dmeu a rengmam el mesiou er a Jehovah. Tiang a dirrek el mla lmuut lokesengii a deleuill er kemam el terung. A lebebil er a taem, e a Jack a mo soal a ki mongemedaol er a rebebil lobekel el ousbech a omelisiich el me teloi er kemam lomengur. Me ak blechoel melekoi el kmo, “Ak millatk er a osisiu el tekoi!” Ngblechoel el mo ta uldesuam el kirel a tekoi.

Jack: Ak dirk mlo smecher er a rakt el prostate cancer. Alta e a Marie-Line a diak lsoal lorrenges, engdi ak dmu er ngii el kmo: “Rrang, a lsekum ak mad er a klukuk, e ngdiak mad el ‘cheluodel a uchul.’ Ak mad el dmeu a renguk e le ak medengei el kmo a kuluusbech er a klengar er ngak el ngar a ungil rolel, el milsiou er a Jehovah el rullak me ngdmeu a renguk.”​—Gen. 25:8.

Marie-Line: A Jehovah a mla oterekokl er kemam a ngerachel el dimlak ki momdasu el kmo aki mo ngmai. A klengar er kemam a mui er a betok lungil tekoi. Me ngkmal ulterekokl a rengmam el kmo a lsekum a cheldebechelel a oldurech er kemam el mora ngii di el basio e aki mong, e le ki medengei el kmo a Jehovah a mo olengeseu er kemam!