1. Ngera ngosisecheklid er ngii a Olisechakl 3:1, 7?

A REBEBIL er kid a kmal bechedechedechaol. E a rebebil a kuk di lmuk. Me ngua lolekoi er ngii a bades er tia el suobel, ngar ngii a taem el dongedecheduch me a taem el deluk. (Monguiu er a Olisechakl 3:1, 7.) Me nguaisei, engdi kede locha mo oureng ulekum a rebebil rudam me a rudos a mo blechoel mengedecheduch. E dirrek el mo oureng ulekum a rebebil a mo diak lsal di mengedecheduch.

2. Ngtecha ngar ngii a llemeltel el melib a llach el kirel a taem el dongedecheduch me a taem el di deluk?

² A omengedecheduch a sengk el mlara Jehovah. (Exo. 4:10, 11; Och. 4:11) Ngokiu a Tekingel e ngosukid el mo medengelii a ungil rolel e kede ousbech er ngii el sengk. Me ngar tia el suobel, e kede mo mesaod a kerebai el ngar a Biblia el mo ngosukid me kede mo medengei el kmo ngoingerang a ungil taem el dongedecheduch e oingerang e ngungil di deluk. Kede dirrek el mo medengelii a uldesuel a Jehovah el kirel a tekinged el mora rechad. Me a kot e bo dosaod el kirel a ungil taem el dongedecheduch.

3. A doltirakl er a Rom 10:14, e ngoingerang e ngungil taem el dongedecheduch?

³ Ngkired el blechoel kltmokl el mengedecheduch el kirel a Jehovah me a dirrek el Rengedel. (Mt. 24:14; Monguiu er a Rom 10:14.) Sel doruul uaisei, e kede oukerebai er a Jesus. A ta er klou el uchul me a Jesus a mlei er a chutem, a mlei louchais er a rechad a klemerang el kirel a Demal. (Jn. 18:37) Engdi ngdiak dobes el kmo ngklou a ultutelel el dekerekikl er a rolel a dongedecheduch. Me sel dongedecheduch er a rechad el kirel a Jehovah, e ngkmal kired “loba delemedemek ma chomeluu,” e dirrek el kired lochotii el kmo kede melatk a uldesuir me a klaumerang er tir. (1 Pe. 3:15) Seikid e ngmo sebeched el remuul a bebil er a  tekoi el diak di dongedecheduch, ngbai mo sebeched losisecheklterir.

4. Ngoeak a ngera el rolel e a cheldechedechad a sebechel ngosuterir a rebebil el ua losaod a Osisechakl 9:9?

⁴ A remechuodel a diak el kirir lomai er a rengrir el mengedecheduch er a odam me a lechub a odos a lsekum e ngkirel lousbech a omesmechokl. Nguaisei, engdi ngkirir el ngiltii a ungil taem e mo mengedecheduch er ngii me lak bo lemerur. Ngsorir el mo mengedecheduch er ngii sel lak a rechad. A remechuodel a kirir el kerekikl a tekingir me bo lsebechir el melisiich er a chad lorrenges er tir. Me nguaisei, engdi ngdiak el kirir lomai er a rengrir me lak losaod a omellach er a Biblia el ngii a sebechel ngosuir a chad el mo meruul a ungil lomelilt. (Monguiu er a Osisechakl 9:9.) Ngera uchul me ngklou a ultutelel el bo debekeu el mengedecheduch a lsekum ngmo kirel? Me bo dosaod a eru el blekeradel el ta er ngii a chad el mle kirel mesmechokl er a rengelekel sechal, e a tang a redil el silmecheklii a uldesuel a mo king.

5. Ngoingerang e ngmle kirel a Eli el mengedecheduch loba blekeu?

⁵ A Ngarbab el Prist el Eli a mla er ngii a reteru el kmal betik er a rengul el ngelekel sechal. Tirka el ngelekel a dimlak lolecholt er a omengull el mora Jehovah. Ngmla er ngii a meklou a belkul el ngerechelir el milsiou el prist er a templo. Engdi te mle meterekakl aika el deruchellir, e dimlak loba omengull el kirel a tenget el mora Jehovah, e dirrek el mirruul a deleboes er a chelsel a templo. (1 Sa. 2:12-17, 22) A doltirakl a Llach er a Moses, e a rengelekel a Eli a mle kirir lokodall, engdi a Eli a di uluungeroel er tir e milechititerir me te melemolem el mesiou el ngar a templo. (Dut. 21:18-21) Me ngmlo uangera uldesuel a Jehovah el kirel a omerellel a Eli? Ngdilu er a Eli el kmo: “Ngera me ke bai mengull er a re ngelekem el kuk ngarbab er ngak?” Me a Jehovah a tilbir el mo omekoad er tirka el teru el kmal mekngit el chad.​—1 Sa. 2:29, 34.

6. Ngera kede suubii er a Eli?

⁶ Kede nguu a klubeled er a omerellel a Eli. A lsekum kede mo medengei el kmo a sechelid me a lechub a chedad a mla tomellii a llechul a Dios, e ngkmal kired el mo omeklatk er ngii el kirel a llechul a Jehovah. E dirrek el ngosuir me bo lsebechel nguu a ngeso er a remechuodel. (Jak. 5:14) Ngkmal diak lsoad el mo ua Eli, el mo mengull er a sechelid me a lechub a chedad el kuk ngarbab er a omengull er kid el mora Jehovah. Kede ousbech er a blekeurreng el mo mesmechokl er a chad, engdi tiang a mo uchul a klungiaol. Ka molatk er a klekakerous er a omerellel a Eli me a redil er a Israel el Abigail.

7. Ngera uchul me a Abigail a mlo mengedecheduch er a David?

 ⁷ A Abigail a mle bechil a merau el chad el Nabal. Sel taem el David me a rechedal a chiliis er a King Saul, e ngmle telkib el taem el lekiliei el teloi er a remengkar a chermel a Nabal el sib e dirrek el ulemekerreu ngii el chermel er a remerechorech. Me a Nabal, ngmirreng a sulir? Ngdimlak. Sel taem el David a uleldurech mo olengit a kall me a ilumel er a Nabal el kirir a rechedal, e a Nabal a ngilasech a rengul e dilu mekngit el tekoi el mo er tir. (1 Sa. 25:5-8, 10-12, 14) Tiaikid a uchul me a David a mlo soal lomekoad er a rokui el sechal er a telungalek er a Nabal. (1 Sa. 25:13, 22) Me ngmilekerang e mlo diak leduubech tia el klou el tellemall? A Abigail a mlo mtebengii el kmo ngungil taem el longedecheduch, me nguleba blekeurreng e mlo olsiuekl er tirka el 400 el songerenger, e kesib a rengrir, e kltmokl el mo oumekemad, e dirrek el milengedecheduch er a David.

8. Ngera kede suubii er a omerellel a Abigail?

⁸ A Abigail er a lesang a David, e ngmilengedecheduch loba blekeu me a omengull me a omengesuseu. Me alta e a Abigail a dimlak luchul tia el mondai, engdi ngullengit a klausubes er a David. Ngdilu el kmo ngmedengei el kmo a David a ungil a blekerdelel el chad me ngulterekokl el mo kongei el meruul a llemalt, e ngii el Abigail a dirrek el mle ultuil er a Jehovah el mo ngosuir. (1 Sa. 25:24, 26, 28, 33, 34) Me kede ua Abigail el ousbech a blekeurreng el mengedecheduch a lsekum kede mo medengei el kmo a chad a meruul er a tekoi el sebechel mo uchul e ngruebet er a klengit. (Psa. 141:5) Ngkired lolecholt er a omengull, engdi ngdirrek el kired el mo oba blekeurreng. Me sel doba bltikerreng el lomeklatk er a chad, e kede ochotii el kmo kede mera el sechelil.​—Osi. 27:17.

9-10. Ngera kirir a remechuodel el diak lobes er ngii sel lomeklatk er a rechad?

⁹ A remechuodel a ileakl el kirir el loba blekeu  sel longedecheduch er a chad er a ongdibel el robeta er a klengit. (Gal. 6:1) Ngkirir loba klengariourreng el kmo tir me ngdiak lemecherrungel me nglocha mo er ngii a taem e te dirrek el mo ousbech a uleklatk. Engdi tiang a diak lerelleterir me bo lak lollach er tirke lousbech a omellach. (2 Ti. 4:2; Tit. 1:9) Me sel lomeklatk er a chad, e te melasem lousbech er tia el sengk el omengedecheduch el losisecheklii e dirrek el mo oba kllourreng. Ngbetik a rengrir er a odam er tir, e tiaikid el bltikerreng a rulleterir el mo sorir el ngosuir. (Osi. 13:24) Engdi sel ngaruchei el lolatk er ngii a mo msa odanges a Jehovah lokiu sel loltirakl a llechul, e dirrek el lomekerreu er a ongdibel er a ngii di el tellemall.​—Rel. 20:28.

¹⁰ Me kede mla smaod a betok el kirel a taem el dongedecheduch. Me nguaisei, engdi ngmo er ngii a taem el ungil el di deluk. Ngera lomelsemai a sebeched el mo chelebangel er a chouaika el taem?

11. Ngera el okesiu a luluusbech er ngii a Jakobus, e ngera uchul me ngklou a ultutelel?

¹¹ Ngsebechel mo meringel er kid el mtebechelii a omelekinged. A ta er a milluches er a Biblia el Jakobus a uluusbech er a okesiu el mesaod er tia el omelsemai. Ngdilu el kmo: A “lsekum a chad a diak a tal le mecheuid er a omelekingel, e ng diak a telemellel e sebechel el di ngii el mtebechelii el tal chad.” (Jak. 3:2, 3) A bridle a lechet el lenguu losisebii er a ngerel a uos el me mekur er a bdelul. Me sel longurs er ngii ngike omtebechel er ngika el uos e ngsebechel lomesiul er ngii e dirrek el rullii el mo stob. Me a lsekum ngika el omtebechel er ngii a mo diak lutebechelii, e ngsebechel ngii el uos el kmal mo bekerurt el remurt el mo uchul e ngsebechel ngii me ngika el chad el ngar bebul el metemall. Me ngdi osisiu, a lsekum ngdiak dekerekikl lomtebechel a omelekinged, e ngsebechel el mo uchul a betok el tellemall. Me bo dosaod a bebil er a taem el mo  kired el di lmuk me lsebeched el “mtebechelii” a omelekinged.

12. Ngoingerang e ngkired el kerekikl el “mtebechelii” a omelekinged?

¹² Ke mo mekerang a lsekum a odam me a lechub a odos a ngar ngii a lodengei el tekoi el ngii a berrotel? El ua tiang, a lsekum ke metik er a odam el kiei er a beluu el merrob er a urered, e ke mo oker er ngii me louchais a rolel a loruul er a omesiungir er sel beluu? Nglocha ungil a uldesuem le ngdiak lsoam a bo lomekcharm er tir. Ngbetik a rengud er a rudam er kid e semeriar el mo medengei a tekoi el lechelebangel. E dirrek el soad el meluluuch el kirir. Me nguaisei, engdi tiaikid el taem e ngungil a dekerekikl el “mtebechelii” a omelekinged. E le lsekum kede oremelii a chad me ngouchais a berrotel el tekoi, e ngolechotel a kmo ngdiak lebetik a rengud er ngika el chad me a dirrek el rudam me a rudos er kid el tir a oumerang er ngii el kmo ngdiak bo louchais a rolel a loruul er a omesiungir. Ngulterekokl el diak lsoad el mo uchul a dechelel a meringel blekeradel el kirir a rudam me a rudos el kiei er a beluu el merrob er a urered. Me ngdi osisiu, ngdiak a odam me a lechub a odos el mesiou el ngar aike el beluu el soal louchais a rolel a loruul er a omesiungir a Resioning el kiei er ngii el beluu.

13. A doltirakl er a Osisechakl 11:13, e ngera kirir a remechuodel el meruul, e ngera uchul?

¹³ A remechuodel a ileakl kirir loltaut a omellach er a Biblia el ngar a Osisechakl 11:13 el mo kerekikl me lak louchais a berrotel el tekoi. (Monguiu.) Tiang a sebechel mo meringel a lsekum e ngbechiil. A rubekel a olekes er a deleuill er tir lokiu sel leblechoel el chadecheduch e le kauchais a uldesuir me aike el ngar a rengrir me a sebekreng er tir. Engdi a odam a kirel medengei el kmo ngdiak el kirel louchais a “berrotel el tekoi” el kirir a rechad er a ongdibel. E le lsekum ngouchais, engdi rulleterir a rechad el mo diak loumerang er ngii e dirrek el metemall a chisel. Me a rudam el mloterekokl er tir a ngerachel er a ongdibel, a diak el kirel el ‘obebelbult a chururir’ me a lechub e le cheblad. (1 Ti. 3:8) Ngbelkul a kmo ngdiak el kirir el mengeblad me a lechub el outulechoid el kirir a rebebil. A lsekum a odam el ta er a remechuodel a betik a rengul er a bechil, e ngdiak el kirel lomekberaod er ngii er a tekoi el diak el kirel a bechil el mo medengei.

14. Ngoeak a ngera el rolel e a bechil a odam el mesiou el mechuodel a ngosuir me ngmelemolem lungil chisel?

¹⁴ A bechiil redil a sebechel ngosuir a bechil me ngmelemolem lungil chisel, lokiu sel lak lorrimel er ngii el mo ouchais a berrotel el tekoi. A lsekum a bechiil redil a oltaut er tia el ulekrael, e ngdiak di lolengeseu er a bechil, e ngdirrek el lolecholt er a omengull el mo er tirke el louchais a berrotel el tekingir el mora bechil. E sel kot el klou a ultutelel, a mo rullii a Jehovah el mo dmeu a rengul er ngii el bechiil redil, e le ngolengeseu el meleketek er a budech me a kltarreng er a chelsel a ongdibel.​—Rom 14:19.

15. Ngmle uangera uldesuel a Jehovah el bedul tirke el tedei el sechelil a Job? E ngera uchul?

¹⁵ Ngsebeched el suub a betok er a Biblia el ngar a babier er a Job er a rolel a dongedecheduch me a ungil taem el dongedecheduch. A Job a chilarm er a betok el meringel blekeradel, e a reteua el chad a mlong el mlo omsa ulekrael. Tirka el chad a chiloit a betok el taem el di liluk. Engdi a uriul e a cheldechedecherir a retedei er tir el Elifas, Bildad, me a Sofar a ulechotii el kmo ngdimlak lousbech er a taem el di lmuk el ulsiik a rolel e te ngosuir a Job. Te bai ulemdasu a rolel e te omeketakl er ngii el mora Job el kmo ngmirruul a cheleuid el tekoi. Me te milengedecheduch, engdi oumesingd el tekingir el bedul a Job me a Jehovah a dimlak leklemerang e mle mekngit el tekoi. Te mle meringel loukerrekeriil er a Job. (Job 32:1-3) Me ngmilekerang a Jehovah? Ngkmal ngilasech a rengul er tirka el tedei  el chad. Ngdilu kmo ngklebelung a omerellir e dilu er tir me bo lolengit er a Job me loluluuch el kirir.​—Job 42:7-9.

16. Ngera sebeched el suub er aike el mekngit el blekerdelel a Elifas, Bildad, me a Sofar?

¹⁶ Kede suub a betok er aike el mekngit el blekerdelel a Elifas, Bildad, me a Sofar. A kot e ngdiak el kired loukerrekeriil er a rudam er kid. (Mt. 7:1-5) Ngbai kired el mo kerekikl lorrenges er tir er a uchei er a dongedecheduch. Seikid e ngmo sebeched el medengei aike el lecharm er ngii. (1 Pe. 3:8) A ongerung, a uchei er a dongedecheduch e ngkirel a tekinged el klemerang e ungil a delecherul. (Efe. 4:25) E a ongedei, e a Jehovah a kmal semeriar a tekoi el dechadecheduch er a delongeled.

17. Ngera sebeched el suubii er a kerebil a Elihu?

¹⁷ A ongeua el chad el mlo omes er a Job a Elihu el chedal a Abraham. Ngulerrenges er a Job me tirke el tedei el chadecheduch. Ngmle blak a rengul lorrenges me ngmlo sebechel el ungil el mengedecheduch e bleketakl a uleklatk el ledilung el ngilsuir a Job el sumecheklii a uldesuel. (Job 33:1, 6, 17) Ngmle klou a ultutelel er a Elihu el mo kobkellii a Jehovah, el diak el ngii me a lechub e ngii di el chad. (Job 32:21, 22; 37:23, 24) Me ngokiu a kerebil a Elihu, e kede suubii el kmo ngar ngii a taem el di deluk me a taem el dongedecheduch. (Jak. 1:19) Kede dirrek el suubii el kmo sel domeklatk, e a kot el klou a ultutelel tekoi el dolatk er ngii a mo msa klebkall a Jehovah el diak el kid.

18. Ngoeak a ngera el rolel e kede ochotii el kmo kede mengreos er tia el sengk er a omengedecheduch?

¹⁸ Ngsebeched lochotii el kmo kede mengreos er tia el sengk er a omengedecheduch lokiu sel doltirakl a ulekrael el kirel a taem el dongedecheduch me a rolel a dongedecheduch. A mellomes a rengul el King Salomon a mlukrael el mo meluches el kmo a tekoi el “medung er a ungil blsechel a di ua kolt el ringngo el ngar a klebokel belatong el silber.” (Osi. 25:11) Me sel bo dungil rongesii a chad ebo domdasu er a uchei er a dongedecheduch, e a tekinged a mo uaike el kolt el ringngo el mekreos e dirrek el klebokel. A bo deuaisei, e alta ngkedeb me a lechub e ngkemanget a tekinged, engdi ngmelisiich er a rebebil, e dirrek el rullii a Jehovah el mo dmeu a rengul er kid. (Osi. 23:15; Efe. 4:29) Tiaikid a kot lungil rolel e kede ochotii el kmo kede mereng a sulel a Dios er tia el sengk er a omengedecheduch!