1. Ngera el tekoi a klemerang el kirir a remekekerei el odam?

REMEKEKEREI el odam, ngkmal betok a sebechiu el meruul. A rebetok er kemiu a mesisiich a bedengir. (Osi. 20:29) Kom kmal lolengeseu er a ongdibel er a betok el tekoi. Me kom locha kmal lomes el beduluchei el mo er sel taem el ometutk el mo ta er a remesiou er a ongdibel. Me nguaisei, engdi kom locha omelechesiu el kmo, a rebebil a omes er kemiu el kmal dirk ngeasek e diak a kmal klemedengei er kemiu me ngdirkak bo el sebechiu el nguu tia el klou a ultutelel el ngerachel. Me alta kom dirk ngeasek engdi ngngar ngii a sebechiu el meruul er chelechang me bo loumerang e lolecholt a omengull el mo er kemiu a rechad er a ongdibel.

2. Ngera kede mo mesaod er tia el suobel?

² Ngar tia el suobel e kede mo mesaod er a klengar er a King David. Kede dirrek el mo mesaod a tekoi el dilubech er a klengar er a reteru el king er a Juda el Asa me a Jehosafat. Kede mo merriter a omelsemai el blo lechebangel, tekoi el lurruul el mo mesmechokl, me a tekoi el sebechir a remekekerei el odam el suub er tir.

3. Ngera ta er a rolel e a remekekerei a sebechir el lolengeseu er a remeklou er a ongdibel?

³ A David er a lengeasek e ngulemekeroul a duch el rebebil ulemes el meklou a ultutelel. Ngika mle mesisiich a deleuill er ngii me a Jehovah. Ngdirrek el mlo meduch el chad er a ongngak e uluusbech er tia el dechal lolengeseu er a telutk el king er a Dios, el Saul. (1 Sa. 16:16, 23) Kemiu el mekekerei el odam ngngar ngii a duch er kemiu el sebechiu lousbech lolengeseu  er a rechad er a ongdibel? A rebetok er kemiu a ngar ngii a duch er tir. El ua tiang, kom locha mtebengii el kmo a remeklou el chad er a ongdibel a kmal oba omereng el saul sel dolengeseu er tir el mo meduch el lousbech a tablet er tir me a lmuut el bebil er a electronic device el meruul omesubir el di tir el tang me a dirrek el kirel a miting. A klemedengei er kemiu el kirel a usbechellel aika el device a kmal sebechiu el lousbech el lolengeseu er tir.

4. El ua David, a remekekerei el odam ngkirir el omekeroul a ngera el blekeradel? (Momes er a siasing er a medal tia el babier.)

⁴ Ngar er a klengar er ngii er a bek el sils e a David ulechotii el kmo, ngmle bekongerachel e sebeched el ultuil er ngii. El ua tiang, sera lengeasek e ngmle meringel loureor el omekerreu a chermel a demal el sib. Tia mle kengaol el ureor. Uriul el taem e a David a dilu er a Saul el kmo: “Kau el kuoll, ngak oungerachel a chermel a demak el sib. Sel bek el le mei a laion ma lechub e ng kuma el mela ngelekel a sib, e ak utirii el odecheleklii, e osebelii a ngelekel a sib.” (1 Sa. 17:34, 35) A David a mle bekeu el omekerreu aika el sib e le ngmle medengei el kmo ngngerechelel. A remekekerei el odam a sebechir loukerebai er a David sel leblak a rengrir el meruul a ureor el mla moterekokl er tir.

5. A doltirakl er a Psalm 25:14, e ngera sel kot el klou a ultutelel el tekoi el sebechir a remekekerei el odam el meruul er ngii?

⁵ A David er a lengeasek e ngmilekurulii a kmes el deleuill er ngii me a Jehovah. Tia el deleuill er ngii me a Jehovah a mle lmuut el klou a ultutelel er a blekengel me a dechal el louharp. A Jehovah dimlak di le Dios er ngii, ngdirrek el mle Sechelil. (Monguiu er a Psalm 25:14.) Remekekerei el odam, sel kot el klou a ultutelel el tekoi el sebechiu el meruul er ngii a melisiich er a deleuill er kemiu me a Demmiu el ngar er a eanged, e tia sebechel el mo uchul e kom ngmai a lmuut el bebil er a ngerachel.

6. Ngera bebil er a mle mekngit el uldesuir a rechad el kirel a David?

⁶ A rebebil er a rechad a mle mekngit a uldesuir el kirel a David. El ua tiang, a David er a ledu el kmo ngmo okoad er a Goliath e a King Saul a millasem el merrob er ngii e dilu el kmo: “Kau a dirk buik.” (1 Sa. 17:31-33) E a uchei er itiang e a obekul a dilu er ngii el kmo ngdiak lekerekikl a ngerechelel. (1 Sa. 17:26-30) Me nguaisei, engdi Jehovah dimlak lomes  er a David el kmo ngkmal ngalek me a lechub e ngdiak lekerekikl a ngerechelel. Ngika mle ungil medengelii a David. Me a David a mle ultuil er a Sechelil el Jehovah el kirel a klisiich e milekodir a Goliath.​—1 Sa. 17:45, 48-51.

7. Ngera ke suub er a ta er a tekoi el dilubech el mora David?

⁷ Ngera sebechem el suubii er a tekoi el dilubech el mora David? Kede suubii el kmo ngkired el mo oba kllourreng. Tirke el medengelkau er a omkekerei a ousbech a taem el mo omuchel lomes er kau el mla mo klou el chad. Me nguaisei engdi ngsebechel el mo ulterekokl a rengum el kmo a Jehovah a diak di lomes er a ikrel a chad. Ngungil medengelkau me aike el tekoi el sebechem el remuul. (1 Sa. 16:7) Molisiich er a deleuill er kau me Ngii. A David a mirruul el uaisei er a lomes a blebelel a Jehovah. Ngmle dmolech el melebedebek el kmo a bleob ngngera ngosisecheklii el kirel Ngika el ulemeob. (Psa. 8:3, 4; 139:14; Rom 1:20) A ta er a tekoi el dirrek el sebechem el meruul er ngii a olengit a klisiich er a Jehovah. El ua tiang, a rebebil er a rengalek er a skuul te omekako er kau lekau el ta er a Sioning er a Jehovah? A lsekum e nguaisei, e moluluuch el mora Jehovah me lengesukau el melemolem el outekangel. E moltaut a ulekrael el ngar er a Tekingel me a dirrek aike el babilenged me a video el mengai a uchetemel er a Biblia. Bek el taem el mesa Jehovah el lolengeseu er kau el outekangel a omelsemai, e ngsmisichii a klaumerang er kau er ngii. Me a lmuut kung, a rebebil sel lomes er kau el ultuil er a Jehovah, e te mo oumerang er kau.

8-9. Ngera ngilsuir a David el mengiil el oba kllourreng el mo nguu a kleking, e ngera sebechir a remekekerei el odam el suub er a kerebai er ngii?

⁸ Mdirrek el melatk er a ta er a omelsemai el blo lechelebangel er ngii a David. Uriul er a lemucheluch el mo king, e ngmle kirel el mengiil el betok el rak e mo nguu a kingellel a omerreder er a Juda. (1 Sa. 16:13; 2 Sa. 2:3, 4) Ngera ngilsuir el melemolem el mengiil el oba kllourreng? Ngdimlak bo lemechitechut a rengul ngbai mle ultab a osengel er aike el tekoi el sebechel el meruul. El ua tiang, sera lechiis el mo kiei er a Filistia e nguluusbech er tiakid el taem el oumekemad er a recherrouel a Israel. Ngoeak tiakid el rolel e ngulemekerreu aike el belurir a rechad er a Juda.​—1 Sa. 27:1-12.

⁹ Ngera sebechir a remekekerei el odam el suub er a kerebil a David? Moruul aike el sebechem el mo mesiou er a rudam er kau. Ka molatk er a experience er a odam el Ricardo. * Sera ledirk lengeasek e ngkmal mle soal mo mesiou el regular pioneer. Me nguaisei, ngdimlak el sebechel er seikid el taem. Ngika dimlak bo lemechitechut a rengul me a lechub e bo el kesib a rengul e ngbai milenglou er a temel lomerk er a klumech. Ngmelekoi el kmo: “Sel kulatk er ngii, e ngsebechek el mesa klungiolel a kulemolem el olengeriakl. Ak mle kerekikl el lmuut el mo er tirke el lullecholt er a klemeriarreng e mengetmokl er ngak el kirel aike el taem el kluut el mo oldingel er tir. Ngmle ketengek el lomuchel el mesuub a Biblia el obengkel a chad. Sera kunglou er a duch er ngak, e ngmlukeroul a blekengek.” A Ricardo er chelechang a ta er a blak a rengul el regular pioneer e dirrek el ta er a remesiou er a ongdibel.

10. Ngera ngmirruul er ngii a David er a ta el taem er a uchei er a loruul er a klou a ultutelel el omelilt?

¹⁰ Ka molatk er a lmuut el ta er a tekoi el dilubech er a klengar er a David. Sera lomart er ngii me a rechedal er a Saul er a beluu er a Filistia e te milechititerir a telungalek er tir e mlo oumekemad. A recherrouel a mlo el  ngmai a kloklir e ngoititerir a telungalek er tir el mo kelebus. Ngmle sebechel a David el mo omdasu el kmo ngii el kmal mla mo ungil chad er a mekemad a sebechel medesuii a rolel ngmo olsobel er tir. Me nguaisei, engdi a David a mlora Jehovah el kirel a ngeso. Ngoeak a ngelseuil a prist el Abiathar e a David a uleker er a Jehovah el kmo: “Ng ungil a bo kultoir er tirkel mle oldechelakl?” Me a Jehovah a dilu er ngii el kmo lebo loltoir er tir e ulelterekokl er a rengul el kmo ngmo mesisiich. (1 Sa. 30:7-10) Ngera sebechem el suubii er tia el tekoi?

11. Ngera sebechem el meruul er ngii er a uchei er a omoruul a omelilt?

¹¹ Mosiik a ulekrael er a uchei er a omoruul a omelilt. Mongedecheduch er a rechad er a blim. Ngdirrek el sebechem el ngmai a ungil ulekrael a omongedecheduch er a remechuodel. A Jehovah a oumerang er tirka el mla metutk el chad me kau me ngdirrek el sebechem el oumerang er tir. Ngomes er tir el “sengk” el mei er a ongdibel. (Efe. 4:8) Ngmo klungiolem a omoukerebai er a klaumerang er tir e morrenges a ungil ulekrael el lomeskau. Me kuk bo dosaod aike el sebeched el suub er a King Asa.

12. Ngera el blekeradel a lullab a King Asa er a lomuchel el mengedereder?

¹² A Asa er a lekekerei el chad e ngmle ngariou a rengul e ullecholt er a blekeu. El ua tiang, sera lemad a demal er a Abia e lenguu a kleking e ngmlo mengikiid er a beluu er a bleob el chelid. Ngdirrek el dilu er a “re chad er a Juda me te mo osiik er a RUBAK el Dios er a re demerir, e mo oltaut a osisecheklel ma llechul.” (2 Kr. 14:1-7) E sel taem el Sera el chad er a Ethiopia me a re 1,000,000 el soldau a mlo oumekemad er a Juda, e a Asa a mlora Jehovah el kirel a ngeso, e millekoi el kmo: “RUBAK, ng di osisiu er kau a cho molengeseu er a re mechitechut ma lechub e te mesisiich el chad er a mekemad. Mngesukemam e RUBAK el Dios, e aki ultuil er kau.” Aika el tekingel a ochotii el kmo ngmle ulterekokl a rengul el kmo a Jehovah a mle sebechel losebelii ngii me a rechedal. A Asa a uluumerang er a Demal el ngar er a eanged, me a “RUBAK a mlo mesisiich er a re chad er a Ethiopia.”​—2 Kr. 14:8-12.

13. Ngera dilubech el mora Asa er a uriul, e ngera uchul?

¹³ A Asa a locha mlo medakt er a bo loumekemad er ngii tirka el 1,000,000 el soldau  engdi ngii el uluumera el ulsirs er a Jehovah a uchul me ngmlo mesisiich. Me nguaisei engdi ngklengiterreng e le sera leduubech a mondai el mle kekerei er tiang, e a Asa dimlak lebora Jehovah el kirel. Sel taem el King Baasa er a Israel a mlo oldechelakl er ngii e a Asa mlo olengit a ngeso er a king er a Siria. Tia el tekoi a mlo uchul a klou el tellemall! A Jehovah dilu er a Asa loeak a profet er ngii er a Hanani el kmo: “A uchul ma re soldau er a king er a Siria a mla chemiis er kau, kau el mlo ultuil er a king er a Siria e dimlak bo multuil er a RUBAK el Dios er kau.” Ngulemuchel er tiakid el taem el mong e a Asa di mle blechoel el loumekemad. (2 Kr. 16:7, 9; 1 Ki. 15:32) Ngera klubeled er tiang?

14. Ke mekera ochotii el kmo kultuil er a Jehovah, e a doltirakl er a 1 Timothy 4:12, e ke mo uangerang el chad sel moruul el uaisei?

¹⁴ Molemolem loba klengariourreng e moumera el ulsirs er a Jehovah. Sera ometecholb e ke ulechotii a klou el klaumerang er kau er a Jehovah. E a Jehovah a kmal mle dmeu a rengul loutkeu er kau el me chedal a telungalek er ngii. Me a tekoi el kirem el meruul er ngii er chelechang a melemolem el loumera el ulsirs er Ngii. Nglocha beot er kau el mo ultuil er a Jehovah sel moruul a meklou el omelilt el ngii a mo ngodechii a klengar er kau. Engdi ke mo mekerang er aike el kuk bebil taem? Ngkmal klou a ultutelel el multuil er a Jehovah sel moruul omelilt er kau el ua tekoi er a ongelaod, rolel a ureor, me a turrekong er kau! Lak multuil er a di llemesem. Bai mosiik a omellach er a Biblia el mo ngosukau el melilt e mkiei el oltirakl er a chelsel a klengar er kau. (Osi. 3:5, 6) A omoruul el uaisei, e ke rullii a Jehovah el mo dmeu a rengul me a rechad er a ongdibel a mo olecholt er kau a omengull.​—Monguiu er a 1 Timothy 4:12.

15. El ua lolekoi a 2 Kronika 18:1-3; 19:2, e ngera el cheleuid el tekoi a leriruul a King Jehosafat?

¹⁵ Me nguaisei, kau a diak mcherrungel el ua rebek el chad, me a lebebil e ke mo remuul a cheleuid. Engdi tia diak el kirel torebengau me ngdiak mosiou er a Jehovah el mo er sel tkurrebab el sebechem. Molatk er a King Jehosafat. Ngika mla er ngii a ungil blekerdelel. Ngdi mle kekerei el chad e “milsiou er a Dios er a demal, e olengesenges a llechul.” Me a lmuut kung, nguldercheterir a remengeteklel a Juda el mora beluu el rokir el mo olisechakl er tir el kirel a Jehovah. (2 Kr. 17:4, 7) Me alta ngmera el mle betik a rengul er a Jehovah  engdi a lebebil e ngdimlak lungil melilt. Sei a uchul me a ta el taem e ngngilai omesmechokl er a ta er a rumtechei er a Jehovah. (Monguiu er a 2 Kronika 18:1-3; 19:2.) Ngera sebechem el suubii er tiang?

16. Ngera sebechem el suub er a experience er a Rajeev?

¹⁶ Mkengei e moltaut omesmechokl. Ke locha di ua rebetok el mekekerei el chad el meringel er kau a remuul a meklou a ultutelel tekoi el mo kot. Lak bo el mechitechut a rengum. Molatk er a experience er a ta el kekerei el odam el Rajeev. Ngmelekoi el kirel sera lengeasek el kmo: “A lebebil er a taem ngdimlak kudengei el kmo ngsoak el mekerang el kirel a klengar er ngak. Ak di mle ua rebetok el ngeasek el soak el teloi a sports e milil er a bai kbora miting me a lechub a odingel.” Ngera ngilsuir a Rajeev? A ta er a ungil a blekerdelel mechuodel a milsang omesmechokl. A Rajeev a kmo: “Ngngilsukak el mo melatk er a omellach el ngar er a 1 Timothy 4:8.” A Rajeev a ngiluu a rengul moriou e uleltirakl er tia el omellach e mlo melatk el kmo ngngera meklou a ultutelel tekoi er a klengar er ngii. Ngmelekoi el kmo: “Ak riruul a turrekong er ngak er a klereng el mo kot er a klengar er ngak.” Ngera mlo rsel? A Rajeev a kmo: “Sesei el rak er uriul er a knguu tia el omesmechokl e ak mlo ta er a remesiou er a ongdibel.”

17. Ngua ngera uldesuir a remeklou el kirir a remekekerei el odam el mesiou er a Jehovah?

¹⁷ A remeklou a kmal oba omereng el saul el mesiou er a Jehovah lobengkemiu a remekekerei el odam el “kaukledem”! (Sef. 3:9, NW) Ngkmal sorir tia el reng er kemiu el blak a rengmiu el meruul a ureor el mngai. Kom kmal oba kengei er tir.​—1 Jn. 2:14.

18. El ua lolekoi a Osisechakl 27:11, ngua ngera uldesuel a Jehovah el kirir a remekekerei el odam el mesiou er ngii?

¹⁸ Remekekerei el odam, lak mobes el kmo a Jehovah a kmal betik a rengul er kemiu e oumerang er kemiu. Ngika ulemlaoch el kmo a uriul sils e ngmo er ngii a klou el ildois er a remekekerei el chad el di tir el mo kongei el mo mesiou er ngii. (Psa. 110:1-3) Ngmedengei el kmo ngbetik a rengmiu er ngii e somiu el mesiou er ngii el mo er sel tkurrebab el sebechiu. Me moba kllourreng el mora rebebil me a dirrek el kirem. Sel mruul a cheleuid, e mkengei a omellach me a omesmechokl el mngai, e momes el kmo ngmlara Jehovah leko er kau. (Heb. 12:6) Bo leblak a rengum el kutmokl a ngerachel el mngai. E a ngaruchei er ngii, a rokui el tekoi el moruul e mrellii a demam el ngar er a eanged el mo dmeu a rengul er kau.​—Monguiu er a Osisechakl 27:11.