Ngera uchul me “[ngikel] kmal chedal a Elimelek” a dilu el kmo ngmo el “metom” er a dikesel a bo lebechil a Ruth? (Rut. 4:1, 6)

A lsekum a chad er a taem er a Biblia a mad e diak a ngelekel a uchul ngduubech a bebil ker: Ngera duubech el mora chetemel? A ngklel a telungalek er ngii ngmo remiid? A Llach er a Moses a ngosukid longer aika el ker.

Ngera duubech el mora chetemel a chad el mad me a lechub e ngmo chebuul me ngoterur a chetemel? A odam er ngii me a lechub e ngkmeed el chedal a sebechel mecherar a chutem. Me a chutem a mo melemolem el ngar er a telungalek er tir.​—Lev. 25:23-28; Ule. 27:8-11.

Tia ngmekera oterekeklii el kmo a ngklel a telungalek er ngii el chad a diak leriid? A bechil ngike el mad a mo bechil a ta er ngii el sechal, el ua lurruul er ngii a Ruth. A chad a mo bechil a bechil a ta er ngii me ngmo sebechel ngii el redil el mo er ngii a ngelekel el melemolem er a ngklel ngika el mla mad e nguu a dikesel. Tia dirrek el ulemekerreu er ngika el melakl el dil.​—Dut. 25:5-7; Mt. 22:23-28.

Ka molatk er a Naomi. Ngika mle bechil a chad el ngklel a Elimelek. Sera lemad a Elimelek me a reteru el ngelekir el sechal, e ngmlo diak a sechal er a telungalek er tir el sebechel lomekerreu er ngii. (Rut. 1:1-5) Me sera lluut el mora Juda e ngdilu er a buchelsechelengel er a Ruth me lolengit er a Boas me lluut el mecherar a chetemir. Ngika mle kmeed el chedal a Elimelek. (Rut. 2:1, 19, 20; 3:1-4) Engdi Boas a miltebengii el kmo ngmla er ngii a chad el lmuut el kmeed el chedal a Elimelek. Me ngika mle llemeltel el kot a mecherar a chutem el kirir.​—Rut. 3:9, 12, 13.

A uchelel e ngii el chad a kilengei el olengeseu. (Rut. 4:1-4) Alta ngmle medengei el kmo ngmo mengoit a udoud el lmuut el melai er ngii el chutem, engdi ngmiltebengii el kmo a Naomi a diak el sebechel mechelii a ngalek el mo oudiukes er a chetemel a Elimelek. Me tia el chutem a mo dechelel a dikesel, me ngmle ungil el kirel.

Me nguaisei engdi ngmlo ngodechii a uldesuel er a lutebengii el kmo ngkirel el mo bechil a Ruth. Ngdilu el kmo: “A bo le ua ise rolel e ng diak bo kuusbech er a llemeltek el omchar er ngii el sers, ele ng soal mo uchul e ak metom a dikesek.” (Rut. 4:5, 6) Ngera uchul me ngngildechii a uldesuel?

A lsekum a Ruth a mo bechil me a lechub e ngkuk ta er a chad, e mechellii a ngalek, e ngika el ngalek a mo oudiukes er a chetemel a Elimelek. Me ngmekera ‘mo uchul e ng metom er a dikesel’? A Biblia diak louchais engdi ikakid a locha bebil er a rolel e ngmo metom er a dikesel.

• A kot e ngmo ua loriid a ududel e le chetemel a Elimelek a diak bo le kloklel. Ngmora ngelekel a Ruth.

• Ongerung, ngmo ngerechelel lomekerreu e omekang er a Naomi me a Ruth.

• Ongedei, a lsekum e ngmo er ngii a lmuut el bebil er a ngelekel er a Ruth, e a dikesel a mo obii er a delongelir me a rengelekel.

• Ongeuang, a lsekum e ngdimlak a rengelekel, e a ngelekel a Ruth a mo oudiukes er a chetemel me a chetemel a Elimelek. Me ngmo choridii a chetemel el mora ngalek el mo oba ngklel a Elimelek el diak el ngklel. Sei a uchul me ngdimlak el soal metom er a dikesel el kirel a Naomi. Ngmle soal ngike el ongingil er ngii el Boas a bo lenguu tia el ngerachel. A Boas a mle soal meruul er tiang el “mo omtebechel ngii el daisang el ngar a ngklel ngikel mlad el chad er a telungalek.”​—Rut. 4:10.

Me ngika el chad a mle lmuut el klou a ultutelel er ngii a ngklel me a dikesel. Ngkmal di millatk er a di ngii. Me nguaisei engdi ngdiak a chad el medengelii a ngklel er chelechang. Me ngii a urridii a ileakl el techall el lengiluu a Boas, el ta er a ruldidellel a rasech el mora Mesias el Jesus Kristus. Ngmera el klengiterreng el kirel a chad el di millatk er a di ngii e dimlak el kengei el ngosuir a chad lousbech a ngeso!​—Mt. 1:5; Lk. 3:23, 32.