1. Ngera urungulir a ruungalek el kirir a rengelekir?

 RUUNGALEK, aki medengei el kmo ngkmal somiu el ngosuterir a rengelekiu el mo medengelii e mo betik a rengrir er a Jehovah. Engdi a Dios a diak le mues. Ngmekera sebechem el ngosuterir a rengelekem el mo omes er ngii el kmo ngmera el chad e mo kmeed er ngii?​—Jak. 4:8.

2. Ngmekera ruungalek e sebechir el losisecheklterir a rengelekir el kirel a blekerdelel a Jehovah?

² A klou a ultutelel el rolel e ngsebechir a rengalek el mongeseu el mo kmeed er a Jehovah a sel dosuub er a Biblia lobengterir. (2 Ti. 3:14-17) Engdi a Biblia dirrek lochotii a ta er a rolel e a rengalek a sebechir el mesuub el kirel a Jehovah. Ngar er a babier er a Osisechakl e a ta el chedam omeklatk er a ngelekel el kmo lak lobes a blekerdelel a Jehovah el ngii a mocholt er a blebelel. (Osi. 3:19-21) Kede mo mesaod a bebil rolel e a ruungalek a sebechir lousbech a blebelel a Jehovah el ngosuterir a rengelekir el suub a blekerdelel a Jehovah.

3. Ngera ngkirir a ruungalek el ngosuterir a rengelekir el mo meruul er ngii?

³ A Biblia kmo a “diak el moues el blekerdelel a Dios . . . a mla moues el bleketakl; kede mes el ngar a ikel le bileob.” (Rom 1:20) Ruungalek nglocha kmal somiu el mengoit a taem lobengterir a rengelekiu er rikl. Mousbech er tia el taem lolengeseu er a rengelekiu el mo mesa rolel aike el “le bileob” a Jehovah ocholt a mengasireng el blekerdelel. Me dosaod aike el sebechir a ruungalek el suub er a rolel a Jesus a ullisechakl.

4. Ngmilekera Jesus e ousbech a bleob el olisechakl er a redisaiplo er ngii? (Lukas 12:24, 27-30)

⁴ Momtab a rolel e a Jesus a uluusbech a bleob lolisechakl. A  ta el taem e ngullengit er a redisaiplo er ngii me lomtab a kiuid me a bung. (Monguiu er a Lukas 12:24, 27-30.) A Jesus a mle sebechel lousbech a ngii di el charm me a lechub e ngdellomel engdi nguluusbech er a charm el suebek me a bung el rultirakl er ngii a mle ungil medengei. A redisaiplo er ngii a locha ulemes a kiuid el suebek me a bung lomung er a ked. Ngsebechem el imagine er a Jesus el mengedecheduch e melutk aikang? Me a Jesus ngmilekerang er a uriul er a ledu aika el ocholt er a bleob? Ngulsisecheklterir a redisaiplo er ngii a kmal klou a ultutelel el tekoi el kirel a Demerir el ngar er a eanged el kmo, ngbekururau e meruul a ungil: A Jehovah mo omekang e omekbail er a reblak a rengrir el mesiungel el di ua loruul el kirel a kiuid me a bung er a ked.

5. Ngera er a blebelel a Jehovah sebechir a ruungalek lousbech lolisechakl er a rengelekir el kirel a Jehovah?

⁵ Ruungalek, ko mo oukerebai er a rolel e a Jesus a ullisechakl? Ngsebechem louchais er a ngelekem er a bleob el kmal moba omereng el saul el kirel, el uai a kot el soam el charm me a lechub e ngdellomel. Sel moruul er tiang e ngkirem el smodii el mora ngelekem el kmo tiang ngera ngouchais er kid el kirel a Jehovah. Ngsebechem loker er a ngelekem el kmo ngngera kot el soal charm me a lechub e ngdellomel. Omousbech er a blebelel a Jehovah el soal e nglocha mo kerekikl lorrenges sel mosaod el kirel a blekerdelel a Jehovah el mocholt er ngii.

6. Ngera sebeched el suubii er a kerebil a delal a Christopher?

⁶ A ruungalek ngkirir el mengoit er a klou el taem el research el kirel a charm me a lechub e ngdellomel el mo mesaod el kmo ngngera ngouchais er ngii el kirel a Jehovah? Ngdiak. A Jesus a dimlak lebeskid a omesodel a kmo ngua ngera longang a kiuid me a lechub e ngmekera mukeroul a bung. Nguaisei el ngar ngii aike el taem el rengelekem a locha mo sorir a dmolech el omesodel a blebelel a Jehovah engdi a lebebil a di kekerei el tekoi el dutebengii er a blebelel a Jehovah me a lechub e ngker a sebechel ngosuir a ngelekem el mo medengelii a point. Molatk a tekingel a odam el Christopher er a lengalek: “A delak a blechoel el melekoi er kemam a mekekerei el tekoi el kirel aike el blebelel a Jehovah el iliuekl er kemam el ngosukemam el moba omereng el saul el kirel. El ua tiang, sera ki mkeed er a rois, e ngmo kmo: ‘Ka mesa klungel me a klebekelel aika el rois! A Jehovah e ngdiak el amazing?’ Me a lechub sel ki mkeed er a daob e ngmo kmo: ‘Ka mesa klisichel aika el waves! A Dios ngdiak el sal kmal mesisiich?’” A Christopher a kmo: “Aika el mekekerei el tekingel el ngilsukemam el mo omdasu, a kmal klou a lerirellii er kemam.”

7. Ngmekera sebechem el train er a rengelekem el mo melatk a blebelel a Jehovah?

⁷ Sel lorael el mo meklou a rengelekem e ngsebechem el train er tir el mo dmolech el melatk a blebelel a Jehovah e momtab aike el louchais el kirel a blekerdelel. Ngsebechem el mesaod el kirel a ta el tekoi el lebilebii a Dios e oker er tir el kmo, “Tia ngera ngosisecheklii er kau el kirel a Jehovah?” Nglocha kmal mo mechas a rengum e mo dmeu a rengum lorrenges aike el louchais er kau.​—Mt. 21:16.

8. Ngera el techall a lullab a rechad er a Israel loungalek sel lorael “er a rael”?

⁸ A rechad er a Israel el uluungalek a ledilu er tir el mo olisechakl er a rengelekir a llechul a Jehovah sel lorael “er a rael.” (Dut. 11:19) A rael a ulekiu a ked er a Israel. Ngsebechir el mes a kakerous el charm me a bung sel lorael er ngii. A rechad er a Israel sel lorael e ngmla er ngii a techellir el mengedecheduch er a rengelekir el kirel aike el lulemeob a Jehovah. Kemiu  loungalek me nglocha ngar ngii a osisiu el techall el molab lolisechakl er a rengelekiu el kirel a blebelel a Jehovah. Mesa rolel e a rebebil er a ruungalek a mla meruul er tiang.

9. Ngera sebechem el suub er a Punitha me a Katya?

⁹ A chedil Punitha el kiei er a klou el city er a India a kmo: “Sel ki bo moldingel er a telungalek er kemam el kiei el cheroid er a city e aki omes er ngii el techall lolisechakl er a rengelekam el kirel a mengasireng el blebelel a Jehovah. Ak feel el kmo a rengelekam a ungil mesuub el kirel a blebelel a Jehovah sel lecheroid er a sekedel a rael me a klungel a traffic er a city.” Ruungalek a rengelekiu a locha kmal diak bo lobes aika el taem el mongoit lobengterir el ngar er aika el klebokel el basio. Katya el odos er a Moldova a kmo: “Ngkmal diak kubes aike el taem er a kngalek el obengterir a rechad er a blik el ngar er aike el basio er a belumam el ngar er a ikrel a city. Ak mera el oba omereng el saul el kirir el ulemuchel lolisechakl er ngak er a kmal dirk kekerei el mo stob e omtab a blebelel a Jehovah e mo medengelii loeak ngii.”

10. Ngera sebechir a ruungalek el meruul a lsekum e ngmeringel er tir a mora ike el beluu el ngar er a ikrel a city? (Momes er a baks el “ Ngeso el Kirir a Ruungalek.”)

¹⁰ Engdi ngmekera a lsekum e ngmeringel er kid a mora chouaika el beluu? Amol el kiei er a India a kmo: “Ngar er a beluu el kkiei er ngii, e a ruungalek a kmal kemanget a hours er tir er a ureor me a trip el mora ike el beluu el ngar er a ikrel a city a sebechel el kmal mo meringel a cheral. Me nguaisei a kekerei el park me a lechub e ng balcony er a blai a sebeched el mo er ngii e omes a blebelel a Jehovah e mesaod el kirel a blekerdelel.” Sel bo mkerekikl lomes, e nglocha sebechem el mes a blebelel a Jehovah er a basio el kmeed er a blim el sebechem el locholt er a rengelekem. (Psa. 104:24) Ke locha mo metik a charm el suebek, mekekerei el charm, dellomel, me a lmuut el betok. A Karina er a Germany a kmo: “A delak a kmal soal  a bung, me sera kkekerei e ki mdak el merael e ngblechoel melutk a betok el klebokel el bung.” Ruungalek ngdirrek el sebechiu el lousbech aike el betok el video me a babier el kirel a blebelel a Jehovah el bla lotobed a cheldebecheled lolisechakl er a rengelekiu. Nguaisei a ngii di el beluu el omkiei er ngii me ngsebechem el ngosuterir a rengelekem el mo omtab aike el bla lebeob a Dios. Chelecha e me dosaod a bebil blekerdelel a Jehovah el sebechem el ngosuterir a rengelekem el mo mtab.

11. Ngmekera ruungalek e sebechir el ngosuterir a rengelekir el mo mtebengii a bltkil a rengul a Jehovah?

¹¹ Mngesuterir a rengelekem el mo mtebengii a bltkil a rengul a Jehovah loeak sel mochotii er tir a rolel a charm omekerreu er a rengelekel. (Mt. 23:37) Ngdirrek el sebechem el louchais el kirel a betok el kakerous el tekoi el lebileob el doldeu a rengud er ngii. A Karina el dulsaod er ngii er a uchei a kmo: “Sel ki bo morael ngak me a delak e ngblechoel el melisiich er ngak el mo stob e omtab a rolel e a derta el bung a kmal ileakl me a rolel e a klebekelel a ochotii a bltkil a rengul a Dios. Betok el rak er uriul ak kmal dirk kerekikl lomtab a bung me a chiro er ngii me a rolel e a derta er ngii a kakerous. Aika melemolem lomeklatk er ngak er a bltkil a rengul a Jehovah el mei er kid.”

12. Ngmekera ruungalek e sebechir el ngosuterir a rengelekir el mo mtebengii a llemesel a rengul a Dios? (Psalm 139:13, 14) (Dirrek el momes er a siasing.)

¹² Mngesuterir a rengelekem el mo mtebengii a llemesel a rengul a Dios. A Jehovah a lmuut el mellomes a rengul er kid. (Rom 11:33) El ua tiang, ngsebechem el ngosuterir el mo omtab er a rolel e a eabed obeob me a rolel e ngkmal beot er ngii a merorael el ngar er a ta er a basio el mora tang. (Job 38:36, 37) Ngdirrek el sebechem el ngosuterir el mo mtebengii a mengasireng el rolel e a bedenged ulebeob. (Monguiu er a Psalm 139:13, 14.) Molatk er a rolel e a chedam el Vladimir a rirellii tiang. Ngkmo: “A ta er a klebesei e a ngelekam el sechal a rirebet er a rrat er ngii e metemall. Uriul er a sesei el klebesei e ngmlo mechubs tia el telemall er a bedengel. Ngak me a bechik a silodii el mo er ngii el kmo a Jehovah milebid el sebechel a bedenged el di ngii lomekungil er ngii. Me aki millekoi er ngii el kmo tia kmal diak desang er a ngii di el tekoi el bla leruul a rechad. El ua tiang, a mlai a diak el sebechel di ngii el mo  ungil sel le accident. Tia el tekoi a ngilsuir a ngelekam el mo medengelii a llemesel a rengul a Dios.”

13. Ngmekera ruungalek e sebechir el ngosuterir a rengelekir el mo mtebengii a klisichel a Dios? (Isaia 40:26)

¹³ A Jehovah olengit er kid el mo merk osenged el bedul a melidiul e melatk er a rolel e a klisichel a remuul a btuch me ngngar olsechelel. (Monguiu er a Isaia 40:26.) Ngsebechem el melisiich er a rengelekem me lomes er a eanged e lolatk aike el leues. Molatk aike el latk a odos er a Taiwan el Tingting er a lengalek: “A ta el taem e a delak a ngilikak el mo camp e aki omes a btuch er a eanged el diak a light er a city. Ngar tiakid el taem e ak mle chelebangel orimel e mle bekikl el kmo ngmo el mo diak el sebechek el melemolem el mesiou er a Jehovah loba blakerreng. A delak a millisiich er ngak el mo melatk er a klisiich luluusbech er ngii a Jehovah el meob aika el rokui el btuch e mo melatk el kmo a Jehovah sebechel lousbech er tia el klisiich el ngosukak el outekangel a ngii di el omelsemai. Uriul er tia el trip er kemam, e ngmlo soak el lmuut el mo ungil medengelii a Jehovah e smisichii a renguk el mo mesiou er ngii.”

14. Ngmekera ruungalek e sebechir lousbech a blebelel a Jehovah el ngosuterir a rengelekir el mo mesa el kmo a Jehovah a dmeu a rengul el Dios?

¹⁴ A blebelel a Jehovah ochotii el kmo ngdmeu a rengul e dirrek lochotii el kmo ngchad er oltobedechur. A re scientist a mla omtab a rolel a charm ousekool, luldimukl a charm el suebek me a ngikel. (Job 40:20) A rengelekem te mla omes a charm lousekool e ocherchur er tir? Te locha mla mesa katuu loltoir er a btuu er a rekodoll me a lechub e ngngelekel a bilis el kausekool. Sel next el meseterir locherur er a charm lousekool e momeklatk er tir el kmo kede mesiou er a dmeu a rengul el Dios.​—1 Ti. 1:11, NW.

15. Ngera sebechel ngosuterir a ruungalek loltobed aike el ngar er a uldesuir a rengelekir? (Osisechakl 20:5) (Dirrek el momes er a siasing.)

¹⁵ A lebebil a ruungalek a meringel er tir a rulleterir a rengelekir el mo ouchais a mondai el lechebangel. A lsekum e ke chelebangel er tiang, e nglocha mo kirem el oltobed aike el ngar er a uldesuir a rengelekem. (Monguiu er  a Osisechakl 20:5.) A rebebil loungalek a metik el kmo ngbeot er tir el meruul er tiang sel longoit a taem el lobengterir a rengelekir er a ikrel a delengcheklir. E ngerang? A ta er a uchul a diak el betok a mengesang er a rengalek me a ruungalek. A chedam er a Taiwan el Masahiko a ouchais er a ta er a uchul: “Sel dongoit a taem el ngar rikl lobengterir a rengeleked el hike me a lechub e kede merael er a chelechol e te feel el relax. Seikid e ngmo beot er kid oltobed aike el ngar er a uldesuir.” Katya el dulsaod er ngii er a uchelel a kmo: “A delak a blechoel el ngoikak el mora klebokel el park sel after school. Ngar tia el budech el basio e ngbeot er ngak ouchais er ngii a dilubech er a skuul me a lechub e ngtekoi el kbekikl el kirel.”

16. Ngmekera telungalek e sebechir lousbech a blebelel a Jehovah el mo olengull e dmak el milil?

¹⁶ A blebelel a Jehovah dirrek el sebechel mesterir a retelungalek a techall el mo olengull e dmak el milil, e tia mo melisiich er a deleongel er a telungalek. A Biblia kmo ngngar ngii a “belsechel a deurreng” me a “belsechel a ngloik.” (Oli. 3:1, 4) A Jehovah a mla meob a betok el klebokel el basio el sebeched el meruul a tekoi el soad. A rebetok el telungalek a sorir el dmak el mo mengedub me a lechub e te milil. A rebebil er a rengalek a sorir el remurt e ousekool er a park, e omes a charm, me a lechub e te mengedub er omoachel me a lechub e ngdaob. Ngmera el betok a techall el sebeched el oldeu a rengud er aike el bla lebeob a Jehovah!

17. Ngera uchul me a ruungalek a ungil lolengeseu er a rengelekir el mo oldeu a rengrir er a blebelel a Dios?

¹⁷ Ngar er a beches el blekeradel er a Dios, e a ruungalek me a rengalek a sebechir el mo oldeu a rengrir er a blebelel a Jehovah el ngar er a rolel e ngdiak el sebechir el meruul er ngii er chelechang. Seikid ngdiak bo demedakt a charm me tir a diak bo lemedakt er kid. (Isa. 11:6-9) Ngmo diak a ulebengelel a temed loldeu a rengud er a blebelel a Jehovah. (Psa. 22:26) Engdi ruungalek lak mongiil el mo er tiakid el taem el mo olengeseu er a rengelekem el oldeu a rengrir er a blebelel a Jehovah. Sel bo mousbech a blebelel a Jehovah lolisechakl er a rengelekem el kirel, e ke locha kmal mo kongei a tekingel a King David er a ledu el kmo: “Rubak, [ng] diak a remuul a ikel moruul.”​—Psa. 86:8.