1-2. Ngera blechoel el duubech sel lemetecholb a chad, e ngera ungil molatk er ngii?

 NGMLA ta el momes er a rechad el telbiil el mo metecholb? Ke orrenges er tir el ulterekokl a rengrir longer aike el eru el ker el donger er a uchei er a demetecholb. Ke mesa el kmo a rechedal a telungalek er tir me a resechelirir a kmal proud er tir. Tirka el chad sel letekerekl er a ralm e ke orrenges er a rechad el omrotech e mesa sel klou el deurreng er a mederir. Bek el sandei e te betok el telael el chad a tuib a rengrir el mora Jehovah e metecholb el ta er a Sioning er ngii.

² E kau? A lsekum ke melatk a mo metecholb, e kau a medidiich el llomes er tia el mekngit el beluulechad e le kau el “osiik er a Jehovah.” (Psa. 14:1, 2, NW) Tia el suobel a milluches el kirem, omklou me a omkekerei. Me nguaisei, tirke el mla metecholb a dirrek el kirir el smisichii a urungulir el sorir el mesiou er a Jehovah el mo cherechar. Me dedak el mesaod a edei er aike el betok luchul me ngsoad el mesiou er a Jehovah.

3. Ngera uchul me a remesiungel a Jehovah betik a rengrir er a klemerang me a llemalt? (Psalm 19:8, 119:163)

³ A Jehovah dilu er a rechedal el kmo bo el “betik a rengmiu er a klemerang.” (Sek. 8:19) E a Jesus a millisiich er a rultirakl er ngii me bo losiik er a llemalt. (Mt. 5:6, BT) Tia belkul a kmo a chad a kirel ngar ngii a mesisiich el urungulel el mo meruul a llemalt, ungil, e klikiid er osengel a Dios. Kau, ngbetik a rengum er a klemerang me a llemalt? Ngkmal ulterekokl a rengmam el kmo nguaisei. Ngchetim a blulak me a mekngit me a chelebirukel. (Monguiu er a Psalm 19:8; 119:163.) A chad loumulak a di ua Satan el merreder er tia el beluulechad. (Jn. 8:44; 12:31) A ta er a turrekong er a Satan a melemall er a chedaol el ngklel a Jehovah el Dios. A Satan ngkakid er a lomerk a blulak el chais  el kirel a Dios er kid er a ultok er a Eden el mei. Ngmillasem el meruul er a rechad el mo omdasu el kmo a Jehovah a mengedereder el melatk er a di ngii e omulak e orreked a ungil er a rechad. (Gen. 3:1, 4, 5) A blulekngel a Satan el kirel a Jehovah a melemolem el meruul er a rechad el mo mekngit a uldesuir el kirel a Jehovah. A rechad sel lengiltii el mo diak le ‘betik a rengrir er a klemerang’ e a Satan a mekroleterir el mo meruul a bek el bedengel a mekngit e diak el melemalt lomeruul.​—Rom 1:25-31.

4. Ngmekera Jehovah e mla ochotii el kmo ng “Dios er a klemerang”? (Dirrek el momes er a siasing.)

⁴ A Jehovah “Dios er a klemerang,” e olisechakl er a klemerang el mo er tirke el betik a rengrir er ngii. (Psa. 31:5, NW) Sel loruul el uaisei e ngngosuterir el mo mimokl er a blulekngel a Satan. A Jehovah dirrek el lolisechakl er a rechedal el mo honest e meruul a llemalt. Tia ngosuterir el mo ungil a uldesuir el kirir e mo budech a uldesuir me a rengrir. (Osi. 13:5, 6) Jehovah ngmla rullii tiang el kirem el ngar er a omesubem er a Biblia? Ke mla suubii el kmo a rolel a Jehovah sel kot lungil el kirir a rechad me a dirrek el kirem. (Psa. 77:13) Me ngsoam el meruul aike el ledu Jehovah el kmo ngmelemalt. (Mt. 6:33) Ngsoam el mesebechakl er a klemerang, e ochotii el kmo aike el blulak lolekoi a Satan el kirel a Dios er kid el Jehovah a diak el klemerang. Ngmekera sebechem el meruul er tiang?

5. Ngmekera sebechem el dechor el kirel a klemerang me a llemalt?

⁵ Ngsebechem el ngiltii a rolel a klengar el ngii a ochotii el kmo, ‘Ak oltngakl a blulekngel a Satan e dechor el kirel a klemerang. Ngsoak a Jehovah a lemerredelek e soak el meruul aike el ledung el kmo ngmelemalt.’ Ngmekera omoruul er tiang? Bora Jehovah loeak a nglunguuch e mtibir a rengum el mo er ngii e mochotii a telbilel a rengum loeak sel bo metecholb. A bltkil a rengum el kirel a klemerang me a llemalt a mesisiich luchul me ke melilt el mo metecholb.

6. Ngua losaod a Psalm 45:4 (NW), ngera uchul me ngbetik a rengud er a Jesus Kristus?

⁶ Ngera uchul me ngbetik a rengum er a Jesus Kristus? Molatk a bebil er a ungil luchul el ngar er a Psalm 45:4 (NW). b (Monguiu.) A Jesus a dechor el kirel a klemerang, klengariourreng,  me a llemalt. A lsekum e ngbetik a rengum er a klemerang me a llemalt, e ngsebeched el mesa uchul me ngbetik a rengum er a Jesus Kristus. Molatk er a rolel e a Jesus uleba blekeu el mesebechakl er a klemerang me a llemalt. (Jn. 18:37) Engdi ngmekera Jesus e melisiich er a klengariourreng?

7. Ngera kmal soam er a klengariourreng er a Jesus?

⁷ Ngoeak a kerebai er ngii e a Jesus a melisiich er a klengariourreng. El ua tiang, ngmsa rokui el klebkall er a Jehovah. (Mk. 10:17, 18; Jn. 5:19) Ngmo uangerang a uldesuem sel momes er tia lolechotel a klengariourreng? Ngdiak el odbechau el mo betik a rengum er a Ngelekel a Dios e mo oltirakl er ngii? Ngmera el uaisei. Ngera uchul me a Jesus a ngariou a rengul? E le ngkmal soal loukerebai er a Demal, el ngii a ngariou a rengul. (Psa. 18:35, NW; Heb. 1:3) Ngdiak locheuir a rengum a Jesus, el ngii a cherrungel lokesiul a blekerdelel a Jehovah?

8. Ngera uchul me ngbetik a rengud er a Jesus el King er kid?

⁸ Ngbetik a rengud er a Jesus el King er kid e le ngii a kot lungil el merreder. A Jehovah mle train er a Ngelekel e tutkii el mo mengedereder. (Isa. 50:4, 5) Ka mdirrek el melatk er a bltikerreng el bla lochotii. (Jn. 13:1) A Jesus el King er kau a rredemel a bltikerreng er kau. Ngsilodii el kmo tirke el mera el betik a rengrir er ngii el lomekedong er tir el kmo te sechelil, ochotii a bltikerreng er tir loeak a blekongesenges. (Jn. 14:15; 15:14, 15) Ngmera el ileakl el chetengakl el desechelil a Ngelekel a Jehovah!

9. Ngmekera techolb er a Rekristiano e osisiu er a techelbel a Kristus?

⁹ A ta er a ledilu er ngii a Jesus el mora rultirakl er ngii a bo lemetecholb. (Mt. 28:19, 20) Ngika kiltmeklii a kerebai. Me nguaisei a techolb er ngii a kakerous er a techolb er a rultirakl er ngii er a bebil rolel. (Momes er a baks el “ Klekakerous er a Techolb er a Jesus me a Techolb er a Rultirakl er Ngii.”) Engdi ngar er a bebil rolel e ngosisiu. A Jesus er a lemetecholb e ngulechotii el kmo ngkltmokl el mo meruul er a soal a Demal. (Heb. 10:7) Ngdi osisiu, a rultirakl er a Kristus a metecholb lochotii el mora rokui el chad el kmo te mla tuib a klengar er tir el mora Jehovah el Dios. A klengar er tir er chelechang a meruul er a soal a Jehovah el diak el ike el sorir. Me te oukerebai er a Mastang er tir.

10. Ngera uchul me a bltkil a rengum el mora Jesus a kirel odbechau el mo metecholb?

¹⁰ Kau a kongei el kmo a Jesus a di ta el Ngelekel a Jehovah e ngike el King el bla letetkii a Dios el mo mengedereder er kid. Komes er a Jesus el kmo ngngariou a rengul e cherrungel lokesiul a Demal. Ke mla suubii el kmo ngulemeka er a resongerenger, milengelaod er a remechitechut a rengrir, e ulemekungil er a resmecher. (Mt. 14:14-21) Ke mla mesa rolel a lomekrael ongdibel er chelecha el taem. (Mt. 23:10) E kau a medengei el kmo ngmo remuul a lmuut el betok er a ngar medad el King er a Rengedel a Dios. Ngmekera sebechem lochotii er ngii el kmo ngbetik a rengum er ngii? Loeak sel moltirakl er a kerebai er ngii. (Jn. 14:21) Ngsebechem el meruul er tiang loeak sel mtibir a rengum el mora Jehovah e metecholb.

11. Ngera ke mo dmu el kmo ngkot el klou a ultutelel luchul me a chad a mo metecholb, e ngera uchul me nguaisei?

¹¹ Ngera sel kot el klou a ultutelel luchul me a chad a mo metecholb? A Jesus uluuchais er sel kot el klou a ultutelel el llechul a Dios er a ledu el kmo: “Bo le betik a rengum er a Rubak el Dios er kau el oba rengum el rokir, ma klengar er kau el rokir, ma uldesuem el rokir, ma  klisichem el rokir.” (Mk.12:30) Aika el tekoi ngsmodii a bltkil a rengum el mora Dios?

12. Ngera uchul me ngbetik a rengum er a Jehovah? (Dirrek el momes er a siasing.)

¹² Ngbetok a uchul me ngbetik a rengud er a Jehovah. El ua tiang, ke mla mo medengei el kmo ngngii “a uchelel a rokui el klengar” me ngii a omeskid a “bek el ungil e cherrungel sengk.” (Psa. 36:9; Jak. 1:17) A rokui el ungil el tekoi el moldeu a rengum er ngii a mlara bekururau e betik a rengul el Dios er kid.

13. Ngera rullii a olubet me ngkmal lungil sengk?

¹³ A olubet a mera el ungil sengk el mlara Jehovah. Ngera uchul me ngsebeched el melekoi el uaisei? Molatk er a kmes el deleuill er a Jehovah me a Ngelekel. A Jesus a dilu el kmo: “A Chedam a betik a rengul er ngak” me ngak a “betik a renguk er a Chedam.” (Jn. 10:17; 14:31) Tia el deleuill er tir a liluut el kmal mo mesisiich er a chelsel aike el betok el biliol el rak el ledilak. (Osi. 8:22, 23, 30) Me molatk er a klou el ringel el blo lolechesuar er ngii a Jehovah er a lebecherei a Ngelekel me bo lechuarm e mad. A Jehovah kmal betik a rengul er a rechad, luldimukl er kau, me ngkilengei el mecherei a Ngelekel me ngmad el tenget me lsebechem kau me a rebebil el mo kiei el mo cherechar. (Jn. 3:16; Gal. 2:20) Ngdiak a lmuut el ngarbab luchul me ngbetik a rengud er a Dios.

14. Ngera kot lungil turrekong el sebechem el rullii?

¹⁴ A bltkil a rengum el mora Jehovah mla mukeroul e le ke mla suub a betok el kirel. Nglocha  kmal soam el mo kmeed er ngii er chelechang el mo cherechar. E kmal sebechem. Ngmelisiich er kau el mo odeuir a rengul. (Osi. 23:15, 16) Ngsebechem el meruul er tiang el diak di loeak a tekingem ngdirrek el ngar er a omerellem. A rolel a klengar er kau a mo ochotii el kmo ke mera el betik a rengum er a Jehovah. (1 Jn. 5:3) Tiakid sel kot lungil turrekong el sebechem el rullii.

15. Ngmekera sebechem lochotii a bltkil a rengum el mora Jehovah?

¹⁵ Ngmekera sebechem lochotii a bltkil a rengum el mora Jehovah? A kot e ngsebechem el rullii a ileakl el nglunguuch el mo er ngii, el ngii a tibir a rengum el mora di ta el mera el Dios. (Psa. 40:8) E a uriul e ke ochotii tia el telbilel a rengum loeak sel ometecholb. Ngua dulsaod er a uchelel tia el suobel, a techolb er kau a kmal klou a ultutelel el sils er a klengar er kau. Ke mechelii a beches el klengar el diak el kirem, e ngbai kirel a Jehovah. (Rom 14:8; 1 Pe. 4:1, 2) Tia kora kmal klou el tekoi, e uaisei. Engdi ngmekengii a rael el mo er sel kot lungil el klengar. Ngoeak a ngera el rolel?

16. Ngua losaod a Psalm 41:12, ngmekera Jehovah bo lomekngeltengat er tirke el lousbech er a klengar er tir el mesiou er ngii?

¹⁶ A Jehovah ngike el kot el bekururau el chad. Ngii di el tekoi el obsang me ngii a mo meskau a lmuut el betok. (Mk. 10:29, 30) Ngmo meskau sel kot lungil klengar el ngar ngii a belkul mo lmuut er a chelsel tia el beluulechad el mo nguemed. E tia di uchelel. A klengar lomuchel er sel ometecholb a sebechel melemolem. Ngsebechem el mesiou er a betik a rengul el Demam el mo cherechar. A bltikerreng er a delongelem kau me a Demam a mo melemolem el mukeroul, me kau a mo kiei el ua klemengetel a klengar er ngii, ke mo kiei el mo cherechar.​—Monguiu er a Psalm 41:12.

17. Ngera sebechem el msang a Jehovah, el diak er ngii?

¹⁷ Sel mtibir a rengum e metecholb, e ke msa Demam a kmal mekreos el tekoi. Ngika mla meskau a bek lungil e deurreng er a klengar er kau el moldeu a rengum er ngii. Me ngsebechem el msang Ngike el louklalo er a eanged me a chutem a tekoi el diak lobang, el ngii a blakerreng er kau el mo er ngii. (Job 1:8; 41:11;  Osi. 27:11) Ngera lmuut lungil rolel e ke ousbech er a klengar er kau? A bltkil a rengum el mora Jehovah sel kot lungil luchul me ke metecholb.

18. Ngera el ker a sebechem el di kau loker?

¹⁸ Me ngmekera donger er a ker el, Me ke mo metecholb? Ngdi kau a sebechem longer er tiang. Engdi ngmo ngosukau a di lekau loker, ‘Ngera uchul me ak mengiil el mo metecholb?’ (Rel. 8:36) Molatk aike el edei luchul el bla desaod. A kot, ngbetik a rengum er a klemerang me a llemalt. Di lekau loker, ‘Ngsoak el mo mesa sel sils el rokui el chad a mo melekoi a klemerang e meruul a llemalt?’ Ongerung, ngbetik a rengum er a Jesus Kristus. Di lekau loker, ‘Ngak, ngsoak a Ngelekel a Dios a bo le King er ngak e soak loltirakl er a kerebai er ngii?’ E a ongedei e ngaruchei er ngii el rokui, ngbetik a rengum er a Jehovah. Di lekau loker, ‘Ngsoak loldeu er a rengul a Jehovah loeak a kusiou er ngii el Dios er ngak?’ A lsekum a nger er kau er aika el ker a choi, e ngera uchul me ngdirkak metecholb? Ngera uchul me ke mengiil?​—Rel. 16:33.

19. Ngera uchul me ngdiak a belkul morreked er a rengum el mo metecholb? Momekesiu. (Johanes 4:34)

¹⁹ A lsekum ke orreked er a rengum el mo metecholb, molatk er a okesiu luluusbech er ngii a Jesus. (Monguiu er a Johanes 4:34.) Mutebengii el kmo a Jesus ulemekesiu er a meruul er a soal a Demal el mora kall. E ngerang? A kall a ungil el kired. A Jesus a mle medengei el kmo a ngii di el tekoi lolengit er kid a Jehovah el mo meruul er ngii a ungil kired. Jehovah diak el soal a doruul a tekoi el mo uchul a telemelled. Kau el mo metecholb, nguldimukl er a soal a Jehovah? Chochoi. (Rel. 2:38) Me ngsebechel mo ulterekokl a rengum el kmo, omolengesenges er tia el tekingel el kmo bo metecholb e ngmo uchul a klungiolem. A lsekum ngdiak morreked er a rengum el mo menga er sel kot lungil el kall, e ngera me ke orreked er a rengum el mo metecholb?

20. Ngera kede mo mesaod er a ongingil suobel?

²⁰ Ngera uchul me ke mengiil? A rebetok a locha mo onger el kmo, “Ngdirkak bok ready.” A omelilt el mo tibir a rengum el mora Jehovah e metecholb a sel kot el klou a ultutelel el omelilt el bo mrellii. Me nguaisei el kousbech a taem, e kirem el kerekikl el melatk er ngii, e meringel el oureor el mo kltmokl el kirel. Engdi a lsekum e ngmera el soam el mo meruul er tiang, e ngera sebechem el meruul er chelechang el mengetmokl er kau el kirel? Ongingil suobel a mo onger er tia el ker.