1-2. (a) Ngmilekera Paulus er a llechesii a babilengel el mora Efesus, e ngera uchul me ngmilluches el mo er tir? (b) Ngera el ker a bo dosaod?

 A APOSTOL Paulus er a lekelebus er a blil er a Rom e ngkmal mle soal melisiich er a rekldemel er a klemerang. Engdi ngdimlak el sebechel loldingel er tir me ngmilluches a babier el mo er tir. A ta er aika el babier a lelilechesii el mora Rekristiano er a Efesus er a bekord el 60 me a lechub 61 C.E.—Efe. 1:1; 4:1.

² Bekord el teruich el rak er uchei e a Paulus a milengoit er a klou el taem el lomerk e olisechakl er a ungil chais er a Efesus. (Rel. 19:​1, 8-10; 20:​20, 21) Ngkmal mle betik a rengul er a rudam er ngii e mle soal el lolengeseu er tir el mo melemolem el mesiou er a Jehovah el loba blakerreng. Engdi ngera uchul me ngmilluches el mo er tirka el ngellitel el Kristiano el kirel a ilkolk me a llomes? E ngera sebechir a rokui el Kristiano el suub er aike el leliluches? Ka me dosaod a nger er aika el ker.

NGAR ER A ILKOLK EL MORA LLOMES

3. Ngera el tekoi a luluusbech a Paulus el ngar er a babilengel el mora Rekristiano er a Efesus?

³ A Paulus a milluches el mora Rekristiano er a Efesus el kmo: “Kom mlar a ilkolk, e ngdi kom [mla mo] . . . ngar a llomes.” (Efe. 5:8) Paulus ousbech er a tekoi el “ilkolk” me a “llomes” el omekesiu er a klungel omelodech el lurruul a Rekristiano er a Efesus. Ka me dosaod er a uchul me a Paulus a millekoi er tir el kmo “ko mlar a ilkolk.”

4. Ngoeak a ngera el rolel e a rechad er a Efesus a mlara ilkolk er a tekoi er a klechelid?

 ⁴ Ilkolk er a tekoi er a klechelid. Uchei er a lemei er a klemerang a Rekristiano er a Efesus e te uluumerang a klsuul osisechakl me a tekoi er olai. A mats er a Efesus a mla er ngii a templo er a Artemis el chelid er a Grik, el rebetok el chad er tiakid el taem ulemes er ngii el kmo ngta er a kot el klebokel el omekedecheraol el lulemekedechor er ngii a rechad. A rechad a mlo er tia el templo el mo mengull a bleob el chelid. A rechad er omeob el klalo a mirruul a bleob el lokesiul tia el templo me ngika el chelid e kmal mlo merau er ngii. (Rel. 19:​23-27) Me a lmuut kung a rebetok el chad er tia el mats uluuelai.—Rel. 19:19.

5. Ngoeak a ngera el rolel e a rechad er a Efesus a mlara ilkolk er a tekoi er a kldung?

⁵ Ilkolk er a tekoi er a kldung. A rechad er a Efesus a mle imis er a deleboes el delengerenger e dimlak lemerur er omerellir. Mekikiongel el cheldecheduch a sebechem el remenges er a play loltobed me aike el ungil klebesei er a klechelid. (Efe. 5:3) A rebetok er a rechad er a Efesus a “mla oriid a rrengir” el belkul a kmo, “te mla mo diak lomelechesiu a ringel.” (Efe. 4:​17-19) A rechad er a Efesus er uchei er a lesubii el kmo ngngera mera el ungil me a mekngit, e a ukltkir a mle ulekoad. Te dirrek el dimlak lomekerreu a uldesuel a Jehovah el kirel omerellir. Me a Paulus a mle sebechel melekoi el kirir el kmo a “bderrir a di milkolk. Ng diak a ruklir er sel klengar el ngar a Dios el mei.”

6. Ngera uchul me a Paulus a mle sebechel melekoi el kmo a rechad er a Efesus a mla mo “ngar a llomes”?

⁶ Engdi a rebebil er a rechad er a Efesus a dimlak lolemolem el ngar er a ilkolk. A Paulus a milluches el kmo, ‘kom mla mo chedal a Dios, me kom ngar a llomes.’ (Efe. 5:8) Te mlo kiei loltirakl er a Tekingel a Dios el ngii a ua llomes el lomekrael er tir. (Psa. 119:105) Tirka el chad er a Efesus a chiloit a klsuul osisechakl me a deleboes el delengerenger. Te mlo “oukerebai er a Dios” e mora tkurrebab el klisichir el mengull er a Jehovah e odeuir a rengul.—Efe. 5:​1, NW.

7. Ngoeak a ngera el rolel e kede uai a rebetok er a Rekristiano er a Efesus?

⁷ Ngdi osisiu, a uchei er a desuubii a klemerang e kede mlara ilkolk er a rolel a tekoi er a klechelid me a kldung. A rebebil er kid a mle  celebrate a holidays me a rekuk bebil er kid a mlara deleboes el delengerenger. Engdi sera desuub a llechul a Jehovah el kirel a ungil me a mekngit, e kede mirruul omelodech er a klengar er kid. Kede mlo kiei el loltirakl er a soal. Tiakid a uchul me kede ngmla ngmai a betok el klungiaol. (Isa. 48:17) Engdi chelecha kede dirk chelebangel omelsemai. Ngkired el melemolem el cheroid er a ilkolk el dechilitii e “remuul a klengar er [kid] el mo ua blekerdelir a re chad er a llomes.” Ngmekera doruul er tiang?

MONGEROID ER KAU ER A ILKOLK

8. A doltirakl er a Efesus 5:​3-5, e ngera mle kirir a Rekristiano er a Efesus el mengeroid er tir er ngii?

⁸ Monguiu er a Efesus 5:​3-5. A Rekristiano er a Efesus a mle kirir el melemolem loltngakl a omeruul el diak el lodeuir a rengul a Jehovah me bo lsebechir el cheroid er a ilkolk er a tekoi er a kldung. Ngdimlak di lekirir el mengeroid er tir er a deleboes el delengerenger ngdirrek el mle kirir el mengeroid er tir er a mekikiongel el cheldecheduch. A Paulus ulemeklatk er tir el kmo ngkirir el mengeroid er tir er chouaika el tekoi a lsekum ngsorir el nguu a “[blingelir] er a Rengedel a Kristus ma Dios.”

9. Ngera uchul me ngkired el mo kerekikl me ngdiak bo dechelsechusem a tekoi el mo uchul e kede mo meruul a deleboes?

⁹ Kid me ngdirrek el kired el mo kerekikl me ngdiak bo dechelsechusem er a “tekoi er a ilkolk.” (Efe. 5:11) Betok el experience ochotii el kmo a chad sel lomes, lorrenges, me a lechub e lolekoi a mekikiongel e diak el klikiid el cheldecheduch e ngmo beot er ngii a rullii a klengit. (Gen. 3:6; Jak. 1:​14, 15) Ngar er a ta el beluu e a klou el group er a rudam a mlo “friends” er a one el chat group. A uchelel e a rebetok er tir a milsaod a tekoi er a klereng. Engdi cherengel a taem e a cheldechederir a mlo diak el klikiid. Te mlo mesaod a tekoi er a sex. A bebil er tir a uriul e te uluuchais el kmo aika el diak el klikiid el cheldecheduch a uchul me te mlo meruul a deleboes.

10. Ngmekera Satan e melasem el mengeuid er kid? (Efesus 5:6)

¹⁰ A beluulechad er a Satan a melasem el mengeuid er kid el mo omdasu el kmo, aike el lolekoi a Jehovah el kmo ngdiak lungil e diak el klikiid a diak el mekngit. (2 Pe. 2:19) Ngdiak el mechas a rengud er tiang! A ta er a tekoi el bla loruul er ngii a Diabelong el kemanget el taem a omekerrau a rengrir a rechad me ngmo diak el sebechir el mtebengii a chebirukel er a llemalt. (Isa. 5:20; 2 Ko. 4:4) Sei a uchul me a betok el movie, show, me a website a melisiich a tekoi el lomtok a melemalt el llechul a Jehovah! A Satan a melasem el mengeuid er kid el mo omdasu el kmo aike el diak el klikiid el omeruul me a blekeradel el kmal klou er chelecha el taem a diak el mekngit e dirrek el fun e diak a telemellel.—Monguiu er a Efesus 5:6.

11. Ngmekera experience er a Angela e melisiich er a klungel a ultutelel a doltaut er a ulekrael el ngar er a Efesus 5:7 (BT)? (Dirrek el momes er a siasing.)

¹¹ Satan a soal a bo dobengterir a rechad el tir a rullii el mo meringel er kid oltirakl a llechul a Jehovah. Tia uchul me a Paulus a millisiich er a Rekristiano er a Efesus el kmo: “Lako bo mteloi ra delongelir” tirke el meruul a chelebirukel er osengel a Dios. (Efe. 5:​7, BT) Me nguaisei engdi ngkired el lmuut el mo kerekikl er a Rekristiano er a Efesus e le chelecha el taem e ngdiak di dobengterir a rechad loeak sel deteloi er tir ngdirrek loeak a social media. A Angela a el kiei er a Asia mlo mtebengii a telemellel a social media. Ngkmo: “Ngsebechel medeklid. Cherengel a taem e ngsebechel mekekokil ngodechii a uldesuem. Ngdi mle telkib e ngmlo diak el bother er ngak a mo ‘friends’ er tirke el diak longull omellach er a Biblia. Cherengel a taem e ak mlo omdasu el kmo ngdi OK  a klengar el diak lodeuir a rengul a Jehovah.” Ngkmal dmeu a rengud e le remechuodel a ngilsuir a Angela el mo remuul omelodech el luluusbech. Ngmelekoi el kmo: “Chelechang e ak omekeek er a uldesuek er a tekoi er a klereng el diak el social media.”

12. Ngera mo ngosukid el mo melemolem el loltirakl a llechul a Jehovah el kirel a ungil me a mekngit?

¹² Ngkmal kired el oldechelakl er a uldasu er tia el beluulechad el kmo ngdi ungil a dekiei el ngar er a deleboes. Kede medengei el kmo tia diak el melemalt. (Efe. 4:​19, 20) Ngungil di lekid el oker: ‘Ngak ak kerekikl el diak bo kteloi er a rechad el kuureor el lobengterir, re classmate er ngak, me a lechub e te rebebil el tir a diak longull a melemalt el llechul a Jehovah a lak a ungil luchul? Ngak a kuba blekeu el loltirakl a llechul a Jehovah alta rebebil a mo melekoi er ngak el kmo ngblutek a uldesuek?’ Ngdirrek el ua lolekoi er ngii a 2 Timothy 2:​20-22, nglocha mo kired el kerekikl el melilt er a resechelid er a chelsel a ongdibel. Ngdiak el soad el lobes el kmo a rebebil a locha diak bo lolengeseu er kid el moba blakerreng el ngar er a omesiunged el mora Jehovah.

MORAEL EL “UA BLEKERDELIR A RE CHAD ER A LLOMES”

13. Ngera belkul a ‘deruul a klengar er kid el mo ua blekerdelir a re chad er a llomes’? (Efesus 5:​7-9)

¹³ A Paulus a millisiich er a Rekristiano er a Efesus me ngdiak di bo loltngakl er a ilkolk ngdirrek el kirir el “remuul a klengar er [tir] el mo ua blekerdelir a re chad er a llomes.” (Monguiu er a Efesus 5:​7-9.) Ngera belkul tiang? Ngbelkul a kmo ngkired el mo olab a blekerdelir a remera el Kristiano er a bek el taem. A ta er a rolel e kede mo meruul er tiang oeak sel leblak a rengud el menguiu e mesuub er a Biblia me aike el babilenged el mengai er a Biblia. E kmal klou a ultutelel a dekerekikl el mesuub er a kerebai me a osisecheklel a Jesus Kristus el ngike el “llomes er a beluulchad.”—Jn. 8:12; Osi. 6:23.

14. Ngmekera chedaol reng e sebechel ngosukid?

¹⁴ Kede dirrek lousbech er a ngelsuil a chedaol reng er a Dios me bo lsebeched el mo olab a blekerdelir a “re chad er a llomes.” E ngerang? E le ngdiak el beot a dolemolem el klikiid er a chelsel tia el mengelengalek el beluulechad. (1 Th. 4:​3-5, 7, 8) A chedaol reng a  sebechel ngosukid el mo mesisiich er a uldasu er tia el beluulechad el ngii a uldimukl er ngii aike el osisechakl me a uldesuir a redi chad el diak loltirakl er a uldesuel a Dios. Chedaol reng a sebechel ngosukid el mo ourodech a “bek el bedengel a ungil el rodech er a kldung, ma llemalt.”—Efe. 5:9.

15. Ngoeak a ngera el rolel e ngsebeched el nguu chedaol reng? (Efesus 5:​19, 20)

¹⁵ A ta er a rolel e ngsebeched el nguu a chedaol reng a oeak sel doluluuch lolengit er ngii. A Jesus a dilu el kmo a Jehovah mo “[mesterir] a Chedaol Reng tirkel olengit er ngii.” (Lk. 11:13) E sel dedak el loldanges er a Jehovah er a miting er a ongdibel me kede dirrek el nguu chedaol reng. (Monguiu er a Efesus 5:​19, 20.) A ungil ulekrolel chedaol reng er a klengar er kid a mo ngosukid el mo kiei el ngar er a rolel e kede odeuir a rengul a Dios.

16. Ngera mo ngosukid el mo ungil melilt? (Efesus 5:​10, 17)

¹⁶ Sel lebo el kired el meruul a meklou a ultutelel el omelilt e ngkired el osiik el kmo “ng ngera soal a Rubak [a bo doruul]” er ngii e mo oltirakl er ngii. (Monguiu er a Efesus 5:​10, 17.) Sel bo dodengei omellach er a Biblia el melutk el kirel a blekeradel el dengar ngii e kede osiik er a uldesuel a Dios el kirel. E sel doltaut ngii el omellach e kede mo ungil melilt.

17. Ngera uldimukl er a bo dungil lousbech a temed? (Efesus 5:​15, 16) (Dirrek el momes er a siasing.)

¹⁷ A Paulus a milellach er a Rekristiano er a Efesus me bo lungil lousbech a temir. (Monguiu er a Efesus 5:​15, 16.) A cherroued el Satan el “Ngikel Mekngit” a kmal soal meruul er kid el mo mechesang el meruul a tekoi er tia el beluulechad me ngmo diak a temed el kirel omesiunged el mora Dios. (1 Jn. 5:19) Ngkmal sebechel di beot er a Kristiano el mo nguu a kerruul er tia el beluulechad, skuul, me a lechub e ngureor el mo ngaruchei er omesiungel el mora Jehovah. A lsekum tiang a duubech e ngochotii el kmo ngmla mo omdasu el ua rechad er tia el beluulechad. Nguaisei, aika el tekoi a diak el mekngit engdi ngdiak el kirel mo kot er a klengar er kid. A bo dorael el ua “blekerdelir  a re chad er a llomes” e ngkired el mo ‘ousbech a bek el techall’ el kirel aike el mera el meklou a ultutelel.

18. Ngera ngmirruul a Donald me bo lsebechel lungil lousbech a temel?

¹⁸ Bo lebiusech a medam el kirel aike el techall el sebechem el mui el mesiou er a Jehovah. Tiakid a lurruul er ngii a Donald el kiei er a South Africa. Ngkmo: “A kulemes er a klengar er ngak e milluluuch lolengit er a Jehovah me lengesukak el mo meruul a lmuut el betok el ngar omesiungek. Ak milluluuch el kirel a ureor el mo uchul e ngmo klou a temek el oldingel. Me ngoeak a ngelsuil a Jehovah e ak miltik er a ungil ureor. Me ngak me a bechik ulemuchel el mesiou el ngar er a mui el taem.”

19. Ngmekera sebeched el melemolem el merael el “ua blekerdelir a re chad er a llomes”?

¹⁹ A babilengel a Paulus el mora Rekristiano er a Efesus a ulterekokl el ngilsuterir el mo melemolem loba blakerreng el mora Jehovah. Aika el mlukreng el tekingel a dirrek el sebechel ngosukid. Ngua bla desang, ngsebechel ngosukid el mo ungil melilt a rolel ongelaod me a rechad el dolilt el mo obengterir. Ngsebechel lodbechid el mo blechoel el mesuub er a Biblia me a llomes er a klemerang lolemolem el lomekrael er kid er a bek el tekoi el doruul. Ngdirrek el melisiich er a klungel a ultutelel a chedaol reng el ngii a sebechel ngosukid el mo omekdubech a ungil blekeradel. Sel doltaut aika el lulluches a Paulus e ngngosukid el mo ungil melilt loltirakl er a uldesuel a Jehovah. Sel doruul aika el tekoi e ngmo sebeched el choridid er a ilkolk er tia el beluulechad e mo melemolem el ngar er a llomes!