1. Ngera mo oldechelakl er a rebebil blak a rengrir el mesiungel a Jehovah?

 NGKMAL mengelaod er kid sel dodengei el kmo a rechedal a Jehovah oba kengei er ngii! A Biblia kmo: “A RUBAK a dmeu a rengul er a re chedal.” (Psa. 149:4) Me nguaisei engdi a lebebil e te ngar ngii a remo mechitechut a rengrir e locha mo melatk, ‘Ngak, a kuba kengei er a Jehovah?’ Rebetok el blak a rengrir el mesiungel a Jehovah el ngar er a Biblia a mla er ngii aike el taem el blo loldechelakl a rengrir er chouaitia el osisiu el uldasu.—1 Sa. 1:​6-10; Job 29:​2, 4; Psa. 51:11.

2. Ngtecha oba kengei er a Jehovah?

² A Biblia ochotii el kmo a rediak el mecherrungel el chad a sebechir el nguu a kengei er a Jehovah. Ngmekera denguu a kengei er ngii? Ngkired el moumerang er a Jesus Kristus e metecholb. (Jn. 3:16) Seikid e kede ochotii el mora rechad el kmo kede mla obult er a kngtid e mla tibir a rengud el mo meruul er a soal a Dios. (Rel. 2:38; 3:19) A Jehovah kmal mo dmeu a rengul sel doruul aika el tekoi me lebo er ngii a deleuill er kid me ngii. A lsekum kede mora tkurrebab el klisiched loltirakl er tia el telbilel a rengud, e kede nguu a kengei er ngii me ngii a mo omes er kid el kmeed el sechelil.—Psa. 25:14.

3. Ngera kede mo mesaod?

³ Engdi ngera uchul me a rebebil a mo feel el kmo te diak loba kengei er a Dios? Ngmekera Jehovah e ochotii er kid el kmo kede oba kengei er ngii? E mekera Kristiano sebechel mo ulterekokl a rengul el kmo ngoba kengei er a Dios?

 A UCHUL ME A REBEBIL A FEEL EL KMO TE DIAK LOBA KENGEI ER A JEHOVAH

4-5. Alta kede mo feel el kmo ngdiak a ultuteled, engdi ngngera sebechel mo ulterekokl a rengud er ngii?

⁴ A rebetok er kid a diak lungil a uldesued el kired er a dekekerei el me klou. (Psa. 88:15) Odam el Adrián a kmo: “Ngak tia er a kumdasu el kmo ngdiak a ultutelek. Ak dirk remember er ngak er a kdirk kekerei el buik e kululuuch el kmo a telungalek er ngak lebo lsiseb er a Baradis alta kulemdasu el kmo ngdi ngak a kmal diak el sebechek el mo kiei er sei.” Tony el dimlak el mukeroul el Sioning a kmo: “A rechad er a blik a dimlak a ta el ledu er ngak el kmo ngbetik a rengrir er ngak e lechat er ngak. Tia rirellak el mo feel el kmo ngdiak a ngerang el sebechek el rullii el rulleterir el mo dmeu a rengrir.”

⁵ A lsekum e kede mo feel el kmo ngkmal diak a ultuteled e ngsebeched el melatk el kmo, a Jehovah a milkrolid el mo er ngii. (Jn. 6:44) Ngomes a klungioled el diak el sebeched el di kid el mes, e medengelii a rengud. (1 Sa. 16:7; 2 Kr. 6:30) Me ngkmal sebeched el loumerang er ngii sel ledu el kmo kede kmal mekreos.—1 Jn. 3:​19, 20.

6. Ngmle uangerang a uldesuel a apostol Paulus el kirel a kngtil er a ngar er a mong?

⁶ A rebebil er kid a mirruul a tekoi er a uchei er a demei er a klemerang el locha dirk uchul me a ukltked oldechelakl er kid. (1 Pe. 4:3) Mo lmuut er a reblak a rengrir el Kristiano me te dirk oldechelakl a chelitecheterir. A rengum, ngdirk oldechelakl er kau? A leuaisei e lemechelaod a rengum el kmo a reblak a rengrir el mesiungel a Jehovah me te dirrek el mla melechesuar osisiu el tekoi. El ua tiang, a apostol Paulus a kmal mlo mekngit a rengul sel lolatk a chelitechetul. (Rom 7:24) Nguaisei el Paulus ulebult a kngtil e miltecholb. Engdi ngdirk ulemes er ngii el kmo “[ngkot] el ngar uriul ra chelsir ar apostel” e “ngikel kot el tkul a mekngit.”—1 Ko. 15:​9, BT; 1 Ti. 1:15.

7. Ngera kired el diak dobes er ngii el kirel a kngtid er a ngar er a mong?

⁷ A Demad el ngar er a eanged a tibir el kmo ngmo ousubes er kid a dobult er a kngtid. (Psa. 86:5) Me a lsekum e kede mera el ouuchel a rengud er a kngtid e ngkmal sebeched loumerang a tekingel a Jehovah el kmo ngmla ousubes er kid.—Kol. 2:13.

8-9. Ngmekera sebeched el mo mesisiich er sel uldesued el kmo ngkmal ngesonges a doruul me ngdiak el sebeched lodeuir a rengul a Jehovah?

⁸ Kede rokui el soad el meruul aike el rokui el sebeched el mesiou er a Jehovah. Me nguaisei engdi a rebebil a locha mo feel el kmo te diak el rredemelel a nguu a kengei er ngii. Odos el Amanda a kmo: “Ak blechoel el mo omdasu el kmo sel kumsa Jehovah sel kot lungil er ngak e ngbelkul a kmo ngkirek el meruul a lmuut el betok. Me ak blechoel el melasem el meruul lengelakl er sel sebechek. Me sel lak ketmokl e ak mo omdasu el kmo a Jehovah diak lungil a renguk er ngak el di uai ngak.”

⁹ Ngmekera sebeched el mo mesisiich er sel uldesued el kmo ngkmal ngesonges a doruul me ngdiak el sebeched lodeuir a rengul a Jehovah? Lak mobes el kmo a Jehovah tabesul el Dios. Ngkmal diak bo longerechir er kid el mo meruul lengelakl er sel sebeched. Ng appreciate aike el doruul el kirel, el sel derellii sel kot lungil el sebeched. Mdirrek el melatk a kerebai er a Biblia el kirir tirke el milsiou er a Jehovah loba rengrir el rokir. Molatk er a Paulus. Ngika kmal mle blak a rengul loureor el betok el rak el merael a betok el telael el mael e omuchel a betok el ongdibel. Engdi sera lemengodech a blekeradel er a klengar er ngii me bo lak el sebechel lomerk er a klumech el ua ngar er a mong, e ngika ngurridii a kengei er a Dios? Ngdiak. Ngmillemolem el meruul aike el sebechel me a Jehovah ulemekngeltengat er ngii. (Rel. 28:​30, 31) Ngdi osisiu, aike el sebeched el msang a Jehovah locha mo mengodech. Engdi sel kot el klou  a ultutelel er ngii a moktek er kid el meruul. Ka me dosaod a bebil er a rolel e a Jehovah ochotii el kmo kede oba kengei er ngii.

NGMEKERA JEHOVAH E OCHOTII EL KMO KEDE OBA KENGEI ER NGII?

10. Ngmekera sebeched el “rongesii” a Jehovah louchais er kid el kmo kede oba kengei er ngii? (Johanes 16:27)

¹⁰ Ngoeak a Biblia. A Jehovah kmal soal losiik a rolel e ngolecholt el mora rechedal el kmo ngbetik a rengul er tir me tir oba kengei er ngii. A Bades ouchais a eru el taem el ledilu er a Jesus el kmo ngbetik er a rengul el Ngelekel el odeuir a rengul. (Mt. 3:17; 17:5) Kau, ngsoam el rongesii a Jehovah el olterekokl er a rengum el kmo koba kengei er ngii? A Jehovah diak el ngar er a eanged e longedecheduch er kid engdi ngmengedecheduch er kid loeak a Tekingel. Sel donguiu a tekingel a Jesus el ngar er a Ebangkelio e ngsebeched el “rongesii” a Jehovah el melekoi er kid el kmo kede oba kengei er ngii. (Monguiu er a Johanes 16:27.) A Jesus a mle cherrungel lolecholt a blekerdelel a Demal. Me sel donguiu el kirel a Jesus el kongei er a rediak el mecherrungel el chad el blak a rengrir el loltirakl er ngii, e ngsebeched el imagine er a Jehovah el melekoi aika el tekoi el mei er kid.—Jn. 15:​9, 15.

11. Ngera uchul me sel bo dechebangel a ringel e ngdiak lolechotel a kmo kede mla oridii a kengei er a Jehovah? (Jakobus 1:12)

¹¹ Ngoeak a omerellel. A Jehovah kmal soal lolengeseu er kid el ua sel lomeskid aike el dousbech er a bedenged. A lebebil e ngmo mechikid me kede mo chuarm a ringel el ua melemalt el chad el Job. (Job 1:​8-11) A ringel a diak lolechotel a kmo kede mla oridii a kengei er a Dios. E ngbai meskid a techelled el mo ochotii a delechel a bltkil a rengud el mora Dios me a klaumerang er kid er ngii. (Monguiu er a Jakobus 1:12.) Chelsel a ringeled e kede mo melechesiu er a bltkil a rengul me ngii lolengeseu er kid el loutekangel.

12. Ngera sebeched el suub er a experience er a Dmitrii?

¹² Molatk er a Dmitrii el odam er a Asia. Ngurridii a urerel e dimlak el sebechel metik a ureor el betok el buil. Ngulechotii a klaumerang er ngii er a Jehovah loeak a longlou er a temel lomerk er a klumech. Ngmlo chuib a betok el buil e di dimlak el sebechel metik a ureor. E ngmocha imis el smecher el diak el sebechel mekiis er a dukllel. Ngmlo omdasu el kmo ngmla mo diak lungil bechiil el sechal e chedam e mlo oumededenger el kmo ngdirk oba kengei er a Jehovah. Engdi a ta er a klebesei e a ngelekel el redil a mle print er a babier el llechukl er ngii a bades er  a Isaia 30:15: “Di mchelellakl el oumeral ulsirs er ngak. Isei e kom mo mesisiich e selebechakl.” Ngngiluu loia er bita er a dukllel e kmo, “Daddy sel lebo el mekngit a rengum e molatk er tia el bades.” A Dmitrii a mlo mtebengii el kmo ngoeak a Jehovah e a telungalek er ngii a dirk ngar ngii a kelir, bilir, me a delengcheklir. Ngkmo: “A mle kirek el meruul er ngii a melemolem el chelellakl a renguk e oumerang el ulsirs er a Dios er ngak.” A lsekum ke chelebangel er osisiu el ringel, e ngkmal sebechem loumerang el kmo a Jehovah omekerreu er kau e mo ngosukau el loutekangel.

13. Ngtecha bo lousbech er ngii a Jehovah el lolecholt er kid el kmo kede oba kengei er ngii, e meruul er tiang loeak a ngera el rolel?

¹³ Ngoeak a rekldemed er a klemerang. A Jehovah ousbech er a rudam me a rudos er kid lolecholt er kid el kmo kede oba kengei er ngii. El uai tiang, nglocha mo ousbech er a rebebil el melisiich er kid er sel taem el kmal dousbech er ngii. A ta el odos er a Asia a kmal mlo stressed. Ngurridii a urerel e kmal mlo smecher. E a bechil a rullii oberaod el klengit e mo diak losiou el ta er a remechuodel. Ngkmo: “Ngkmal dimlak el sebechek el understand el kmo ngngera me tia duubecha el mei er ngak. Ak mlo omdasu el kmo ak locha rirellii a klengit me a kmla oridii a kengei er a Jehovah.” Ngika el odos er kid a ullengit er a Jehovah me lolterekokl er a rengul el kmo ngdirk oba kengei er ngii. Ngmilekerang a Jehovah? Ngmelekoi el kmo: “A remechuodel er a ongdibel a milengedecheduch er ngak e ulterekokl er a renguk er a bltkil a rengul a Jehovah el mei er ngak.” A uriul e ngliluut lolengit a ngeso er a Jehovah. Ngkmo: “Tia el osisiu el sils e ak ngiluu a letter er a rudam me a rudos er a ongdibel. Sera kunguiu aika el tekingir el milengelaod er ngak e ak mlo feel el kmo a Jehovah rirengesak.” Chochoi, a Jehovah blechoel el lolecholt el kmo kede oba kengei er ngii loeak a ungil tekingir a rebebil.—Psa. 10:17.

14. Ngera ta er a rolel e a Jehovah ochotii el kmo kede oba kengei er ngii?

 ¹⁴ A Jehovah dirrek lochotii el kmo kede oba kengei er ngii loeak a lousbech er a rudam me a rudos er kid el mellach er kid er sel taem el bo dousbech er ngii. El ua tiang, Jehovah uluusbech er a Paulus er a taem er a rekot el Kristiano el mo meluches a 14 el mlukreng el babier el mora rekldemel er a klemerang. Aika el babilengel a dirrek el mle uldimukl er ngii a bleketakl el omesmechokl el lulemesterir el loeak a bltikerreng. Ngera uchul me a Jehovah ulemekrael er a Paulus el mo meluches aika el omesmechokl? A Jehovah a ungil Chedam me ngmesmechokl er a rengelekel el tir a “deuil a rengul.” (Osi. 3:​11, 12, NW) Me a lsekum kede ngmai omesmechokl el mengai a uchetemel er a Biblia e lak domdasu el kmo kede mla oridii a kengei er a Jehovah. Ngbai ochotii el kmo ngdirk betik a rengul er kid. (Heb. 12:6) Ngera lmuut el bebil er a olechotel a kmo kede oba kengei er a Jehovah?

LMUUT EL BEBIL ER A OLECHOTEL A KMO KEDE OBA KENGEI ER A JEHOVAH

15. A Jehovah ngomesterir a chedaol reng er ngii el mora rua techang, e ngera uchul me tiang olterekokl er a rengud?

¹⁵ Jehovah omesterir chedaol reng er tirke el oba kengei er ngii. (Mt. 12:18) Ngsebeched el di kid el oker, ‘Ngak a kulecholt a bebil er aike el rodech er a chedaol reng er a chelsel a klengar er ngak?’ Kau nglmuut el klou a rengum el mora rechad er chelechang er a uchei er a bo modengelii a Jehovah? Sel bo molecholt a rodech er a chedaol reng er a Dios er a chelsel a klengar er kau e ngmo ulterekokl a rengum el kmo ke oba kengei er a Jehovah!—Momes er a baks el “ A Rodech ra Reng a . . . ”

16. Jehovah ngousbech er techang lomerk er a ungil chais, e uangerang a uldesuem el kirel tiang? (1 Thesalonika 2:4)

¹⁶ A Jehovah kmal ungil a rengul lolterekokl er a ungil chais er tirke el oba kengei er ngii. (Monguiu er a 1 Thesalonika 2:4.) Mutebengii a rolel e a odos el Jocelyn a ngilai a klungiolel er a le share er a ungil chais el mora rebebil. A ta er a klebesei e a Jocelyn a milekiis e kora feel kmal depressed. Ngkmo: “Ak mle feel el diak a klisichel a bedengek e diak usbechellek. Engdi ak mle pioneer e tia sils er ngak el oldingel. Me ak milluluuch e mlo oldingel.” Tiakid el tutau e a Jocelyn a mle meet er a Mary el kmal ungil a blekerdelel el redil el kilengei omesubel a Biblia. Sesei el buil er uriul e a Mary uluuchais er a Jocelyn el kmo ngmiluluuch lolengit er a ngelsuil a Dios er sel sils er a lolengod er a chesmerel. A Jocelyn a melatk er tia el  experience e kmo: “Ak mlo feel el kmo a Jehovah ua lolekoi er ngak el kmo, ‘Ke oba kengei er ngak.’” Nguaisei ngdiak el rokui el chad a mo kongei er a klumech el domerk er ngii. Engdi ngsebechel mo ulterekokl a rengud el kmo a Jehovah dmeu a rengul sel debo er a tkurrebab el sebeched el ouchais er a ungil chais el mora rebebil.

17. Ngera ke suub er a Vicky el kirel olubet? (Psalm 5:12)

¹⁷ Jehovah ousbech er a kerresel a olubet el kirir tirke el loba kengei er ngii. (1 Ti. 2:​5, 6) Engdi ngmekera a lsekum kede dirk feel el kmo ngdiak doba kengei er a Jehovah alta kede oumerang er a olubet e mla metecholb? Lak dobes el kmo ngdiak el sebeched el blechoel el ultuil er a rengud engdi ngsebeched loumerang el ultuil er a Jehovah. Ngomes er tirke el oumerang er a olubet el melemalt er osengel e tibir el mo omekngeltengat er tir. (Monguiu er a Psalm 5:12; Rom 3:26) Omelebedebekel a Vicky er olubet a kmal ngilsuir. A ta er a klebesei e ngkmal mle dmolech el melatk el kirel olubet e mlo mtebengii el kmo: “A Jehovah ngikakid er a lolecholt er a kllourreng el mei er ngak. . . . Engdi ngak a ua kulekoi er ngii el kmo: ‘A klungel a bltkil a rengum a diak el sebechel me rutechak. A tengetengel a Ngelekel a diak el sebechel dokedek a kngtik.’” Omelebedebekel er a sengk er olubet a uchul me ngmlo sebechel feel el kmo a Jehovah betik a rengul er ngii. Kid me sel dolebedebek el kirel olubet e kede dirrek el mo feel er a bltkil a rengul a Jehovah me a kengei er ngii.

18. A lsekum kede melemolem el betik a rengud er a Demad el ngar er a eanged, e ngera sebechel mo ulterekokl a rengud er ngii?

¹⁸ Alta kede mora tkurrebab el klisiched loltaut aike el bla desuub er tia el suobel engdi ngdirk mo er ngii aike el taem el bo lemechitechut a rengud e oumededenger el kmo kede oba kengei er a Jehovah. A lsekum e tiang a duubech e lak mobes el kmo a Jehovah kongei er “tirke el melemolem el betik a rengrir er Ngii.” (Jak. 1:​12, NW) Me molemolem el lolekeed er kau er a Jehovah e momtab aike el rolel e ngolecholt er kau el kmo ke oba kengei er ngii. E kmal diak mobes el kmo a Jehovah a “diak le cheroid er a derta er kid.”—Rel. 17:27.