1-2. Ngera el omelsemai a lechebangel a rebetok el Sioning?

A APOSTOL Paulus a millisiich er a Timothy me a dirrek el rokui el Kristiano el mo churrengelii a omesiungir. (2 Ti. 4:5, BT) Kede rokui el melasem el oltirakl er tia el ulekrael er a Paulus. Me nguaisei, engdi kede mo chelebangel a ringel. A rebetok er a rudam me a rudos a ousbech er a blekeu el mo omerk er a klumech. (2 Ti. 4:2) Ka molatk er a rudam me a rudos el kiei a beluu el diak el sebechir el mimokl el omerk er a klumech. Te melemolem el omerk alta ngsebechir el mekelebus el kirel!

² A rechedal a Jehovah a dirrek el mo chobangel a blekeradel el sebechel mengitechut er tir. El ua tiang, a rebetok a kirir el meringel el oureor el mesiou er a telungalek er tir. Ngkmal sorir menglou er a temir el omerk er a klumech engdi ngkmal mo mesaul a bedengir. A rebebil a diak el betok a sebechir el meruul e le ngngar ngii a secherir me a lechub e te kmal chudelang, e locha diak el sebechir el tuobed er a blirir. E a rekuk bebil a meringel el oldechelakl a uldesuir le te omdasu el kmo ngdiak a belkrir. A odos el Mary * el kiei er a Middle East a kmo: “Ngkmal kirek el meringel loureor el oldechelakl er a uldesuek sel bo el mechitechut a renguk e tia uchul me ngdi mo diak a klisichel a bedengek. E seikid e a ukltkek a kuk mo oldechelakl er ngak e le ngmo diak el sebechek el meruul er a omesiungek.”

3. Ngera kede mo mesaod er tia el suobel?

³ Kede rokui el di chelebangel a kakerous el blekeradel engdi Jehovah a sebechel ngosukid el mo outekangel e melemolem el mesiou er ngii el mo er sel tkurrebab el sebeched. Me a uchei er a bo dosaod a rolel e a Jehovah a olengeseu er kid, e me kot e bo dosaod er a rolel e ngmillisiich er a Paulus me a Timothy el churrengelii a omesiungir alta te mlo chobangel a ringel.

4. A Paulus ngmlo chobangel a ngera el omelsemai?

⁴ A Paulus a mlo chobangel a betok el omelsemai. Ngika kmal uluusbech a omelisiich er aike el taem el le mlechelebed, lobetech er a bad, e lemekelebus. (2 Ko. 11:23-25) E di mle bleketakl louchais el kmo nguleldechelakl a mekngit el uldasu. (Rom 7:18, 19, 24) Ngdirrek el uluutekangel er a “toched,” el ngii a kmal mle soal a Dios a lenguu el choridii er ngii.​—2 Ko. 12:7, 8.

5. Ngngera mle sebechel a Paulus el remuul alta ngmlo chobangel omelsemai?

⁵ Me alta Paulus a mle chelebangel a meringel el blekeradel engdi a Jehovah a silsichii el mo omerk er a klumech. Ka molatk aike el leriruul a Paulus. Sera lekelebus er a blil er a Rom e ngmle blak a rengul mesebechakl er a ungil chais el mora remengeteklel a klechelid er a Chijudea me a locha rengar bab el chad er a kabelment. (Rel. 28:17; Fil. 4:21, 22) Ngdirrek el ulemerk el mora resoldau er a Rom me tirke el rokui el mlo oldingel er ngii. (Rel. 28:30, 31; Fil. 1:13) Ngar er aika el osisiu el taem e ngdirrek el milluches a mlukreng el babier el ngii a ullengeseu er a Rekristiano er a irechar el me lmuut er chelechang. Me a lmuut kung, a kerebil a Paulus a kmal millisiich er a ongdibel er a Rom el uchul me a rudam er ngii a mlo ‘bekeu el ouchais a tekingel a Dios el diak le medakt.’ (Fil. 1:14) E alta lebebil e a Paulus a dimlak el sebechel remuul a betok engdi ngriruul aike el sebechel e tia mlo uchul e ng “merekii a Ebangkelio.”​—Fil. 1:12.

6. A doltirakl er a 2 Korinth 12:9, 10, e ngera uchul me a Paulus a mle sebechel churrengelii a omesiungel?

⁶ A Paulus a mle medengei el kmo a rokui el tekoi el leriruul el ngar er a omesiungel a di uleak a klisichel a Jehovah. Ngdilu el kmo, a klisichel a Dios a “mengal mo chemolt er a chelitechetul a chad.” (Monguiu er a 2 Korinth 12:9, 10.) Ngoeak a klisichel a chedaol reng er a Jehovah e a Paulus a mlo sebechel el churrengelii a omesiungel alta ngmlo chobangel odechelakl, e mekelebus, me a dirrek el lmuut el bebil er a omelsemai.

7. Ngera el omelsemai a mle kirel a Timothy el mo mesisiich er ngii me bo el sebechel churrengelii a omesiungel?

⁷ A Timothy a dirrek el mle kirel lultuil er a klisichel a Dios me bo el sebechel el kutmeklii a omesiungel. Ngika ulebengkel a Paulus er a le missionari lomais a beluu. Me a lmuut kung, a Paulus a ulemekngerachel er ngii el mo oldingel e melisiich a bebil ongdibel. (1 Ko. 4:17)  A Timothy a locha mlo omdasu el kmo ngdiak el sebechel kutmeklii tia el lureor. Tiakid a locha uchul me a Paulus a dilu er ngii el kmo: “Lak le klengeasek er kau a uchul me bora kemril a mederir ar chad.” (1 Ti. 4:12, BT) Ngdirrek el ngar tiakid losisiu el taem e a Timothy a uleldechelakl er a toched, el ‘rektel el blechoel el mor ngii.’ (1 Ti. 5:23) Me nguaisei engdi Timothy a mle medengei el kmo a Jehovah a mo smisichii loba chedaol reng er ngii, me lolemolem lomerk er a klumech e mesiou er a rudam er ngii.​—2 Ti. 1:7.

8. Ngmekera Jehovah e melisiich er a rechedal er chelecha el taem?

⁸ A Jehovah a mesterir a rechedal a “klou el klisiich” me bo el sebechir el melemolem el mesiou er ngii el oba blakerreng. (2 Ko. 4:7) Ka me bo dosaod a eua el tekoi el bla lebeskid a Jehovah el melisiich er kid e olengeseu er kid el melemolem el mesiou er ngii el oba blakerreng. Aikang a: nglunguuch, Biblia, rudam me a rudos, me a berkel a klumech.

9. Ngmekera nglunguuch e ngosukid?

⁹ Mo mesisiich loeak a nglunguuch. A Paulus a mengelechel er kid el ngar er a Efesus 6:18 el mo meluluuch er a “rokui el techall.” E a Dios a mo onger er a nglunguched e ngosukid. A Jonnie el kiei er a Bolivia a milsa klisichel a nglunguuch er a bo lechebangel a ringel. A bechil me a rechad er a blil a di mle dul mo smecher er osisiu el taem. Ngika kmal mle meringel er ngii a omekerreu er tir el tedei. A delal a mlad e a bechil me a demal a kmal mle meoud el mo ungil. Ngmelatk aikakid el taem e melekoi el kmo: “Sera lesal kmal mo oberaod, e ak milluluuch el mora Jehovah louchais er ngii aike el mla er a renguk.” Me a Jehovah milsa Jonnie a klisiich el luluusbech er ngii el outekangel. A Ronald el ta er a mechuodel er a Bolivia a rirenges el kmo a delal a smecher el kasinoma. Ta el buil er uriul e ngmlad. Ngera ngilsuir el outekangel er tia el meringel el blekeradel? Ngdmu el kmo: “A nglunguuch a meskak a techellek el ouchais er a Jehovah aike el ngar er a renguk me a uldesuek. Ak medengei el kmo nglmuut el ungil medengelkak e ungil medengelii a blekeradel el kchebangel er ngii.” A lebebil e ngkmal mo oberaod a tekoi el dechelebangel er ngii e locha mo diak dodengei el kmo ngera kede meluluuch el kirel. Me nguaisei, engdi a Jehovah mengemedaol er kid el meluluuch el mo er ngii, mo lmuut me a lemeringel er kid a mesaod aike el ngar er a rengud me a uldesued.​—Rom 8:26, 27.

10. El ua losaod a Hebru 4:12, ngera uchul me ngkmal klou a ultutelel el donguiu e dolebedebek a Tekingel a Dios?

¹⁰ Mo mesisiich loeak a Biblia. A Paulus a mle ultuil er a Tekingel a Dios el kirel a klisiich me a ongelaod, e kid me ngkired el dirrek el meruul el uaisei. (Rom 15:4) Sel donguiu e dolebedebek a Tekingel a Dios, e a Jehovah a sebechel lousbech er a chedaol reng er ngii el ngosukid el mo ungil medengei a bades me a rolel e ngsebechel el ngosukid. (Monguiu er a Hebru 4:12.) A Ronald el dulsaod er ngii er a uchei a kmo: “Ngkmal dmeu a renguk e le krirellii el mo siukang er ngak el bek el kesus e ak menguiu er a Biblia. Ak blechoel el melebedebek a blekerdelel a Jehovah me a omerellel el bedul a remesiungel. Tia kmal melisiich er ngak.”

11. Ngmilekera Tekingel a Dios e ngosuir a ta el odos?

¹¹ Sel dolebedebek a Tekingel a Dios e ngngosukid el mo oba melemalt el uldasu el kirel a tekoi el dechebangel. Molatk er a rolel e a Biblia a ngilsuir a ta el melakl el dil. A ta er  a remechuodel a dilu er ngii el kmo nglocha sebechel ngmai a klubelel er a babier er a Job. Sera kot el longuiu er ngii e ngmlo kora oukerekeriil er a Job le ngdimlak el melemalt a uldesuel. Ngulemdasu el kmo: “Job, kau a kmal negative a uldesuem!” Engdi ngmlo mtebengii el kmo, ngii me ngdi ua Job. Tia ngilsuir el mo melodech er a uldesuel e outekangel er a kodellel a bechil.

12. Ngmekera Jehovah e olengeseu er kid loeak a rudam me a rudos?

¹² Mo mesisiich loeak a rudam me a rudos. A dirrek el ta er a rolel e a Jehovah melisiich er kid a oeak a rekldemed er a klaumerang. A Paulus a milluches el kmo ngkmal uluureng el mo mesterir a rudam me a rudos er ngii me bo el sebechir el “kasisiich.” (Rom 1:11, 12, BT) A Mary el dulsaod er ngii er a uchei a kmal mengreos aike el taem el lobengterir a rudam me a rudos er ngii. Ngdmu el kmo: “A Jehovah uluusbech er a rudam me a rudos el tir a dimlak lodengei a tekoi el kchebangel el melisiich er ngak. Te kmal diak lodengei el kmo a tekingir me a card er tir el mei er ngak a tekoi el kmal kuluusbech er ngii. Ngdirrek el ngosukak sel kungedecheduch er a rudos el tir a mla chobangel a osisiu el blekeradel, e le ak ngmai a klubelek er tir. Me a remechuodel a dirrek el rullak el mo melechesuar el kmo ngngar ngii a basio er ngak er a ongdibel.”

13. Kede mekera e kasisiich sel dengar er a miting er a ongdibel?

¹³ Ta er a kot el ungil basio el sebeched el kasisiich er ngii a miting er a ongdibel. Sel obo er a miting e molasem el melisiich er a rebebil loeak sel mouchais er tir el kmo ngbetik a rengum er tir e moureng a sulir el kirel aike el loruul. El ua tiang, uchei er a ta el miting e a Peter el ta er a remechuodel a dilu er a ta el chedil el bechil a diak le Sioning el kmo: “Ngmeral melisiich er ngak sel kisekau. A retelolem el ngelekem a blechoel el kltmokl e ngar ngii a nger tir er a miting.” Ngmlo delelualu a iuechel a medal e melekoi el kmo: “Ngmeral diak modengei el kmo a kmal lousbech el remenges a ilecha el tekingem.”

14. Ngmekera berkel a klumech e ngosukid?

¹⁴ Mo mesisiich loeak a berkel a klumech. A rechad a lsorir lorrenges er kid me a lak engdi ngdmeu a rengud sel douchais a klemerang er a Biblia el mora rebebil. (Osi. 11:25) A odos el Stacy a milsa el kmo a berkel a klumech a kmal melisiich er kid. Sel taem el chedal a telungalek er ngii a milsuld a ngklel, e ngkmal mlo mekngit a rengul e di millatk el kmo, ‘Nglocha mla er ngii a mle lmuut el sebechek el rullii el mo ngosuir.’ Tia el tekoi a kmal di milengesang er a uldesuel a Stacy. Ngera ngilsuir loutekangel er tia el meringel el blekeradel? Berkel a klumech! Sel lomerk er a klumech e ngmo melatk er a rechad er a territory el ousbech a ngeso. Ngdmu el kmo: “Ngar er a chelsel tiakid el taem e a Jehovah milskak a study er ngak el ngii a mle mereched el mo olengeriakl. Tia kmal millisiich er ngak. Sel tekoi el kmal mla ngosukak a berkel a klumech.”

15. Ngera ke suub er a tekingel a Mary?

¹⁵ Ngblekerdelel a klengar er a rebebil a uchul me ngdiak el sebechir el meruul a betok el ngar er a omesiungir. A lsekum e ngnguaisei a uldesuem e lak mobes el kmo, a Jehovah a dmeu a rengul sel mrellii sel sebechem. Ka mluut el melatk er a kerebil a Mary. Sera lolukl el mora basio el ngodech a omelekoi er ngii e ngmlo omdasu el kmo, ngdiak a ngera el sebechel el rullii. Ngdmu el kmo: “Ngmle kemanget el taem el di sebechek el melekoi a beot el tekoi me a lechub ak di menguiu a bades, e omesterir a rechad a tract sel kuldingel.” Tia uchul me ngmlo mekngit a uldesuel el kirel le ngulemekesiu er ngii el mo er tirke  el ungil melekoi er tia el omelekoi. Me nguaisei, engdi ngngildechii a uldesuel. Ngmlo mtebengii el kmo a Jehovah a sebechel lousbech er ngii alta ngdirkak el bo el sebechel melekoi er tia el omelekoi. Ngmelekoi el kmo: “A klemerang er a Biblia a beot a omesodel, e aikakid a melodech e olsobel er a klengar er a rechad.”

16. Ngera sebechel ngosuterir tirke el diak el sebechir el tuobed er a blirir engdi ngsorir el omerk er a klumech?

¹⁶ A Jehovah a medengei el kmo a rebebil er kid a kmal sorir el omerk er a klumech engdi ngdiak el sebechir el tuobed er a blirir. Me ngsebechel mesterir a techall el mo merkii a klumech el mo er tirke el mo olengeseu er tir er a blirir me a lechub e te toktang me a nurse. Sel sekum kede mo omekesiu aike el doruul er chelechang el mora aike el durruul er a ngar er a mong e ngchoitechetur a rengud. Me nguaisei engdi a lsekum e kede mo omtab a rolel e a Jehovah olengeseu er kid er chelechang, e ngsmisichid el mo melemolem loutekangel a ngii di el blekeradel loba deurreng.

17. A doltirakl er a Olisechakl 11:6, e ngera uchul me ngkired el melemolem el omerk er a klumech alta ngdiak demereched el mes a rsel a urered?

¹⁷ Ngkmal diak dodengei el kmo a tane er a klemerang el dolalem ngmo ungil a dbechel me a lechub e ngdiak. (Monguiu er a Olisechakl 11:6.) El ua tiang, a Barbara el odos el okai me a derengel a rekil a blechoel lou telephone witnessing e meluches a letter. Ngar er a ta er aike el letter lulluches e nguldekiar er ngii a March 1, 2014 el Ongkerongel. Tia dai er ngii a kmo, “Aike el Bla Leruul a Dios el Kirem.” Ngika dimlak lodengei el kmo nguldureklii tia el babier el mora obekel el mla mo diak le Sioning er a Jehovah. Tirka mlo betok el taem el longuiu er tia el Ongkerongel. Ngike el bechiil el sechal a mlo omelechesiu er a Jehovah el ua longedecheduch er ngii. Me te ulemuchel el ngar er a miting. A uriul er a betok er a 27 el rak el lecheroid er a klemerang, e te liluut el mo teloi er a ongdibel. Nglocha kmal millisiich er a Barbara er a lerenges aika el tekoi!

18. Ngera sebeched el meruul me dengai a klungioled er a chedaol reng er a Dios?

¹⁸ A Jehovah a meskid a betok el rolel e ngsebeched el nguu a chedaol reng er ngii. Sel dousbech aike el tekoi el bla lebeskid el ua nglunguuch, Biblia, rudam me a rudos, me a berkel a klumech e kede ochotii er ngii el kmo, kede oumerang el kmo ngsoal lolengeseu er kid e kmal mo ngosukid. Mada bo deblechoel el ultuil er a Demad el ngar er a eanged el ngii a kmal dmeu a rengul el “omesterir a klisichir tirkel blak a rengrir er ngii.”​—2 Kr. 16:9.