Tia el blekeradel a ngildechii a klengar er ngak e le tiakid a uchul me ak mlo osiik er a Dios. Engdi a uchei er a kuuchais el kmo ngngera dilubech er tiakid el kesus, e hall e kuuchais el kirel a klengar er ngak er a kngalek el rirellak el mo soak losiik er a Dios.

Ak milechell er a Guesnain er a 1937, el beluu er omengiis el kol el ngar er a diluches er a France. Ak silubii er a demak el ngii a mle chad er omengiis el kol el mo chad er a ureor. Ak dirrek el silubii er a demak el mo ouketui a diak el melemalt el omeruul. Ngika milsa el kmo a rebetok el chad er omengiis a dimlak el melemalt a omeruul el mo er tir me a blekeradel el lureor er a chelsel a mle kengaol. Ngmle soal el olengeseu er tir me ngmlo chedal aike el cheldebechel el milsebechakl er a llemeltir a rechad er omengiis. Ngdirrek el kmal mle kesib a rengul er a reprist. Tirka kmal mle ungilbesrir engdi te dirk ullengit a kall me a udoud er a rechad er omengiis el tir a kmal mle mechebuul. Ngkmal mle chetil aika el blekerdelir me ngdimlak a ta el lolisechakl er ngak el kirel a klechelid. Ngkmal dimlak a ta el ki mosaod el kirel a Dios.

 Sera kurael el mo klou ak dirrek el kmal mlo ouketui a diak el melemalt el omeruul. A ta er a kmal diak el soak el blekeradel a omengetukel er a rechad er a ngodech el beluu el kiliei er a France. A kuluusekool a soccer el obengterir a rengalek er a ngodech el beluu e kmal mle soak el milil el obengterir. A lmuut kung, a delak a mle redil er a Poland el dimlak lechad er a France. Me ngkmal mle soak a rechad er a kakerous el beluu a bo ledak el kiei el ngar er a budech el tabesul omeruul el mo er tir rokui.

Ngmle llach el kirek el mo soldau er a 1957. Tiakid a uchul me ak mlora aike el rois er a Algeria el ua kulsaod er a uchei. Uriul er a kumekedong er a Dios me lengesukak, e ak milsa donkey el diak el cheraro er a mekemad. Ngkmal mlo ungil a renguk! Me nguaisei engdi tia el blekeradel me a mekemad el mla er ngii a rirellak el mo melatk er a belkul a klengar er ngak. Ngera uchul me kede ngar tiang? A Dios, ngomekerreu er kid? Ngsebechel el mo er ngii a cherrungel el budech?

A uriul e ak mlo olengull er a mekemad er a blirir a rechad er a blik, e mlo medengelii a ta er a Sioning er a Jehovah. Ngika milskak a ta er a copy er a La Sainte Bible, el oidel a Biblia er a Rekatolik el tekoi er a France. Ak kulemuchel el menguiu er ngii er ak lluut el mora Algeria. Ngmiltab osengek er a Ocholt 21:3, 4. Ngmelekoi el kmo: “A blil a Dios a ngar a delongelir a re chad! . . . Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel.” * Ngkmal mlo mechas a renguk er aika el tekoi. Ak millatk el kmo, ‘Aika ngmera el sebechel el mo tekoi?’ E le seikid el taem e ngkmal dimlak a klemedengei er ngak er a Dios me a Biblia.

Sera ktobed er a klsoldau er a 1959 e ak mlo medengelii a Sioning el François, el ngii a mlo olisechakl er ngak a klemerang er a Biblia. El ua tiang, ngulechotii er a Biblia el kmo a Dios a ngar er ngii a ngklel el Jehovah. (Psa. 83:18, NW) Ngdirrek el silodii el kmo a Jehovah a mo meklemeltii a beluulechad, rullii el mo baradis, e otaut a tekoi el ngar er a Ocholt 21:3, 4.

Aika el tekoi a kmal mle bleketakl e dirrek el kmal rirtechii a renguk. Engdi ngdirrek el ngilasech a renguk er a reprist e kmal mle soak el chabarer er tir lolisechakl a tekoi el diak el ngar er a Biblia! Ak kmal dirk uleba uldesuel a demak e dimlak a kllourreng er ngak. Ngkmal mle soak a lemereched el mesmechokl a tekoi!

A François me a rebeches el sechelik el Sioning a ngilsukak el mo chelellakl a renguk. Te silodii el kmo a urered a Rekristiano a diak doukerrekeriil. Kede bai omesterir a rechad a omelatk loeak a ungil chais er a Rengedel a Dios. Tiakid a ureor el lurruul er ngii a Jesus e ureor el lebilsterir a rultirakl er ngii. (Mt. 24:14; Lk. 4:43) Ngdirrek el mle kirek el mesuub el mo ungil mengedecheduch er a rechad alta te ngodech a klaumerang er tir er ngak. El ua lolekoi a Bades el kmo: “A mesiungel a Rubak a diak le kirel toketok. Ng bai ungil er a re bek el chad.”​—2 Ti. 2:24.

Me ak ngilodech a blekerdelek e miltecholb er a ta el sils el ongdibel el ta er a Sioning er a  Jehovah er a 1959. Ngar itiang e ak mlo medengelii a odos el Angèle. Ngmle soak ngii me a kulemuchel el loldingel er a ongdibel el lemla er ngii. Aki mlo bechiil er a 1960. Ngika kmal ungil a blekerdelel, e ungil bechiil el redil, e mekreos el sengk el mlara Jehovah.​—Osi. 19:14.

Ngar er aika el mereko el rak e ak kmal siluub a betok er a rudam loba llomeserreng e meketeketa el Sioning. A ta er a kmal klou a ultutelel el tekoi el ksilubii a kmo: A dungil el kutmeklii a ngerecheled e ngkired el mo ngariou a rengud e oltaut er a bades er a Osisechakl 15:22 el ngii a melekoi el kmo: “Le betok a ngesou er a uldasu e a uldasu a mo ungilbesul.”

Sera 1964 e ak mlo mtebengii a klungel a ultutelel tia el bades. Tiakid el rak e a kulemuchel el mesiou el ta er a odam el oldingel a ongdibel, el melisiich er a rudam me a rudos er a tekoi er a klereng. Me nguaisei engdi ngmle 27 a rekik e kmal dirk ngesonges a klemedengei er ngak. Me ak mlo remuul a cheleuid. Engdi ak ngngilai a klubelek er ngii. E a ngaruchei er ngii e ak siluub a meklou a ultutelel suobel er a “ngeso er a uldasu” er a rudam el meketeketang el ngar er a klemerang.

Ak mo dobedebekii a tekoi el dilubech er a kkot el mo mesiou el odam el oldingel a ongdibel. Ak kuleldingel er a ta er a ongdibel er a Paris e a ta el odam a ullengit el mo mengedecheduch er ngak. Me ak dilu el kmo, “Chochoi.”

Ngnguleker el kmo, “Louis, a toktang sel lebora obliil e ngmo omes er techang?”

Me ak dilu el kmo, “A chad el smecher.”

Me ngdilu el kmo, “Nguaisei, engdi ak mla mtebengii el kmo kau a blechoel el mengoit er a klou el temem loldingel er a rechad el tir a mesisiich er a tekoi er a klereng, el uai ngike el odam loungerachel er a ongdibel. A ongdibel er kemam a betok a rudam me a rudos er ngii el dirk beches, sekemerur, me a lechub e ngmechitechut a rengrir. Ngkmal mo ungil a rengrir a omongoit a taem el obengterir e dirrek el mora blirir e omengur el obengterir.”

Ak kmal oba omereng el saul el kirel tia el ungil ulekrael el bilskak a odam. A bltkil a rengul el mora sib er a Jehovah a kmal rirtechii a renguk. Me alta ngmle meringel er ngak a rongesii engdi ak di mle mereched el mo oltaut a tekingel. Ak kmal mereng a sulel a Jehovah el kirir chouaitirka el odam.

Sera rak er a 1969 me a 1973 e ak miltutk el mo oungerachel er a department er a kall er a international  convention el mla er ngii er a Colombes, Paris. A rebekord el 60,000 el chad er sel convention er a 1973 a mle kirir el okelall el eim el klebesei! Ngdimlak kudengei el kmo aki mekera e mo kutmeklii tiang. Me nglmuut kung, sel mo sumecheklii tia el tekoi a Osisechakl 15:22 el kmo, bo mosiik a ngeso er a uldasu. Me a kullengit a ngeso er a rudam el mle mesisiich er a klemerang el mla er ngii a klemedengei er tir el kirel tiang. Tirka mle uldimukl er tir a ruureor el butcher, omekeroul a iasai, meruul a kall, me a omechar a klalo. Aki mlo dmak e kutmeklii tia el klou el ureor.

A 1973 e ngak me a bechik a ble el invite er kemam el mo mesiou er a Bethel er a France. A kot el ngerachel el kngiluu a mle ta er a omelsemai. Ngmle kirek el olab aike el babilenged el mora rudam el ngar er a beluu er a Cameroon er a Africa. A urered er tia el beluu a lulerrob er ngii er a rak er a 1970 el mora 1993. Ngdirrek el dimlak kudengei el kmo ak mekerang e mo kutmeklii tiang. Ngike el odam el loungerachel a ureor el meketmokl er a France a miltebengii tiang me ngmillisiich er ngak el kmo: “A rudam er kid el ngar er a Cameroon a kmal lousbech a kall er a klereng. Me dokelterir!” Me tiakid aki murruul er ngii.

Ak mlora aike el beluu el kmeed er a oliochel er a Cameroon el mo olsiuekl er a remechuodel er a Cameroon. Tirka el lodam a kmal ullecholt a blekeu me a llomeserreng e ngilsukak el mo sebechek el olsiseb a okelel a reng er a Cameroon. A Jehovah a kmal ulemekngeltengat er kemam. Ngmle 20 el rak el rechedal er a Cameroon a millemolem el melai A Ongkerongel me a dirrek el Our Kingdom Service el babier el mlotobed er a bek el buil.

Sera ki momuchel el kasisiik ngak me a Angèle e ak miltebengii el kmo ngika mla er ngii a kmes el deleongel er ngii me a Jehovah. Sera ki bo bechiil e ngliluut el obeketakl tia el tekoi. Sel kesus er a merengel a chebechiielam e ngullengit er ngak me kululuuch el kirel a urungulam el mo mui el mesiou er a Jehovah el terung. A Jehovah a ulenger er a nglungucham.

 A Angèle a dirrek el mla ngosukak el mo mui el oumerang lulsirs er a Jehovah. El ua tiang, sera le invite er kemam er a 1973 el mo mesiou er a Bethel, e ngmle meringel er ngak a kongei e le ngmle soak a omesiungam el loureor el oldingel a ongdibel. Engdi a Angèle a ulemeklatk er ngak el kmo kemam a tilib a rengmam el mora Jehovah. Me a leuaisei, kemam ngdiak lekiram el kongei el mo meruul a ngii di el tekoi el lolengit a cheldebechelel? (Heb. 13:17) Ak kmal kilengei a tekingel! Me aki mlora Bethel. A bechik a mellomes a rengul e tabesul a uldesuel el redil el kmal betik a rengul er a Jehovah. Aika el blekerdelel a kmal mla smisichii a deleuill er kemam e ngosukemam el meruul a ungil omelilt el ngar er a omesiungam er aika el betok el rak.

Chelecha el ki msal chudelang e a Angèle a melemolem lolengeseu er ngak e kmal ungil bechiil el redil. El ua tiang, aki mlo mesuub a tekoi er a Merikel me bo lsebecham el mora ike el skuul longetmokl a cheldebechelel a Jehovah, e le oumesingd er ngii a motobed el tekoi er a Merikel. Me aki mlo teloi er a ongdibel el tekoi er a Merikel alta ki mla mo ngar okeuid me a derengel a rekmam. Tia mle meringel e le ak chedal a Branch Committee er a France me ngmla er ngii a betok el ngerechelek. Engdi aki mle kaingeseu. Aki mla mo ngar er a okai me a derengel a rekmam e dirk mengetmokl er kemam el kirel a miting el tekoi er a Merikel me a France. Aki dirrek el mora tkurrebab el sebecham el teloi er a miting me a odingel lobengkel ongdibel er kemam. A Jehovah a kmal mla omekngeltengat er kemam.

A ta er a klengeltengat aki mngiluu er a 2017. Ngak me a Angèle a mla er ngii a techellam el mora School for Branch Committee Members and Their Wives el mla er ngii er a Patterson, New York.

A Jehovah a ngike el Ngarbab el Sensei. (Isa. 30:20, NW) Me ngkmal diak lemechas a rengud el kmo a remesiungel el meklou me a remekekerei a melai er sel kot el ungil rolel a klemedengei! (Dut. 4:5-8) Ak mla mtebengii el kmo a rengeasek el lorrenges er a Jehovah me a rudam me a rudos el mesisiich a deleuill er tir me ngii, a mukeroul er a tekoi er a klereng e mo blak a rengrir el mesiungel a Jehovah sel bo el klou. A Osisechakl 9:9 omeklatk er kid el kmo: “A ikel mdu er a mellomes a rengul chad a mo rullii me ng mengal mo mellomes a rengul. Ma cho mdung er a melemalt el chad a di mo melechel a klemedengei er ngii.”

A lebebil e ak mo melatk er sel kesus er a kngar er aike el rois er a Algeria er a betok er a 60 el rak er a mla me mong. Ngmera el dimlak kudengei el kmo ngkmal mo ungil a klengar er ngak er a ngar medak. E kmal betok a bla ksuub er a rebebil! A Jehovah a mla meskak, ngak me a Angèle a kot lungil klengar. Ki mla rullii er a rengmam el mo melemolem el melai a klubelam er ngika el Demad el ngar er a eanged me a dirrek el rudam me a rudos el loba llomeserreng e meketeketa el mesiou er a Jehovah e kmal betik a rengrir er ngii.