1-2. Ngera ta er a uchul me ngkired el semeriar er a babier er a Ocholt?

 NGMLA ta el momes er a album er a chad? Ngdiak modengelterir a ruumesingd el chad el ngar er aika el siasing. Engdi ngmiltab osengem er a ta er a siasing. E ngerang? E le kau a ngar tia el siasing. Ke omes er ngii e melebedebek el kmo tia el siasing ngmilengai er ker. Ke dirrek el melasem el melangch er a rechad el ngar tia el siasing. Tia el siasing a kmal ileakl er a rengum er aike el rokui el siasing.

² A babier er a Ocholt a kmal di uai tia el siasing. E ngerang? Ngngar ngii a eru el uchul. A kot e tia el babier er a Biblia melluches el kired. Kede menguiu el ngar sel kot el bades er tia el babier el kmo: “Tial babier a ochotel a tekoi el Dios a milsa Jesus Kristus el kirel el bo lolecholt er a re mesiungel el kmo ng ngera mochu duubech.” (Och. 1:1) Me a tekoi el llechukl er tia el babier a diak el bora rokui el chad ngdi mora remesiungel a Dios. Kid el chedal a Dios a diak lemechas a rengud el kmo kede teloi er a otutel aika el ulaoch el ngar tia el babier. Ngua dedu el kmo, kede mesekid “el ngar tia el siasing.”

3-4. A doltirakl er a babier er a Ocholt e aika el ulochel ngmo tmaut er oingerang, e ngera ngkirel rullii el kired?

³ A ongeru el uchul a taem el ika el ulaoch a mo tmaut. A chudela el apostol Johanes a milsaod el kirel tia el taem el kmo: “Ak meltuchel er a Chedaol Reng er a sils er a Rubak.”  (Och. 1:10) A Johanes er a lluches aika el tekoi er a bekord el 96 C.E. e a “sils er a Rubak” a dirk mle cheroid. (Mt. 25:14, 19; Lk. 19:12) Me nguaisei a doltirakl er a ulaoch er a Biblia e tia el sils ulemuchel er a 1914 er a bo leking a Jesus el ngar er a eanged. Ngulemuchel er seikid el mei er chelecha el taem e aika el ulaoch er a Ocholt, el uldimukl er ngii a rechedal a Dios, a ulemuchel a otutel. Chochoi, kid a kiei er a taem er a “sils er a Rubak.”

⁴ Kid el kiei er chelecha el kmal ileakl el taem a kired el mo kerekikl lomtab er tia el omellach el ngar er a Ocholt 1:3: “Ng ngeltengat ngikel menguiu er tial babier er mederir a re chad, e ngeltengat tirkel orrenges a ikal klumech er a ulaoch e oltirakl a ikel llechukl er ngii; ele ng di kmedul mo tmaut a ikal tekoi.” Nguaisei ngkired el “menguiu,” “orrenges a ikal klumech er a ulaoch,” e “oltirakl.” Ngngera bebil er aika el tekoi el kired el oltirakl?

5. Ngmekera babier er a Ocholt e melisiich er a klungel a ultutelel a doterekeklii el kmo a Jehovah a kongei er a omengull er kid?

⁵ Ngar sel kot el bliongel er a Ocholt e kede suubii el kmo a Jesus a ungil medengei a tekoi el duubech er a ongdibel er a rechedal. (Och. 1:12-16, 20; 2:1) Ngulechotii tiang el ngar er a tekingel el mora ike el euid el ongdibel er a Asia Minor. A Jesus a milsterir a ileakl el ulekrael el mo ngosuterir el oterekeklii el kmo, a omengull er tir a lekengei er ngii a Jehovah. Me a lmuut kung, aika el tekingel a melutk el kirir a rokui el chedal a Dios er chelecha el taem. Ngngera klubeled er tiang? A mengetekled el Kristus Jesus a ungil medengelii a klisichel a klereng er kid. Kede ngar er a cheungel a ulekerreuil a Jesus, e ngika mes a rokui el tekoi. Ngmedengei aike el dousbech el mo melemolem loba kengei er a Jehovah. Ngngera ika el ulekrael el lebilsterir el kired el oltirakl er chelecha el taem?

6. (a) A doltirakl a tekingel a Jesus el ngar er a Ocholt 2:3, 4, e ngera mle kngtil a ongdibel er a Efesus? (b) Ngera kede suubii er tiang?

⁶ Monguiu er a Ocholt 2:3, 4. Ngdiak el kired loridii sel bltikerreng el dulebang er a dekot el mo mesiou er a Jehovah. A tekingel a Jesus el mora rechad er a ongdibel er a Efesus ochotii el kmo, te ullecholt er a ducherreng e millemolem el mesiou er a Jehovah alta te mlo chobangel a betok el ringel. Me nguaisei engdi te urridii a bltikerreng el lulebang er a kot el luchul. Ngmle kirir el lmuut el mekurulii tia el bltikerreng e le lak e a Jehovah diak bo lekengei er a omengull er tir. Ngdi osisiu er chelecha el taem, ngdiak el sebeched el di outekangel e merekong. Ngkirel melemalt a moktek er kid el outekangel. A Dios a diak di lomes aike el doruul ngdirrek lomes er a uchul me kede meruul. A moktek er kid el meruul a tekoi a klou a ultutelel er a Jehovah e le mengerechir er kid el mo mengull er ngii le ngbetik a rengud er ngii e oba omereng el saul el kirel.​—Osi. 16:2; Mk. 12:29, 30.

7. (a) El ua losaod a Ocholt 3:1-3, ngera mle mondai er a rechad er a Sardis? (b) Ngera kired el meruul er ngii?

⁷ Monguiu er a Ocholt 3:1-3. Ngkired el melemolem el di klekar. A rechedal a ongdibel er a Sardis a kuk mle ngodech a mondai er tir. Alta ngkmal mle blak a rengrir er a ngar er a mong, engdi ngmla mo beot a rengrir er a omesiungir. A Jesus a dilu er tir el kmo “bekiis.” Ngera kede suubii er tiang? Nguaisei, a Jehovah a diak lobes a urered. (Heb. 6:10) Engdi ngdiak el sebeched el di olab a tekoi el  durruul er a ngar er a mong. Alta ngmla mo diak el sebeched el meruul a betok engdi ngkired el melemolem el blak a rengud el meruul er a “urerel a Rubak” e melemolem el klekar el mo lmuut er a ulebongel.​—1 Ko. 15:58, BT; Mt. 24:13; Mk. 13:33.

8. Ngera kede suub er a tekingel a Jesus el mora rudam er a Laodisea el ngar er a Ocholt 3:15-17?

⁸ Monguiu er a Ocholt 3:15-17. Ngkirel blak a rengud el mesiou er a Jehovah loba rengud el rokir. A tekingel a Jesus el mora rechad er a Laodisea a ochotii a lmuut el ta er a mondai. Omengull er tir a mle “ouralmsils.” Sei a uchul me a Jesus a dilu er tir el kmo “ng ua ngeral mekngit a chelebulem me kede chubkau.” Ngmle kirir lochotii a blakerreng el kirel a Jehovah me a omengull er ngii. (Och. 3:19) Ngera kede suubii er tiang? A lsekum e ngmo diak doba blakerreng el ua ngar er a mong, e ngkired el mekurulii a omereng el saul er kid el kirel a ilteet er a klereng el dolab. (Och. 3:18) Ngdiak el soad el mo mechesang el osiik er a ungil klengar me bo luchul e lak denguu a omesiunged el mo kot.

9. Ngua desa er a tekingel a Jesus el mora Rekristiano er a Perkamum me a Thiatira, ngera el tellemall a kired el mengeroid er kid er ngii?

⁹ Ngkired el otngakl a osisecheklir a rumtok a osisechakl. A Jesus a milsmechokl er a rebebil el ngar er a Perkamum e le tir el ulemuchel a klekakeakl. (Och. 2:14-16) Ngchilat er a rengar er a Thiatira e le te milengeroid er tir er a “dmolech el bertelel a Satan,” e millisiich er tir el mo “oreked” er a klemerang. (Och. 2:24-28) A Rekristiano er isei el mlo mechitechut e le tir el uleltirakl a klsuul el osisechakl, a mle kirir el obult. E kid er chelecha el taem? Ngkired el otngakl a ngii di el osisechakl el diak loltirakl er a uldesuel a Jehovah. A ruumtok a osisechakl a “oubail er a leko te chedal a chelid” engdi ng “diak er omerellir ochotel a klisichel a klemerang el lodengei.” (2 Ti. 3:5) Ngmo beot er kid a mo medengei e otngakl a klsuul osisechakl a lsekum e ngblak a rengud el mesuub er a Tekingel a Dios.​—2 Ti. 3:14-17; Jud. 3, 4.

10. Ngngera lmuut el ta er a tekoi el sebeched el suubii er a tekingel a Jesus el mora ongdibel er a Perkamum me a Thiatira?

¹⁰ Ngdiak el kired el meruul a deleboes me a lechub e kede melemolem er tia el omeruul. Ngdirrek el mla er ngii a lmuut el ta er a mondai er a Perkamum me a Thiatira. A Jesus a dimlak el kengei er a rebebil el ngar aika el ongdibel e le te millemolem a deleboes el omeruul. (Och. 2:14, 20) Ngngera klubeled  er tiang? Ngdiak el sebeched el omdasu el kmo a Jehovah a mo excuse a deleboes el doruul e lekid el mla mesiou er ngii el betok el rak e olab a betok el ngerachel. (1 Sa. 15:22; 1 Pe. 2:16) Alta blekeradel er tia el beluulechad a di merael el mo mekngit engdi Jehovah dirk mengerechir er kid el mo olab a ngarbab el llechul.​—Efe. 6:11-13.

11. Ngngera kede mla suub? (Momes er a baks el “ Suobel el Kired er Chelecha el Taem.”)

¹¹ Me ngngera kede mla suub? Ngkired el oterekeklii el kmo a Jehovah kongei er a omengull er kid. A lsekum e kede meruul er a tekoi el sebechel mo uchul e ngmo diak lekengei er a omengull er kid, e ngkired el mereched el mo meklemeltii tiang. (Och. 2:5, 16; 3:3, 16) Ngngar ngii a lmuut el ta er a tekoi el Jesus a dilu el mora ika el ongdibel. Tiang ngerang?

12. Ngera sebeched el suub er a tekingel a Jesus el mora rudam er a Smirna me a Filadelfia? (Ocholt 2:10)

¹² Chelecha me bo dosaod a tekingel a Jesus el mora ongdibel er a Smirna me a Filadelfia. Ngdilu er a Rekristiano er isei el kmo lak lemedakt el mo chobangel a odechelakl, e le Jehovah mo omekngeltengat er a blakerreng er tir. (Monguiu er a Ocholt 2:10; 3:10) Ngngera klubeled er tiang? Ngkired el medengei el kmo kede mo modechelakl e kongei loutekangel er ngii. (Mt. 24:9, 13; 2 Ko. 12:10) Ngera me tia kmal klou a ultutelel el uleklatk?

13-14. Ngngera ngmla rullii el mora rechedal a Dios a blekeradel losaod er ngii a 12 el bliongel er a Ocholt?

¹³ Babier er a Ocholt ouchais er kid el kmo a rechedal a Dios a mo modechelakl er chelecha el taem er kid, el ngii a “sils er a Rubak.” A 12 el bliongel ouchais el kmo ngmo duubech a mekemad er a eanged sel lemeteketek a Rengedel a Dios. A Mikael el ngii a Jesus Kristus me a rechanghel er ngii a oumekemad er a Satan me a remekngit el anghel. (Och. 12:7, 8) A recherrouel a Dios a mo mechitechut e obidokl el mei er tia el chutem, luchul a klou el ringel el mei er a beluulechad. (Och. 12:9, 12) Me ngngera mla duubech el mora rechedal a Dios?

¹⁴ A Ocholt ouchais er kid a loruul er ngii a Satan. Ngmla mo diak el sebechel mora eanged me chelecha ngulturk a klsbengel a rengul er a rengellitel el tir omtechei er a Rengedel a Dios er tia el chutem e “chocholt ra Jesus.” (Och. 12:17, BT; 2 Ko. 5:20; Efe. 6:19, 20) Ngmekera mla tmaut tia el ulaoch?

15. Te rua techang omtechei er tirke el “terul ocholt” el losaod er tir a 11 el bliongel er a Ocholt, e ngera dilubech el mo er tir?

¹⁵ A Satan a milechelii odechelakl el mora rengellitel el odam el tir a ulemekrael er a ureor er a berkel a klumech er a Renged. Tirka el odam omtechei er tirke el “terul ocholt”  el losaod er tir el kmo te milekodeterir. * (Och. 11:3, 7-11, BT) Sera 1918 e a reteai er tirka el odam a mlotelechakl e mle kirir el mo kelebus el kemanget el taem. Ngar er a osengir a redi chad, e a urerir tirka el ngellitel a bla ‘lokodir.’

16. Ngera el mengasireng el tekoi a dilubech er a 1919, e ngera ngmelemolem el meruul a Satan el mei er chelechang?

¹⁶ A ulaoch el ngar er a 11 el bliongel er a Ocholt a dirrek el louchais el kmo tirka el “terul ocholt” a lmuut el me ngar. Tia el ulaoch a tilaut el ngar er a mengasireng el rolel e le ngdimlak bo leta el rak e te tilobed er a kelebus. Uchelel a rak er a 1919 e tirka el ngellitel el odam a tilobed e a uriul e te mle drop a ultelechakl el mlo er tir. Tirka el odam a di mle mereched el mo meruul er a ureor er a Renged. Me nguaisei engdi tia dimlak leterebengii a odechelakl er a Satan el mora rechedal a Dios. Seikid el taem el mei e a Satan a mla rullii a “imui” er a odechelakl el mora rokui el chedal a Dios. (Och. 12:15) Me kede rokui el kired el mo “meduch a [rengud] e mesisiich el oumerang.”​—Och. 13:10.

17. Ngngera el ngeso a bla lengai a rechedal a Dios, alta Satan a meringel el oldechelakl er tir?

¹⁷ A 12 el bliongel er a Ocholt a ouchais el kmo a rechedal a Dios a mo ngmai a ngeso er aike el dimlak el lolatk el kmo ngmo uaisei. Ngua omko “chutem” a ngilelmii a “omoachel” er a odechelakl. (Och. 12:16) E tia mera el uaisei. A lebebil e a telengtengil a beluulechad er a Satan el ua rechad er a kerrekeriil a ngosuterir a rechedal a Dios. Ngmla mo betok el taem el remesiungel a Jehovah a mlo kats a case er a kort el luchul me ngngar ngii a bebil ilmeklir. Te mekera e ousbech er tia el ilmokl? Te ungil ousbech a bek el techall el mo meruul er a ureor el bla lebesterir a Jehovah. (1 Ko. 16:9) Ngngera uldimukl er tia el ureor?

18. Ngngera sel kot el klou a ultutelel el ureor el doruul er ngii er chelecha el uriul sils?

¹⁸ A Jesus a ulemlaoch el kmo a rechedal a mo omerk er a “Ebangkelio el kirel ngii el Renged [er a Dios]” el mora beluulechad el rokir er uchei er a lemei a ulebongel. (Mt. 24:14) Sel lomerk e te nguu a ngelsuil a anghel, me a lechub e te rechanghel, el losaod er ngii el kmo ng “oba diak a ulebengelel klumech er  a Ungil Chais el mo ouchais er ngii el mor tirkel kiei er a beluulchad, el mor a bek el bedengir a re chad, ma kebliil, ma omelekoi, ma beluu.”​—Och. 14:6.

19. Ngera el klumech a dirrek el kirir tirke el betik a rengrir er a Jehovah el omerk er ngii?

¹⁹ A ungil chais er a Renged a diak di le sel klumech lomerk er ngii a rechedal a Dios. Te kirir el dirrek el olengeseu er a ureor el loruul a rechanghel, el losaod er ngii a 8 el mora 10 el bliongel er a Ocholt. Tirka el anghel ouchais a ringel el mo duubech el mo er tirke el otngeklii a Rengedel a Dios. Me a Resioning er a Jehovah a omerk er a klumech el lomekesiu er ngii el mora “chull el kori ma ngau,” el ngii a ouchais a kerrekeriil el mora kakerous el telengtengil tia el mekngit el beluulechad er a Satan. (Och. 8:7, 13) A rechad a kirir el mo medengei el kmo a ulebongel a kmedang me bo loruul a omelodech er a klengar er tir e lesobel er a sils er a ngesechel a rengul a Jehovah. (Sef. 2:2, 3) Me nguaisei engdi a ruumesingd el chad a diak el sorir tia el klumech. Me kede ousbech er a blekeu el mo omerk er ngii. A temel a kloul ringel e sel ulebongel el klumech er a kerrekeriil a lmuut el mo meringel er a rechad a orrenges er ngii.​—Och. 16:21.

20. Ngera kede mo mesaod el ngar aike el eru el oeakuriul el suobel?

²⁰ Ngkmal kired el olengesenges “a ikal klumech er a ulaoch” e le kid a uldimukl er a otutel aike el ngar er a babier er a Ocholt. (Och. 1:3) Engdi ngmekera sebeched el melemolem el oba blakerreng el outekangel a odechelakl e meruul er a ngerecheled el omerk aika el klumech? Kede nguu a omelisiich loeak aika el eru el tekoi: a kot, ngoeak a bo dodengei aike el louchais a babier er a Ocholt el kirel a recherrouel a Dios me a ongerung, aike el klengeltengat el bo dengai er a ngar medad a lsekum e kede melemolem el oba blakerreng. Kede mo mesaod aikang el ngar aike el eru el oeakuriul el suobel.