1. Ngngera el klou a ultutelel el omelilt a kirir a rechad el meruul er ngii?

 A RECHAD er chelecha el taem a ngar ngii a klou a ultutelel omelilt el kirir el meruul er ngii. Te mo olab el mora Jehovah el Dios el llemeltel el mengedereder, me a lechub e te mo dechor el kirel a mekngit el cheraro el Satan el Diabelong? Ngdiak a ngar er a belngel. A omelilt er tir a ngar ngii a bo lerellii er a klengar er tir er a ngar medad. (Mt. 25:31-33, 46) Temel a “kloul ringel” e te mo nguu a olangch er osobel me a lechub e ngolangch er a tellemall.​—Och. 7:14, BT; 14:9-11; Ese. 9:4, 6.

2. (a) A Hebru 10:35-39 ngmelisiich er kid el mo mekerang? (b) Ngmekera babier er a Ocholt e sebechel ngosukid?

² Monguiu er a Hebru 10:35-39. A lsekum e ke mla ngiltii el mo dechor el kirel a omengederederel a Jehovah, e tia olechotel a llomeserreng. Chelechang e ngsebechem el ngosuterir a rebebil el mo melilt el meruul el uaisei. Ngsebechem lousbech aike el ngar er a babier er a Ocholt el olengeseu er tir. Tia el babier a ouchais er a mo duubech el mo er tirke el omtok er a omengederederel a Jehovah, engdi ngdirrek louchais a klengeltengat el mo er tirke loba blakerreng el mo er ngii. Ngkmal kired el merriter aika el klemerang. Sel doruul el uaisei e ngsmisichid el mo melemolem el mesiou er a Jehovah. Me a lmuut kung, ngsebeched lousbech el olengeseu er a rebebil el mo melemalt el melilt e melemolem loltirakl er tia el omelilt.

3. Ngera kede mo mesaod er tia el suobel?

³ Ngar tia el suobel e kede mo mesaod aika el ker: Ngera medechel el kirir tirke el olab el mora omengederederel a Dios? E ngera mo duubech el mo er tirke el ngiltii el mo oltirakl er ngike el bekerkard el charm el losaod er ngii a babier er a Ocholt?

4. A apostol Johanes ngmesa ngera el bliongel er a rechad lobengkel a Jesus el ngar er a eanged?

⁴ A apostol Johanes a milsa er a ues a eru el bliongel er a rechad el oltirakl er a omengederederel a Jehovah e nguu a klengeltengat er ngii er a diak a ulebengelel el klengar. A ildisir a rengar sel kot el bliongel a 144,000. (Och. 7:4) Tirka mlengai er a chutem el mo obengkel a Jesus er a eanged el mo chedal a kabelment me a lechub e ng Renged. Te obengkel a Jesus el mengedereder er a chutem. (Och. 5:9, 10; 14:3, 4) A Johanes a mesterir er a ues el dechor lobengkel a Jesus er a Rois Sion er a eanged.​—Och. 14:1.

5. Ngngera di kmedu el mo duubech el mo er tirke el medechel el cheldellel a 144,000?

⁵ Ngar er a chelsel aika el betok el rak e te betok el telael el chad a mla mengilt el mo cheldellel a 144,000. (Lk. 12:32; Rom 8:17) Me nguaisei engdi Johanes a louchais er ngii el kmo ngdi kesai er tir a mo medechel er tia el chutem er a uriul el sils. “Tirkel medechel” a mo nguu a ulebongel el “olangch” er a uchei er a lomuchel a kloul ringel lolechotel a kengei er a Dios. (Och. 7:2, 3; 12:17) A temel a kloul ringel e tirka el medechel a mo mengai el mora eanged el mo obengterir tirke el mlad e mora eanged e churrengelii a ildisir el 144,000. Te mo mengedereder er a Rengedel a Dios lobengkel a Jesus.​—Mt. 24:31; Och. 5:9, 10.

6-7. (a) Ngngera el bliongel er a rechad a lilsa er a uriul a Johanes, e ngera kede suubii el kirir? (b) Ngngera uchul me a rengellitel me a rechedal a “kloul seked” a kirir el semeriar er a 7 el bliongel er a Ocholt?

⁶ Uriul er a lesa tia el bliongel er a rechad el ngar er a eanged a Johanes e ngmilsa “kloul seked.” Tirka diak lulterekokl a ildisir el ua tirke el 144,000. (Och. 7:9, 10) Ngera kede suubii el kirir? A Johanes a louchais er ngii el kmo: “Tirika tirikel uleak sel kloul ringel; e sililek a bilir ra rsechel a Ngelekel a sib el mo becheleleu.” (Och. 7:14, BT) Uriul er a lesobel er a kloul ringel a “kloul seked” e te mo kiei er tia el chutem e oldeu a rengrir er a betok el klengeltengat.​—Psa. 37:9-11, 27-29; Osi. 2:21, 22; Och. 7:16, 17.

⁷ Me a bla demengilt el mora eanged me a lechub e kede di ngar tia el chutem, e kid, ngsebeched el mesekid el teloi er tirka el losaod er tir a 7 el bliongel er a Ocholt? Ngkired. Tia kmal mo taem er a deurreng el kirir aika el eru el bliongel er a remesiungel a Dios! Ngkmal mo dmeu a rengud el ngileltii el mo oltirakl er a omengederederel a Dios. Ngngera ngdirrek el louchais er kid Ocholt el kirel a kloul ringel?​—Mt. 24:21, BT.

8. Ngmekera omuchel a kloul ringel, e ngera te mo meruul er ngii a ruumesingd el chad?

⁸ Ngua dulsaod er ngii er sel uleak uchei el suobel, a kabelment er tia el beluulechad a di kmedung e ngmo odelecheklii a Kloul Babilon, el ngii a cheldellel a rokui el klsuul el klechelid. (Och. 17:16, 17) Tia mo mechelii a kloul ringel. Me a rebetok te mo obult el mo mesiou er a Jehovah? Ngdiak. Ngua losaod er ngii a 6 el bliongel er a Ocholt, a rechad el diak losiou er a Jehovah a bai mora ika el kabelment me a siobai, el lomekesiu er tir el ua rois, el kirel a osebechakl. Me tir el diak el dechor el obengkel a Rengedel a Dios a uchul me a Jehovah mo omes er tir el kmo te omtok.​—Lk. 11:23; Och. 6:15-17.

9. Te mekera rechedal a Jehovah e mo ileakl el ngodech er a temel a kloul ringel, e ngera mo duubech el mo er tir?

⁹ A rechedal a Jehovah a kmal mo ileakl el  ngodech er tia el kmal meringel el taem. Ngdi tir a mo mesiou er a Jehovah e diak lengiltii el mo oltirakl er ngike el “charm.” (Och. 13:14-17) Tia mo ongasech a rengrir tirke el omtok er a Jehovah. Sei a uchul me a cheldellel aika el renged el rokui a mo oldechelakl er a remesiungel a Jehovah er a beluulechad el rokir. A Biblia omekedong er tia el odechelakl el odelecheklel a Kok er a Makok.​—Ese. 38:14-16.

10. Ngua losaod er ngii a Ocholt 19:19-21, ngmo mekera Jehovah el kirel tirke el mo oldechelakl er a rechedal?

¹⁰ Ngmo mekerang a Jehovah el kirel tia el odelecheklir? Ngouchais er kid el kmo: “Ng mo kesib a renguk.” (Ese. 38:18, 21-23) A 19 el bliongel er a Ocholt ouchais el kmo a Jehovah mo oderchii a Ngelekel el me mesebechakl er a rechedal e odelecheklterir a recherrouir. A “resoldau er a eanged” el tir a reblak a rengrir el anghel me a re 144,000 a mo obengkel. (Och. 17:14; 19:11-15) Ngngera mo rsel tia el mekemad? Ngmo okngemedeterir tirke el rokui el chad me a cheldebechel el omtok er a Jehovah!​—Monguiu er a Ocholt 19:19-21.

11. Ngera el ileakl el tekoi a losaod er ngii a ulebengelel a babier er a Ocholt?

¹¹ Ka di molebedebek a mo uldesuir tirke el blak a rengrir el mo suobel er sel taem el lemokngemed a rokui el cherrouel a Dios! Ngkmal mo klou a deurreng! Me alta ngdirrek el mo klou a deurreng er a eanged er sel taem el lemokngemed a Kloul Babilon, engdi ngngar ngii a lmuut el klou luchul a deurreng. (Och. 19:1-3) Tia ulebengelel a babier er a Ocholt, el ngii a “merengel a chebechiielel a Ngelekel a Sib.”​—Och. 19:6-9.

12. El ua losaod a Ocholt 21:1, 2, ngmo er ngii a merengel a chebechiielel a Ngelekel a Sib er oingerang?

¹² Oingerang e ngmo er ngii tia el merengel a chebechiil? A re 144,000 el rokui a mo ngar er a eanged er uchei er a lomuchel a mekemad er a Armakedon. Me nguaisei engdi a merengel a chebechiielel a Ngelekel a Sib a diak lebo er ngii er tiakid el taem. (Monguiu er a Ocholt 21:1, 2.) Ngbai mo er ngii er uriul er a mekemad er a Armakedon, el lebla lemokngemed a rokui el cherrouel a Dios.​—Psa. 45:3, 4, 13-17.

13. Ngngera belkul a merengel a chebechiielel a Ngelekel a Sib el kirir tirke el chedal tia el telbiil?

¹³ Ngngera belkul a merengel a chebechiielel a Ngelekel a Sib el kirir tirke el chedal tia el telbiil? Ngdi ua merengel a chebechiil el oldak er a sechal me a redil, me ngdi osisiu tia el okesiu er a chebechiil a oldak er a King el Jesus Kristus me a re 144,000, el tir a ua “redil . . . mo bechil.” Tia mo kutmeklii a beches el kabelment el ngii a mo mengedereder el 1,000 el rak.​—Och. 20:6.

14-15. A 21 el bliongel er a Ocholt ngomekesiu er a re 144,000 el ua ngerang? (Momes er a siasing er a medal tia el babier.)

¹⁴ A dirrek el 21 el bliongel er a Ocholt omekesiu er a re 144,000 el mora kmal klebokel el mats lokedongall el “beches el Jerusalem.” (Och. 21:2, 9) Tia el mats a dechor bebul a tacher me a teblo el omekedecheraol el bad el llechukl er ngii a “ngklir a re truich ma terul apostol er a Ngelekel a Sib.” Ngera me a Johanes a miltab osengel er tiang? E lengii el milsa ngklel er a ta er aika el bad. Tia mera el chetengakl el mo er ngii!​—Och. 21:10-14; Efe. 2:20.

¹⁵ Tia el okesiu el mats a kmal diak a uai  ngii. A rael er ngii a rruul er a bliochel el kolt, siseball er ngii a rruul er a ngisel a chesiuch, e a cheotelel me a uchetemel a rruul er a meringelchad el bad, e melemalt a tengel me a klemengetel. (Och. 21:15-21) Me nguaisei engdi ngdirk ngar ngii a dibus! Mutebengii a louchais er kid a Johanes: “Ng dimlak kisa templo er a chelsel ngiil beluu, ele templo er ngii a Rubak el Dios el Olab a Bek el klisiich ma Ngelekel a Sib. Ngiil beluu a diak lousbech er a sils ma lechub a buil el omekllomes er ngii, ele klebkellel a Dios a dmiich er ngii ma Ngelekel a Sib a olbidel er ngii.” (Och. 21:22, 23) Me tirke el rullii a beches el Jerusalem a sebechir el di melemalt el mora Jehovah. (Heb. 7:27; Och. 22:3, 4) A Jehovah me a Jesus a templo er tia el mats.

16. Ngngera te mo experience a rechad er a temel a Ta el Telael el Rak er Omengederederel a Rengedel a Dios?

¹⁶ Ngkmal omeksemeriar a rengrir a rengellitel sel lolatk er tia el mats. Me nguaisei tirke el oba omelatk el di kiei er tia el chutem me te dirrek el semeriar er ngii. Tia el beches el Jerusalem a mo uchul a betok el klengeltengat er a temel a Ta el Telael el Rak er Omengederederel a Rengedel a Dios. A Johanes omes aika el klengeltengat el ua “omoachel er a ralm er a klengar.” A “kerrekar er a klengar” a dechor er a bita me a bita er tia el omoachel el omekdubech a llel a kerrekar el ngii a “chomekungil a bek el renged.” (Och. 22:1, 2, BT) Rokui el chad er tiakid el taem a ngar ngii a techellir el mo melai a klungiolir er aikang. Me a rechad a mo mekekoketerir el merael el mo cherrungel. Ngmo diak a secher, ringel, me a llangel er a klengiterreng.​—Och. 21:3-5.

17. El ua losaod a Ocholt 20:11-13, te rua techang a mo melai a klungiolir er a temel a Ta el Telael el Rak er a Omengedereder?

¹⁷ Te rua techang a mo melai a klungiolir er aika el ungil sengk? Ngklou el seked er a rechad el suobel er a Armakedon me a rengalek el bo lochelleterir er a beches el blekeradel. A 20 el bliongel er a Ocholt a dirrek el tibir el kmo a rulekoad a mo mekiis. (Monguiu er a Ocholt 20:11-13.) A re “ungil” el uleba blakerreng el mora kodall me a “re mekngit” el dimlak a techellir el mesuub el kirel a Jehovah a mo mekiis el mo kiei er tia el chutem. (Rel. 24:15; Jn. 5:28, 29) Tia ngbelkul a kmo  a rokui el chad a mo mekiis er a Ta el Telael el Rak er a Omengedereder? Ngdiak. Tirke el ultngeklii a techellir el mo medengelii a Jehovah e mlad a diak bo lebekiis. Ngmla er ngii a techellir engdi te ulechotii el kmo te diak leredemelel a mo kiei er a Baradis er tia el chutem.​—Mt. 25:46; 2 Th. 1:9; Och. 17:8; 20:15.

18. Ngmo uangerang beluulechad er a ulebongel er a 1,000 el rak?

¹⁸ A ulebengelel a 1,000 el rak e tirke el rokui el ngar tia el chutem a mo mecherrungel. Ngmo diak a chad el uldiukes er a klengit el mlara Adam. (Rom 5:12) A delebeakl er a klengit el mlara Adam a mo diak el mo cherechar. Me a rechad a ‘mo ngar’ el cherrungel er a ulebengelel a 1,000 el rak.​—Och. 20:5, BT.

19. Ngngera uchul me ngusbechall a ulebongel el omelsemai?

¹⁹ Kede medengei el kmo a Jesus a mlo mesisiich er a orimel er a Satan. Ngmillemolem el oba blakerreng er a chelsel a meringel el blekeradel. Engdi a remecherrungel el chad, te dirrek el mo kongei el meruul el uaisei a lsekum a Satan a mo er ngii a techellel el melasem er tir? A derta el chad a ngar ngii a techellir el mo onger er tia el ker er sel taem el letobed a Satan er a diak a btil deliobech er a ulebengelel a 1,000 el rak. (Och. 20:7) Tirke el mo mesisiich er tia el ulebongel el omelsemai a mo nguu a diak a ulebengelel el klengar me a mera el ilmokl. (Rom 8:21) Tirke el omtok a mo mokngemed el mo cherechar lobengkel a Satan me a remekngit el anghel er ngii.​—Och. 20:8-10.

20. Ngmo uangera uldesuem sel molatk aika el ulaoch er a babier er a Ocholt?

²⁰ Ngua ngera uldesuem er tia el review er kid er a babier er a Ocholt? Kau, ke kmal semeriar sel molatk er kau el mo ngar er a temel otutel aika el ulaoch? Ngdiak lerellau el mo soam el invite er a rechad el me teloi er kid er a bliochel el omengull el mora Dios? (Och. 22:17) Kede kmal semeriar el kirel aika el tekoi el mo duubech er a ngar medad me kede kmal oba osisiu el uldesuel a apostol Johanes er a ledu el kmo: “Bo le ua isei! Mei, e Rubak el Jesus!”​—Och. 22:20.