1-2. Mosaod er a rolel e a omellach er a Biblia a lmuut el mo dmolech a belkul er kid sel lemengodech a blekeradel er a klengar er kid.

 SEL sils el bo lebechiil a sechal me a redil e te kerekikl el orrenges er a cheldecheduch el mengai er a Biblia el kirel a chebechiil. Aike el tekoi el soadel er tia el cheldecheduch a diak lebeches el tekoi er tir. Me nguaisei engdi aika kmal mla mo meklou a ultutelel er tir. E ngerang? E le te mo oltaut el bechiil el sechal me a bechiil el redil.

² Ngdi osisiu el kirel sel bo loungalek a obekel el Kristiano. Chelsel aika el betok el rak e te locha mla remenges a betok el cheldecheduch el kirel a domekeroul er a rengalek. Me nguaisei engdi chelechang aika kmal mla mo meklou a ultutelel tekoi er tir. Ngmo er ngii a ngalek el lomekeroul er ngii. Tia kmal klou el ngerachel! Nguaisei el sel lemengodech a blekeradel er a klengar er kid e ngngar ngii aike el bades el kmal mo meklou a ultutelel er kid. Tiakid a ta er a uchul me a remengull er a Jehovah a menguiu er a Biblia, e dirrek el ua ulekrael el mlora reking er a Israel, ngkirir el dirrek el melebedebek er ngii er a “bek el sils er a klengar” er tir.​—Dut. 17:19.

3. Ngera kede mo mesaod er tia el suobel?

³ Ruungalek, kemiu oba ta er a kmal ileakl el ngerachel el sebechel a Kristiano el nguu, el ngii a olisechakl er a rengelekiu el kirel a Jehovah. Me nguaisei engdi ngdiak di le somiu el olisechakl er tir el kirel a Dios er kid. Ngsomiu el ngosuterir el mo betik a rengrir er ngii. Ngera sebechiu el meruul el ngosuterir a rengelekiu el mo betik a rengrir er a Jehovah? Ngar tia el suobel e kede mo mesaod a eua el omellach er a Biblia el sebechel ngosukemiu a rechedam me a rechedil. (2 Ti. 3:16) Kede dirrek el mo mesaod er a rolel e a ruungalek el Kristiano  el loltaut a ulekrael er a Biblia a mla ngmai a klungiolir.

4. Ngera ta er a omellach el sebechel ngosuterir a ruungalek el mekurulii a bltkil a rengrir a rengelekir el mora Jehovah? (Jakobus 1:5)

⁴ 1 el omellach: Mosiik er a ulekrael er a Jehovah. Molengit er a Jehovah me lebeskau a llomeserreng el mousbech er ngii el mo ngosuterir a rengelekiu el mekurulii a bltkil a rengrir el mo er ngii. (Monguiu er a Jakobus 1:5.) Ngii ngike el kot lungil chad el sebechel meskid a ulekrael. Ngbetok a uchul me ngii a kot lungil. Molatk eru er ngii. A kot e a Jehovah ngike el kot el klou a experience er ngii el oungalek. (Psa. 36:9) Ongerung, aike el mellomes el ulekrael el lebeskid a di mo uchul a klungiaol.​—Isa. 48:17.

5. (a) Ngera ngmla meskid a cheldebechelel a Jehovah el olengeseu er a ruungalek? (b) Ngera ke silubii er a video el kirel a rolel e a Brother me a Sister Amorim ulemekeroul er a rengelekir?

⁵ A Jehovah oeak a Tekingel me a cheldebechelel e ngmla meskid a kmal betok el kall er a klereng el sebechel ngosukemiu el mekuruleterir a rengelekiu el mo betik a rengrir er ngii. (Mt. 24:45) El ua tiang, ngkmal sebechiu el metik a ungil ulekrael el ngar sel series el “Help for the Family,” el tilobed er a Awake! el betok el rak e chelecha ngsebechem el metik er ngii er a website er kid. Ngdirrek el kmal betok a video el mla motobed er a jw.org el sebechel ngosukemiu el oltaut a ulekrael er a Jehovah e omekeroul er a rengelekiu. *​—Osi. 2:4-6.

6. Ngua ngera uldesuel a ta el chedam el kirel a ulekrael el ngii me a bechil a melai er a cheldebechelel a Jehovah?

⁶ A rebetok el ruungalek a melekoi el kmo te kmal oba omereng el saul el kirel a ngeso el loltobed a Jehovah loeak a cheldebechelel. A chedam el Joe a kmo: “Ngkmal diak lebeot el tekoi a domekeroul er a retedei el ngalek er a klemerang. Ngak me a bechik a blechoel el meluluuch lolengit er a Jehovah me lengesukemam. Aki kmal omelechesiu el kmo a suobel me a lechub e ng video a tilobed er a kmal melemalt el taem el ngosukemam el kirel a tekoi el kim chelebangel er ngii. Aki kmal ultuil er a ulekrael er a Jehovah.” A Joe me a bechil a mla metik el kmo aika el suobel me a video a olengeseu er a rengelekir el mo kmeed er a Jehovah.

7. Ngera uchul me ngklou a ultutelel el ruungalek a kerekikl el melatk er a kerebai er tir? (Rom 2:21)

 ⁷ 2 el omellach: Molisechakl loeak a kerebai er kemiu. A rengalek omes er a rechad er a blirir e mesuub er tir. Nguaisei, a chedam me a chedil a diak lemecherrungel. (Rom 3:23) Engdi ngolechotel a llomeserreng sel lebora tkurrebab el klisichir el kutmeklii a ungil kerebai el kirir a rengelekir. (Monguiu er a Rom 2:21.) A ta el chedam a mesaod el kirir a rengalek el kmo: “Te di ua sponge el di beot er tir a absorb a rokui el tekoi.” Ngdirrek el melekoi el kmo: “Te mo ouchais er kid a lsekum a omerelled a diak le chatter er aike el tekoi el dolisechakl er tir.” Me a lsoad a rengeleked a bo lebetik a rengrir er a Jehovah, e ngkirel mesisiich a bltkil a rengud el mora Jehovah e tir a sebechir el mesang.

8-9. Ngera ke suub er a tekingel a Andrew me a Emma?

⁸ Ngbetok a rolel e a ruungalek a sebechir losisecheklterir a rengelekir el mo betik a rengrir er a Jehovah. Molatk a tekingel a 17 a rekil lodam el Andrew: “A rechad er a blik a ulsisecheklak er a klungel a ultutelel a doluluuch. Bek el kesus e a demak a meluluuch lobengkek mo lmuut me a lsekum ak mla meluluuch el di ngak el tang. A rechad er a blik a blechoel lomeklatk er kemam el kmo: ‘Ngkmal sebechem el meluluuch el mora Jehovah el betok el taem.’ Tia uchul me ak mlo omes er a nglunguuch el kmal klou a ultutelel. Chelechang e ngkmal beot er ngak a mengedecheduch er a Jehovah e omes er ngii el betik a rengul el Chedam.” Ruungalek lak mongkekerei er a lerellii el mora rengelekiu a klisichel a bltkil a rengmiu el mora Jehovah.

⁹ Ka mdirrek el melatk er a Emma. A demal er a lechitii a telungalek er tir e ngmlo uchul me a delal a mlo chelebangel a betok el blals. A Emma kmo: “Ngkmal mle betok aike el taem el delak a mlo ngesonges a ududel engdi ngika mle blechoel el melekoi el kmo a Jehovah omekerreu er a remesiungel e omesterir aike el lousbech. Ak milsa el kmo a klengar er ngii ochotii el kmo ngmera el oumerang er tia el tekoi. Ngika uleltirakl aike el lullisechakl er ngak.” Ngera klubeled er tiang? A ruungalek a sebechir el losisecheklterir a rengelekir loeak a kerebai er tir el mo lmuut er a chelsel a meringel el blekeradel.​—Gal. 6:9.

10. Ngera el techall el mo mengedecheduch er a rengelekir a lullab a rechedam me a rechedil er a Israel? (Duteronomi 6:6, 7)

¹⁰ 3 el omellach: Bo blechoel el mengedecheduch er a rengelekiu. A Jehovah dilu er a rechad er a Israel er a irechar el kmo, bo leblechoel lolisechakl er a rengelekir el kirel. (Monguiu er a Duteronomi 6:6, 7.) Tirka el chedam me a chedil a mla er ngii a betok el techellir er a chelsel a ta el sils el mo mengedecheduch er a rengelekir e dolemii a bltikerreng el mora Jehovah er a rengrir. El ua tiang, a ngalek el sechal er a Israel a locha mengoit a betok el sikang lobengkel a demal el melalem a dellomel me a lechub e ngmeridm a sim. A ochedal a locha mengoit er a klou el temel lobengkel a derrir el merasem, mengaus, e meruul a lmuut el bebil er a ureor er a blai. Me a chedam me a chedil me a rengalek sel ledak loureor e ngklou a temir el chadecheduch el kirel a meklou a ultutelel el tekoi. El ua tiang, ngsebechir el dmak el mesaod er a blekerdelel a Jehovah el ungilreng me a rolel e ngolengeseu er a telungalek er tir.

11. Ngera ta er a techall a ngar ngii el kirir a ruungalek el Kristiano el chadecheduch tir me a rengelekir?

¹¹ A blekeradel a mla mengodech. Ngar er a betok el beluu e a rechedam me a rechedil me a rengalek a diak el sebechir el blechoel el dmak. A ruungalek a locha oureor me a rengalek a ngar er a skuul. Sei a uchul me a ruungalek a kirir losiik a techall el mo mengedecheduch  lobengterir a rengelekir. (Efe. 5:15, 16; Fil. 1:10) A temel a omengull el telungalek a ta er a techall el sebechir el ousbech er ngii. A ngeasek lodam el Alexander a kmo: “A demak a blechoel el mengetmokl er a omengull el telungalek er kemam e kmal diak lebecherei a ngii di el ngerang me bo lorrob er tia el temam el dmak. Uriul er a omengull er kemam e aki mengoit a taem el di chadecheduch.”

12. Ngera ngkirel melatk a bdelul a telungalek sel loruul er a omengull el telungalek?

¹² A lsekum e kau a bdelul a telungalek, e ngera sebechem el meruul er ngii me a rengelekem a mo semeriar er a temel omengull el telungalek? Nglocha sebechem el mesuub er a Enjoy Life Forever! el lobengterir! Tia el babier a meskemiu a betok el techall el mo ungil chadecheduch. Ngsoam a rengelekem a louchais aike el ngar er a uldesuir me a rengrir me lak mousbech er a temel a omengull el telungalek el mellach me a lechub e ke mengokl er tir. Molasem el diak lebo lekesib a rengum a lsekum e te ouchais a uldesuir el ngii a diak loltirakl omellach er a Biblia. Bai bo ledeu a rengum e le te ouchais a mera el ngar er a uldesuir, e molisiich er tir el mo blechoel el meruul el uaisei. Ngdi sebechem el mo ungil ngosuterir a rengelekem sel bo modengei aike el mera el ngar er a uldesuir me a rengrir.

13. Ngera dirrek el bebil er a techall el ruungalek a sebechir lousbech lolekeed er a rengelekir er a Jehovah?

¹³ Ruungalek, mosiik a techall er a bek el sils el mo olengeseu er a rengelekiu el mo kmeed er a Jehovah. Ngdiak mousbech el mengiil el mo temem el mesuub lobengterir el mo meruul er tiang. Molatk a tekingel a chedil Lisa: “Aki olengeseu er a rengelekam el mo medengelii a Jehovah loeak a blebelel. El uai tiang, a chermam el bilis sel lerellii a kmung ngngerang el rulleterir a rengelekam el mo ocherchur e aki smodii el mo er tir el kmo, ngike el Ulemeob a dirrek el chad er a oltobedechur e dmeu a rengul el Dios el soal a doldeu er a rengud.”

14. Ngera uchul me ngklou a ultutelel el ruungalek a ngosuterir a rengelekir el mo ungil melilt er a resechelirir? (Osisechakl 13:20)

¹⁴ 4 el omellach: Mngesuterir a rengelekiu el mekeroul a ungil klausechelei. A tekingel a Dios a meketeklii el kmo a resechelid a ngar ngii a lerellii er kid. Ngsebechir el ngosukid el mo ungil me a lechub e te rullid el mo mekngit. (Monguiu er a Osisechakl 13:20.)  Ruungalek, kemiu ko medengelterir a resechelirir a rengelekiu? Ngmla ta el mongedecheduch e mongoit a taem el obengterir? Ngngera sebechiu el meruul el ngosuterir a rengelekiu el mo mak a klausechelei er tir lobengterir tirke el betik a rengrir er a Jehovah? (1 Ko. 15:33) Ngsebechem el ngosuterir el mak a ungil klausechelei loeak sel em invite er tirke el ngar ngii a ungil deleuill er tir el lobengkel a Jehovah el me teloi er kemiu el meruul a tekoi lobengterir a rengelekiu.​—Psa. 119:63.

15. Ngngera ngsebechir a ruungalek el meruul el ngosuterir a rengelekir el mak a ungil klausechelei?

¹⁵ Molatk er a experience er a chedam el Tony. Ngouchais aike el bla leruul ngii me a bechil el ngosuterir a rengelekir el melilt er a rungil sechelei: “Ngar aika el mla mo merek el rak e ngak me a bechik a mla invite er a remeklou me a remekekerei el odam me a odos el mei er a blimam. Aki dmak lomengur e meruul er a omengull el telungalek er kemam. Tia ungil rolel e kede mo ungil medengelterir tirke el betik a rengrir er a Jehovah e mesiou er ngii loba deurreng. Ngngar ngii a re circuit overseer, missionari, me a re lmuut el bebil el mla me kiei el obengkemam. A experience er tir me a blakerreng er tir a kmal klou a lerirellii el mora rengelekam e mla ngosuterir el mo kmeed er a Jehovah.” Ruungalek mrellii er a rengmiu el mo ngosuterir a rengelekiu el mo mak a ungil klausechelei.

16. Ke mo mekerang a lsekum a ngelekem a kmo ngdiak el soal mesiou er a Jehovah?

¹⁶ Engdi ke mo mekerang a lsekum e ke meruul aike el rokui el sebechem e a ta er a rengelekem, a kmo ngdiak el soal mesiou er a Jehovah? Lak momdasu el kmo ngdimlak mrellii a ngerechelem el chedam me a chedil. A Jehovah a mesterir a rokui el chad el uldimukl er a rengelekem a ilmeklir el melilt, el mo mesiou er ngii me a lechub e ngdiak. A lsekum a ngelekem a ngiltii el mo cheroid er a Jehovah e molemolem loba omelatk el kmo a ta er a klebesei e nglmuut el mei. Lak mobes er a okesiu er a ririid el ngalek. (Lk. 15:11-19, 22-24) Ngika el ngalek a mlo remuul a kmal betok el mekngit engdi a uriul e ngliluut el mei. A rebebil a locha mo kmo: “Tia di okesiu. Ngmera el sebechel duubech?” Ngkmal sebechel! Tia experience er a kekerei el chad el Elie.

17. Ngmekera e melisiich er kau a experience er a Elie?

 ¹⁷ A Elie mesaod el kirel a rechad er a blil el kmo: “Te mlora tkurrebab el sebechir lolengeseu er ngak el mo betik a renguk er a Jehovah me a Tekingel el Biblia. Engdi sera bo kngeasek e ak mlo omtok.” A Elie mlo omart er ngii e meruul a mekngit. A rechad er a blil a mle sorir el olengeseu er ngii el melemolem el kmeed er a Jehovah engdi ngultngeklterir. Sera letobed el mo diak el kiei el obengterir e ngmlo meruul a mekngit. Me nguaisei engdi ngika lebebil e ngmesaod er a Biblia el obengkel a ta er a resechelil. A Elie a kmo: “Bek el taem el kusaod el kirel a Jehovah el mora sechelik e ak mera el mo melatk el kirel a Jehovah. Omerollel a taem e a tane er a klemerang el ledillemii er a renguk a rechad er a blik engdi mle ulekoad a milekekokil mukeroul.” Cherengel a taem e a Elie liluut el mei er a klemerang. * Molatk er a deuil a rengrir a rechad er a blil e le te ullengeseu er ngii el mo betik a rengul er a Jehovah er a ledirk kekerei!​—2 Ti. 3:14, 15.

18. Ngua ngera uldesuem el kirel a meringel el urerir a ruungalek el olisechakl er a rengelekir el mo betik a rengrir er a Jehovah?

¹⁸ Ruungalek, a Jehovah mla meskemiu a ileakl el techall el mo omekeroul er a beches el telecheroll er a remesiungel. (Psa. 78:4-6) Tia diak lebeot me aki kmal chemat er a meringel el ureriu lolengeseu er a rengelekiu! Omolemolem el meruul aike el rokui el sebechiu el olengeseu er a rengelekiu el mo betik a rengrir er a Jehovah e mo omekeroul er tir el oba omellach me a osisechakl er a Jehovah, e ngkmal sebechel mo ulterekokl a rengmiu el kmo ko modeuir a rengul a Demad el ngar er a eanged.​—Efe. 6:4.