1. Ngmekera Biblia losaod er a mera el bltikerreng?

 “A NGEUIL [a bltikerreng] a kmard el ua mesisiich el ngau, ngngeuil a Jah. A kloul ralm a diak el sebechel el mekodir a bltikerreng, ma eeleb a ka bo lelebii.” b (Sal. 8:6, 7, NW) Tia mera el klebokel lomesodel a mera el bltikerreng. Aika el tekoi a melisiich a rengrir a rebechiil el chad: Ngsebechel mo er ngii a diak lengemed el bltikerreng er a delongeliu.

2. Ngera kirir a rubekel el meruul er ngii me lak el bo lemekelekolt a bltikerreng er a delongelir?

² Ngkmal di ultuil er a rebechiil el chad el kmo, ngmo er ngii a diak lengemed el bltikerreng er a delongelir er a klemengetel a klengar er tir el rokir, me a lechub e ngdiak. Ngsebeched lomekesiu er ngii er a ngau. Tia sebechel melemolem el kmard el diak a ulebengelel a lsekum kede olsiu er a ngeuil. A lsekum e ngdiak e ngdi merael el mo el mad. Ngdi osisiu a bltikerreng er a delongelir a rebechiil el chad a sebechel el melemolem el mesisiich a lsekum e te melisiich er a deleuill er tir. Engdi a lebebil a rubekel a mo omelechesiu el kmo a bltikerreng er a delongelir a mekelekeltang, tokubets a lsekum e te chuarm le ngringelel a udoud a uchul, tekoi er a secher, me a lechub e ngringelel okurulir a rengalek. Me a lsekum ke bechiil e ngmekera sebechel a ‘ngeuil a Jah’ el melemolem el kmard er a chelsel a chebechiieliu? Ngar tia el suobel e kede mo mesaod edei el rolel e ngsebechel melemolem el mesisiich a deleuill er kemiu e oldeu a rengmiu er a chebechiil el ngar ngii a deurreng er ngii. c

3. Ngmekera mesisiich el deleuill lobengkel a Jehovah e ngosuir a obekel el melemolem el mesisiich a bltikerreng er a delongelir? (Olisechakl 4:12) (Dirrek el momes er a siasing.)

³ A lolemolem el kmard a ‘ngeuil a Jah’ e a bechiil el sechal me a redil a kirir el meringel loureor me lengar ngii a mesisiich el deleuill er tir me a Jehovah. Ngmekera tia el deleuill e ngosuir a chebechiielir? A obekel sel lomes er a deleuill er tir me a Demerir el ngar er a eanged el kmal klou a ultutelel, e te kltmokl el mo oltaut a ulekrael er ngii, e tia mo ngosuterir el chorideterir er a mondai e dirrek el sumechokl a mondai el ngii a sebechel kolekeltii a bltikerreng er a delongelir. (Monguiu er a Olisechakl 4:12.) A rechad el mesisiich a deleuill er tir me a Jehovah mora tkurrebab el sebechir el oukerebai e omekeroul a blekerdelel, el ua ungilreng, kllourreng, me a klausubes. (Efe. 4:32–5:1) Obekel lolecholt aika el blekeradel a rullii el mo beot er a bltikerreng el meloseb. A odos el Lena el mla bechiil el betok er a 25 el rak a kmo, “Ngbeot er kid a mo betik a rengud e mengull er a chad el mesisiich a deleuill er ngii me a Jehovah.”

4. Ngera uchul me a Jehovah ngileltii a Josef me a Maria el mo demal me a delal ngike el mo Mesias?

⁴ Molatk er a kerebai el ngar er a Biblia. A Jehovah er a lebo el kirel el melilt er a obekel el mo demal me a delal ngike el mo Mesias, e a rokui el ruldidellel a rsechel a David e ngileltii a Josef me a Maria. E ngerang? A derta er tir a mla er ngii a deleuill er tir me a Jehovah, me a Jehovah mle medengei el kmo te mo meruul er a chebechiielir el mo iliuekl er a bltkil a rengrir el mo er ngii. Rebechiil el chad, ngera sebechiu el suub er a Josef me a Maria?

5. Ngera sebechir a rebechiil el sechal el suub er a Josef?

⁵ A Josef a mle kltmokl el mo oltaut a ulekrael er a Jehovah, e tia rirellii el mo ungil bechiil el sechal. Edei el taem e ngngilai a ulekrael er a Dios el kirel a telungalek er ngii. Bek el taem e ngdi mle mereched el mo oltirakl, mo lmuut me a leblo luchul a klou el omelodech. (Mt. 1:20, 24; 2:13-15, 19-21) A Josef luleltirakl a ulekrael er a Dios a uchul me ngmle sebechel lomekerreu er a Maria e msa ike el lousbech. Molatk er a rolel e a omerellel a rirellii el lmuut el mo klou a bltikerreng me a omengull er a Maria el mo er ngii! Rebechiil el sechal, ngsebechiu loukerebai er a Josef loeak a mosiik er a ulekrael er a Biblia el kirel a rolel omomekerreu er a telungalek er kemiu. d Sel moltaut er tia el ulekrael mo lmuut me a lebo el kirem el meruul omelodech, e ke ochotii a bltkil a rengum el mora bechim e smisichii a chebechiieliu. A odos er a Vanuatu el mla bechiil el betok er a 20 el rak a kmo: “A bechik sel losiik a ulekrael er a Jehovah e loltaut, e nglmuut el mo dmolech omengull er  ngak el mo er ngii. A kumelechesiu er ngak el selebechakl, e ulterekokl a renguk el kirel omelilt loruul.”

6. Ngera sebechir a rebechiil el redil el suub er a Maria?

⁶ A Maria mla er ngii a deleuill er ngii me a Jehovah. A klaumerang er ngii a dimlak lultuil er a tekoi lurruul a Josef. Ngika mle ungil medengei a bades. Ngdirrek el uterekeklii a taem el mo melebedebek. (Lk. 2:19, 51) Ngsebechel mo ulterekokl a rengud el kmo a deleuill er ngii me a Jehovah a rirellii el mo ungil bechiil el redil. Chelecha el taem a rebetok el bechiil el redil a melasem el mo ua Maria. El ua tiang, a odos el Emiko a kmo: “Sera kmesobil e ngmla er ngii a schedule er ngak er a tekoi er a klereng. Engdi uriul er a bo kbechiil e a bechik a milluluuch el kiram e ulemekrael omengull er kemam me ak mlo mtebengii el kmo, a klaumerang er ngak a mlo ultuil er aika el loruul. Ngmle kirek el di mo ngak loureor el kirel a deleuill er ngak me a Jehovah. Me chelechang ak mla kutmokl a taem el di ngak el tang lobengkel a Dios er ngak el meluluuch, menguiu a Bades, e melebedebek a uldesuel.” (Gal. 6:5) Rebechiil el redil sel molemolem el melisiich er a deleuill er kemiu me a Jehovah e ngmedechel a uchul me a rebechemiu a betik a rengrir er kemiu e oldanges er kemiu.​—Osi. 31:30.

7. Ngera sebechir a rubekel el suub er a Josef me a Maria el kirel a mo dmak el meruul omengull er tir?

⁷ A Josef me a Maria dirrek el dilak loureor el melisiich er a deleuill er tir me a Jehovah. Te mle medengelii a klungel a ultutelel a ledak el mengull er a Jehovah el telungalek. (Lk. 2:22-24, 41; 4:16) Nglocha mle meringel er tir a meruul el uaisei er a lebo leklou a telungalek er tir, engdi ngmle sebechir el meruul er ngii. Te mera el ungil kerebai el kirir a rebechiil el chad er chelecha el taem! A lsekum e ngngar ngii a rengelekem el ua Josef me a Maria, e nglocha meringel omngar er a miting me a lechub e mongetmokl er a taem el mo mengull el telungalek. Me a lmuut kung, nglocha kmal meringel er kemiu a metik a taem el obekel el mesuub me a lechub e ko meluluuch el terung. Engdi lak mobes el kmo sel omdak el mengull er a Jehovah, e ko mo kmeed er ngii me a ta me a tang. Me mrellii a omengull el mo klou a ultutelel.

8. Ngera sebechir a rubekel el ngar ngii a mondai er a chebechiielir el meruul er ngii me lengai a klungiolir er a omengull el telungalek er tir?

⁸ Engdi ngmekera a lsekum e ngngar ngii a mondai er a chebechiieliu? Nglocha diak el somiu el dmak el meruul omengull. A leuaisei, momuchel loeak sel mongoit er a di kedeb el taem el mesaod er a tekoi el kemiu el terung a somiu. Tia sebechel smisichii a delongeliu e mekurulii a urunguliu el mo somiu el dmak el mengull er a Jehovah.

9. Ngera uchul me a bechiil el sechal me a redil a kirir el mengoit a taem el dmak?

⁹ Rubekel, sel omongoit a taem el dmak e ngrullii a bltikerreng er a delongeliu me ngmelemolem el mesisiich. Sel moruul er tiang e ngmo uchul me ngdiak bo mchacheroid. (Gen. 2:24) Molatk a blo lodengelii a Lilia me a Ruslan er a uriul er a bo lebechiil er a betok er a 15 el rak er a mla me mong. A Lilia kmo: “Aki mlo mtebengii el kmo ngdiak leklou a temam el dmak. Aki mle mechesang loureor, meruul a ureor er a blai, e a uriul e ngmlo er ngii a rengelekam. Aki mlo mesa el kmo a lsekum e ngdiak ki mongoit a taem el dmak el obekel, e ngsebecham el mo chacheroid.”

10. Ngmekera rubekel e sebechir loltaut er a omellach el ngar er a Efesus 5:15, 16?

¹⁰ Ngera sebechir a rubekel el meruul loterekeklii el kmo te mengoit a taem el dmak? Nglocha kirem el mo kutmeklii a taem me a lechub  e ng schedule er kemiu el dmak. (Monguiu er a Efesus 5:15, 16.) A odam el Uzondu er a Nigeria a kmo: “Sel ek schedule a tekoi el kuruul e ak kutmeklii a taem el di ngak me a bechik a dmak el mengoit er ngii, e rullii el mo klou a ultutelel.” (Fil. 1:10) Molatk er a rolel e a Anastasia el bechil a circuit overseer er a Moldova, a ungil lousbech a temel. Ngkmo: “Ak melasem el meruul aike el kirek el meruul sel lemechesang a bechik er a ngerechelel. Seikid e ngmo sebecham el mengoit a taem el dmak er uriul.” Engdi ngmekerang a lsekum a schedule er kau a rullii el mo meringel er kemiu a metik er a taem el dmak?

11. Ngera te dilak el meruul er ngii a Akuila me a Prisila?

¹¹ Rubekel a sebechir el ngmai a klubelir er a Akuila me a Prisila, el obekel el rekot el Kristiano kmal mle betik a rengrir er tir. (Rom 16:3, 4) Alta Biblia diak louchais a betok el kirel a chebechiielir engdi ngouchais el kmo te dilak loureor, omerk er a klumech, e olengeseu er a rebebil. (Rel. 18:2, 3, 24-26) A Biblia sel losaod er a Akuila me a Prisila e te blechoel el dmak.

12. Ngera sebechel a bechiil el sechal me a redil el meruul el mengoit a taem el dmak? (Dirrek el momes er a siasing.)

¹² Ngmekera rubekel e sebechir loukerebai er a Akuila me a Prisila? Molatk aike el betok el tekoi el kirem kau me a bechim el meruul. Ngsebechem el dmak el meruul el terung, er a bai di lekau el tang? El ua tiang, a Akuila me a Prisila dilak lomerk er a klumech. Kemiu, ko mblechoel el melib el dirrek el mo meruul el uaisei? A Akuila me a Prisila dirrek el dilak loureor. Kau me a bechim a locha diak losisiu a ureriu, engdi kemiu ngsebechiu el dmak el meruul a ureor er a blai? (Oli. 4:9) Sel mkaingeseu el meruul a ureor e ko mo feel el one el team e mo er ngii a techelliu el chadecheduch. A Robert me a Linda mla bechiil el betok er a 50 el rak. A Robert a kmo: “Ngdiak el klou a temam el dmak el meruul a rolel a tekoi er omilil. Engdi sel kullib a belatong e a bechik losuld, me a lechub sel kngar rikl el melaml e ngii a me tuobed e oureor lobengkek, e ngmera el mo dmeu a renguk. Sel ki mdak el meruul a tekoi e ngolekeed er kemam el terung. A bltikerreng er a delongelam a melemolem el mukeroul.”

13. A bechiil el sechal me a redil a bo lemera el dmak el mengoit a taem, e ngngera kirir el meruul er ngii?

¹³ Engdi lak mobes el kmo, a obekel el dmak a diak leblechoel el belkul a kmo tia olekeed er tir el terung. A bechiil redil er a Brazil a kmo: “Chelecha el taem el kmal betok a tekoi el sebechel mo mengesang er kid, e ngsebeched el mo omdasu el kmo kede mengoit a taem el dmak le kede kiei er chimo el blai. Ak mla suubii el kmo a mengoit a taem el dmak a di tedobech er ngii. Ngkirek el msa bechik a attention lousbech er ngii.” Molatk er a rolel e a Bruno me a bechil er a Tays a make sure el kmo ngomsa bechil a attention. A Bruno kmo: “Sel lengar  ngii a free el temam, e aki mo mechei a dengua er kemam, e mengoit a taem el terung.”

14. A lsekum obekel a diak el sorir el dmak, e ngera sebechir el meruul er ngii?

¹⁴ Engdi ngmekerang a lsekum kau me a bechim a diak el somiu el mengoit a taem el dmak? Nglocha kakerous a tekoi el somiu me a lechub e ngmo seselk a rengum er ngii. Ngera sebechem el meruul er ngii? Molatk er sel okesiu er a ngau el dulsaod er ngii er a uchei. A ngau diak leklou a ngeuil sel obekerdii. Ngkirem el mekekokau lousbech a meklou el kerrekar lolsiu er ngii. Ngdi osisiu, kemiu ngsebechiu lomuchel loeak omongoit a di sesei el taem er a bek el sils el dmak? Moruul er a tekoi el somiu el terung, el diak el tekoi el sebechel mo uchul a mondai. (Jak. 3:18) Sel momuchel el kekerei, e ngsebechel a bltikerreng er a delongeliu el lmuut el mukeroul.

15. Ngera uchul me a omengull a klou a ultutelel el kirel a bltikerreng er a delongelir a rubekel?

¹⁵ A omengull a klou a ultutelel er a chelsel a chebechiil. E ngsel eolt lousbech er ngii a ngau el mo melemolem el mesisiich a ngeuil. A lak a eolt e ngdi mereched el mad a ngau. Ngdi osisiu, a lak omengull e a rubekel a mo mesa el kmo, a bltikerreng er a delongelir a di mereched el mo mekelekolt. Engdi a bechiil el sechal me a redil el mora tkurrebab el sebechir el kaiuecholt omengull a meringel loureor me ngdiak el mad a bltikerreng er a delongelir. Engdi ngdiak el kau el lomdasu el kmo ke olecholt omengull el mo er ngii, e ngbai sel lsekum a bechim a feel el kmo ke mengull er ngii. A Penny me a Aret a mla bechiil el betok er a 25 el rak. A Penny kmo: “Kemam el kaiuecholt omengull a uchul me a blimam a basio el mui er a bltikerreng. Ngbeot er kemam a kauchais a uldesuam e le ki medengei el kmo ngike el tang omes er a uldesuem el klou a ultutelel.” Me ngngera sebechem el meruul er ngii el ngosuir a bechim el mo feel el kmo ke mera el mengull er ngii? Molatk er a kerebil a Abraham me a Sara.

16. Ngera sebechir a rebechiil el sechal suub er a Abraham? (1 Petrus 3:7) (Dirrek el momes er a siasing.)

¹⁶ Abraham ulechotii omengull el mora Sara. Ngmillatk a uldesuel me a rengul a Sara. A ta el taem e a Sara kmal mlo oberaod a rengul me nguluuchais er a Abraham aike el mlara rengul, mo lmuut er a oltelechakl er a Abraham. A Abraham ngngilasech a rengul e dilu er ngii a diak lungil tekoi? Ngdiak. Ngmle medengei el kmo a Sara ungil bechiil el redil el mle chederedall er ngii e ulerrenges er ngii. Me a Abraham ulerrenges er ngii e millasem el mesmechokl er tia el mondai. (Gen. 16:5, 6) Ngngera sebeched el suub? Rebechiil el sechal, e ngngar ngii a llemeltiu el meruul omelilt el kirel a telungalek er kemiu. (1 Ko. 11:3) Engdi ngolechotel a bltikerreng omolatk er a uldesuel a bechim er a uchei er omoruul omelilt, tokubets a lsekum e ngngar ngii a bo lerellii  el mo er ngii. (1 Ko. 13:4, 5) Ngngar ngii aike el taem el bechim a locha mo stress e ousbech louchais er kau aike el ngar er a rengul. Kau, ke mo ochotii el kmo ke mengull er a uldesuel loeak sel omkerekikl lorrenges er ngii? (Monguiu er a 1 Petrus 3:7.) A Angela me a Dmitry a mla bechiil el bekord el 30 el rak. Ngmesaod el kirel a rolel e a bechil a rullii el mo feel el kmo ngmengull er ngii: “A Dmitry a blechoel el kltmokl lorrenges er ngak sel lengar ngii a mengesang er ngak me a lechub e ngsel di kuusbech el mengedecheduch. Ngoba kllourreng, mo lmuut er sel kungedecheduch el mla mo diak kuba chelellakl el reng.”

17. Ngera sebechir a rebechiil el redil suub er a Sara? (1 Petrus 3:5, 6)

¹⁷ Sara ulechotii omengull el mora Abraham loeak a le support omelilt er ngii. (Gen. 12:5) A ta el taem e a Abraham a mlo omtechakl er a rechad el dimlak le expect er tir el mei. Ngullengit er a Sara me lechoit aike el loruul e leruul a betok el blauang. (Gen. 18:6) A Sara di mle mereched el mo remuul aike el ledilung a Abraham. Rebechiil el redil, ngsebechiu loukerebai er a Sara loeak sel em support a omelilt er a rebechemiu. Sel moruul el uaisei, e kom smisichii a chebechiieliu. (Monguiu 1 Petrus 3:5, 6.) A Dmitry el dulsaod er ngii er sel uleak uchei el parakurab, a mesaod er a rolel e a bechil a rullii el mo feel el kmo ngmengull er ngii. Ngkmo: “Ak appreciate er a Angela el support omelilt er ngak, mo lmuut me a lsekum e ngdiak el ta uldesuam el kirel. A lsekum e ngmo diak lungil omelilt er ngak, e ngdiak lolekoi a kngtik.” Ngmera el beot er kid a betik a rengud er a chad el mengull er kid!

18. Ngmekera mo uchul a klungiolir a rubekel a loureor el meringel me lolemolem el mesisiich a bltikerreng er tir?

¹⁸ A Satan er chelecha el taem a soal rulleterir a rebechiil el chad el mo diak el kaubltikerreng. Ngmedengei el kmo sel lebo lak el kaubltikerreng e te mo merael el mo cheroid er a Jehovah. Me nguaisei engdi a mera el bltikerreng a diak a sebechel mekodir! Me a bltikerreng er a chebechiielem bo leua bltikerreng el losaod er ngii a Cheliteklel a Salomon. Mrellii er a rengum el nguu a Jehovah el mo kot er a chelsel a chebechiieliu, mongoit a taem el dmak, e mkaiuecholt omengull el kirel a uldesuel a tang me a tang me aike el lousbech. Sel moruul el uaisei, e a chebechiieliu a mo uchul a klebkall el mo er ngike el Uchul a mera el bltikerreng el Jehovah. E di ua ngau el lekerekikl er ngii, a bltikerreng er kemiu a mo mesisiich er a klemengetel a klengar er kemiu.