1. A Jehovah ngera ngolengit er a remesiungel el mo meruul er ngii? (Dirrek el momes er a siasing.)

 NGTECHA sebeched el mo er ngii sel dousbech ongelaod me a ulekrael? Kede medengelii a nger tiang. Ngkmal sebeched el meluluuch el mora Jehovah el Dios. E a Jehovah olengit er kid el mo meruul er tiang. Ngsoal a deblechoel el meluluuch, e ‘lak demekimd el meluluuch.’ (1 Th. 5:17, BT) Ngsebeched el mimokl el meluluuch el mo er ngii lolengit a ulekrael el kirel a ngii di el tekoi er a klengar er kid. (Osi. 3:5, 6) A Jehovah kmal bekururau el Dios el diak loluk er a ildisel a taem el sebeched el meluluuch el mo er ngii.

2. Ngera kede mo mesaod er tia el suobel?

² Kede kmal mengreos er a sengk er a nglunguuch. Me nguaisei engdi ngkmal betok a kired el meruul me nglocha meringel er kid a metik a taem el mo meluluuch. E locha omelechesiu el kmo a nglunguched a sebechel lmuut el mo ungil. Kede oba omereng el saul le ngsebeched el metik omelisiich me a ulekrael er a Bades el kirel tiang. Ngar tia el suobel e kede mo mesaod a rolel e ngsebeched el kutmokl a temed el mo meluluuch loeak a dorriter er a kerebai er a Jesus. Kede dirrek el mo mesaod er a rolel e ngsebeched el remuul a nglunguched el lmuut el mo ungil loeak sel doluluuch el kirel a eim el meklou a ultutelel el tekoi.

3. Ngera ngmle medengelii a Jesus el kirel a nglunguuch?

³ A Jesus a mle medengei el kmo a Jehovah omes er a nglunguuch el kmal klou a ultutelel. Uchei er a lemei er tia el chutem, e ngulemes er a Demal el onger a nglunguchir a reblak a rengrir el sechal me a redil. El ua tiang, a Jesus a ulebengkel a Demal er sel taem er a longer a nglunguchel a Hana, David, Elias, me a lmuut el bebil. (1 Sa. 1:10, 11, 20; 1 Ki. 19: 4-6; Psa. 32:5) Sei a uchul me ngullisechakl er a redisaiplo er ngii el mo blechoel el meluluuch loba ulterekokl el reng!​—Mt. 7:7-11.

4. Ngera kede suub er a nglunguchel a Jesus?

⁴ Ngoeak a nglunguchel el mora Jehovah e a Jesus a kiltmeklii a kerebai el kirir a redisaiplo er ngii. A Jesus er a loruul er a omesiungel e ngmle blechoel el meluluuch. Ngmle kirel kutmeklii a taem el mo meluluuch e le ngkmal mechesang e mle blechoel el iliuekl er a rebetok el chad. (Mk. 6:31, 45, 46) Ngulemkokl a letutau me lengar er ngii a temel di ngii el tang el meluluuch. (Mk.1:35) A ta el taem e ngmilluluuch el ta el kesus er a uchei er a bo loruul er a kmal klou a ultutelel omelilt. (Lk. 6:12, 13) E milluluuch el betok el taem er sel kesus er a uchei er a lemad, er uchei er a bo loruul er sel kot el meringel el telengtengil omesiungel er tia el chutem.​—Mt. 26:39, 42, 44.

5. Ngmekera sebeched el mo oukerebai er a Jesus sel doluluuch?

⁵ A kerebil a Jesus ochotii el kmo, alta kede kmal mo mechesang engdi ngkired el kutmeklii a temed el mo meluluuch. Kede locha uai ngii el kired el kutmeklii a ileakl el taem el mo meluluuch. Nglocha kired el mereched el mekiis a letutau me a lechub e kede mekar el telkib er a uchei er a bo demechiuaiu el mo meluluuch. Sel doruul el uaisei e kede ochotii el mora Jehovah el kmo kede oba omereng el saul el kirel tia el kmal ileakl el sengk. A odos el Lynne a melatk er a rolel e ngkmal rirtechii a rengul er sel taem er a lsuubii el kirel a ileakl el sengk er a nglunguuch. Ngmelekoi el kmo: “Sera ksuubii el kmo ngsebechek el mengedecheduch er a Jehovah er a ngii di el taem, e ngngilsukak el mo omes er ngii el kmeed el Sechelik e rirellak el mo soak el remuul a nglunguchek el mo ungil.” Te rebetok er kid a dirrek el kmal lomelechesiu el uaisei. Mada me dosaod eim el meklou a ultutelel el tekoi el sebechel mo uldimukl er a nglunguched.

6. A doltirakl er a Ocholt 4:10, 11, e a Jehovah ngrredemelel a ngmai a ngerang?

⁶ Moldanges er a Jehovah. A apostol Johanes a milsa er a ues a re 24 el mechuodel el ngar er a eanged el mengull er a Jehovah. Te uleldanges er a Jehovah e millekoi el kmo ngrredemelel a nguu a “klebkall, ma odanges,  ma klisiich.” (Monguiu er a Ocholt 4:10, 11.) A reblak a rengrir el anghel me ngdirrek el kmal betok a uchul me te oldanges e mengebkall er a Jehovah. Te ngar er a eanged lobengkel, e kmal mla mo ungil medengelii a Jehovah. Ngodbecheterir el mo oldanges er a Jehovah sel lomes a tekoi el loruul.​—Job 38:4-7.

7. Ngera sebeched loldanges er a Jehovah el kirel?

⁷ Kid me ngdirrek el kired el oldanges er a Jehovah er a nglunguched, loeak sel douchais er ngii aike el uchul me ngbetik a rengud er ngii e oba omereng el saul el kirel. Sel monguiu e mosuub er a Biblia, e molasem el omtab aike el blekerdelel a Jehovah el kmal soam. (Job 37:23, NW; Rom 11:33) E mouchais er ngii er a uldesuem el kirel aika el blekerdelel. Ngdirrek el sebeched el oldanges er a Jehovah el kirel aike el loruul el kired me a rokui el chedal a telungalek er kid er a klereng. Ngika kmal blak a rengul el omekerreu er kid.​—1 Sa. 1:27; 2:1, 2.

8. Ngera bebil er aike el betok luchul me ngkired el mereng a sulel a Jehovah? (1 Thesalonika 5:18)

⁸ Moreng a sulel a Jehovah. Ngbetok a uchul me kede mereng a sulel a Jehovah sel doluluuch. (Monguiu er a 1 Thesalonika 5:18.) Ngsebeched el mereng a sulel el kirel aike el ungil ngar ngii er kid, e le rokui el lungil ngar ngii er kid a mla er ngii el mei. (Jak. 1:17) El ua tiang, ngsebeched el mereng a sulel er tia el beluulechad el kmal klebokel me aika el mengasireng el blebelel. Ngdirrek el sebeched el mereng a sulel er a klengar er kid, telungalek er kid, resechelid, me a omelatk el dobang. E soad el mereng a sulel a Jehovah el kongei er kid el mo er ngii a mekreos el deleuill er kid el lobengkel.

9. Ngera uchul me nglocha mo kired el mekurulii omereng el saul er kid el mora Jehovah?

⁹ Nglocha mo kired el meringel loureor el melatk aike el luchul me a derta er kid a oba omereng el saul el kirel a Jehovah. Kede kiei er a beluulechad el rechad er ngii a diak loba omereng el saul. A rechad a blechoel el di melatk aike el sorir e diak lolatk el kmo ngngera sebechir el meruul lolecholt omereng el saul el kirel aike el ngar ngii er tir. A lsekum kede mechetakl er tia el blekeradel e a nglunguched a sebechel di mo mesaod ongtid. Ngkired el melemolem el omekeroul e olecholt er a omereng el saul el kirel aike el loruul a Jehovah el kired me lak bo leuaisei a nglunguched.​—Lk. 6:45.

10. Ngmekera omereng el saul e ngilsuir a ta el odos el outekangel? (Dirrek el momes er a siasing.)

¹⁰ Sel doba omereng el saul e ngsebechel ngosukid loutekangel a ringel. Molatk er a experience er a Kyung-sook el losaod er ngii a January 1, 2015 el Ongkerongel. Ngika miltik el kmo ngkasinoma olemedel, e mla obriid. Ngmelekoi el kmo: “Tia el secherek a kmal chiltechetur a renguk. Ak mlo feel el kmo ak mla oriid a rokui el tekoi er a klengar er ngak, e kmal mlo medakt.” Ngera ngilsuir loutekangel? Ngmelekoi el kmo a bek el kesus er a  uchei er a bo lebechiuaiu e ngmora chetebtel a blil e meluluuch el klou a ngerel el kirel a eim el tekoi el loba omereng el saul el kirel er seikid el sils. Tia rirellii el mo diak el sal louedikel a rengul e uldbechii el mo ouchais er a bltkil a rengul el mora Jehovah. Ngmlo melechesuar a rolel a Jehovah olengeseu er a reblak a rengrir el mesiungel sel bo lechelebangel a meringel el omelsemai, e mlo mtebengii el kmo nglmuut el betok a klengeltengat er a klengar er kid er a omelsemai. Ngdi ua Kyung-sook, ngkmal betok a uchul me kede mereng a sulel a Jehovah, mo lmuut me a dechebangel omelsemai. Sel doluluuch louchais omereng el saul er kid el mo er ngii e ngsebechel ngosukid loutekangel e melemolem el dmeu a rengud.

11. Ngera uchul me a redisaiplo er a Jesus uluusbech er a blekeu er a lluut el mora eanged a Jesus?

¹¹ Molengit er a Jehovah me lebeskau a blekeu sel momerk er a klumech. Uchei er a lluut el mora eanged a Jesus e ngulemeklatk er a redisaiplo er ngii el kirel a ngerechelir el mo sioning el kirel “er a Jerusalem, ma Judea el rokir, ma Samaria, el mo lmuut er a bek el beluu er a beluulchad.” (Rel. 1:8; Lk. 24:46-48) Kedeb el taem er uriul er tiang e a remengeteklir a Rechijudea kilebsengii a apostol Petrus me a Johanes e ngiltiterir el mora medal olbiil, e dmu er tir me lemeterob lomerk, e orrouk er tir. (Rel. 4:18, 21, BT) Me ngmilekera Petrus me a Johanes?

12. A doltirakl er a Rellir 4:29, 31, e ngera te mirruul er ngii a redisaiplo?

¹² Me a Petrus me a Johanes a dilu er a remengeteklel a klechelid er a Judea el kirel a ulekdakt er tir el kmo: “Ka di le kemiu el merriter er ngii el kmo ngera melemalt er medal a Dios, a kim olengesenges er kemiu ma lechub e kim olengesenges er a Dios? Kemam a diak el sebecham el mo lmuk el diak kim ouchais a ikel bla kim ues ma bla kim renges.” (Rel. 4:19, 20) Sera letobed er a kelebus a Petrus me a Johanes, e a redisaiplo milluluuch el mora Jehovah el kirel a mo meruul er a soal. Te milluluuch el kmo: “Beskemam a re mesiungem a blekeu el mengedecheduch a tekingem.”​—Monguiu er a Rellir 4:29, 31.

13. Ngera sebeched el suubii er a kerebil a Jin-hyuk?

¹³ Ngsebeched loukerebai er a redisaiplo loeak sel dolemolem lomerk, a ledu remengedereder me destob lomerk. Molatk er a odam el Jin-hyuk el mlekelebus le ngii el dimlak el kengei el omekbitang. Sera lengar er a kelebus e ngmlukngerachel el mo omekerreu er a rekelebus, el tir a di tir el tang el diak el teloi er a rokui el kelebus. Ngika dimlak el sebechel mesaod a ngii di el tekoi er tir, luldimukl er a Biblia. Ngdi mle sebechel mesaod el mo er tir aike el tekoi luluusbech. Ngmilluluuch lolengit er a blekeu me a llomeserreng el mo omerk er a bek el techall. (Rellir 5:29) Ngkmo: “A Jehovah ulenger er a nglunguchek er a lebeskak a blekeu me a llomeserreng el mo omuchel a betok el omesubel a Biblia el di eim el bung er a chesmerel a blil a kelebus el lemla er ngii tirka el chad. E sel klebesei e ak lemuches a babilengek el mo er tir e mesterir er a bo lekukuk.” Kid me ngsebechel mo ulterekokl a rengud el kmo a Jehovah mo ngosukid el merkii a klumech. Ngua Jin-hyuk, ngsebeched el meluluuch lolengit er a blekeu me a llomeserreng.

14. Ngera sebechel ngosukid sel dechelebangel a mondai? (Psalm 37:3, 5)

¹⁴ Molengit er a Jehovah me lengesukau loutekangel a mondai er kau. A rebetok er kid a chuarm le ngngar ngii a secherel a bedenged me a lechub e nguldesued, ngmla mad a betik er a rengud, ngngar ngii a meringel el  blekeradel er a telungalek er kid, odechelakl, me a lechub e ngkuk ta er a mondai. Me a blekeradel el ua pandemic me a mekemad a mla remuul aika el tekoi el lmuut el menga el mo meringel er kid outekangel. Mouchais er a Jehovah aike el ngar er a rengum. Mouchais er ngii, el di ua mouchais er a kmeed el sechelim. E bo lulterekokl a rengum el kmo “ng mo ngosukau.”​—Monguiu er a Psalm 37:3, 5.

15. Ngmekera nglunguuch e ngosukid el ‘outekangel er a temel a ringel’? Mosaod.

¹⁵ Sel leblak a rengud el meluluuch e ngngosukid el ‘outekangel er a temel a ringel.’ (Rom 12:12, NW) A Jehovah medengei a lechebangel a remengull er ngii, “ng orrenges ongterir.” (Psa. 145:18, 19) A Kristie el 29 a rekil el pioneer a mlo mtebengii el kmo tia mera el klemerang. Ngika mlo er ngii oberaod el secherel a bedengel. Tia rirellii el kmal mo depressed. Uriul e ngmlo medengei el kmo a delal a kmal smecher e mo mad. Ngmelekoi el kmo: “Ak milluluuch lolengit er a Jehovah me lebeskak a klisiich el kuluusbech er ngii er a bek el sils. Ak mle oltirakl er a schedule er ngak er omengull, el ngar er a miting e meruul er a omesubek el di ngak el tang.” Ngdochelir el kmo: “A nglunguuch a ngilsukak loutekangel er aike el mle kot el meringel el taem. Ak mle medengei el kmo a Jehovah obengkek e tia milskak a klou el ongelaod. Me alta ngdimlak el mereched el mo ungil a secherel a bedengek, engdi Jehovah ulenger er a nglunguchek loeak a lebeskak a budech me a chelellakl el reng.” Me lak dobes el kmo “a Rubak a meduch el olsobel er a re chad el mengull er a chelid er a ringelir.”​—2 Pe. 2:9.

16. Ngera uchul me kede ousbech er a ngelsuil a Jehovah el mo oltngakl omengesuseu?

¹⁶ Molengit er a Jehovah me lengesukau el otngakl omengesuseu. Kid el diak demecherrungel a uchul me ngkired el blechoel loldechelakl er a rengud el ngii a di soal mo meruul a tekoi el mekngit. A Satan a meruul aike el  rokui el sebechel rullii tiang el kmal mo meringel er kid. A ta er a rolel e ngmelasem el mengidokel er a uldesued a oeak a diak el klikiid el tekoi er ongelaod. Chouaika el tekoi er ongelaod a sebechel mekeek a uldesued er a mekikiongel el uldasu el ngii a rullii el mo diak el klikiid a uldesued me a rengud e sebechel mekrolid el mo rullii oberaod el klengit.​—Mk. 7:21-23; Jak. 1:14, 15.

17. Ngmekera doureor loltirakl ongtid el mo mengeroid er kid er omengesuseu? (Dirrek el momes er a siasing.)

¹⁷ Kede ousbech er a ngelsuil a Jehovah el mo otngakl a ngii di el omengesuseu el mo meruul a mekngit. A Jesus a uldekiar tia el ongit er a kerebai el kirel a nglunguuch: “Lak momekrael er kemam el mor a meringel el ongarm, e bai mosebelemam er Ngikel Mekngit.” (Mt. 6:13) Jehovah kmal soal lolengeseu er kid engdi ngkired lolengit er a ngelsuil. Ngdirrek el kired loureor loltirakl a nglunguched. Ngsebeched el meruul aike el rokui el sebeched el mengeroid er kid er aike el diak lungil rolel a uldasu el kmal haeri er a beluulechad er a Satan. (Psa. 97:10) Ngsebeched lomekeek er a uldesued er a ungil luldasu loeak sel donguiu e dosuub er a Biblia. Ngdirrek el mo mekerreuii a uldesued sel dengar er a miting e domerk er a klumech. Me a Jehovah tibir el kmo ngdiak bo lebechikid me demekesuseu er a ongarm el diak el sebeched el mo mesisiich er ngii.​—1 Ko. 10:12, 13.

18. Ngera kired el rokui el meruul er ngii?

¹⁸ Chelecha el uriul sils el kmal mla mo meringel a blekeradel e ngkmal kirel a derta er kid el meluluuch me lolemolem loba blakerreng el mora Jehovah. Mrellii a schedule er kau er a bek el sils el mo meluluuch el mora Jehovah, el mera el ngar er a rengum. A Jehovah soal a doluluuch el ‘subedii aikel ngar a rengud.’ (Psa. 62:8) Moldanges er ngii e moreng a sulel el kirel aike el rokui el loruul. Molengit er ngii me lengesukau el moba blekeu sel momerk er a klumech. Molengit er ngii me lengesukau el mo outekangel a ngii di el mondai e mo otngakl a omengesuseu el mchelebangel. Lak becherei a ngii di el chad me a lechub e ngngii di el tekoi me bo luchul e ngdiak mblechoel el meluluuch el mora Jehovah. Engdi ngmekera longer a nglunguched a Jehovah? Kede mo mesaod er tia el kmal klou a ultutelel el ker er a ongingil el suobel.