1. Ngera bebil er a omelsemai el lechebangel a rebetok er kid?

 KAU, ngmla ta el mrellii a turrekong er kau er a klereng engdi ngmle meringel er kau otutii? b Ngkmal diak di lekau el tang. El ua tiang, a Philip a mle soal lmuut el remuul a nglunguchel el mo ungil e melechel a ildisel a taem loluluuch, engdi ngmle meringel er ngii a metik a taem el mo meluluuch. E a turrekong er a Erika a mle soal mechir a miting er a odingel engdi ngdirk blechoel el mo meoud. Me a Tomáš a mle betok el taem el lolasem el menguiu er a Biblia el rokir. Ngmelekoi el kmo: “Ngdimlak el deu a renguk el menguiu er a Biblia. Ak millasem el edei el taem, engdi bek taem ak di mlora babier er a Levitikus e stob.”

2. Ngera uchul me ngdiak el kirel mo mechitechut a rengud a lsekum e ngngar ngii a turrekong er kid er a klereng engdi ngdirkak dotutii?

² A lsekum e ngngar ngii a turrekong er kau el dirkak motutii, e lak bo lemechitechut a rengum. Mo lmuut me a doruul a mekekerei el turrekong me ngousbech a taem me a meringel el ureor. Kau el soam el otutii a turrekong er kau ochotii el kmo ke mengreos er a deleuill er kau me a Jehovah e soam el msang sel kot lungil er kau. A Jehovah kmal mengreos a meringel el urerem. Me nguaisei, engdi ngika diak longerechir aike el diak el sebechem. (Psa. 103:14; Mik. 6:8) Me a turrekong er kau a kirel tabesul e chatter er a klengar er kau. Me a lsekum a turrekong er kau a uaisei, e ngera sebechem el meruul me motutii? Me dosaod a bebil ngeso er a uldasu.

3. Ngera uchul me ngkmal klou a ultutelel a lengar er ngii a mesisiich el urunguled el mo oltaut a turrekong er kid?

³ Ngkmal klou a ultutelel a lengar ngii a mesisiich el urunguled el mo oltaut er a turrekong er kid. Sel lengar ngii a mesisiich el urunguled, e kede mo meringel loureor el kirel a turrekong er kid. Ngsebeched lomekesiu er tiang el mora eolt el oldubech er a bos me ngmo er sel bo er ngii. A lsekum e ngmelemolem el ngar ngii a eolt e a chad a mora basio el soal el mo er ngii. E a lsekum e ngmesisiich a eolt e nglocha di mereched el mong. Ngdi osisiu, sel mesisiich a urunguled, e ngngar ngii a klou el techall el bo dotutii a turrekong er kid. A David el odam er a El Salvador a kmo: “Sel ngar ngii a mesisiich el urungulem, e ke mo meringel loureor el kirel. Ngdiak el soam el mo mecherei a ngii di el ngerang me bo luchul e lak motutii a turrekong er kau.” Me ngera sebechem el meruul me lebo er ngii a mesisiich el urungulem?

4. Ngera sebeched el meluluuch el kirel? (Filipi 2:13) (Dirrek el momes er a siasing.)

⁴ Moluluuch me lluut el menga el mo mesisiich a urungulem. Jehovah sebechel lousbech er a chedaol reng er ngii el meskau a urungulem el mo otutii a turrekong er kau. (Monguiu er a Filipi 2:13.) A lebebil e kede rullii a turrekong er kid le kede medengei el kmo ngkired el meruul el uaisei, e tia kmal lungil el tekoi. Engdi nglocha diak a urunguled el mo oltaut er ngii. Tiakid a lulemelechesiu er ngii a odos er a Uganda el Norina. Ngrirellii a turrekong er ngii el mo mesuub a Biblia lobengkel a chad, engdi ngdimlak a urungulel el mo oltaut er ngii le ngulemdasu el kmo ngdimlak el meduch lolisechakl. Ngera ngilsuir? Ngmelekoi el kmo: “A kulemuchel lolengit er a ulengesuil a Jehovah er a bek el sils me lesisichii a urungulek el mo mesuub a Biblia lobengterir a rechad. A osisiu el taem e a kuluureor lobengkel a nglunguchek loeak a kuureor er a rolel a kulisechakl. Uriul er a sesei el buil e ak mlo mtebengii el kmo ngmla mukeroul a urungulek. Tia el osisiu el rak a kulemuchel a teblo el study.”

5. Ngera sebeched el melebedebek el mo melisiich er a urunguled el mo otutii a turrekong er kid?

⁵ Molebedebek el kirel aike el bla leruul a Jehovah el kirem. (Psa. 143:5) A apostol Paulus a millebedebek el kirel a krasia er a Dios el mo er ngii, e tia uldbechii el mo meringel loureor el kirel a Jehovah. (1 Ko. 15:9, 10; 1 Ti. 1:12-14) Ngdi osisiu, sel bo blechoel el melebedebek aike el rokui el bla leruul a Jehovah el kirem, me ngii a menga el mo mesisiich a urungulem el mo otutii a turrekong er kau. (Psa. 116:12) Molatk er a ngilsuir a odos er a Honduras el mo otutii a turrekong er ngii el mo regular pioneer. Ngkmo: “Ak mlo melatk er a klou el bltkil a rengul a Jehovah el mei er ngak. Ngngilikak el mora rechedal. Ngomekerreu e mesebechakl er ngak. Sera kulebedebek aikang e ngliluut el kmal mo mesisiich a bltkil a renguk el mora Jehovah e silsichii a urungulek.”

6. Ngera dirrek el sebechel ngosukid el smisichii a urunguled el mo oltaut a turrekong er kid?

⁶ Molatk aike el klengeltengat el bo mngai sel motutii a turrekong er kau. Molatk a ngilsuir a Erika el dulsaod er ngii er a uchei, el mle soal mo olab a taem. Ngkmo: “Ak miltebengii el kmo ngkmal betok a dimlak kngai sel kmeoud el mora  miting. Sel kmereched el mong e ngngar ngii a techellek el outkeu e mengedecheduch er a rudam me a rudos. Ngsebechek el remenges a ungil ngeso er a uldasu el ngii a mo ngosukak el mo oldeu a renguk e olengeriakl er a berkel a klumech.” A Erika millatk a klungiolel a bo lolab a taem, e ultutii a turrekong er ngii. Ngera el klengeltengat a sebeched el melatk? A lsekum a turrekong er kau a kirel a omengiuel a Biblia me a lechub e nglunguuch, e molatk er a rolel e ngmo smisichii a deleuill er kau me a Jehovah. (Psa. 145:18, 19) A lsekum e ngturrekong er kau omekeroul er a ta er a blekerdelir a Rekristiano, e molatk er a rolel e ngmo rullii a delongelem kau me a rebebil el lmuut el mo ungil. (Kol. 3:14) Nglocha sebechem el lemuches aike el rokui luchul me ngsoam lotutii a turrekong er kau. Em blechoel lomes er ngii. A Tomáš el dulsaod er ngii er a uchei a kmo: “Sel lebetok a uchul me ak melasem loltaut er a turrekong er ngak, e ngrullak me ngdiak el soak el meterob loureor el kirel.”

7. Ngera ngilsuir a Julio me a bechil el otutii a turrekong er tir?

⁷ Mongoit a taem lobengterir tirke el mo melisiich er kau el mo oltaut er a turrekong er kau. (Osi. 13:20) Molatk er a ngilsuir a Julio me a bechil el mo oltaut er a turrekong er tir el mo menglou er a omesiungir. Ngkmo: “Aki millilt er a resechelimam el mle support er a turrekong er kemam, e mle blechoel el mesaod er ngii lobengterir. A rebetok er tir a mla otaut a osisiu el turrekong, me ngmle sebechir el meskemam a ungil ngeso er a uldasu. A resechelimam a dirrek el uleker el kmo aki mla mo uangerang, e millisiich er kemam sel ki mousbech er ngii.”

8. Ngera mo duubech a lsekum kede di oureor el kirel a turrekong er kid sel lengar ngii a urunguled el meruul er ngii? (Dirrek el momes er a siasing.)

⁸ Nguaisei engdi ngngar ngii aike el sils el diak a urunguled el meruul a tekoi. Tia ngbelkul a kmo ngdiak el sebeched loureor el kirel a turrekong er kid? Ngdiak. Ngsebeched lomekesiu er ngii er tiang: A eolt a sebechel mesisiich el klisiich lodbechii a bos el mo er sel lebo er ngii. Me nguaisei a eolt a kakerous a klisichel, e ngar ngii aike el sils el diak a eolt. Tia ngbelkul a kmo a chad a diak el sebechel merael el beduluchei? Ngdiak. El ua tiang, a bebil bos a ngar ngii a mesil er ngii me a lechub e ngoius. A chad a sebechel lousbech aikang el melemolem el merael el mo er sel lebo er ngii. A urunguled a sebeched lomekesiu er ngii er a eolt el bebil e ngmesisiich er aike el kuk bebil er a sils. E ngar ngii aike el sils el diak a urunguled loureor el kirel a turrekong er kid. Me a lsekum e kede di oureor el kirel a turrekong er kid sel lengar ngii a urunguled el meruul el uaisei, e nglocha diak bo dotutii. Engdi ngdi ua ngika el chad el losiik a kakerous el rolel e ngmo er sel lebo er ngii, kid me ngdirrek el sebeched el oureor el kirel a turrekong er kid sel lak a urunguled el loureor el kirel. Alta ngdiak lebeot engdi kmal mo dmeu a rengum sel motutii. Me a uchei er a dosaod aike el sebeched el meruul, e me dosaod er a ker el sebechel duubech.

9. Ngungil doureor el kirel a turrekong a lsekum e ngdiak er a rengud a meruul er ngii? Mosaod.

⁹ A Jehovah soal a dosiou er ngii el dmeu a rengud  e ngar er a rengud el meruul el uaisei. (Psa. 100:2; 2 Ko. 9:7) Me a leuaisei, e ngungil doureor el kirel a turrekong er a klereng a lsekum e ngdiak er a rengud el meruul er ngii? Molatk er a kerebil a apostol Paulus. Ngdilu el kmo: “[A] bedengek a kulik er ngii el omtebechel er ngii.” (1 Ko. 9:25-27) Alta Paulus a dimlak er a rengul a meruul er a tekoi el mle soal a Jehovah, engdi ngmle force er ngii el mo rullii. A Jehovah mle dmeu a rengul el kirel a omesiungel a Paulus? Chochoi! Ngulemekngeltengat er ngii er a blakerreng er ngii.​—2 Ti. 4:7, 8.

10. Ngera klungiolel a doureor el meringel el kirel a turrekong er kid mo lmuut me a lak a urunguled el meruul er ngii?

¹⁰ Ngdi osisiu, a Jehovah dmeu a rengul sel lomes er kid el oureor el kirel a turrekong er kid, mo lmuut me a lsekum e ngdiak a urunguled el meruul er ngii. Ngmdeu a rengul le alta kede locha mo meruul er a tekoi el diak el soad, engdi ngmedengei el kmo kede meruul er ngii le ngbltkil a rengud el mo er ngii. Ngua lulemekngeltengat er a Paulus, Jehovah mo omekngeltengat a meringel el urered. (Psa. 126:5) E sel dechermii a klengeltengat er a Jehovah e ngmo meskid a urunguled. A odos er a Poland el Lucyna a kmo: “A lebebil e ngdiak el soak el tobed el mo oldingel, tokubets sel lemesaul a bedengek. Me nguaisei engdi sel deurreng el kumelechesiu er ngii er a uriul a mera el ileakl el sengk!” Me dosaod el kmo ngera sebeched el meruul sel lak a urunguled.

11. Ngmekera Jehovah e sebechel ngosukid el oserecheklii a rengud?

¹¹ Moluluuch el kirel a ulserechakl el reng. A ulserechakl el reng a sel duch er kid el mtebechel a rengud me a omerelled. Tia el tekoi a blechoel el mesaod el kirel sel destob er kid me ngdiak bo doruul er a mekngit. Me nguaisei, a ulserechakl el reng a usbechall a lsekum e ngsoad el mo meruul a ungil, tokubets a lsekum e ngmeringel er kid a meruul er ngii me a lechub e ngdiak a urunguled el meruul er ngii. Lak mobes el kmo, a ulserechakl el reng a rodech er a reng, me molengit er a chedaol reng er a Jehovah el mo ngosukau el mekurulii tia el kmal klou a ultutelel el blekeradel. (Lk. 11:13; Gal. 5:22, 23) A David el dulsaod er ngii er a uchei a mesaod el kirel a rolel e a nglunguuch a ngilsuir. Ngmle soal mo blechoel el meruul er a omesubel el di ngii el tang. Ngmelekoi el kmo: “Ak blechoel lolengit er a Jehovah me lengesukak el mekurulii a ulserechakl el reng. Ngoeak a ngelsuil a Jehovah e ngmle sebechek el mechelii a schedule er ngak er omesuub e melemolem loltirakl er ngii.”

12. Ngmekera omellach el ngar er a Olisechakl 11:4 e ngosukid el otaut a turrekong er kid?

¹² Lak mongiil el mora leko ngungil el taem. Ngkmal diak bo lungil a blekerdelel a klengar er tia el beluulechad. Me a lsekum e kede mengiil mora ungil taem, e nglocha kmal diak bo dotaut a turrekong er kid. (Monguiu er a Olisechakl 11:4.) Odam el Dayniel a kmo: “Ngkmal diak a ungil el taem. Me ngdiak lungil dongiil, ngungil di domuchel.” A Paul el odam er a Uganda melekoi er a ta er a uchul me ngdiak lungil a dongudel a blachel: “Sel domuchel alta ngmeringel a blekeradel, e kede msa Jehovah tekoi el sebechel lomekngeltengat er ngii.”​—Mal. 3:10.

13. Ngera klungiolel a domuchel el meruul a mekekerei el turrekong?

¹³ Momuchel el meruul a mekekerei el turrekong. Nglocha diak a urunguled le turrekong er kid a kora meringel er kid otutii. A lsekum e nguaisei, e kau ngsebechem el mingii el mo mekekerei? A lsekum e ngturrekong er kau omekeroul er a ileakl el blekeradel, e ngsebechem lomuchel lolecholt er ngii el ngar er a mekekerei el rolel. A lsekum a turrekong er kau a chiuii a Biblia el rokir, e kau ngsebechem lomuchel el menguiu a dertelkib? A Tomáš, el dulsaod er ngii er a uchei a mle meringel er ngii oltaut er a turrekong er ngii el chiuii a Biblia el rokir er a chelsel a ta el rak. Ngkmo: “Ak mlo mtebengii el kmo ak ngileltii a rolel omenguiu el kuk kmal mereched  el kirek. Me ak liluut el melasem er ngii loeak a kunguiu a di kesai el parakurab er a bliongel e kulebedebek el kirel. Tia rirellak el mo dmeu a renguk er omengiuek.” Sera lemedechel a deuil a rengul a Tomáš el menguiu, me ngii a liluut el mo kemanget a temel el menguiu er a Biblia. Cherengel a taem e ngchiliuii a Biblia el rokir. c

14. Ngera locha mo duubech el rullii el mo meringel er kid otutii a turrekong er kid?

¹⁴ Alta ngngar ngii a mesisiich el urunguled me a lechub e ngkmal ulserechakl a rengud, engdi ngdiak a cheldechulel a lsekum ngmo er ngii a tekoi el duubech el rullii el mo meringel er kid otutii a turrekong er kid. El ua tiang, a “bkaischemrungel” el blekeradel a sebechel nguu a taem el dousbech er ngii loureor el kirel a turrekong er kid. (Oli. 9:11, NW) Kede locha mo chobengelii a ringel el choitechetur a rengud e nguu a klisiched. (Osi. 24:10) E kid el diak demecherrungel a uchul me kede locha mo remuul a tekoi el diak lengesukid el rullii a turrekong er kid. (Rom 7:23) Me a lechub e kede kmal mla mo mesaul. (Mt. 26:43) Ngera sebechel ngosukid sel leduubech a tekoi el rullii el mo meringel er kid otutii a turrekong er kid?

15. A lsekum ngduubech a tekoi el rullii el mo meringel er kid oltaut er a turrekong er kid, e ngbelkul a kmo ngdikea el sebeched el otutii? Mosaod. (Psalm 145:14, NW)

¹⁵ Lak mobes el kmo a lsekum ngduubech a tekoi el rullii el mo meringel er kau otutii a turrekong er kau, e ngdiak el belkul a kmo ngdiak el sebechem el otutii. A Biblia melekoi el kmo nglocha mo betok el taem el bo dechebangel a mondai me a lechub e ngringel. Me nguaisei engdi ngomeketakl er ngii el kmo ngsebeched el lmuut el mekiis, tokubets loeak a klisichel a Jehovah. (Monguiu er a Psalm 145:14, NW. d) Odam el Philip el dulsaod er ngii er a uchei a kmo: “Ngdiak el ior er a idisel a taem el diak kututii a turrekong er ngak. E ngbai ildisel a taem el kluut loureor er a turrekong er  ngak.” A David el dulsaod er ngii er a uchei me ngdirrek el melekoi el kmo: “Ak melasem el diak kumes lomelsemai aike el diak lungil sils me a lechub sel leduubech a tekoi el rullii el mo meringel er ngak oltaut a turrekong er ngak, e ngbai techall el mo ochotii er a Jehovah a klungel a bltkil a renguk el mo er ngii.” Chochoi sel dolemolem el merael el beduluchei alta kede mo chobangel a tekoi el melsemai er kid, e kede ochotii er a Jehovah el kmo ngsoad lodeuir a rengul. A Jehovah locha kmal dmeu a rengul sel lomes er kau el melemolem el meringel loureor el kirel a turrekong er kau.

16. Ngera sebeched el suub er aike el tekoi el duubech el rullii el mo meringel er kid otutii a turrekong er kid?

¹⁶ Mngai a klubelem er aike el tekoi el duubech el rullii el mo meringel er kau otutii a turrekong er kau. Molatk er a uchul me ngdilubech e di lekau el oker, ‘Ngera sebechek el rullii me tiang lak el luut el duubech?’ (Osi. 27:12) A lebebil e ngochotii el kmo a turrekong el dengileltii a diak el sebeched lotutii. A lsekum e nguaisei, e mluut el merriter er a turrekong er kau e mesa el kmo ngmera el lungil el kirem. e Jehovah diak bo lomdasu el kmo ngdimlak mrellii a turrekong er kau a lsekum a turrekong er kau a diak el sebechem lotutii.​—2 Ko. 8:12.

17. Ngera uchul me ngkired el melemolem el melatk aike el bla dotaut?

¹⁷ Molemolem el melatk aike el bla motaut. A Biblia melekoi el kmo a “Dios a diak le chebirukel me di lobes a ureriu.” (Heb. 6:10) Me kau me ngdirrek el diak el kirem lobes. Molatk aike el turrekong el bla motaut. Ngsebechel deleuill el bla bekurulii lobengkel a Jehovah, ouchais er a rechad el kirel, me a lechub e ngtecholb. Ngdi uai omolengeriakl e otaut aika el turrekong, me kau me ngsebechem el melemolem lolengeriakl el mo otutii a turrekong er kau er chelechang.​—Fil. 3:16.

18. Ngera diak el kired lobes er ngii sel doureor el kirel a turrekong er kid? (Dirrek el momes er a siasing.)

¹⁸ Ngoeak a ngelsuil a Jehovah, e ngsebechem el otaut a turrekong er kau, el di uai ngike el chad el mlara bos el mlo er sel soal mo er ngii. Engdi lak mobes a rechad el ngar er a bos oldeu a rengrir er a omerael. Ngdi osisiu, chelecha el molemolem el meringel loureor el mo oltaut er a turrekong er kau, e lak mobes el mo omes aike el rolel a Jehovah olengeseu e omekngeltengat er kau. (2 Ko. 4:7) A lsekum e ngdiak em give up, e ke mo ngmai a lmuut el meklou el klengeltengat.​—Gal. 6:9.