1-3. (a) Ngkirel uangera uldesued el kirel a klemerang er a Biblia? Mosaod. (Momes aike el siasing er a uchelel a suobel.) (b) Ngera kede mo mesaod er tia el suobel?

 CHELECHA el taem, e ngmla mo blekerdelir a rechad el mecherar a klalo er a stoang e lmuut el mo olutii. E a lsekum te omechar a klalo el okiu a Internet, e nglmuut el klou a techellir el mo olluut er ngii. Nglocha dimlak el sorir sel klalo e le ngdimlak bo leua sel lulemdasu er ngii me a lechub e ngar ngii a telemellel. Me te bai kilengei el lmuut el mo olutii e mtechir er a kmung ngerang, me a lechub e te olengit el lmuut el melai a ududir.

² Ngkmal diak bo doruul er a osisiu el tekoi el mora klemerang er a Biblia. Sel ta el ‘docherar’ e ngkmal diak lsoad el mo ‘oterur,’ el belkul a kmo sel desuubii a klemerang, e ngdiak dekengei el choitii. (Monguiu er a Osisechakl 23:23, NW; 1 Timothy 2:4) * (Momes er a footnote.) Ngua ike el dulsaod er sel mlo merek el suobel, e kede mengoit er a klou el taem el mo mesuub er a klemerang. Kede locha dirrek el chiloit a urered el milengereker a betok el udoud. E locha mlo kired el mesmechokl a bebil er a deleuill er kid me a rebebil, e melodech a  uldesued me a omerelled, me a lechub e ngmlo diak deteloi a bebil el siukang me a omeruul el ngii a diak loldeu er a rengul a Jehovah. Engdi ngulterekokl a rengud el kmo a tekoi el dechiloit a kmal diak el sebechel mo mekesiur a klengeltengat el dengai e le kid el mla mo medengelii a klemerang.

³ A Jesus a milsaod er a okesiu el kirel a chad el omsaso e osiik a ungil el ngisel a chesiuch. Me sel lebetik er a chimo el kmal mekreos el chesiuch, engdi mereched loterau a rokui el kloklel me bo el sebechel el mecherar. Tia el ngisel a chesiuch a omtechei er a klemerang el kirel a Rengedel a Dios. Ngokiu tiaikid el rolel e a Jesus a ulechotii a kerresel a klemerang el mo er tirke el osiik er ngii. (Mateus 13:45, 46) Me sera dekot el suubii a klemerang, el ngii a klemerang el kirel a Rengedel a Dios me aike el rokui el mekreos el klemerang el ngar er a Biblia, e kede dirrek el kilengei el chemoit a rokui el tekoi me bo lsebeched el nguu. Me a lsekum kede melemolem el mengreos er a klemerang, e ngdiak a ta el bo dekengei el choitii. Engdi ngklengiterreng, e le rebebil el chedal a Dios a mlo diak longreos er tia el klemerang, e dirrek el chilitii. Me ngkmal diak lsoad el mo uaisei! Ngkired el oltirakl a ulekrael er a Biblia el mo merael el “oltirakl er a klemerang er a klengar” er kid. (Monguiu er a 3 Johanes 2-4.) Me tia belkul a kmo kede nguu a klemerang el mo kot, e kiei lolecholt er ngii er a rolel a klengar er kid. Engdi ngera uchul e mekera chad e ‘oterur’ me a lechub e ngchoitii a klemerang? Ngmekera mo ulterekokl a rengud el kmo ngdiak bo ‘doterur’ me a lechub kede choitii a klemerang? Ngmekera lmuut el mo ulterekokl a rengud el merael el “oltirakl er a klemerang”?

4. Ngera uchul me a rebebil a mlo diak lolemolem el merael er a klemerang er a taem er a Jesus?

⁴ Sel taem er a Jesus, e a rebebil er tirke el kilengei er a klemerang a dimlak lolemolem el merael er a klemerang. El ua tiang, a uriul er a lerellii a mengasireng el tekoi a Jesus el omeka er a klou el seked, e a seked a uleltirakl er ngii el mora bita el Daob er a Galilea. Engdi a Jesus a dillii a tekoi el rirelleterir el kmal kilebetiekl el dilu el kmo: “A lsekum ng diak monga er a techel a bedengel a Ngelekel a Chad e diak molim er a rsechel, e ng diak le bor ngii a meral klengar er kemiu.” Te bai dimlak loker er a belkul a tekingel a Jesus, e dilu el kmo: “Tia kmal meringel el osisechakl. Ng techa sebechel el orrenges er ngii?” Me tiang a mlo uchul me a re “betok el chad el uleltirakl er a Jesus a mlo cheroid er ngii e dimlekea le sorir el lmuut el mo obengkel.”​—Johanes 6:53-66.

5, 6. (a) Ngera me a rebebil a mla mo cheroid er a klemerang er chelechang? (b) Ngmekera chad e oberius el mo cheroid er a klemerang?

⁵ Ngklengiterreng, e le rebebil er chelecha el taem a mla mo cheroid er a klemerang. E ngera uchul? A rebebil a milsibas er a beches el klemedengei er a bades er a Biblia me a lechub e ngtekingel me a lechub e ngtekoi el lullekoi me a lechub e ngrirellii a ta er a odam el rebetok a medengelii. Me a rekuk bebil a mlo chetirir er sel taem el ta er a chad a milellach er tir lousbech er a Biblia me a lechub e ngmlo er ngii a meringel el klekakebosech er a uldasu er a delongelir tir me a chad er a ongdibel. A relmuut el bebil a uleltirakl a klsuul el osisecheklir a rumtok a mera el osisechakl me a rebebil el melekoi a blulak el kired. Aika di bebil er a uchul me a rebebil a mle durengrir el mo cheroid er a Jehovah me a ongdibel. (Hebru 3:12-14) Ngbai lmuut el ungil ulekum te mlo ua klaumerang er a Petrus el mora Jesus! Me sel taem el rebebil a kilebetiekl er a tekingel a Jesus, e nguleker er a rechapostol er ngii el kmo kele lsorir el dirrek el merael. Me a Petrus a ulenger el kmo: “Rubak, ng techa ki bor ngii? Kau olab a tekoi er a diak a ulebengelel klengar.”​—Johanes 6:67-69.

 ⁶ A cherengel a taem e a rebebil a mekekoketerir el oberius el mo cheroid er a klemerang, el locha dimlak lemereched el mo mtebengii. A chad el mekekokil el mo cheroid er a klemerang a di ua bilas el mekekokil el oberius el mo cheroid er a bkul omoachel. A Biblia a mengelechel er kid el mo kerekikl me “lak doberius el mo cheroid.” (Hebru 2:1) Ngbetok el taem e a chad el oberius el mo cheroid er a klemerang a dimlak el durengul el mo uaisei. Engdi ngmilecherei a deleuill er ngii me a Jehovah me ngmlo mechitechut, me a cherengel a taem e ngurridii. Me kede mekera e diak debecherei tia el blekeradel me ledubech el mei er kid?

7. Ngera sebechel ngosukid me lak doterur a klemerang?

⁷ A lsoad el melemolem el merael er a klemerang, e ngkired el kongei e olengesenges a rokui el tekoi el ledu Jehovah. Ngkired el rullii a klemerang el mo kot el klou a ultutelel el tekoi er a klengar er kid, e mo olengesenges a omellach er a Biblia el kirel a rokui el tekoi el doruul. Ngar er a nglunguchel a King el David, e ngtilbir el mora Jehovah el kmo: “Bo kurael er a klemerang er kau.” (Psalm 86:11) A David a ulterekeklii a rengul el melemolem el merael er a klemerang, me kid me ngdirrek el kired el meruul uaisei. E le lsekum e ngdiak, e ngsebeched lomuchel el mo omdasu aike el tekoi el dechiloit el kirel a klemerang, e locha mo soad el lmuut el mo meruul. Engdi ngdiak el sebeched el di kid el melilt el kmo ngera el klemerang er a Biblia a dekengei er ngii, e ngera diak. Kid a kired el merael el ngar er a “rokui el klemerang.” (Johanes 16:13) Ngar sel mlo merek el suobel e kede milsaod a eim el tekoi el dechiloit me bo lsebeched el mesuub e oltaut er a klemerang er a klengar er kid. Me chelechang e kede mo mesaod er a rolel e ngsebeched el mo ulterekokl a rengud me lak deluut el mora ike el tekoi el dechiloit.​—Mateus 6:19.

8. Ngmekera usbechel a temel a Kristiano e sebechel rullii el oberius el mo cheroid er a klemerang? Mosaod.

⁸ Taem. Ngsebechel el diak doberius el mo cheroid er a klemerang a lsekum kede mo ungil lousbech a temed. A lsekum ngdiak dekerekikl, e ngsebeched el mo mengoit a betok el temed el kirel a omilil, me aike el soad el tekoi, e ngar a Internet, me a lechub e kede omes a TV. Me alta e aika el tekoi a diak lemekngit, engdi a temed el dongoit er ngii a bai sebeched lousbech el mesuub e oldingel. A osisiu el tekoi a dilubech el mora Emma. * (Momes er a footnote.) Sera dirk lekekerei, e ngkmal mle soal charm a uos e dirrek el soal el ngar a uos. Engdi cherengel a taem e ngmlo mekngit a ukltkel el kirel a klungel a taem el longoit er ngii el kirel a soal tekoi e tilbir el mo ngmai a meklou a ultutelel el tekoi el mo kot er a klengar er ngii. Ngdirrek el milsuub el kirel a tekoi el dilubech el mora Cory Wells, el odos el mle blechoel el ngar a uos er aike el klekool el rodeo. * (Momes er a footnote.) Me chelechang e a Emma a mengoit er a klou el temel el mesiou er a Jehovah, e dirrek el ngar ngii a temel lobengkel a telungalek er ngii me a resechelil el tir a dirrek el mesiou er a Jehovah.  Ngomelechesiu er ngii el kmeed er a Dios e dirrek el dmeu a rengul e le ngmedengei el kmo ngungil lousbech a temel.

9. Ngmekera tekoi er a kerruul e sebechel mo klou a ultutelel er a rengud?

⁹ Tekoi er a kerruul. A lsoad el melemolem el merael er a klemerang, e ngdiak el kired el mechei a tekoi er a kerruul me bo leklou a ultutelel er kid. Sera desuubii a klemerang, e kede mlo medengei el kmo a omesiunged el mora Jehovah a lmuut el klou a ultutelel er a tekoi er a kerruul, e dirrek el mle dmeu a rengud el chemoit aika el tekoi el kirel a klemerang. Engdi a cherengel a taem, e kede locha omes er a rechad el omechar a beches el electronic device me a lechub e ngungil a rengrir lomechar a lmuut el bebil er a klalo. Seikid e kede locha omuchel lomdasu el kmo ngar ngii a ngesonges er a klengar er kid. Nglocha mo diak lungilbesul er a rengud er aike el ngar ngii er kid e omuchel el mo melatk a tekoi er a kerruul el ngaruchei er a omesiunged el mora Jehovah. E tiang a kora mekltkid er a tekoi el dilubech el mora Demas. Ngkmal mle imis el betik a rengul er a “tekoi er tial beluulchad” me ngmirrael e choitii a ngerechelel el mesiou lobengkel a apostol el Paulus. (2 Timothy 4:10) A Demas a locha kmal mle betik a rengul er a tekoi er a kerruul el kuk ngaruchei er a omesiungel el mora Dios. Me a lechub e ngmlo chetil el mengoit a temel el mesiou lobengkel a Paulus. Me ngera klubeled er tiang? A uchei e nglocha dirrek el kmal mle soad a tekoi er a kerruul. Me a lsekum e ngdiak dekerekikl, e tia el bltkil a rengud a sebechel lmuut el mukeroul el kmal mo mesisiich el mo uchul e kede oridii a bltkil a rengud el kirel a klemerang.

10. Ngera el rolel a omengesuseu a kired el oltngakl?

¹⁰ A deleuill er kid me a rebebil. A lsoad el melemolem el merael el ngar a klemerang, e ngkmal diak el kired el mechititerir tirke el diak losiou er a Jehovah me longesuseu er kid. Sera desuubii a klemerang, e a deleuill er kid me a resechelid me a rechedal a telungalek er kid el diak el Sioning a mlengodech. A rebebil a locha ullecholt a omengull el kirel tia el beches el klaumerang er kid, engdi a rebebil a locha mlo omtok. (1 Petrus 4:4) Nguaisei, kede melasem er a tkurrebab el sebeched el mo ungil a delongeled kid me a rechedal a telungalek er kid e dirrek el mo ungil a omerelled el bedultir. Engdi ngdiak el kired el mo mengemikr a llechul a Jehovah e le kid el soad el mereng a rengrir. E oeak a omesubed er a 1 Korinth 15:33, e ngmeketeklii el kmo tirke el kmeed el sechelid a kirir el chad el betik a rengrir er a Jehovah.

11. Kede mekerang e mengikiid er kid er a diak el klikiid luldasu me a omeruul?

¹¹ Diak el klikiid luldasu me a omeruul. A lsoad el melemolem el merael el ngar a klemerang, e ngkmal kired el mo chedaol, me a lechub kede klikiid er a osengel a Jehovah. (Isaia 35:8; monguiu er a 1 Petrus 1:14-16.) Sera desuubii a klemerang, e kede millodech a tekoi er a klengar er kid me bo lsebeched el oltirakl a omellach er a Biblia. A rebebil er kid a mirruul a meklou el omelodech er a klengar er tir. Engdi ngdirk kired el kerekikl me lak deluut el mtechir a klikiid el klengar er kid er a diak el klikiid el klengar. Ngera sebechel ngosukid el mo oltngakl a ngii di lomelsemai el mo meruul a mekngit el tekoi? Ka molatk a tekoi el Jehovah a kiltmokl me bo lsebeched el mo chedaol. Ngmilskid a mekreos el klengar er a betik er a rengul el Ngelekel el Sechal, el Jesus Kristus! (1 Petrus 1:18, 19) Me a lsoad el melemolem el klikiid er a osengel a Jehovah, e ngkired el blechoel el melatk er sel kerresel a olubet el tengetengel a Jesus.

12, 13. (a) Ngera uchul me ngkired el omes a chedaol sils el ua osengel a Jehovah? (b) Ngera kede mo mesaod er chelechang?

¹² A siukang me a omeruul el diak loldeu er a rengul a Dios. A rechedal a telungalek er  kid me a rechad er a urered me a resechelid a locha mo melasem el omekedong er kid el mo teloi er tir el mengedaol a bebil tekoi. Me ngera sebechel ngosukid el mo oltngakl a orimel el mo teloi a siukang me a chedaol sils el diak loldeu er a rengul a Jehovah? Ngkmal kirel el mo bleketakl er a rengud aike el uchul me a Jehovah a diak lekengei aika el chedaol sils. Ngsebeched el merriter aika el tekoi lousbech a babilenged e mo melatk er a rolel e a bebil el chedaol sils a ulemuchel. Me sel dolebedebek a Bades el kirel aike el uchul e ngdiak el kired el mengedaol aika el sils, e ngrullid el mo ulterekokl a rengud el kmo kede meruul a tekoi el “odeuir a rengul a Rubak.” (Efesus 5:10) A lsekum kede oumerang er a Jehovah me a Tekingel, e ngmo diak demedakt a uldesuir a rechad el bedulkid.​—Osisechakl 29:25.

¹³ Ngsoad el melemolem el merael el ngar a klemerang el mo cherechar. Ngera sebechel ngosukid el lmuut el mo ulterekokl a rengud el melemolem el merael el ngar a klemerang? Aikakid a edei el tekoi el sebeched el meruul.

14. (a) Ngmekera dolemolem el mesuub er a Biblia e ngosukid me ngdiak bo decheroid er a klemerang? (b) Ngera me kede ousbech er a llomeserreng, me a omellach me a sekutaberreng?

¹⁴ A kot, e molemolem el mesuub er a Biblia, e mo dmolech el melebedebek aike el mosuub. Moterekokl a temem el meruul er tiang. A cherengel a taem el mosuub, e ngmengal medechel a bltkil a rengum er a klemerang, e lmuut el mo soam el melemolem lurrekodel er ngii. A Osisechakl 23:23, NW a ouchais er kid el mo ‘mecherar a klemerang’ e dirrek el mo mecherar a “llomeserreng, me a omellach me a sekutaberreng.” Ngdiak di el klemedengei er kid er a klemerang er a Biblia a ungiang. Ngdirk kired el mo oltaut aika el tekoi er a klengar er kid. Kede mekurulii a sekutaberreng, sel dodekdak aike el tekoi el desuub me aike el tekoi el di bla dodengei. A llomeserreng a rullid el mo meruul a tekoi el oltirakl aike el tekoi el dodengei. A lebebil e a klemerang a mellach er kid lokiu sel lebeketeklii el kmo ngera el tekoi a kired el melodech. Me ngkired el mereched el kongei a chouaika el omellach, el Biblia a mesaod el kmo ngkuk mekreos er a silber.​—Osisechakl 8:10.

15. Ngmekera klemerang e omekerreu er kid el ua olekesongel?

¹⁵ A ongerung, e moterekeklii a rengum el mo oltaut er a klemerang er a klengar er kau er a bek el sils. A Biblia a omekesiu er a klemerang el mora olekesengelel a soldau. (Efesus 6:14) Ngar a taem er a Biblia, e a olekesengelel a soldau a millisiich e ulemekerreu er ngii er a temel a mekemad, a lsekum tia el olekesongel a melemolem el kmes. E le a lsekum ngdi medidai, e ngdiak lsebechel lolengeseu er ngii. Me ngmekera klemerang e omekerreu er kid el ua olekesongel? A lsekum kede blechoel el oltaut a klemerang er a Biblia er a klengar er kid, e ngmo omekerreu er kid me ngdiak dolatk a mekngit e dirrek el ngosukid el mo ungil melilt a tekoi. Me sel lebo er ngii a meringel mondai er kid me  a lechub e kede mekesuseu el mo meruul a mekngit, e a klemerang er a Biblia a rullid el mengal mo soad el meruul a llemalt. Me kid a diak dekengei el mo choitii a klemerang el ua soldau el diak el kengei el mora mekemad el diak a olekesengelel. Me ngsoad el mo oltaut a klemerang er a Biblia er a bek el tekoi er a klengar er kid. A soldau a dirrek el kirel chitutii a saider er ngii er a olekesengelel. Me bo desa sel rolel e ngsebeched el meruul er a osisiu el tekoi.

16. Ngmekera dolisechakl er a klemerang e ngosukid el melemolem el merael el ngar a klemerang?

¹⁶ A ongedei, bora tkurrebab el sebechem lolisechakl er a klemerang er a Biblia el mora rechad. A Biblia a sebeched lomekesiu er ngii el mora saider. A ungil soldau a kerekikl lorreked er a saider er ngii, me kid me ngdirrek el kired el mo kerekikl el lorreked er a Tekingel a Dios. (Efesus 6:17) Kede rokui el sebeched el mo ungil sensei el ‘melemalt a dosaod a klemerang el dolisechakl.’ (2 Timothy 2:15) Me sel dousbech er a Biblia lolisechakl er a rechad, e ngmukeroul a klemedengei er kid e mengal mo betik a rengud er a klemerang. Ngdirrek el rullid el lmuut el mo blak a rengud el merael el ngar a klemerang.

17. Ngera me tia el klemerang a mekreos er a rengum?

¹⁷ A klemerang a kmal mekreos el sengk el mlara Jehovah. Ngmeskid a techelled el mo er ngii a kmes el deleuill er kid lobengkel ngika el Demad el ngar a eanged. E tiang a kot el mekreos el tekoi el sebechel a chad el nguu. A Jehovah a mla osisecheklid er a kmal betok el tekoi, engdi tiang a dirk uchelel! Ngtibir el mo melemolem lolisechakl er kid el diak a ulebengelel. Me bo mongreos er tia el klemerang el ua cho mongreos er a mekreos el ngisel a chesiuch. Molemolem el ‘omechar a klemerang e lak molterau er ngii.’ Seikid e ke mo ua David, el lomelemii tia el telbiil el mora Jehovah el kmo: “Bo kurael er a klemerang er kau.”​—Psalm 86:11.