1, 2. Me a cherengel a taem el loleketek a klaumerang er kid, e ngera kede silubii? Mosaod.

 KA MOLATK er a chad el omsa sengk a kekerei el ngalek. Me a demal me a delal ngii el ngalek a dmu er ngii el kmo, “Mdu sulang.” Me ngii el ngalek a dmu el uaisei e le tir el dilu er ngii me ngmelekoi el uaisei. Engdi a lorael el mo klou, e ngmo medengelii a uchul me a demal me a delal a ulemes er ngii el klou a ultutelel el loureng a saul a lsekum a chad a rullii a ungil el tekoi. Me a cherengel a taem, e ngmo soal loureng a sulir a rebebil e le ngmla mo medengelii a klungel a ultutelel a bo doba omereng el saul.

² Kid me kede uaisei. Sera domuchel el mesuub er a klemerang, e kede silubii el kmo ngklou a ultutelel el bo dolengesenges a llechul a Jehovah. Engdi cherengel a taem el lemeteketek a klaumerang er kid, e kede milsuub el mo medengelii a uldesuel, el belkul a kmo, kede mlo medengei a soal me a chetil, me a osengel el kirel a tekoi. Me sel debecherei a uldesuel a Jehovah me lomekrael er a omelilt er kid me a omerelled, e kede mo omdasu el uai ngii.

3. Ngera me ngsebechel el mo meringel er kid el omdasu a tekoi el ua Jehovah?

³ Me alta ngkmal soad el mesuub el mo omdasu el uai a Jehovah,  engdi a lebebil er a taem e ngmeringel er kid el omdasu el uai ngii e le ngdiak demecherrungel. El ua tiang, kede medengelii a osengel a Jehovah el kirel a rolel a kldung, me a tekoi er a kerruul, me a ureor er a berkel a klumech, me a mekngit el usbechel a rasech, me a lmuut el bebil er a tekoi. Engdi ngsebechel el mo meringel er kid el mo medengelii a uchul me ngomes aika el tekoi el uaisei. Me kede mekera e mo blechoel el omdasu el uai a Jehovah? E tia ngmekera lengesukid el mo meruul a melemalt el tekoi er chelechang me a ngar medad el klebesei?

4. Ngera belkul a dolodech a uldesued?

⁴ Monguiu er a Rom 12:2. Ngar tia el bades, e a apostol el Paulus a milsaod el kirel aike el kired el meruul me bo domdasu el ua uldesuel a Jehovah. Ngdilu el kmo ngdiak el kired el ‘oltirakl a blekerdelel a tekoi er tia el beluulchad.’ Ngdi ua dulsuub er sel mlo merek el suobel, tia belkul a kmo ngkired el oltngakl a uldasu me a blekeradel er tia el beluulechad. Engdi Paulus a dirrek el dilu el kmo ngkired el melodech a uldesued. Tia belkul a kmo ngkired el mesuub er a Tekingel a Dios, e mo medengei a uldesuel, e melebedebek er ngii, e mora tkurrebab el sebeched el omdasu el ua uldesuel a Dios.

5. Msodii a klekakerous er a omenguiu me a omesuub.

⁵ A rolel a omesuub a belkul a kmo ngdiak di demereched el menguiu er a suobel me a lechub e kede underline a nger er aike el ker er sel suobel e lemerekong. Sel dosuub e kede melatk el kmo, tia el tekoi ngera ngosisecheklak er ngii el kirel a kmo ngtecha Jehovah, e ngera ngmeruul, e ua ngera lomdasu a tekoi. Kede melasem el mo medengelii a uchul me a Jehovah a dmu er kid el mo meruul er a ta er a tekoi e kuk oleiub er kid er a tang. Kede dirrek el omtab el kmo ngera kired el melodech er a klengar er kid me a uldesued. Nguaisei, nglocha mo diak el sebeched el melebedebek el kirel aika el rokui el tekoi er a bek el temel a omesubed. Engdi ngungil a lsekum e ngsebeched el ousbech er a telkib el temel a omesubed el melebedebek aike el tekoi el donguiu.​—Psalm 119:97; 1 Timothy 4:15.

6. Ngera duubech sel dolebedebek el kirel a Tekingel a Dios?

⁶ Ngar ngii a ungil el tekoi el mo duubech sel deblechoel el melebedebek el kirel a Tekingel a Dios. Kede mo “medengelii” me a lechub e kede oterekeklii el kmo a uldesuel a Jehovah a cherrungel. Kede omuchel el mo medengelii a osengel el kirel a tekoi, e a cherengel a taem e kede mo kongei er a osengel. Me seikid e kede sumechokl e omekbeches a uldesued. E a cherengel a taem, e kede mo omdasu el uai a Jehovah.

7, 8. (a) Ngua ngera osengel a Jehovah el kirel a tekoi er a kerruul? (Momes er aike el siasing er a uchelel a suobel.) (b) A lsekum e kede mo oba osengel a Jehovah el kirel a tekoi er a kerruul, e ngera el tekoi a mo kot el klou a ultutelel er a klengar er kid?

⁷ A uldesued a ngar ngii a lerellii er a omerelled. (Markus 7:21-23; Jakobus 2:17) Me bo dosaod a bebil el olechotel tia el tekoi. Me a kot a debetik er ngii er sel cheldecheduch el kirel a cherellel a Jesus, el ngii a meketeklii a uldesuel a Jehovah el kirel a tekoi er a kerruul. A Dios a di mle ngii el ngiltii a Josef me a Maria el mo omekeroul er a Ngelekel, alta ngdimlak el betok a ududir. (Levitikus 12:8; Lukas 2:24) Me a Jesus er a lemechell, e a Maria a ‘milekedusii ra chelsel chongolel a charm, ele ngdimlak a mededaes el le borngii ra delemerab rar merael.’ (Lukas 2:7, BT) A ble lsoal a Jehovah e ngmle sebechel el kutmokl a tekoi me bo el sebechel a Jesus el mechell er a kmal ungil blai. Engdi ngbai mle soal a Jesus a bo el ngelekir a rechad el tir a ngiluu a omengull el mora  Dios el mo kot er a klengar er tir. Tiaikid a mle kot el klou a ultutelel er a osengel a Jehovah.

⁸ Me tia el cheldecheduch el kirel a cherellel a Jesus a osisecheklid er a osengel a Jehovah el kirel a tekoi er a kerruul. A rebebil el oungalek a sorir a rengelekir a lebo er ngii a kot el ungil kloklir, alta tia sebechel el mo uchul e ngmo mechitechut a deleuill er tir me a Jehovah. Engdi ngbleketakl el kmo a Jehovah a omes er a deleuill er kid el obengkel el kot el klou a ultutelel. Me kau, ke kongei er a osengel a Jehovah el kirel tia el tekoi? Ngera ngochotii a omerellem?​—Monguiu er a Hebru 13:5.

9, 10. Ngmekera dochotii el kmo kede oba osengel a Jehovah el kirel a tekoi el melibas er a rebebil?

⁹ A lmuut el ta er a olechotel a sel osengel a Jehovah el kirel a chad el melibas er a rebebil el belkul a kmo, ngrulleterir el mora klengit me a lechub e te mo diak losiou er a Jehovah. A Jesus a dilu el kmo: “Me ngikel rullii a tar tirkal mekekerel ngalek el mo diak loumera er ngak, a bai ungil er ngii a le mekabs a klou el chebsuul el bad er a chiklel e bo lobidokl er a daob.” (Markus 9:42) Aikang a kmal oberaod el tekoi! E kid a medengei el kmo a Jesus a di uai a Demal. Me ngsebechel el mo ulterekokl a rengud el kmo, a Jehovah a kmal chetil sel sekum a chad a melibas er a ta er a rultirakl er a Jesus.​—Johanes 14:9.

¹⁰ Me kid kede oba osengel a Jehovah me a Jesus el kirel a tekoi el melibas er a rebebil? Ngera ngochotii a omerelled? El ua tiang, nglocha soad a ta er a teletelel a bail me a dirrek el rolel a dongetmokl er kid. Engdi kede mo mekerang a lsekum a omelilt er kid a sebechel rulleterir a rebebil el mo mekngit a uldesuir me a lechub e te mo omdasu a mekikiongel el tekoi? A bltkil a rengud el mora rudam er kid, ngrullid me ngdiak di dolatk a soad el tekoi?​—1 Timothy 2:9, 10.

11, 12. Ngmekera domekerreu er kid sel dosuub el mo ouketui aike el louketui a Jehovah e mo ulserechakl a rengud?

¹¹ A ongedei el olechotel a kmo, a Jehovah a ouketui a chelebirukel. (Isaia 61:8) Nguaisei, ngmedengei el kmo a lebebil er a taem e ngmo meringel er kid el meruul a llemalt e le ngdiak demecherrungel. Engdi ngdirk soal a bo douketui a mekngit el di uai ngii. (Monguiu er a Amos 5:15.) Me a lsekum e kede melebedebek er sel uchul me ngouketui a mekngit el tekoi, e ngmo ngosukid el mo omes a tekoi el uai ngii e smisichid el mo oltngakl a mekngit el tekoi.

¹² Me sel dosuub el mo ouketui a mekngit el tekoi, e ngmo ngosukid el mo medengei el kmo a bebil el tekoi a mekngit alta e ngdiak a bleketakl el omesodel a Biblia el kirel. El ua tiang, ngar ngii a ta er a bedengel a kikiongel el omeruul el lap dancing a ngklel el kmal mla mo merael a chisel er chelecha el taem. A rebebil er a rechad a omdasu el kmo tia kuk ngodech er a tekoi er a cheliuaiu, me te melekoi el kmo ngdiak el mekngit. * (Momes er a footnote.) Engdi a Jehovah nguaisei a uldesuel? Lak dobes el kmo a Jehovah a ouketui a rokui el bedengel a mekngit el tekoi. Me bo leblak a rengud el mengeroid er kid er a ngii di el mekngit el tekoi el oeak sel dosuub el mo ulserechakl a  rengud e bo douketui aike el louketui a Jehovah.​—Rom 12:9.

13. Ngera me ngkired el omdasu er chelechang el kirel a osengel a Jehovah me bo el sebeched el meruul a ungil el omelilt er kid er a ngar medad el klebesei?

¹³ Sel dosuub, e ngkired el melatk er a osengel a Jehovah el kirel a tekoi e le tia sebechel el ngosukid el mo meruul a ungil omelilt. Me a lsekum e kede mo chelebangel er a blekeradel el kired el mereched el melilt a tekoi el bo doruul, e ngdiak bo el mechas a rengud. (Osisechakl 22:3) Ka me bo dosaod a bebil el kerebai er a Biblia.

14. Ngera kede suubii er a nger er a Josef el mora bechil a Potifar?

¹⁴ A bechil a Potifar er sera longesuseu er a Josef, e a Josef a di mle mereched el otngeklii. Ngbleketakl el kmo, ngmillebedebek er a osengel a Jehovah el kirel a chebechiil. (Monguiu er a Genesis 39:8, 9.) Me ngdilu er a bechil a Potifar el kmo: “Ng mekera e sebechek el mo meruul er cho ua tial mekngit el tekoi e mor a klengit el omtok er a Dios?” Tia ochotii el kmo a Josef a uleba osengel a Dios el kirel a tekoi. E kid a mekerang? Ke mo mekerang a lsekum a chad er a urerem a olengamech er kau? Me a lechub e a chad a oldurokl a kmal mekngit el tekoi me a lechub e ngsiasing el melisiich a deleboes el mora dengua er kau? * (Momes er a footnote.) Ngkmal beot er kid el mo oba blakerreng el mora Jehovah a lsekum e kede mla suubii e kongei er a osengel el kirel a tekoi e mla oterekeklii a rengud er a tekoi el bo doruul.

15. Kede mekerang e lomelemii a blakerreng er kid el mora Jehovah, el di uai tirke el tedei el buik er a Hebru?

¹⁵ Ka molatk er a kerebai er tirke el tedei el buik er a Hebru el Sadrak me a Mesak me a Abednego. A King el Nebukadnesar er a ledu er tir el mo mengull er a kolt el bleob el letileketekii, e ngdimlak lekengei. Me a bleketakl el nger er tir el mora king a ulechotii el kmo, te mla omdasu el kirel a tekoi el mo duubech a lsekum te melemolem el blak a rengrir el mora Jehovah. (Exodus 20:4, 5; Daniel 3:4-6, 12, 16-18) E kuk mekerang er chelechang? Ke mo mekerang a lsekum a merredelem er a ureor a olengit er kau el mo melenget a udoud el kirel a party el chelsechusem er a klsuul klechelid? Ngungil a lak mongiil el dimerekmo leduubech a chouaisei el tekoi, e bai molebedebek er chelechang el kirel a osengel a Jehovah er a chouaika el tekoi. Me sel leduubech, e ngmo beot er kau el mo meruul e melekoi a melemalt el tekoi el di uai tirke el tedei el buik er a Hebru.

16. Ngmekera ungil klemedengei er kid er a uldesuel a Jehovah e ngosukid el mo kltmokl el kirel a bkaischemrungel el secher?

¹⁶ A omelebedebeked el kirel a osengel a Jehovah a dirrek el sebechel el ngosukid el mo lomelemii a blakerreng er kid el mo er ngii sel leduubech a bkaischemrungel el secher. Nguaisei, ngulterekokl a rengud el diak bo dekengei a oidel a rasech me aike el eua el meklou el bingel a rasech. (Rellir 15:28, 29) Engdi ngar ngii a bebil er a ukeruul el mo chelsechusem er a usbechel a rasech el kirel a Kristiano el di ngii el melilt el oltirakl a omellach er a Biblia. Me ngoingerang a ungil taem el bo  doruul a omelilt er kid? Ngsel taem el dengar er a osbitar, el ngar er a ringel e kmal chormang me ngkired el di mereched el melilt a bo doruul? Ngkmal diak. Chelechang e ngtaem el dorriter er tia el tekoi, e deketmokl a babilenged el kirel a ukeruul, el ua Durable Power of Attorney for Health Care, e dongedecheduch er a toktang er kid. * (Momes er a footnote.)

17-19. Ngera uchul me ngklou a ultutelel a dosuub el kirel a uldesuel a Jehovah er chelechang? Mosaod.

¹⁷ E a ulebongel er ngii, e molatk er a nger er a Jesus el mora diak el melemalt el ulekrael er a Petrus el kmo: “Rubak, lak di lekau el omekcharm er kau.” Me a Jesus a mle blechoel el melebedebek el kirel aike el soal a Dios a bo loruul me aike el ulaoch el kirel a klengar er ngii me a kodellel el ngar tia el chutem. Tia el klemedengei a millisiich er ngii el lomelemii a blakerreng er ngii el mora Jehovah e mo odersii a klengar er ngii el olubet el tenget el kired el rokui.​—Monguiu er a Mateus 16:21-23. *

¹⁸ Chelecha el taem, e a Dios a soal a bo desechelil e debo er a tkurrebab el sebeched el omerk er a ungil chais. (Mateus 6:33; 28:19, 20; Jakobus 4:8) Engdi ngar ngii a rebebil er a rechad el locha mo olekebai er kid, el di ua omerellel a Petrus el mora Jesus. El ua tiang, a merredelem er a ureor a kongei el meskau a betok el udoud, engdi kau a medengei el kmo a lsekum e ke mo mengoit a betok el sikang el oureor e ngmo diak a temem el mora miting me a lechub e ke oldingel el obengkel a ongdibel. Me a lechub e ke ngar er a skuul e a resensei er kau a meskau a techellem el melukl el mora ta er a beluu el mo melemolem er a skulem. A lsekum aika el tekoi a duubech, e kau ke mo meluluuch, e meruul a research, e mengedecheduch er a rechad er a blim me a lechub a remechuodel er a ongdibel er a uchei er a omoruul er a omelilt er kau?  Ngkmal ungil a lsekum e ke mesuub el mo medengelii a osengel a Jehovah er chelechang e mo oba osengel el kirel a tekoi. E seikid, e sel bo mchelebangel a chouaika el tekoi, e ngmo diak el sebechel el mengesuseu er kau. E le ke medengelii a obo moruul er ngii e le ke mla oterekeklii a uldesuem el mo melemolem el mesiou er a Jehovah.

¹⁹ Ke locha dirrek el sebechem el lmatk a bebil el blekeradel el di mereched el duubech el mo melasem er a blakerreng er kau el mora Jehovah. Nguaisei, engdi ngdiak el sebeched el di mo kltmokl el kirel a bek el blekeradel el mo er ngii. Engdi a lsekum e kede melebedebek er a uldesuel a Jehovah er a temel a omesubed el di kid el tang, e ngmo beot er kid el lmatk aike el desiluub e mo meduch el oltaut er a chelsel a ngii di el blekeradel el mo er ngii. Me sel dosuub, e bo dolasem el mo medengelii a osengel a Jehovah el kirel a tekoi, e bo domdasu el uai ngii, e bo dolatk a rolel e ngsebeched el ousbech aike el dosuub el mo meruul a ungil omelilt er chelechang me a ngar medad el klebesei.

20, 21. (a) Ngera uchul me ngmo dmeu a rengud er a ilmekled er a chelsel a beches el beluulechad? (b) Ngmekera e sebeched el oldeu a rengud er a klengar er chelechang?

²⁰ Kede rokui el omes el beduluchei el mora beches el beluulechad. A ruumesingd er kid a oureng el mo kiei el diak a ulebengelel er a Baradis er tia el chutem. Me ngar cheungel a Rengedel a Dios, e kede mo mimokl er a rokui el ringel el dechuarm er ngii er chelechang. E osisiu el taem e ngdirk mo er ngii a ilmekled el mo meruul a omelilt er kid el oltirakl aike el soad me a urunguled.

²¹ Engdi tia diak lebelkul a kmo ngmo diak a telkelel a ilmekled. A remedemedemek el chad a dirk kirir el meruul a omelilt er tir el oltirakl er a llechul a Jehovah me a uldesuel el kirel a tekoi. E tiang a mo uchul a klou el deurreng me a budech. (Psalm 37:11) Me chelecha el dongiil er sel taem, e ngsebeched el oldeu er a rengud er a klengar er chelechang el dirk dosmechokl a uldesued el mo ua uldesuel a Jehovah.