1. Ngera me kede rokui lousbech a ongelaod?

 KEDE rokui el ousbech a ongelaod. Alta klengar er kid a mio er a blekiklreng me a klengiterreng me a sebekreng. Kede locha chuarm el secher, me a cheluodel, me a lechub e ngmla mad a betik er a rengud. E a rebebil er kid a chuarm er a mekngit lomerellir a rebebil. Me a lmuut el tang, a rechad el kiei el iliuekl er kid a mengal mla mo mekngit a blekerdelir. Ngmera el tekoi, “a blsechel a ringel” a meketeklii el kmo kede kiei er a “uriul sils” e a bek el sils e kede olekedang er a beches el beluulechad. (2 Timothy 3:1, BT) Me nguaisei, engdi kede dirrek el locha mla mengiil el kemanget el taem el kirel a otutel a telbilel a Jehovah el mo tmaut, e locha mengal mla mo omelechesiu a lmuut el betok el ringel. Me kede mo metik a ongelaod er ker?

2, 3. (a) Ngera klemedengei er kid el kirel a Habakuk? (b) Ngera me kede merriter er a babier er a Habakuk?

² Me bo dorriter er a babier er a Habakuk me bo debetik er a nger er tia el ker. Alta Bades a diak lebeskid a betok el omesodel a klengar er a Habakuk, engdi babilengel a kmal melisiich er kid. A ngakl el  Habakuk a locha belkul a kmo “Ochulel a Bltikerreng.” E tia locha mesaod er sel rolel a Jehovah a lomechull e longelaod er a remengull er ngii. Me a lechub e ngdirrek el locha melutk el mo er sel rolel e a reblak a rengrir el mengull er ngii a bereked er Ngii. A Habakuk a milengedecheduch er a Dios, e uleker a bebil el ker er ngii. Me a Jehovah a ulemekrael er a Habakuk el mo meluches aika el cheldechedecherir e le Ngmle medengei el kmo ngsebechel el mo uchul a klungioled.​—Habakuk 2:2.

³ Tia el cheldecheduch er a delongelel ngika el merengela uldesuel el profet me a Jehovah a di ta el tekoi el losaod er ngii a Biblia el kirel a Habakuk. Engdi tia el babilengel a tedebechel ‘a ikel ngar a Chedaol Llechukl el melluches . . . me ng mo sebeched el melatk e mengiil el klou a rengud e meduch a rengud.’ (Rom 15:4) Me ngmekera babier er a Habakuk e ngosuir a derta er kid? Ngsebechel ngosukid el mo medengelii a belkul a bo demui loumerang er a Jehovah. Tia el ulochel a Habakuk a oterekokl a rengud el kmo ngsebechel mo budech a uldesued alta e kede mo chelebangel a ngii di el mondai me a lechub a omelsemai er a klengar er kid.

4. Ngera me ngkmal mle meringel a uldesuel a Habakuk?

⁴ Monguiu er a Habakuk 1:2, 3. A Habakuk a kiliei er a chelsel a kmal mle meringel taem. A rechad el kiei el iliuekl er ngii a kmal mle mekngit a blekerdelir, e tiang a rirellii el kmal mlo mekngit a rengul. Sel lomes el meliuekl er ngii, e ngomes er a rechad er a Israel el kmal di kakngit e diak el tabesul a omerellir er a delongelir. Me ngmlo melatk el kmo: ‘Ngoingerang e aika el mekngit el blekeradel a mo nguemed? Ngera me ngkmal meketeketang el Jehovah omechei aika el tekoi me ngmelemolem?’ Ngmlo omdasu el kmo ngdiak a ngera el sebechel rullii, me ngullengit er a Jehovah me lesemecheklii tia el tekoi. A Habakuk a locha mlo omdasu el kmo a Jehovah a dikea lomekerreu er a Rechedal me a lechub e ngdikea lokerang. Me kau, ngmla ta el bo leuaisei a uldesuem?

5. Ngera sebeched el suubii er a babier er a Habakuk? (Momes er a siasing er a uchelel a suobel.)

⁵ Me a Habakuk, nguleker aika el ker e le ngii el mlo diak loumerang er a Jehovah me aike el telbilel? Ngdiak leuaisei! Ngikang a ullengit er a Jehovah me lengesuir el sumechokl a tekoi el uluumededenger me a mondai er ngii, el ochotii el kmo ngdirkak bo lak a omeltkel e ngbai dirk oumerang er ngii. Me ngbleketakl el kmo, a Habakuk a mle bekikl e rrau a rengul. Ngdimlak lodengelii a uchul me a Jehovah a mle meoud el meruul a tekoi, me sel uchul me Ngulemechei er ngii me ngchuarm er a betok el tekoi. A mera er ngii, e a Jehovah a ulemekrael er a Habakuk el mo meluches aika el sebekreng er ngii el olisechakl er kid er a klou a ultutelel el tekoi. Me ngdiak el kired el medakt el louchais er a Jehovah er aike el tekoi el debekikl me a lechub e kede oumededenger. Ngmengemedaol er kid el mo meluluuch el ouchais er ngii aike el mera el ngar a rengud. (Psalm 50:15; 62:8) A Osisechakl 3:5 a melisiich er kid el kmo: “Moumeral ulsirs er a RUBAK el oba rengum el rokir. Lak mulsirs er a di llemesel a rengum.” A Habakuk a uleltaut aika el tekoi er a klengar er ngii.

6. Ngera me ngklou a ultutelel el doluluuch?

 ⁶ A Habakuk a uluumerang er a Jehovah el Sechelil e dirrek el Demal, e kilengei el mo olekeed er ngii er a Jehovah. Ngdimlak di lesebek a rengul er a blekeradel el lechilebangel e lolasem el di ngii el mesmechokl. Ngbai milluluuch el subedii er aike el ngar a rengul me a sebekreng er ngii. E tiang a kmal ungil kerebai el kired. A Jehovah a ngike el Orrenges a nglunguuch, e omekedong er kid el mo ochotii er ngii el kmo kede oumerang er ngii lokiu sel doluluuch el subedii er a ringelel a uldesued. (Psalm 65:2) E sel doruul uaisei, e kede mo mesa rolel e a Jehovah a onger a nglunguched. Kede mo melechesuar a chimal el omechull er kid er sel taem el longelaod e lomekrael er kid. (Psalm 73:23, 24) Ngmo ngosukid me kede mo medengelii a uldesuel el kirel a blekeradel el dechelebangel er ngii, el diak lultuil er a kmo ngua ngera el mondai a decharm er ngii. A doluluuch el mora Jehovah a ta er a kot lungil rolel e kede ochotii el kmo kede oumerang er ngii.

7. Ngmilekera Jehovah er sera louchais er ngii a Habakuk er aike el tekoi el suebek a rengul er ngii?

⁷ Monguiu er a Habakuk 1:5-7, NW. * (Momes er a footnote.) A Habakuk er a uriul er a lsbedii a Jehovah el kirel aike el tekoi el suebek a rengul er ngii, e nglocha mlo melatk el kmo ngmo mekerang a Jehovah. Me ngika el betik a rengul el Chedam el Jehovah a mle medengelii a uldesuel a Habakuk. Ngmle ungil medengei el kmo a Habakuk a chuarm e dirrek el ullengit a ngeso er ngii. Me ngdimlak loungeroel er a Habakuk, e bai uluuchais er ngii aike el tekoi el bochu loruul el mo er tirke el diak leblak a rengrir el chad er a Judea. A Habakuk a locha mle kot el chad el Jehovah a uluuchais er ngii el kmo a blals el mo er tir a kmal di kmedung.

8. Ngera me a nger er a Jehovah a kuk mle ngodech er a uldesuel a Habakuk?

⁸ A Jehovah a silodii el mora Habakuk el kmo Ngmla mo kltmokl el meruul a tekoi. Ngmo omals er a remekngit el chad er a Juda. Me sera ledu el kmo tia mo duubech er a “taem er kemiu” e a Jehovah a ulechotii el kmo tia el kerrekeriil a mo er ngii er a taem el dirk chad a Habakuk me a lechub a rechad er a Israel el kiliei el iliuekl er ngii. Me a nger er a Jehovah a kmal mle ngodech er a tekoi el lulemdasu a Habakuk. A rechad er a Kaldea me a lechub a Babilon a kot el mle mekngit a blekerdelir. Te lmuut el mle mekngit a blekerdelir er a rechad er a Israel el tir a mle medengei a llechul a Jehovah. Me ngera me a Jehovah a ousbech er tirka el mekngit a blekerdelir el chad el mengull a klsuul el chelid el mo omekcharm er a rechedal? Tiang a di mo uchul a lmuut el betok el ringel el mora rechad er a Juda. * (Momes er a footnote.) Ngmo uangera uldesuem oleko ke mle Habakuk?

9. Ngera lmuut el bebil er a ker el luleker a Habakuk?

⁹ Monguiu er a Habakuk 1:12-14, 17. Alta Habakuk a mle medengei el kmo a Jehovah a mo ousbech er a rechad er a Babilon el mo omals er tirke el mekngit el chad el kiei el iliuekl er ngii, engdi ngdirk mle rrau a rengul. Me nguaisei, engdi nguleba klengariourreng e tilbir el di melemolem loumerang er a Jehovah. A mera er ngii, e ngdilu el kmo a Jehovah a melemolem el “Osebecheklek.” (Duteronomi 32:4; Isaia 26:4) A Habakuk a mle ulterekokl a rengul el kmo a Dios a betik a rengul e ungil a blekerdelel, me nguchul me ngdimlak lemedakt loker er a Jehovah el kirel a bebil ker el kmo: Ngera uchul me a Jehovah a mecherei a beluu er a Juda me ngmengal mo  chuarm me a rechedal a lmuut el mo chuarm? Ngera me ngdiak lemereched el sumecheklii tiang? Ngera uchul me ngika el Olab a Bek el Klisiich a “di lmuk” e di mechei aika el mekngit me ngdi ngar ngii er a beluu el rokir? Ngika el Jehovah a “chedaol” e a ‘chelsul a medal a imis el chedaol’ me ngkmal diak lutekengelii a rengul er a mekngit.

10. Ngera me a lebebil er a taem e kede mo ua uldesuel a Habakuk?

¹⁰ A lebebil er a taem e kede mo omdasu el ua uldesuel a Habakuk. Kede orrenges er a Jehovah. Kede ultuil a klaumerang er kid er ngii e dirrek el mesuub e menguiu a Tekingel, el ngii a melisiich er a omeltked. Kede dirrek el orrenges a chisel a telbilel lokiu sel dorrenges aike el tekoi el cheldebechelel a olisechakl er kid. Engdi a lebebil e kede mo melatk el kmo, ‘Ngoingera ulebengelel a ringel el decharm er ngii?’ Ngsebeched el nguu a klubeled er a tekoi el lerirellii a Habakuk.

11. A Habakuk, ngtilbir er a rengul el mo mekerang?

¹¹ Monguiu er a Habakuk 2:1. A cheldecheduch er a delongelel a Habakuk me a Jehovah a rirellii el mo budech a rengul. Ngrirellii el mo ulterekokl a rengul e mengiil er a temel a Jehovah el mo meruul a tekoi. Me ngmle betok el taem el di lengii lomeklatk er ngii el melekoi el kmo: “Ak mo chelellakl e mengiil er sel taem a le mei.” (Habakuk 3:16) A rebebil blak a rengrir el mesiungel a Dios a dirrek el mle klou a rengrir el mengiil er a temel a Jehovah el mo meruul a tekoi. Me a ungil kerebai er tir a melisiich er kid e le ngochotii el kmo kid me ngdirrek el sebeched el meruul uaisei.​—Mika 7:7; Jakobus 5:7, 8.

12. Ngera sebeched el suubii er a blekerdelel a Habakuk?

¹² Ngera sebeched el suubii er a telbilel a Habakuk? A kot, e ngkmal diak el kired el meterob el meluluuch el mora Jehovah el kirel a ngii di el mondai er kid. E a ongerung, e ngkired el lorrenges a tekoi el ledu Jehovah lokiu a Tekingel me a cheldebechelel. E a ongedei, e ngkirel mo klou a rengud e mengiil er a Jehovah el mo meruul a tekoi, e dirrek el mo oumerang el kmo ngmo sumechokl a ringeled er sel kot lungil temel. Me a lsekum kede mo oukerebai er a Habakuk, e ngmo budech a rengud e dirrek el mo sebeched loutekangel. E a omeltked a mo ngosukid el mo oba kllourreng e mo dmeu a rengud alta e kede chuarm er a mondai er kid. Ngulterekokl a rengud el kmo a Demad el ngar er a eanged a remuul a tekoi.​—Rom 12:12.

13. Ngmilekera Jehovah er a longelaod er a Habakuk?

¹³ Monguiu er a Habakuk 2:3. Ngsebechel mo ulterekokl a rengud el kmo a Jehovah a mle ungil a rengul el Habakuk a tilbir el mo mengiil er a Temel el mo meruul a tekoi. Ngika el Olab a Bek el Klisiich a kmal mle ungil medengelii a ringelel a Habakuk, me Ngmilengelaod er ngika el profet e uleba bltikerreng el subedii el kmo Ngmo onger aike el keril. A Habakuk a di kmedu el mo mechelaod a rengul el kirel aike el tekoi el mle suebek a rengul er ngii. Me a Jehovah a ua ledilu er a Habakuk el kmo: “Di bo leklou a rengum e moumerang er ngak. Ak mo  onger er a nglunguchem, alta e ke omdasu el kmo ngkmal mo meoud.” A Jehovah a ulemeklatk er a Habakuk el kmo Ngmla tibir a temel er a uchei el kmo ngoingerang e Ngmo oltaut a Telbilel. Me ngmillisiich er a Habakuk me lolemolem el mengiil. E le uriul e ngkmal diak bo lemekngit a rengul ngika el profet.

14. Ngkirel mo ulterekokl a rengud el meruul a ngerang er sel taem el decharm er a mondai er kid?

¹⁴ Kid me ngdirrek el kired el mengiil er a temel a Jehovah el mo meruul a tekoi. Ngdirrek el kired el kerekikl lorrenges aike el louchais er kid. Seikid e ngmo ulterekokl a rengud e mo budech a uldesued alta e kede chuarm er a betok el mondai. A Jesus a millisiich er kid el mo diak domtab a “belsechel ma temel” a tekoi el dirkak louchais er kid a Dios. (Rellir 1:7) Ngkmal kired el mo oumerang el kmo a Jehovah a medengelii sel kot lungil taem el bo loruul a tekoi. Me a leuaisei, e ngdiak el kirel mo mechitechut a rengud, e ngbai kired el mo oba klengariourreng e mo klou a rengud e oumerang er a Dios. Me chelecha el dongiil, e ngkired el mo ungil lousbech a temed e dirrek el mesiou er a Jehovah el ngar a tkurrebab el sebeched.​—Markus 13:35-37; Galatia 6:9.

15, 16. (a) Ngera el telbiil a sebeched el metik er a babier er a Habakuk? (b) Aika el telbiil, ngosisecheklid el kirel a ngerang?

¹⁵ A Jehovah a tilbir el kmo: “Tirkel melemalt a mo ngar ele ng blak a rengrir er a Dios” me a “beluulchad a mo mui er a klemedengei er a klebkellel a Dios.” (Habakuk 2:4, 14) Ngmera el tekoi, a Jehovah a tibir el mo mesterir a klengar el mo cherechar tirke el oba kllourreng e oumerang er ngii.

 ¹⁶ A telbiil el medung er a Habakuk 2:4 a kmal klou a ultutelel a uchul me a apostol el Paulus a milsaod er ngii el edei el taem el ngar a babilengel! (Rom 1:17; Galatia 3:11; Hebru 10:38) Me alta e kede mo chuarm er a ringel, engdi ngulterekokl a rengud el kmo kede mo omes a otutel a telbilel a Jehovah a lsekum kede melemolem el oumerang er ngii. A Jehovah a kmal soal a bo lultaut a osenged er a omeltked el kirel a ngar medad el klebesei.

17. A Jehovah, ngoterekokl a rengud el kirel a ngera el tekoi el bo loruul a lsekum kede oumerang er ngii?

¹⁷ A babier er a Habakuk a meskid a klou a ultutelel el suobel el kired kid el rokui el kiei er a taem er a uriul sils. A Jehovah a tibir a klengar el mo cherechar el kirir a rokui el melemalt el chad el tir a oumerang er ngii. Mada dolemolem el melisiich er a klaumerang er kid er a Dios, alta e kede chuarm er a mondai me a sebekreng. A tekoi el Jehovah dilu er a Habakuk a oterekokl a rengud el kmo Ngii a olengeseu er kid e mo osebelid. Ngolengit er kid me bo doumerang er ngii e bo leklou a rengud el mengiil er sel taem el bla loterekeklii el kirel a Rengedel el mo mengedereder er a chutem. Me ngar seikid el taem, e tia el beluulechad a mo mui er a rechad el dmeu a rengrir e budech a uldesuir el tir a mengull er a Jehovah.​—Mateus 5:5; Hebru 10:36-39.

18. Ngera ngrirellii er a uldesuel a Habakuk a tekingel a Jehovah?

¹⁸ Monguiu er a Habakuk 3:16-19. A tekoi el Jehovah dilu er a Habakuk a kmal mle klou a lerellii er ngii. A Habakuk a millebedebek aike el mengasireng el tekoi el bla leketmokl a Jehovah el kirir a Rechedal er a uchei. Me chelechang e ngmla lmuut el smisichii a klaumerang er ngii er a Jehovah. Ngmla mo ulterekokl a rengul el kmo ngdi kmedung a Jehovah el mo meruul a tekoi! Tiang a mera el milengelaod er ngika el profet, alta e ngmle medengei el kmo nglocha dirk melemolem el chuarm el telkib el taem. A Habakuk a mlo diak el loumededenger. Ngbai mle mui el oumerang el kmo a Jehovah a mo osebelii. Me a tekoi el ledilung el ngar er a 18 el kekerei el bades a locha kot el klou el olechotel a klaumerang el dechiuii er a Biblia. A rebebil el chellimosk el chad a mesaod er a belkul tia el tekoi el kmo: “Ak mo melechesokl er a deurreng el kirel a Rubak; Ak mo meloik el dmeu a renguk el kirel a Dios.” Me tia kmal mesisiich el tekoi el sebeched el rokui el nguu a klubeled er ngii! A Jehovah a diak di letibir a kmal ungil tekoi el kirel a ngar medad e lemerekong, e ngdirrek el oterekokl a rengud el kmo ngdi kmedung e ngmo oltaut aika el telbilel.

19. Ngmekera e mo mechelaod a rengud er a blekerdelel a Jehovah el ua Habakuk?

¹⁹ A kot el klou a ultutelel el tekoi el desuubii er a babier er a Habakuk, a mo oumerang er a Jehovah. (Habakuk 2:4) Ngkired el melisiich er a deleuill er kid me a Jehovah a lsekum ngsoad el melemolem el oumerang er Ngii. Me aikakid a tekoi el kmal kired el meruul. (1) Melemolem el meluluuch el ouchais er a Jehovah aike el rokui el tekoi el debekikl er ngii e suebek a rengud er ngii. (2) Mo kerekikl lorrenges a tekoi el louchais er kid a Jehovah lokiu a Tekingel, e dirrek el mo oltirakl a ulekrael el lomeskid lokiu a cheldebechelel. (3) Mo blak a rengud e oba kllourreng er chelecha el dongiil er a Jehovah el mo oltaut a telbilel. Aikaikid a lurruul a Habakuk. Alta e ngkmal mle meringel a uldesuel er sera lomuchel el chadecheduch ngii me a Jehovah, engdi uriul e ngkmal mlo mesisiich a rengul e dirrek el dmeu a rengul! Me a lsekum kede oukerebai er a Habakuk, e kede dirrek el mo mechelaod a rengud er a blekerdelel a Demad el Jehovah el ua lomechull er kid. Tiang a mera el klou el rolel a ongelaod el denguu er a chelsel tia el mekngit el beluulechad!