1, 2. (a) Ngmle uangera nger er a Jesus er a ledu er ngii a Petrus el mo melatk er a di ngii? (Momes er a siasing er a uchelel a suobel.) (b) Ngera me a Jesus a ulenger el uaisei?

 A REDISAIPLO er a Jesus a kmal kilebetiekl! Te ulemdasu el kmo a Jesus a mo rullii a Renged er a Israel el lmuut el mo mengedereder, engdi a Jesus a dilu el kmo ngdi kmedung el mo chuarm e mad. Me a apostol el Petrus a mle kot el mengedecheduch el kmo: “Rubak, lak di lekau el omekcharm er kau; e le tia el tekoi a diak el kirel el mei er kau.” Me a Jesus a dilu el kmo: “Mcheridau er ngak e Satan! Kau a melibas er ngak ele ikal uldesuem a diak le ngar a Dios el mei, ng bai ngar a chad el mei.”​—Mateus 16:21-23, NW; Rellir 1:6.

² Me a lolekoi el uaisei a Jesus, e ngmileketeklii el kmo a uldesuel a Jehovah a kmal kakerous ngii me a uldasu er tia el beluulechad el longedereder er ngii a Satan. (1 Johanes 5:19) A Petrus a millisiich er a Jesus el di mo melatk er a di ngii, el ngii a blekerdelir a rebetok el chad er tia el beluulechad. Engdi a Jesus a mle  medengei el kmo a Jehovah a soal a longetmokl er ngii el kirel a ringel me a kodall el ngii a kmedu el mo chelebangel er ngii. Me a nger er a Jesus a meketeklii el kmo ngkilengei a uldesuel a Jehovah e uleltngakl a uldasu er tia el beluulechad.

3. Ngera me ngmeringel er kid el mo kongei a uldesuel a Jehovah e doltngakl a uldasu er tia el beluulechad?

³ E kid a kuk mekerang? Kede omdasu el ua Jehovah me a lechub e kede ua rechad er tia el beluulechad? Kid el Kristiano a uchul me kede melasem er a tkurrebab el sebeched el mo meruul aike el tekoi el lodeuir a rengul a Dios. Engdi ngua ngera uldesued? Kede melasem er a tkurrebab el sebeched el mo omdasu el ua Jehovah, el belkul a kmo, kede omes a tekoi el uai ngii? Kede ousbech er a blakerreng el mo meruul el uaisei. Engdi ngkmal beot er kid el mo omdasu el ua rechad er tia el beluulechad e le kede kiei el iliuekl er a reng er tia el beluulechad. (Efesus 2:2) A rechad er tia el beluulechad a dirrek el di omdasu el di kirir, me ngsebeched el mekesuseu el mo omdasu el uai tir. Me ngmeringel er kid el mo omdasu el uai a Jehovah engdi ngkmal beot er kid el mo omdasu el ua rechad er tia el beluulechad.

4. (a) Ngera mo duubech a lsekum e kede mecherei tia el beluulechad me ngomekrael a uldesued? (b) Ngera kede mo mesuub er tia el suobel?

⁴ Sel debecherei tia el beluulechad me lomekrael a uldesued, e kede di mo melatk er a di kid e mo soad el di kid el melilt el kmo ngera ungil me a ngera mekngit. (Markus 7:21, 22) Me ngkmal klou a ultutelel a dosuub el mo omdasu el ua “Dios” el diak el ua re “chad.” E tia el suobel a mo ngosukid el meruul er tiang. Kede mo mesaod aike el uchul me ngdiak el meringel a bo doba osengel a Jehovah el kirel a tekoi, e ngbai mo uchul a klungioled. Kede dirrek el mo mesa rolel e ngdiak debechei a uldasu er tia el beluulechad me lomekrael me a lechub e longesuseu er kid. E a ongingil el suobel, e kede mo mesuub er a rolel e ngsebeched el mo oba uldesuel a Jehovah el kirel a bebil el tekoi.

5. Ngera me a rebebil er a rechad a diak el sorir a ngii di el chad a lomekrael er tir?

⁵ A rebebil er a rechad a diak el sorir a ngii di el chad a bo lomekrael er a uldesuir. Te melekoi el kmo, “Ngdi ngak el omdasu el kirek.” A belkul a tekingir a kmo, ngsorir el di tir el meruul a omelilt er tir e ngar ngii a llemeltir el meruul el uaisei. Ngdiak el sorir a rebebil a bo longedereder er tir, me a lechub e lorrimel er tir el mo uai a rokui el chad. * (Momes er a footnote.)

6. (a) Ngera el ilmokl a lomeskid a Jehovah? (b) Tia el ilmokl, ngdiak a telkelel?

⁶ Ngungil a bo dodengei el kmo alta kede kongei er a uldesuel a Jehovah el kirel a tekoi, engdi ngdirk ngar ngii a uldesued. A Ongeru el Korinth 3:17, BT a kmo: “Sel le ngarngii a Reng ra Rubak a ngarngii a ilmokl.” A Jehovah a meskid a ilmekled el melilt el kmo kede mo uangera el chad. Me kid a kakerous a soad el tekoi e sebeched el di kid el melilt el kmo ngera el tekoi a desemeriar er ngii. A Jehovah a milebid el uaisei. Engdi tia diak el belkul a kmo ngdiak a telkelel a ilmekled. (Monguiu er a 1 Petrus 2:16.) Me sel bo el kired el mo medengei el kmo ngera ungil me a ngera mekngit, e a Jehovah a soal a dousbech er a Tekingel el omekrael er kid. Me tia ngmeringel  el tekoi me a lechub e ngmo uchul a klungioled?

7, 8. Ngmeringel er kid el mo omes a tekoi el ua Jehovah? Mosaod.

⁷ Ngsebeched el omekesiu er ngii er tiang. A ruungalek a melasem el olisechakl er a rengelekir a ungil tekoi. Te locha olisechakl er tir el mo honest, e mo blak a rengrir el oureor, e mo omekerreu er a rebebil, e aikang a diak el meringel el tekoi. A ruungalek a bai sorir el ngosuterir a rengelekir me bo lungil a klengar er tir. Me sel bo lemeklou a rengalek e letobed er a blai, e ngmo sebechir el di tir el meruul a omelilt er tir. Me a lsekum e te kiei el oltirakl aike el ungil tekoi el lulisechakl er tir a redemerir me a rederrir, e ngklou a techellir el mo ungil a omelilt el loruul me ngdiak bo el chuarm a betok el mondai me a sebekreng e bo louuchel a rengrir er a uriul.

⁸ A Jehovah a soal a rengelekel a bo lungil a klengar er tir el di ua chad el ungil oungalek. (Isaia 48:17, 18) Me ngolisechakl er kid a omellach el kirel a blekerdeled me a omerelled el bedul a rebebil. Ngomekedong er kid el mo mesuub el omes a tekoi el ua osengel e mo kiei el oltirakl a llechul, e tiang a diak el meringel el tekoi. Ngbai rullid el mo mellomes a rengud e ngosukid el mo ungil melilt a tekoi el doruul. (Psalm 92:5; Osisechakl 2:1-5; Isaia 55:9) Me ngdirk sebeched el meruul a soad el tekoi, engdi kede dirrek el mo ungil melilt a tekoi, el mo uchul a deuil a rengud. (Psalm 1:2, 3) Me sel bo domdasu a tekoi el ua Jehovah, e ngmo uchul a klou el klungioled!

9, 10. Ngera ochotii el kmo a uldesuel a Jehovah a lmuut el ngarbab er a uldasu er tia el beluulechad?

⁹ A lmuut el ta er a uchul me ngsoad el mo omdasu el uai a Jehovah a ngii el uldesuel a lmuut el ngarbab er a uldasu er tia el beluulechad. A beluulechad a ouchais el kmo ngera el blekeradel a ungil, me a rolel e ngmo er ngii a deurreng er a telungalek er kid, me a rolel e ngmo er ngii a kot el ungil el urered, me a lmuut el bebil er a tekoi er a klengar. Engdi oumesingd er aika el uldasu a kmal diak loltirakl er a uldesuel a Jehovah. El ua tiang, a beluulechad a blechoel el melisiich er a rechad el di mo meruul aike el sorir el tekoi e mo omes a deleboes el omeruul el ua lungil el tekoi. E a lebebil er a taem e ngmelisiich er a rubekel el kmo, ngmo dmeu a rengrir a lsekum te mo chacheroid me a lechub e te merort a chebechiielir el di mekekerei el tekoi a uchul. E tiang a omtok er aike el lolisechakl a Biblia. Engdi a uldasu er tia el beluulechad er chelechang, nglmuut el ungil er a ulekrael el ngar er a Biblia?

¹⁰ A Jesus a dilu el kmo: “Ngdi llomeserreng er a Dios a chemolt el klemerang el oeak a ikel lukdubech el tekoi.” (Mateus 11:19) Me alta tia el beluulechad a kmal mla olengeriakl er a tekoi er a technology, engdi ngdirkak el bo el sebechel el sumechokl aike el meklou el mondai er a klechad el rullii me ngmeringel er kid el mo dmeu a rengud, el uai a mekemad, me a omengetukel me a delengerenger. Me a lmuut el tang, a beluulechad a omes a deleboes el omeruul el ua lungil tekoi. Engdi a rebetok el chad a kongei el kmo ngmelemall a telungalek, e mo uchul a secher, me a lmuut  el bebil er a tellemall. E kuk mekerang el kirel a ulekrael er a Jehovah? A Rekristiano el mla kongei er a uldesuel a Jehovah a ungil a klengar er a telungalek er tir, e mesisiich a bedengir, e budech a delongelir el obengterir a rudam me a rudos er tir er a beluulechad el rokir. (Isaia 2:4; Rellir 10:34, 35; 1 Korinth 6:9-11) Tia meketeklii el kmo a uldesuel a Jehovah a lmuut el ngarbab er a uldasu er tia el beluulechad.

11. Ngtecha ulemekrael er a uldesuel a Moses, e ngera dilubech?

¹¹ A remesiungel a Jehovah er a irechar a mle medengei el kmo a uldesuel a Jehovah a lmuut el ngarbab. El ua tiang, alta Moses a “mlosisechakl er a bek el llomeserreng er a re chad er a Ekipten,” engdi ngmle medengei el kmo a mera el llomeserreng a mlara Jehovah el mei. (Rellir 7:22; Psalm 90:12) Me ngullengit er a Jehovah el kmo: “Mochotii a uldesuem me bo le sebechek el mo medengelkau.” (Exodus 33:13) A Moses a kilengei er a Jehovah me ngomekrael er a uldesuel a uchul me a Jehovah a uluusbech er ngii el mo oltaut a Moktek er ngii el oeak a mengasireng el rolel, e milengebkall er a Moses er a lomekedong er ngii el kmo, ngchad el klou a klaumerang er ngii.​—Hebru 11:24-27.

12. A Paulus ngmle ultuil er a ngerang el kirel a omelilt er ngii?

¹² A apostol el Paulus a mle mellomes a rengul, e ngarbab a skulel, e millekoi a kesengil e ngeru el bedengel a omelekoi. (Rellir 5:34; 21:37, 39; 22:2, 3) Engdi ngultngakl a llomeserreng er tia el beluulechad e bai mlo ultuil er a Tekingel a Dios el kirel a omelilt er ngii. (Monguiu er a Rellir 17:2, 3; 1 Korinth 2:6, 7, 13.) Sei a uchul e ngkmal mle ungil a omesiungel e ulemes el beduluchei el kirel a diak a ulebengelel el omeksullel el bo el nguu.​—2 Timothy 4:8.

13. Ngtecha ngerechelel el mo sumechokl a uldesued me bo domes a tekoi el ua Jehovah?

¹³ Ngbleketakl el kmo a uldesuel a Dios a lmuut el ngarbab er a uldasu er tia el beluulechad. Me a lsekum e kede oltirakl a llechul a Dios, e ngmera el mo dmeu a rengud e ungil a klengar er kid. Engdi a Jehovah a diak lorrimel er kid el mo omdasu el uai ngii. A “blak a rengul e mellomes a rengul el mesiou” me a remechuodel a diak longedereder a uldesued. (Mateus 24:45; 2 Korinth 1:24) A derta er kid a ngar ngii a ngerecheled el mo sumechokl a uldesued me bo domes a tekoi el ua Jehovah. Me ngmekera doruul er tiang?

14, 15. (a) Ngera kired el melebedebek el kirel a lsoad el mo ua uldesuel a Jehovah? (b) Ngera me ngdiak el kired el omekeek er a uldesued er a uldasu er tia el beluulechad? Mosaod.

¹⁴ A Rom 12:2 a kmo: “Lak di moltirakl a blekerdelel a tekoi er tia el beluulchad, e bai bsa techellel a Dios me lukbeches a rengmiu e le ngodech a blekerdeliu. E seikid e kom mo medengelii a rengul a Dios er a kmo ng ngera ungil, ma ngera odeuir a rengul, ma ngera kmal cherrungel el ungil.” Tia el bades a osisecheklid el kmo, alta ngkakerous el tekoi a ulemekrael a uldesued er a uchei er a bo dodengelii a klemerang, engdi ngsebeched el ngmodech a uldesued el mo oltirakl a uldesuel a Dios. Me alta e a tekoi el di demechell e ngngar ngii er kid me a tekoi el dilubech er a klengar er kid a sebechel el omekrael er a rolel a domdasu a tekoi, engdi ngsebechel di mengodech a uldesued. E mo mengodech el oltirakl er aike el tekoi el deblechoel el melebedebek el kirel. Me a lsekum e kede melebedebek el kirel a uldesuel a Jehovah, e ngmo ulterekokl a rengud el kmo a osengel a blechoel el melemalt. E seikid, e ngmo soad el omes a tekoi el uai ngii.

 ¹⁵ Me a lsoad el melodech a uldesued el mo oltirakl a uldesuel a Jehovah, e ngkired el mo diak ‘doltirakl a blekerdelel a tekoi er tia el beluulchad.’ Me tia belkul a kmo ngkired el mo diak domes e donguiu e dorrenges a ngii di el ngerang el omtok er a uldesuel a Dios. Me a bo dodengelii a klungel a ultutelel tia el tekoi, e ka me bo dosaod el kirel a kall. A chad el soal el mo mesisiich a bedengel a locha mo melilt el menga ungil el kall. Engdi ngdi mo diak a ultutelel tia el tekoi a lsekum e ngblechoel el menga mla mo mekngit el kall! Me nguaisei, a blakerreng er kid el mesuub el kirel a uldesuel a Jehovah a di mo diak a ultutelel a lsekum kede omekeek a uldesued er a uldasu er tia el beluulechad.

16. Ngera el tekoi a kired el omekerreu er kid er ngii?

¹⁶ Me kid, ngsebeched el mo cheroid er a rokui el uldasu er tia el beluulechad? Ngdiak, e le kid el kiei er a chelsel e diak el sebeched el tuobed er ngii a uchul me kede mo remenges a bebil el uldasu er tia el beluulechad. (1 Korinth 5:9, 10) Ngmo lmuut me sel doldingel, me kede mo rongesterir a rechad el mesaod a cheleuid el uldasu me a klsuul el klaumerang. Me alta ngdiak el sebeched el mo cheroid er a rokui el cheleuid el uldasu, engdi ngdiak el kired el melemolem el melatk me a lechub e dekengei er ngii. Kede ua Jesus el kired el mereched el oltngakl a uldasu el Satan a soal a bo dolab. E sebeched el di kid el omekerreu er kid loeak sel lak dongoit a klou el taem el melatk el kirel a uldasu er tia el beluulechad.​—Monguiu er a Osisechakl 4:23.

17. Kede mekera e mengeroid er kid er a uldasu er tia el beluulechad?

¹⁷ El ua tiang, ngkired el kerekikl el melilt er a resechelid. A Biblia a mengelechel el kmo a lsekum kede mo sechelirir tirke el diak losiou er a Jehovah, e kede mo omuchel el omdasu el uai tir. (Osisechakl 13:20; 1 Korinth 15:12, 32, 33) Ngdirrek el kired el mo kerekikl el melilt a tekoi er a ongelaod el doruul. Me sel doltngakl a ongelaod el melisiich a uldasu el kmo kede mlara mongkii el mei me a kdekudel el blekeradel me a lechub e ngdeleboes el omeruul, e ngmo diak dongikiongel a uldesued el olab a uldasu el “lomtok ra klemedengei ra Dios.”​—2 Korinth 10:5, BT.

18, 19. (a) Ngera uchul me ngkired el mo kerekikl el kirel a uldasu er tia el beluulechad el diak el sal bleketakl a olechotel? (b) Ngera el ker a sebeched el oker, e ngera uchul?

 ¹⁸ Ngdirrek el kired el mo medengei e oltngakl a uldasu er tia el beluulechad el diak el sal bleketakl a olechotel. El ua tiang, a bebil el chais er a beluu a melisiich a bebil el uldasu er a balatiks. E a kuk bebil el chais a melisiich a turrekong me a meklou el tekoi el beluulechad a omes el kmal ungil. A kuk bebil el mubi me a babier a melisiich aike el uldasu el kmo “ngak a kot” me a “telungalek a kot” e remuul el mo tabesul, e ungil, e dirrek el melemalt. Nguaisei engdi aika el uldasu a omtok er a Biblia el melekoi el kmo, kid me a telungalek er kid a mera el mo dmeu a rengud a lsekum ngbetik a rengud er a Jehovah el kuk ngaruchei er a rokui el tekoi. (Mateus 22:36-39) Me a lmuut el tang, a bebil el cheldecheduch el kirir a rengalek, alta oumesingd er ngii a locha ungil a tekoi er a chelsel, engdi ngsebechel mekekokil el remuul a uldesuir a rengalek el mo omes a mekngit el omeruul el ua lungil tekoi.

¹⁹ Tia diak el belkul a kmo ngmekngit a doldeu a rengud er a ungil rolel a ongelaod. Engdi ngkired el di kid el oker el kmo: ‘Ngak ngsebechek el mes a uldasu er tia el beluulechad alta ngdiak el sal bleketakl a olechotel? Ngak a kumekerreu er ngak me a rengelekek er a bebil el prokuram er a TV me a babier el donguiu? Ak ullengeseu er a rengelekek el mo oba osengel a Jehovah el kirel a tekoi me lak bo lemekesuseu er aike el lerenges me a leues el uldasu er tia el beluulechad?’ A lsekum e kede mo medengelii a klekakerous er a uldesuel a Dios me a uldasu er tia el beluulechad, e ngmo diak ‘doltirakl a blekerdelel a tekoi er tia el beluulchad.’

20. Ngera sel ochotii el kmo ngtecha omekrael er kid?

²⁰ Ngdiak el kired el obes el kmo kede melai a omesodel a tekoi el oeak a eru el rolel. A tang a Jehovah e sel kuk tang a Satan me a beluulechad er ngii. Me ngtecha omekrael er kau? A nger er tia el ker a kmo, ngike el molai a omesodel a tekoi er ngii. Me a lsekum e kede kongei a uldasu er tia el beluulechad, e a beluulechad a mo omekrael a uldesued me kede mo omdasu e meruul a tekoi el di kired. Me ngkmal klou a ultutelel a bo dekerekikl el melilt aike el tekoi el domes, me a donguiu, me a dorrenges, me a dolebedebek el kirel.

21. Ngera kede mo mesaod er a ongingil el suobel?

²¹ Ngar tia el suobel e kede milsuub el kmo a bo doba uldesuel a Jehovah el kirel a tekoi, e ngkired el mengeroid er kid er a uldasu er tia el beluulechad. Ngdirrek el kired el melebedebek el kirel a uldesuel a Dios me bo el sebeched el mo omdasu el uai ngii. Ngar er a ongingil el suobel, e kede mo mesuub er a rolel e ngsebeched el meruul er tiang.