Ak milechell er a 1983. Sera kkekerei e ngkmal mle mesisiich a bedengek engdi sera bo le teruich a rekik e ngkmal mlo imis el meringel a bedengek el rokir. A bekord el eru el rak er uriul e ak milekiis er a ta el tutau e mlo diak el sebechek el ouedikel. Ak mlora tkurrebab el klisichek el mengitengtik a ochik engdi ngdimlak el sebechek. Tiakid el sils el mei er chelechang e ngmlo diak el sebechek el merael. Tia el secherek a dirrek el uchul me ngmle stob a ulekurulel a bedengek. Chelecha el sils e ak dirk ua klungel a bedengel a kekerei el ngalek.

A sesei el buil er uriul er a lebo er ngii tia el secherek el uchul me ngdiak el sebechek el tuobed er a blai, e a reteru el Sioning er a Jehovah a mlei er a blik. Oumesingd el taem el lemei a rechad er a blik e ak kumart er ngak, engdi tiakid el sils ak milechititerir tirka el redil me te mengedecheduch er ngak. Te milsaod el kirel a Baradis e tia mlo mekltkak er aike el tekoi el krirenges er a le eim a rekik. Seikid el taem e a missionari el ngklel a Jethro el kiliei er a Suriname a mle oldingel er a belumam el ta er a ta el buil. Ngika milsuub lobengkel a demak. Ngkmal mle ungil a omerellel el mei er ngak. Ngkmal mle soak a blekerdelel el chad. A rechad er a blil a demak a dirrek el ulebekak el ngar er a bebil miting er a Resioning el mla er ngii er a belumam. Tia uchul me a loker a ta er tirka el redil el Florence el kmo ngsoak el lmuut el mesuub a betok, e ak kilengei.

Me a Florence me a bechil er a Justus a liluut el mei e ulemuchel el mesuub a Biblia el lobengkek. Te miltebengii el kmo ak metitur el menguiu me te ulsisecheklak. Cherengel a taem e ak mlo meduch el di ngak el menguiu. A ta er a klebesei e te uluuchais er ngak el kmo te mla mukngerachel el mo mesiou er a beluu er a Suriname. Ngmlo mekngit a renguk e le ngdimlak a chad el ngar er a Orealla el sebechel el melemolem el mesuub lobengkek. Engdi ngdmeu a renguk e le Jehovah a dimlak a ta lobes er ngak.

Ngdimlak lemeketeket e a Floyd el ta er a pioneer a mlei er a Orealla e metik er ngak er a loldingel obliil. Ngmillekoi a omesubel a Biblia me ak mlo klikmechur. Nguleker el kmo: “Ngera me ke klikmechur?” Me ak uluuchais er ngii el kmo ngak a mla mo merek el suubii a brochure el Ngerang a Soal a Dios a Doruul? e ulemuchel el mesuub er a babier el Knowledge That Leads to Everlasting Life. * Ak silodii el mo er ngii er a uchul me ngmlo diak kusuub. Me aki mlo dmak el rokir tia el babier engdi ngii me ngdirrek el mlukngerachel el mora kuk ta er a basio. Me ngliluut el mo diak a chad el mesuub lobengkek. 

 Engdi sera 2004 e a reteru el special pioneer el Granville me a Joshua a mlukngerachel el mei er a Orealla. Te uleldingel a obliil e metik er ngak. Sera loker er ngak el kmo ngsoak el mesuub a Biblia e ak mlo klikmechur. Ak ullengit er tir me losuub er a Knowledge buk lobengkek e lomuchel er a uchelel. Ngmle soak el mesa el kmo aike el bo lolisechakl ngdi osisiu ngii me aike el kmlosisechakl er a uchei. A Granville uluuchais er ngak el kmo ngmla er ngii a miting er a ongdibel er a beluu. Me alta ngmla mo teruich el rak er a ktobed er a blik engdi mle soak el mong. Me ngmlei e otekak er a wheelchair e odbechak el mora Blil a Ongdibel.

Cherengel a taem e a Granville a mlo melisiich er ngak el mo teloi er a Skuul el Kirel a Urerel a Dios. Ngdilu el kmo: “Kau a chitechut engdi ngsebechem el mengedecheduch. A ta er a klebesei e kau a mo oltobed er a cheldecheduch el mora buai. Tia mo tekoi.” Aika el tekingel a millisiich er ngak e milekdechar a renguk.

Ak kulemuchel el omerk er a klumech lobengkel a Granville. Me nguaisei ngmle mekngit a rael er a beluu me ngmeringel a domais el ngar er a wheelchair. Me ak ullengit er a Granville me loltak er ngak lousbech er a wheelbarrow. Tiang a kmal mle ungil merael. Sera rak er a April 2005 e ak miltecholb. Kedeb el taem er uriul e a rudam a mle train er ngak el moungerachel a babier er a ongdibel e dirrek el mo oungerachel er a sound.

Ngkmal mlo mekngit a renguk er a le accident er a chert el mad a demak er a 2007. Tia kmal mlo uchul a klou el klengiterreng er a telungalek er ngak. Me a Granville a milluluuch lobengkemam e milenguiu a bades el melisiich er kemam. Eru el rak er uriul e ngliluut el duubech a ta er a klou el klengiterreng. A Granville a dirrek el mle accident er a chert el mad.

Tia el kekerei el ongdibel er kemam a mlo diak a mechuodel er ngii e di chimong a ta er a remesiou er a ongdibel. A kodellel a Granville a mlo uchul a klou el kngtil a renguk. Ngika kmal mle sechelik. Ngkmal mle blak a rengul lolengeseu er ngak er a tekoi er a klereng me a klechad. Ngar sel miting er a uriul er a kodellel e ngmle ngerechelek el menguiu er a temel Omesubel a Ongkerongel. Ngmle sebechek el chemuiu aike el kot el eru el parakurab engdi mlo diak el sebechek el orekedii a renguk me ak lilangel el dimlak el sebechek el stob. Me ngmlo kirek el metengel er a stage.

Ngkora ulemuchel el mo ungil a renguk er sel taem el rudam el mla ta er a ongdibel a mlei el me olengeseu er kemam er a Orealla. Ngdirrek el branch office a uldureklii a Kojo el ta er a special pioneer. Ngkmal dmeu a renguk le delak me a ochellek a ulemuchel el mesuub a Biblia e mla metecholb. E sera March 2015, e ak miltutk el mo ta er a remesiou er a ongdibel. Ngmlo chuib a taem e ak mlo otebedii a kot el cheldechedechak el mora buai. Seikid el sils e ak mlo klikmechur e merael a iuechel a medak e melatk a tekingel a Granville er a betok el rak er a uchei el kmo: “A ta er a klebesei e kau a mo oltobed er a cheldecheduch el mora buai. Tia mo tekoi.”

Ngoeak a prokuram er a JW Broadcasting^® e ak mla mo medengelterir a Resioning el tir a chelebangel a osisiu el blekeradel el kngar er ngii. Alta te chitechut engdi te bekerredechel e dmeu a rengrir. Ngak a dirrek el sebechek el meruul a bebil tekoi. A urungulek el soak el msang a Jehovah aike el sebechek a uldbechak el mo regular pioneer. E sera September 2019 e ak ngiluu a kmal ileakl el techall! Tiakid el buil e ak miltutk el mo mesiou el ta er a remechuodel er a ongdibel er kemam el bekord el 40 a re publisher er ngii.

Ak mera el oba omereng el saul el kirir a rudam me a rudos el milsuub el obengkek e ngilsukak er a omesiungek. Ngar uchei er ngii, e ak mera el oba omereng el saul el kirel a Jehovah el dirkak a ta lobes er ngak.