SUOBEL EL BO DOSUUB 48
‘Momes el Bedul Uchei’
“A medam di lomes el bedul uchei, ma osengem di le melemalt er medam.”—OSI. 4:25.
CHELITAKL 77 Llomes er a Milkolk el Beluulechad
NGAR TIA EL SUOBEL *
1-2. Ngmekera dotireklii sel uleklatk el ngar er a Osisechakl 4:25? Mosaod.
MOLTAK aika el edei el olechotel. A chudela el odos a melatk aike el ungil taem er a klengar er ngii er a ngar er a mong. Me alta ngmeringel a klengar er ngii er chelechang, engdi ngmelemolem el meruul er sel sebechel el mora Jehovah. (1 Ko. 15:58) Bek el sils el lolatk er ngii me a rebetik er a rengul el dmak el ngar er a beches el beluulechad. A ta er a odos a miltemall a rengul er a omerellel a kldemel er a klaumerang, engdi ngdimlak loba ngasecherreng. (Kol. 3:13) A odam a kmal ungil medengei aike el mekngit el leriruul er a ngar er a mong engdi ngultaut a osengel er aike el sebechel meruul me lemelemii a blakerreng er ngii.—Psa. 51:10.
2 Ngera losisiu er ngii tirka el tedei el Kristiano? Tirka el tedei a medengei a tekoi el dilubech er a klengar tir er a ngar er a mong me nguaisei engdi te diak di lolatk. Te bai ‘omes el bedul uchei.’—Monguiu er a Osisechakl 4:25.
3. Ngera me ngkired el ‘omes el bedul uchei’?
3 Ngera me ngklou a ultutelel a ‘domes el bedul uchei’? Ngdi ua chad el diak el sebechel merael el melemalt a rolel a lsekum engdi omes el bedul uriul, e kid me ngdirrek el diak el sebeched el merael bedul uchei el ngar omesiunged el mora Jehovah a lsekum e kede blechoel el di melatk er a klengar er kid er a ngar er a mong.—Lk. 9:62.
4. Ngera bo dosaod er tia el suobel?
4 Ngar tia el suobel, e kede mo mesaod a edei el bedikl el rullid me kede di melatk er a klengar er kid er a ngar er a mong. Aikang a (1) oureng ulekum me a klengar er kid a mo ua ngar er a mong, (2) ngasecherreng, me a (3) ukltked el di oldechelakl er kid. Ngar er a derta er aika el blekeradel, e kede mo mesa rolel e a omellach er a Biblia a sebechel ngosukid el mo diak di dolatk “a ikel mla mo merek el tekoi” e bai mo chemau “a ikel ngar medad.”—Fil. 3:13.
BEDIKL EL OURENG ULEKUM ME A KLENGAR ER KID A MO UA NGAR ER A MONG
5. A Olisechakl 7:10 ngomeklatk el kirel a ngera el bedikl?
5 Monguiu er a Olisechakl 7:10. Tia el bades a diak lolekoi el kmo ngmekngit a doker el kmo: “Ng ngera ma tekoi er a ngar a mong a mle ungil?” A ungil tekoi el dilubech el sebeched el melatk a sengk el mlara Jehovah. Tia el bades a bai melekoi el kmo: “Lak moker el kmo, ‘Ng ngera ma tekoi er a ngar a mong a mle ungil er a tekoi er chelechang?’” Me a bedikl a sel domekesiu er a klengar er kid er chelechang er a ngar er a mong e bo domdasu el kmo nglmuut el mekngit a klengar er kid er chelechang. A kuk ta er a oidel a Biblia oliuid er tia el bades el kmo: “Lak moker el kmo, ‘Ngera uchul me a klengar er a ngar er a mong a mle lmuut el ungil er a klengar er chelechang?’ Tiang a klebelung el ker.”
6. Ngera me ngklebelung a bo deblechoel lomdasu el kmo a klengar er kid er a ngar er a mong a lmuut el mle ungil? Mosaod.
6 Ngera me ngklebelung a bo deblechoel lomdasu el kmo a klengar er kid er a ngar er a mong a lmuut el mle ungil? Tia sebechel rullid me kede di mo melatk aike el ungil tekoi el dilubech er a ngar er a mong me a lechub e ngrullid me kede mengkekerei a ringel el ble dechelebangel. El ua tiang, ka molatk er a rechad er a Israel er a irechar. A uriul er a ltobed er a Ekipten, e te di mle mereched el obes er a ringelel a klengar er tir er isei. Te bai di mlo melatk aike el ungil kall el lulengang. Te millekoi el kmo: “Kede milenga ngikel er a de ngar a Ekipten el di dimlak locheraol. Kede lmatk a ikel kiuri ma sandiang ma sebulias ma tamanengi ma garlic!” (Ule. 11:5) Engdi aika el kall ngmera el “dimlak locheraol”? Ngdiak. Ngmle kirir mengkad er a ngarbab el char e le seikid el taem e te mlara meringel klsibai er a Ekipten. (Exo. 1:13, 14; 3:6-9) Engdi te ulebes aika el ringel el lechillebangel e mlo oureng er a klengar er tir er a ngar er a mong. Ngmlo ultaut a osengir er a ungil klengar er tir er a ngar er a mong e dimlak lultaut a osengir er a ungil tekoi el leriruul a Jehovah el kirir. Me a Jehovah a kmal dimlak el soal tia el blekerdelir.—Ule. 11:10.
7. Ngera ngilsuir a ta er a odos el mo cheroid er a bedikl el oureng ulekum me a klengar er ngii a mo ua ngar er a mong?
7 Ngmekera dongeroid er kid er a bedikl el
oureng ulekum me a klengar er kid a mo ua ngar er a mong? Ka molatk er a odos el ulemuchel el mesiou er a Brooklyn Bethel er a 1945. A telkib el taem er uriul, e ngmlo bechil a ta er a odam el dirrek el mlara Bethel, e te dilak el mesiou el betok el rak. Engdi sera 1976, e a bechil a mlo er ngii a secherel. Sera bo lolechesuar el kmo a kodellel a olekedang, e ngmilsang a ungil ulekrael el mo ngosuir sel lemad. Ngmillekoi el kmo: “Ngkmal mle ungil a chebechiieled. Te betok el chad a dirkak le experience er tiang.” Engdi ngdirrek el milengelechel er ngii el kmo: “Lak di molatk er a klengar er kau er a ngar er a mong, alta ngdiak bo mobes a tekoi el dilubech. A omerolel a taem e ngmo diak el sal mekngit a rengum. Lak bo el chetim a tekoi e bo lemekngit a rengum el kirem. Bo lungil a rengum er a deurreng me a klengeltengat el bla mngai. . . . Aika el tekoi el dilubech el sebeched el melatk a sengk er a Dios el mei er kid.” Tia ngdiak el kmal ungil ulekrael?8. Ngmilekera odos er kid e ngmai a klungiolel e le ngdimlak di lolatk er a klengar er ngii er a ngar er a mong?
8 Ngika el odos a silechedekl aika el tekoi er a rengul. Ngmle blak a rengul mesiou er a Jehovah el mora kodellel er a le 92 a rekil. A sesei el rak er a uchei, e ngmillekoi el kmo: “Sel kumes er aika el mereko el 63 el rak el kusiou er a Jehovah el mui el taem, e ngsebechek el melekoi el kmo ngkmal mle ungil a klengar er ngak.” E ngera uchul? Ngmesaod el kmo: “Sel rullii a klengar el kmal mo ungil a klodam er kid me a omeltked el mo kiei el obengterir a rudam me a rudos er kid er tia el baradis el chutem, e dosiou er a di ta el mera el Dios el Jehovah el Ngarbab el Omebeled, el mo cherechar.” * Ngmera el ungil kerebai er a chad el ulemes el bedul uchei!
BEDIKL ER A NGASECHERRENG
9. A doltirakl er a Levitikus 19:18, e ngoingera el taem e ngmo meringel er kid el mo diak doba ngasecherreng?
9 Monguiu er a Levitikus 19:18. Ngblechoel meringel er kid el mo diak doba ngasecherreng a lsekum a chad el tilemellii a rengud a kldemed er a klaumerang, kmeed el sechelid, me a lechub e ngchedad. El ua tiang, a odos a mlotelechakl er a ta er a odos el kmo ngrirechorech a ududel. A uriul e ngike el odos el ultelechakl a mlo olengit a klausubes, engdi ngike el ta er a odos a dimlak el soal lobes er a tekoi el dilubech. Ngmla ta el bo leuaisei a uldesuem? Alta ngdirkak dechebengelii a osisiu el blekeradel, engdi ruumesingd er kid a mla ta el bo doba ngasecherreng e melatk el kmo ngkmal diak el sebeched lousubes er a chad el tilemellii a rengud.
10. Ngera sebechel ngosukid sel bo doba ngasecherreng?
10 Ngera sebechel ngosukid sel bo doba ngasecherreng? Lak dobes el kmo a Jehovah a omes a rokui el tekoi. Ngmedengei a rokui el tekoi el bo dechelebangel, el uldimukl a diak el melemalt el tekoi el duubech el mei er kid. (Heb. 4:13) Ngmekngit a rengul er kid sel dechuarm. (Isa. 63:9, NW) E mla tibir el kmo ngdi kmedung e ngmo okngemed a ngii di el ringel el bo dechuarm el diak el melemalt el tekoi el duubech el mei er kid a uchul.—Och. 21:3, 4.
11. Ngmekera mo klungioled a bo lak doba ngasecherreng?
11 Ngdirrek el diak dobes el kmo ngmo klungioled a bo lak doba ngasecherreng. Tiakid a blo lutebengii ngike el odos el mlotelechakl. Cherengel a taem, e ngmlo diak loba ngasecherreng. Ngmlo mtebengii el kmo sel dousubes er a rebebil, e a Jehovah a ousubes er kid. (Mt. 6:14) Ngmle medengei el kmo a tekoi el lerirellii ngike el ta er a odos a mle mekngit engdi ngmillilt el mo diak loba ngasecherreng. Seikid e ngliluut el mo dmeu a rengul e mlo sebechel ultaut a osengel er a omesiungel el mora Jehovah.
BEDIKL ER A UKLTKED EL DI OLDECHELAKL ER KID
12. Ngera kede suubii er a 1 Johanes 3:19, 20?
12 Monguiu er a 1 Johanes 3:19, 20. Kede rokui el ngar ngii a taem el ukltked a mo oldechelakl er kid. El ua tiang, a ukltkir a rebebil a oldechelakl er tir e le ngtekoi el lurruul er a uchei er a bo lodengelii a klemerang. A ukltkir a rekuk bebil a oldechelakl er tir e le ngcheleuid el leriruul er a uriul er a lemetecholb. (Rom 3:23) Nguaisei el soad el meruul a melemalt el tekoi. Engdi “kede rokui el blechoel el mo e mecheuid a omerelled.” (Jak. 3:2; Rom 7:21-23) Me alta ngdiak el soad a ukltked a loldechelakl er kid, engdi tia sebechel mo ungil kired. E ngera uchul? E le ukltked a loldechelakl er kid e ngotbechid el mo sumecheklii a klengar er kid e rullid el mo diak deluut el meruul aike el mekngit el deriruul.—Heb. 12:12, 13.
13. Ngera me ngkired el mengkar er kid me a ukltked lak di loldechelakl er kid?
13 Me nguaisei, engdi ngsebechel a ukltked el di oldechelakl er kid alta kede mla obult me a Jehovah mla ochotii el kmo ngmla ousubes er kid. A chouaitia el blekeradel a ngar ngii a letemellii. (Psa. 31:10; 38:3, 4) Ngoeak a ngera el rolel? Ka molatk er a ta el odos el ukltkel a di uldechelakl er ngii el kirel a klengit el leriruul er a uchei. Ngmelekoi el kmo: “Ak ulemdasu el kmo ngdiak a belkul a bo el blak a renguk er a omesiungek el mora Jehovah e le nglocha diak bok sobel.” Te betok er kid a omdasu el uaisei. Ngkmal klou a ultutelel a dekokerengid me lak dobedikl er tia el uldasu. E le ka di molatk er a deuil a rengul a Satan a lsekum ngdi mo kid el otngeklid e a Jehovah a kmal diak loltngakl er kid!—Momekesiu er a 2 Korinth 2:5-7, 11.
14. Ngmekera mo ulterekokl a rengud el kmo a Jehovah dirkak lotngeklid?
14 Engdi kede locha mo melatk el kmo, ‘Ak mekera medengei el kmo a Jehovah dirkak lotngeklak?’ A lsekum ke uleker er tia el ker, e ngochotii el kmo a Jehovah a sebechel lousubes er kau. A betok el rak er a mla me mong, e a The Watchtower a millekoi el kmo: “Kede [locha] mo metik er kid el mesesibas e mesesubuu er a chelitechetud el bla bo desau el meruul er ngii el mle tekoi er a klengar er kid er a uchei. . . . Lak bo lemechitechut a rengum. Lak momdasu el kmo ke mla rullii a diak lemusubes el klengit. A Satan a soal *
obo momdasu el uaisei. Kau el kmal mekngit a rengum e oberaod a uldesuem el kirel tiang a olechotel a kmo ngdiak mekngit el chad. Lak bo el mesaul a rengum loba klengariourreng el mora Dios el olengit a klausubes me a omengikiid me a ngeso. Bo er ngii el ua ngalek el mora demal sel lousbech a ngeso, alta ngmo betok el taem el kirel a osisiu el chelitechetul, e a Jehovah a mo meskau a ngeso el mousbech er ngii lokiu a grazia er ngii.”15-16. Ngmlo uangera uldesuir a rebebil er a bo lodengei el kmo a Jehovah dirkak lotngeklterir?
15 Te betok el chedal a Jehovah a mlo mechelaod a rengrir er a bo lodengei el kmo a Jehovah a dirkak lotngeklterir. El ua tiang, a kesai el rak er a mla me mong, e a experience el tilobed er aike el cheldecheduch el “The Bible Changes Lives” a kmal riretechii a rengul a ta el odam. Ngar er a ta er aika el cheldecheduch, e a odos a milsaod el kmo, ngmekngit el tekoi el dilubech er a klengar er ngii er a ngar er a mong a uchul me ngmle meringel er ngii a oumerang el kmo a Jehovah a sebechel mo betik a rengul er ngii. Ngmillemolem el uaisei a uldesuel er a uriul er a bla lemetecholb el betok el rak. Me nguaisei, engdi ngmlo melebedebek el kirel a olubet, e seikid e ngmlengodech a osengel er a tekoi. *
16 Ngmilekera tia el experience e ngosuir ngika el odam? Ngmeluches el kmo: “Sera kkekerei, e ngmle kirek el meringel el oureor el mo diak kumes a siasing er a remeau. Ak liluut el mo meruul er tiang. Me ak ulsiik a ngeso er a remechuodel, e mla mo sebechek el telkib el mo mesisiich er ngii. A remechuodel a mla oterekeklii a renguk er a bltkil a rengul me a klechubechub er a Dios. Engdi a lebebil er a taem e ak dirk omdasu el kmo ngkmal diak a belkuk, e a Jehovah a diak el sebechel mo betik a rengul er ngak. Sera kchiuii sel experience er [ngike el odos] e ngkmal ngilsukak. Chelechang e ak mla mtebengii el kmo sel bo kumdasu el kmo a Dios a diak el sebechel lousubes er ngak, e ngua kulekoi el kmo a tengetengel a Ngelekel a diak el sebechel melubet a kngtik. Ak mla mcheduii tia el cheldecheduch me bo el sebechek el menguiu e melebedebek er ngii er aike el taem el bo kumdasu el kmo ngdikea belkuk.”
17. Ngmilekera apostol Paulus e dimlak lobedikl er a ukltkel el di oldechelakl er ngii?
1 Ti. 1:12-15) Ngulemes er a olubet el ileakl el sengk el mo er ngii. (Gal. 2:20) Me ngdimlak lobedikl er a ukltkel el di oldechelakl er ngii, ngbai mlo blak a rengul el mesiou er a Jehovah.
17 A chouaika el experience a mekltkid er a apostol Paulus. A uchei er a bo el Kristiano, e ngriruul a bebil oberaod el klengit. A Paulus a dimlak lobes aike el leriruul me nguaisei engdi ngdimlak lultaut a osengel er ngii. (MKIEI EL KIREL A NGAR MEDAD!
18. Ngera kede mla suub er tia el suobel?
18 Ngera kede mla suub er tia el suobel el kirel aika el bedikl? (1) A ungil tekoi el dilubech el sebeched el melatk a sengk el mlara Jehovah, engdi alta ngkmal mle ungil a klengar er kid er a ngar er a mong, a klengar er kid er a ngar medad a lmuut el kmal mo ungil. (2) A rebebil a mo tomellii a rengud, engdi sel dekengei el ousubes er tir, e ngmo sebeched el mo ultaut a osenged er a kuk bebil er a tekoi. (3) A ukltked a di loldechelakl er kid e ngmo uchul me ngdiak dosiou er a Jehovah loba deurreng. Me ngsoad el mo ua Paulus, el oumerang el kmo a Jehovah a mla ousubes er kid.
19. Kede mekera medengei el kmo chelsel a beches el beluulechad e ngmo diak loldechelakl er a rengud a tekoi el dilubech er a ngar er a mong?
19 Ngar ngii a omeltked el mo kiei el mo cherechar. Ngar er a chelsel a beches el beluulechad er a Dios, e ngmo diak loldechelakl er a rengud a tekoi el dilubech er a ngar er a mong. A Biblia a mesaod er tia el taem el kmo: “A ikel dilubech el tekoi er a ngar a mong a kmal di mo diak a melatk.” (Isa. 65:17) Ka di molatk: A rebebil er kid a mla mesiou er a Jehovah er a klengar er tir el rokir e mechudelang er chelechang, engdi ngar er a beches el beluulechad, e te lmuut el mo ngeasek. (Job 33:25) Me derellii er a rengud el diak di dolatk er a klengar er kid er a ngar er a mong. E bai bo domes el bedul uchei e bo dekiei el kirel a ngar medad!
CHELITAKL 142 Melemolem Lurrekodel er a Omelatk el Dobang
^ par. 5 Ngungil a dolatk er a klengar er kid er a ngar er a mong. Engdi ngdiak el soad el kmal mo ultaut a osenged er ngii me lak dungil ousbech a temed er chelechang me a lechub e dobes aike el mo duubech er a ngar medad. Tia el suobel a mesaod a edei el bedikl el sebechel rullid el di mo melatk er a klengar er kid er a ngar er a mong. Kede mo mesaod a omellach er a Biblia me a kerebai er chelecha el taem el sebechel ngosukid el oibngid er aika el bedikl.
^ par. 8 Momes er a The Watchtower er a July 1, 2004, er a 23-29 el llel.
^ par. 14 Momes er a The Watchtower er a February 15, 1954, er a 123 el llel.
^ par. 15 Momes er a The Watchtower er a August 1, 2011, er a 20-21 el llel.
^ par. 58 OMESODEL A SIASING: A uldasu el oureng ulekum me a klengar er kid a mo ua ngar er a mong, ngasecherreng, me a ukltked el di oldechelakl er kid a ua ongelungel el omekberaod er kid e mo uchul e ngdiak delemelemii a omerolled el mora klengar.
^ par. 65 OMESODEL A SIASING: Sel bo lak dolab aika el uldasu, e ngmo mechelaod a rengud e dmeu a rengud e lmuut el mo mesisiich. E seikid e ngmo sebeched el omes el bedul uchei.