Ak mlechell er a 1948 er a Netherlands. Ongingil rak e a telungalek er ngak a millukl el mora beluu er a São Paulo, Brazil. A rechad er a blik a mle blechoel el ngar er a ikelesia me kemam a mle blechoel el menguiu a Biblia el telungalek er a uriul er a belsoil. Aki liluut el melukl er a 1959. Aki mlora beluu er a Massachusetts er a Merikel.

A demak a kmal mle blak a rengul loureor el omekerreu er kemam el teai el chedal a telungalek. Ngika mlo meruul a betok el kakerous el ureor. Nguluureor el merael lolterau a klalo, chad er a construction er a rael, e oureor er a airline. A rokui el chad er a telungalek er kemam a kmal mle dmeu a rengrir er a bo loureor er a airline e le ngmlo sebecham el di mesebesebek.

Sera kngar er a high school e ak mle blechoel el melatk el kmo, ‘Ngera ak mo meruul er ngii sel ktobed er a skuul?’ A rebebil er a resechelik a millilt el mora daingak e a rekuk bebil a mlo soldau. Me nguaisei engdi ngdimlak el soak el mo soldau e le ngdimlak el soak a klautoketok, el diak el soak a klaudechelakl. Me ak ngileltii el mora daingak me lak bo kteloi er a mekemad. Engdi mera er ngii e ngak a  kmal mle soak lolengeseu er a rechad e le kulemdasu el kmo tiakid a rolel e ngmo er ngii a moktek er a klengar er ngak.

Sera kngar er a daingak e ak mle semeriar el kirel a omesuub er a rechad le ngmle soak el mo medengei el kmo ngmilekera omuchel a klengar. Te ullisechakl el kmo a rechad a mlara mongkii el mei e mle sorir a ki di mkengei el kmo tia klemera el tekoi. A bebil er a omesodir a kora dimlak el chatter e diak a bleketakl el olechotel engdi ngkired el di kongei. Tia kmal diak loltirakl er a osisecheklel a science el kmo, ngkirel ngar ngii a ochotel a tekoi el doumerang.

Aike el class el kullai a dimlak lolisechakl omellach el kirel a ungil me a mekngit. Aika bai ullisechakl el kmo ngkired el meruul aike el rokui el kired me bo dungil er a daingak. Ngmlo dmeu a renguk sel kuilil lobengterir a resechelik e ou party e dirrek el melasem a bebil drugs engdi tia el deurreng a di mle tedeb. Me ak mlo melatk el kmo, ‘Tiakid ngmera el moktek er a klengar?’

Ak millukl el mora Boston e siliseb er a daingak er isei. A kuluureor er a summer me bo lsebechek el harau er a skulek. Tiakid a mle ketengek el mo medengelterir a Resioning er a Jehovah. A ta er a chad er a urerek a milengedecheduch er ngak el kirel a ulaoch er a “euid el rak” el ngar er a ongeua el bliongel er a babier er a Daniel e silodii el kmo kede kiei er a taem er a ulebongel. (Dan. 4:13-17) Ak mlo mtebengii el kmo a lsekum ak melemolem el mengedecheduch er ngika el chad e moumerang aike el kusuub, e ngmo kirek el melodech er a klengar er ngak. Me ak mlora tkurrebab el sebechek el mengeroid er ngak er ngii.

Ak millai a class er a daingak el ngii a mo ngosukak el volunteer el meruul a ureor er a South America. A kulemdasu el kmo a kuruul a ungil el olengeseu er a rechad e ngmo er ngii a moktek er a klengar er ngak. Engdi ngdirrek el dimlak bo kumelechesiu el uaisei. Me ak chilitii a daingak er a bo lemerek a skuul.

Sera May 1970 e ak millukl el mora Amsterdam er a Netherlands el mo oureor el kirel a osisiu el airline el luluureor er ngii a demak. A urerek a uchul me ngmlo sebechek el mesarech a beluu er a Africa, America, Europe, me a Asia. Ak mlo mtebengii el kmo a ngii di el beluu el kbo er ngii a chelebangel a meklou el mondai e dimlak a chad el sebechel sumechokl. Ngdirk mle soak el meruul a meklou el ultutelel tekoi er a klengar er ngak me ak liluut el mora Merikel el mo er sel daingak er a Boston el kbla er ngii.

Engdi ngdi dirrek el dimlak betik a nger er a kerik el kirel a klengar. Me a kullengit er a ta er a sensei er ngak el kirel a kmo ngera ungil kuruul er ngii. Ngika kmal chilsir a renguk le ngdilu el kmo: “Ngera uchul me ke dirk ngar er a skuul? Ngdiak el bai el ungil omchitii?” Me ak chilitii a daingak e dimlak lluut lomes er uriul.

Ak dirk milechesuar er a klengar er ngak el bechachau el diak a moktek er ngii me ak mlo teloi er a rechad el tir a millisiich er a budech me a bltikerreng. Me ngak me a rebebil er a resechelik a mla er a Merikel e catch a ride el mora Acapulco, Mexico. Aki kiliei lobengterir a re hippies, el tir a rechad el kora dimlak a sebekreng me a mondai er a klengar er tir. Engdi ak mlo mtebengii el kmo ngkmal dimlak a moktek er a klengar er tir, me a deurreng er tir a  di tedeb el deurreng. Ak milsa el kmo, a betok er tir a di ulumulak e dimlak loba blakerreng el ngar er a deleuill er tir me a rebebil.

Ngar tiakid el taem e ak mlo melatk er a tekoi el kmal mle soak el mo meruul er ngii er a kngalek. Ngmle soak el di ngak el ngar er a bos el mesarech a beluu. Me ngmle kirek el mecherar a bos er ngak. A sechelik er a Tom a dirrek el mle soal el meruul er tiang me aki tilbir el terung el mo omes er a beluulechad el rokir el ngar er a bos. Ngmle soak losiik er a klebokel el iungs el sebechek el mo er ngii e mimokl er a llach er a beluu.

Me ngak me a Tom a mlora Arenys de Mar, el ngii a beluu el kmeed er a Barcelona, Spain. Ngar isei e aki milecherar a bos el 31 el fit a klemengetel el Llygra ngklel. Me aki uluureor er tia el bos el meruul er ngii el mo sebechel tuobed el mora ngouaol. Ngdimlak ki morreched er a omerollam me aki ultebedii a mesil er tia el bos e uluusbech er sel basio el mla er ngii a mesil el blil a ilumel el ralm. Aki milechar a teblo el 16 el fit a klemengetel el oius el kirel sel ki bom siseb a mekekerei el bdelulachang. E sola e aki mirrael el mora Seychelles. Aki tilbir el mo merael er bita er ngebard er a Africa el mora Cape of Good Hope, South Africa. Aki uluusbech a btuch me a bebil map me a book me a mekekerei el dongu el omekrael er kemam. Ngkmal mle mechas a renguk le ngmle sebecham el metik el kmo aki kirel ker.

Engdi aki di mle mereched el mo mesa el kmo tia el bos a diak el klalo. Chelsel a ta el sikang e ngbekord el elolem el gallon el ralm a me soiseb er ngii le ngmla er ngii a lling. Me ngua kullekoi er a uchelel, ngmlo er ngii a ses el eolt me a kmal mlo medakt e milluluuch el melekoi er a Dios el kmo a lsekum aki suobel e ak mo melasem el mesuub el kirel. Ngmlo diak a ses el eolt me ak ultutii a telbilek.

Ak ulemuchel el menguiu er a Biblia er a kim dirk ngar er a ngouaol. Ka di molatk er kau el menguiu er a Biblia er a melengel a Daob er a Mediteranea e omes a ngikel el melechesokl, demul, me a klebekelel a eanged. Sel klebesei e a kumes a btuch er a eanged, e tia rirellak el mo ulterekokl a renguk el kmo ngngar ngii a Dios e ngii a melatk er kid a rechad.

Aki mlara ngouaol el bebil sandei e mlora olekerodel er a Alicante, Spain e melasem el olterau er tia el bos e melai er a kuk tang. Engdi ngmle meringel er kemam oterur tia el lling el bos el diak a mesil er ngii. Me nguaisei engdi ngkmal mle ungil le kuluusbech er tia el taem el menguiu er a Biblia er ngak.

Sera kunguiu er a Biblia e ak mlo mtebengii el kmo tia babier a sebechel lomekrael er kid el mo ungilbesul a klengar er kid. Ngkmal mle soak le ngbleketakl a omesodel el kirel a bo dekiei el klikiid a klengar er kid. Ak dirrek el mlo melatk el kmo ngera uchul me a rechad el uai ngak a kmo ki Kristiano engdi ngdiak kim kiei loltirakl aike el lolekoi a Biblia.

Me ak rirellii er a renguk el mo kikidii a klengar er ngak me ak mle stob lousbech a drugs. Ak millatk el kmo te locha ngar ngii a rechad el kiei loltirakl aike el lolekoi a Biblia e mle soak el mo medengelterir. Tiakid a ongeru el taem el kulluluuch el mora Dios lolengit er ngii me lengesukak el metik er chouaitirka el chad.

Ak millatk el kmo ngungil kumes a derta el klechelid el dimerekmo kbetik er a mera el klechelid. Ak  miles a betok el blil a klechelid er a kurael er a rael er a Alicante. Engdi oumesingd er ngii a mla er ngii a bleob el chelid er ngii, me ak mle medengei el kmo aika dimlak lemera el klechelid.

Ta el chodochosong er a Sandei e ak mle dengchokl er a bukl lomes el bedul a olekerodel e menguiu er a Jakobus 2:1-5, el ngii a mesaod el kmo ngdiak dongetukel er a rechad el merau. Sera kurael el lmuut el mora bos er kemam e ngmiltab osengek er a basio er a klechelid el sign er a bebul a dilu el kmo: “Blil a Ongdibel er a Resioning er a Jehovah.”

Me ak millatk el kmo, ‘Hall e kulasem er tirka el chad el kmo ngmo uangerang omerellir el mei er ngak.’ Me ak siliseb er a Blil a Ongdibel el di hadasi e chesechesomel e selesodel a subelengek. Ngike el chad er a attendance a milkrolak el mo dengchokl er bita er a mechas el ngii a kmal mle ungil a blekerdelel lolengeseu er ngak el losiik a bades el lullekoi ngike el mengedecheduch. A uriul er a miting e ngkmal mlo mechas er a renguk le te kmal betok a mle outkeu er ngak. Ngar ngii a chad el mle invite er ngak el mora blil el mo mesaod a tekoi er a Biblia engdi ngdirkak bo kmerek el menguiu er a Biblia er ngak el rokir me ak dilu er ngii el kmo, “Ak mo subedau sel bok kltmokl el mesuub.” Me nguaisei, engdi kulemuchel el ngar er a rokui el miting.

Bebil sandei er uriul e ak mlora blil ngike el chad e ngulenger a kerik el kirel a Biblia. A ta el sandei er uriul er tiang e ngmilskak a tet el mui er a kmal ungil bail. Ngdilu er ngak el kmo aika bilel a chad el kelebus er chelechang le ngii lolengesenges er a llach er a Biblia el kmo ngkired el kaubltikerreng e diak doumekemad. (Isa. 2:4; Jn. 13:34, 35) Tia rirellak el kmal mo ulterekokl a renguk el kmo ak mla metik er tirka el kulsiik er tir, el tir a rechad el loltirakl a bleketakl el omesodel a Biblia el kirel a klikiid el klengar. Me a turrekong er ngak a mla mo diak kusiik er a klebokel el iungs e ngbai mla mo soak el mo ungil medengelii a Biblia. Me ak liluut el mora Netherlands.

Ak mle catch a ride el eua el klebesei e mlora beluu er a Groningen er a Netherlands. Ngmle kirek losiik a ureor el mesiou er a klengar er ngak. Me ak mle apply a ureor er a ta el shop er a daiksang e te uleker el kmo ngngera klechelid er ngak me ak lilechesii a “Resioning er a Jehovah.” Ngike el merreder er a lesang tiang e ngmlengodech a medal e dilu el kmo, “Ak mo call er kau.” Me nguaisei engdi ngdimlak a ta el lomekedong.

A kulleker er a merreder er a lmuut el ta er a shop er a daiksang el kmo, ngdiak el kora ousbech a ngeso. Me ngullengit a copy er a diploma me a reference er a ureor. A kuluuchais er ngii el kmo ngmla ta el kuureor el meruul er a telemellel a bos el rruul  er a kerrekar. Ngmlo mechas a renguk le ngdilu el kmo, “Ngsebechem el omuchel er a chodochosong engdi ngkirem el kongei er a ta el tekoi. Ngkmal diak el soak a omomuchel a mondai er a shop er ngak le ngak a ta er a Sioning er a Jehovah e kiei el oltirakl a omellach er a Biblia.” Me ak dilu er ngii el kmo, “Ngak a dirrek el ta er Sioning er a Jehovah.” A klemengetel a cheiuk me a chesemek a locha uchul me ngdilu el kmo, “Me a leuaisei e ngak a mo mesuub a Biblia el obengkem!” Me a kmal kilengei. Tia mileketeklii a renguk er a uchul me ngike el ta er a chad a dimlak lomekedong er ngak. Tia mle nger er a nglunguchek. (Psa. 37:4) Me a kuluureor er a shop er ngika el odam el ta el rak. Chelsel tiakid el taem e ak milsuub lobengkel e miltecholb er a January 1974.  

Ta el buil er uriul e a kulemuchel er a ta er a bedengel a ureor. A kulemuchel el pioneer, el ngii a uchul a klou el deurreng er a klengar er ngak. A lmuut el ta er a buil er uriul e ak millukl el mora Amsterdam el mo olengeseu er a beches el group el melekoi a tekoi er a Sebangiol. Ngmera el mle dmeu a renguk el mesuub a Biblia el obengterir a rechad el melekoi a tekoi er a Sebangiol me a Portugal! E sera May 1975 e a kulemuchel el mesiou el special pioneer.

A ta el sils e a ta er a special pioneer el odos el Ineke a mle er a miting er kemam le ngmle soal a study er ngii el chad er a Bolivia a bo lodengelterir a rudam me a rudos el melekoi a tekoi er a Sebangiol. Ngak me a Ineke tilbir el mo keluches me bo el sebecham el mo kaodengei. Aki mlo mesa el kmo ngkmal di osisiu a turrekong er kemam. Aki mlo bechiil er a 1976 e millemolem el mesiou el special pioneer el mo lmuut er a 1982 e mlora 73 el klas er a Gilead. Ngkmal mle dmeu a rengmam er aki metutk el mo mesiou er a East Africa! Aki milsiou er a beluu er a Mombasa er a Kenya el eim el rak. E sera 1987 e aki miltutk el mo mesiou er a Tanzania el urered er ngii a lulerrob er ngii engdi ngmla mo sebeched el mimokl el omerk. Aki mla er tia el beluu el 26 el rak e a uriul e aki liluut el mora Kenya.

Klengar el olengeseu er a rengariou a rengrir el chad el mo mesuub a klemerang er a Biblia a mla meskemam a moktek er a klengar er kemam. El ua tiang, ngike el kot el chad el blo kusuub a Biblia lobengkel er a Kenya, a kbiltik er ngii er a kumerk er a klumech er a buai. Uriul er ak bsang a teblo el magazine e ngdilu el kmo, “Me sel bok merek el menguiu aikang e ak mekerang?” A ongingil sandei e aki ulemuchel el mesuub er a book el Ng Sebechem el Kie er a Paradis er tia el Chutem el mo Cherechar, el ngii a kmal dirk tilobed el tekoi er a Swahili. Ngika miltecholb er a ta el rak er uriul e ulemuchel el regular pioneer. Seikid el taem el mei er chelechang e ngii me a bechil a mla ngosuterir a rekmeed el 100 el chad el mo tuib a rengrir e metecholb.

Sera kkot el mo medengelii a moktek er a klengar e ak mlo omelechesiu er ngak el ua ngike el chad el miltik er a ngisel a chesiuch e dimlak el soal loridii. (Mt. 13:45, 46) Ngkmal soak el lousbech er a klengar er ngak el olengeseu er a rechad el metik er a klengar el ngar ngii a moktek er ngii. Ngak me a bechik a mla chormii el kmo a Jehovah omekngeltengat er a rechedal er a klengar el ngar ngii a mera el moktek er ngii.