1. Ngera el ker a locha bo dolatk er ngii?

KAU, ngmo ouedikel a rengum a lebebil sel molatk el kirel a okngemedel a klsuul klechelid, odelecheklel a Kok er a Makok, me a mekemad er a Armakedon? Ngmla ta el molatk el kmo, ‘Sel leduubech aika el tekoi e ngak, ak mo mtekangel aika el blekeradel loba blakerreng?’ A omesodel a tekingel a Jesus el ngar er a bades el lemlengai er ngii tia el suobel a mo ngosukau a lsekum e ngmla ta el molatk aika el tekoi. A Jesus a dilu er a redisaiplo er ngii el kmo: “Lak louedikel a rengmiu. Moumera er a Dios.” (Jn. 14:1) A mesisiich el klaumerang a mo ngosukid el omes el beduluchei el lulterekokl a rengud.

2. Ngmekera sebeched el smisichii a klaumerang er kid, e ngera kede mo mesaod er tia el suobel?

² Ngsebeched el smisichii a klaumerang er kid me bo lsebeched loutekangel a ringel er a ngar medad loeak sel dolatk a rolel e kede outekangel a omeasem er a klaumerang er kid er chelechang. Sel dolatk er a rolel a dosmechokl a omeasem er chelechang e ngsebechel lochotii el kmo ngar ker a kired el melisiich er a klaumerang er kid er ngii. E a derta el taem el bo demesisiich er a omeasem e ngmelisiich er a klaumerang er kid. Tia mo ngosukid el outekangel a ringel er a ngar medad. Ngar tia el suobel, e kede mo mesaod a eua el blekeradel el blo lechebangel a redisaiplo er a Jesus el lulechotii el kmo ngkirir el lmuut el mo klou a klaumerang er tir. E a uriul e kede mo mesaod a kmeed el osisiu el blekeradel el locha bo dechebangel me a rolel e ngmengetmokl er kid el kirel a ngar medad el taem.

3. El ua losaod a Mateus 6:30, 33, ngngera el tekoi el kirel a klaumerang a lulemeketakl er ngii a Jesus?

³ Ng normal el tekoi el bdelul a delengchokl a soal make sure el kmo ngngar ngii a kelel, bilel, me a delengcheklel a telungalek er  ngii. Tia diak leblechoel beot el tekoi er chelecha el le kmal merengela blekeradel. A rebebil er a rudam me a rudos a mla oriid a urerir e alta te kmal meringel losiik engdi ngdiak el sebechir el metik a ureor. A rekuk bebil a mla kotouar a ureor el diak el sebechir a Rekristiano el meruul. Ngar er a chouaika el blekeradel e kede ousbech er a mesisiich el klaumerang el kmo, a Jehovah a mo ngosukid el mesiou er a telungalek er kid. A Jesus a ulemeketakl er tia el tekoi el ngar er a Cheldecheduch el Ngar er a Rois. (Monguiu er a Mateus 6:30, 33.) Sel lulterekokl a rengud el kmo a Jehovah a kmal diak bo lechitid e ngmo sebeched el nguu a Renged el mo kot er a chelsel a klengar er kid. Sel domes er a Jehovah el olengeseu er kid er aike el dousbech, e ngmera el mo mera el chad er a rengud me a klaumerang er kid a mo mesisiich.

4-5. Ngera ngilsuir a ta el telungalek er a bo louedikel a rengrir el kirel a kmo te mo ngmai er ker aike el lousbech?

⁴ Molatk er a rolel e a ta el telungalek er a Venezuela mle experience er a ulengesuil a Jehovah er a bo louedikel a rengrir el kirel a kmo, te mo ngmai er ker aike el lousbech er a klengar er tir. A ngar er a mong e tia el telungalek er a Castro a mle sebechir el mesiou er a telungalek er tir le ngmla er ngii a sersir. Engdi te mla er ngii a rechad el lullab a boes el mong e nguu tia el sersir e odiketerir. A chedam el Miguel a kmo: “Chelecha e aki di ultuil er a dbechel a kekerei el chutem el ki moleng er ngii er a ta er a chad. Ngbek el sils el kumuchel er a sils er ngak lolengit er a Jehovah me lebeskemam aike el ki mousbech el kirel seikid el sils.” Alta ngmeringel a klengar er tir engdi te mui loumerang el kmo a Demad el ngar er a eanged a mo mesterir aike el lousbech er a bek sils, me te blak a rengrir el ngar er a miting e omerk er a klumech. Te nguu a Renged el mo kot er a klengar er tir e a Jehovah omesterir aike el lousbech.

⁵ Ngar er a chelsel tia el meringel el taem e a Miguel me a bechil er a Yurai a di millatk er a rolel e a Jehovah omekerreu er tir. A Jehovah uluusbech er a rudam me a rudos el omesterir aike el lousbech e olengeseu er a Miguel losiik a ureor. E ngar ngii aike el taem el Jehovah ullengeseu er tir el loeak a ngeso el mlara obis er a branch. A Jehovah a kmal dirkak a ta el lechititerir. Tiakid a mla rullii a klaumerang er a telungalek er tir el lmuut el mo mesisiich. A kot el klou el ngelekir el Yoselin a mesaod el kirel a ta er a ulengeseuil a Jehovah e dmu el kmo: “Ngkmal rutechii a renguk le ngsebechek el bleketakl el mesa chimal a Jehovah. Ngika sechelik el kmal sebechek lultuil er ngii. Aika el ringel el ki blo mchebangel el telungalek a mengetmokl er kemam el kirel a lmuut el meringel el blekeradel er a ngar medad.”

6. Ke mekera smisichii a klaumerang er kau sel lebo er ngii a ringelel a udoud?

⁶ Kau ke chelebangel a ringel le ngtekoi er a udoud a uchul? Nguaisei el alta ngkmal meringel engdi mousbech er tia el taem el melisiich er a klaumerang er kau. Moluluuch el mora Jehovah e monguiu er a Mateus 6:25-34 e molebedebek aika el bades. Molatk a experience er a rechad er chelecha el taem el ngii ochotii el kmo, a Jehovah omekerreu er tirke el mechesang el mesiou er ngii. (1 Ko. 15:58) Sel moruul el uaisei e ngmo rullau el mo ulterekokl a rengum el  kmo a Demam el ngar er a eanged a mo ngosukau el ua lolengeseu er tir. Ngmedengei aike el mousbech me a rolel e ngmo meskau. Sel momes er a Jehovah el lolengeseu er kau e ngmo smisichii a klaumerang er kau e mo ngosukau loutekangel a lmuut el meringel el blekeradel er a ngar medad.​—Hab. 3:17, 18.

7. A doltirakl er a Mateus 8:23-26, BT e ngmilekera “mesisiich el eolt” e melasem er a klaumerang er a redisaiplo er a Jesus?

⁷ A Jesus me a redisaiplo er ngii er a losiueklii a ses el eolt er a daob, e nguluusbech er tia el techall el olengeseu er tir el omekeroul er a mesisiich el klaumerang. (Monguiu er a Mateus 8:23-26, BT. *) Ngkmal mlo mesisiich a eolt me a bos a mlo soal miuil er a daob, engdi a Jesus a kmal iliit a medal. Tirka el disaiplo er ngii a kmal mlo medakt me tulkisii e ullengit er ngii me losebelterir. Me a Rubak a ulleker er tir el kmo: “Ngera me ko medakd? O kemiu el kekere kloumera er kemiu!” Tirka el disaiplo a mle kirir el mtebengii el kmo a Jehovah a kmal sebechel el omekerreu er a Jesus me tirke el obengkel. Ngera klubeled er tiang? A mesisiich el klaumerang a mo ngosukid el loutekangel sel duubech a “mesisiich el eolt” me a ngii di el blekeradel el ua ses el eolt el duubech er a klengar er kid.

8-9. Ngmilekera measem a klaumerang er a Anel, e ngera ngilsuir?

⁸ Molatk er a rolel e a ta el mesobil el odos er a Puerto Rico el Anel a silsichii a klaumerang er ngii le ngii el uluutekangel a ringel. Ngika mlo chormii a “mesisiich el eolt.” Sera 2017 e a Hurricane Maria tilemellii a blil a Anel. Tia el eolt a uchul me ngdirrek el urridii a urerel. A Anel a melekoi el kmo: “Chelsel tia el meringel el taem e ngmlo ouedikel a renguk engdi ak silubii el mo oumerang el ulsirs er a Jehovah loeak a nglunguuch e dimlak kbecherei a sebekreng me le choitechetur a renguk me bo lak el sebechek el mekerang.”

⁹ A Anel a dirrek el louchais el kmo a blekongesenges a ngilsuir el outekangel. Ngmelekoi el kmo: “Ngak el ullengesenges a ulekrael er a cheldebecheled a uchul me ngmle sebechel melemolem el chelellakl a renguk. Ak milsa chimal a Jehovah er a klengar er ngak loeak a omelisiich el kngilai me a dirrek el ngeso er a rudam.” Ngmelemolem el melekoi el kmo: “A Jehovah milskak a kuk betok er aike el kullengit e tia kmal silsichii a klaumerang er ngak.”

10. Ngera sebechem el meruul er ngii a lsekum e ke chobengelii a “mesisiich el eolt”?

¹⁰ Kau, ngngar ngii a “mesisiich el eolt” er a klengar er kau? Tia sebechel ringelel a telemellel a beluu. Me a lechub e ngsebechel ses el eolt er a klengar er kau el uai a secherel a bedengem el mla ielbau me ngdiak modengei el kmo ke mo mekerang. Nglocha mo ouedikel a rengum engdi lak becherei tiang me lerellau el mo diak mulsirs er a Jehovah. Molekeed er kau er ngii loeak sel oblechoel el meluluuch. Molisiich er a klaumerang er kau loeak sel molebedebek aike el taem er a ngar er a mong el Jehovah a ngilsukau. (Psa. 77:11, 12) Ngsebechel mo ulterekokl  a rengum el kmo ngkmal diak a ta el bo lechitau.

11. Ngera uchul me ngkired el rullii er a rengud el mo olengesenges er tirke el mla metutk el mo omekrael?

¹¹ Ngera dirrek el sebechel ngosukau loutekangel a ringel? Ngua lolekoi a Anel, ngblekongesenges. Msubii el moumerang el ulsirs er tirke el Jehovah me a Jesus a oumerang er tir. A lebebil er a taem e tirke el mla metutk el omekrael a meskid a ulekrael el domdasu el kmo ngkora ngodech. Me nguaisei, a Jehovah omekngeltengat er a chad el bekongesenges. Kede medengei el ngar er a Tekingel me a experience er a reblak a rengrir el mesiungel el kmo, a blekongesenges a olsobel a klengar. (Exo. 14:1-4; 2 Kr. 20:17) Molebedebek aika el tekoi. Sel omoruul el uaisei e ngmo meruul a rengum el mo oltirakl a ulekrael er a cheldebechelel a Jehovah er chelechang me a ngar medad el taem. (Heb. 13:17) Seikid e ngmo diak omedakt er a kloul ringel el ngii a di kmedung e ngmei.​—Osi. 3:25.

12. Ngera ngouchais er kid a Lukas 18:1-8 el kirel a klaumerang me a outekangel a diak el melemalt el omeruul?

¹² A Jesus a mle medengei el kmo a diak el melemalt el omeruul a mo melasem er a klaumerang er a redisaiplo er ngii. Me ngmilsterir a okesiu el ngar er a babier er a Lukas el ongeseu er tir el outekangel. A Jesus a millekoi el kirel a melakl el dil el di lilangel el mora diak el melemalt el chad er a kerrekeriil me lebsa llemalt. Ngmle ulterekokl a rengul el kmo a di lolemolem el olengit e ngmo morrenges. Cherengel a taem e ngika el chad er a kerrekeriil a rirengesii. Ngera klubeled er tiang? A Jehovah a kmal melemalt el Dios. Sei a uchul me a Jesus a dilu el kmo: “A le ua isei, e a Dios ng diak bo lungil el kongei er a re chedal el olengit a ngesou er ngii er a llomes me a klebesei?” (Monguiu er a Lukas 18:1-8.) A Jesus a dirrek el dilechelir el kmo: “Ngdi sel le mei a Ngelekel a Chad e ng kol me metik er a ruumerang el ngar a beluulchad?” Sel bo dechebangel a diak el melemalt el omeruul e ngkired lochotii loeak a kllourreng me a blakerreng er kid el kmo ngmesisiich a klaumerang er kid el ua ngika el melakl el dil. Tiakid el klaumerang a olterekokl er a rengud el kmo a Jehovah mo ngosukid er sel blsechel. Ngdirrek el kired el mo oumerang er a klisichel a nglunguuch. A lebebil e a nglunguched a mo monger el ngar er a rolel el dimlak domdasu er ngii.

13. Ngmilekera nglunguuch e ngosuir a ta el telungalek el dimlak el melemalt a omeruul el mlo er tir?

¹³ Molatk er a experience er a odos el Vero el kiei er a Democratic Republic of the Congo. Ngii me a bechil el diak el Sioning me a 15 a rekil el ngelekir el redil a mle kirir el chemiis el mora ta er a beluu e le ngmla er ngii a cheldebechel er a resoldau el mlo oldechelakl er a belurir. Ngar er a omerollir e te mla er ngii a resoldau el mle stob er tir. Te dilu el kmo te mo mekodeterir. Me a Vero a lilangel me a ngelekel a millasem el mengellakl er a rengul e milluluuch el klou a ngerel e uluusbech er a ngklel a Jehovah el betok el taem. Sera bo el merek el meluluuch e ngike el merreder er a resoldau a  uleker el kmo, “Kau el ngalek, ngtecha ulsisecheklau el meluluuch?” Me ngdilu er ngii el kmo, “Ngdelak a ulsisecheklak el oltirakl er a kerebai er a nglunguuch el ngar er a Mateus 6:9-13.” Me ngika el merreder a dilu er ngii el kmo, “Kau el ngalek, morael kau me a delam me a demam el ngar er a budech e a Jehovah el Dios er kau bo lomekerreu er kau!”

14. Ngera mo melasem er a klaumerang er kid, e ngera mo ngosukid el outekangel?

¹⁴ Chouaika el experience osisecheklid el kmo, ngdiak el kired loumededenger er a klisichel a nglunguuch. Engdi ngmekera lsekum a nglunguched a diak el mereched el monger me a lechub e ngdiak lemonger el ngar er a mengasireng el rolel? Ngdi ua ngike el melakl el dil er a okesiu er a Jesus, molemolem el meluluuch el ulterekokl a rengum el kmo a Dios er kid a kmal diak bo lechitau e ngii a mo onger er a nglunguchem er sel temel el ngar er a rolel er ngii. Molemolem el lolengit er a chedaol reng er a Jehovah. (Fil. 4:13, NW) Lak mobes el kmo ngkmal di kmedung e a Jehovah mo meskau a betok el klengeltengat me kau a mo obes aike el ringel el dilubech er a ngar er a mong. Me sel molemolem el loutekangel a ringel loeak a ngelsuil a Jehovah e ngmo smisichau el kirel aike el dirk merael el mei el sils.​—1 Pe. 1:6, 7.

15. El ua losaod a Mateus 17:19, 20, ngera el omelsemai a blo lechelebangel er ngii a redisaiplo er a Jesus?

¹⁵ A Jesus a dilu er a redisaiplo er ngii el kmo a klaumerang a mo ngosuterir el outekangel a omelsemai. (Monguiu er a Mateus 17:19, 20.) A ta el taem e ngmlo diak el sebechir loltobed a mekngit el reng alta te mla meruul er ngii er a uchei. E ngera uchul? A Jesus a dilu er tir el kmo ngngesonges a klaumerang er tir. Ngdilu el kmo a lsekum e ngmo klou a klaumerang er tir e ngmo sebechir el ngmukl a omelsemai el ua meklungel a rois! Chelecha el taem e kede locha dirrek el mo chobangel a omelsemai el locha mo meringel er kid a oumerang el kmo ngsebeched el mtekangel.

16. Ngmekera klaumerang e olengeseu er a Geydi el outekangel er a okodellel a bechil?

¹⁶ Molatk er a Geydi el odos er a Guatemala. Ngii me a bechil er a Edi a mlara omerollir el mo remei er a uriul er a miting e te mekodir a bechil. Ngmilekera klaumerang er ngii e ngosuir loutekangel er a kngtil a rengul? Ngmelekoi el kmo: “A nglunguuch a ngosukak el msa Jehovah berredek, e tia meskak a budech. Ak mesa el kmo a Jehovah omekerreu er ngak loeak a telungalek er ngak me a resechelik er a ongdibel. Ngak el mechesang el meruul er a omesiungek el mora Jehovah a rullak el mo diak el lsal mekngit a renguk e melemolem er a bek el sils el diak bekikl el kirel a klukuk er ngak. Ak mla suubii er tia el experience er ngak el kmo a ngii di el omelsemai el bok chebangel er a ngar medad a sebechek el mtekangel loeak a ngelsuil a Jehovah, Jesus, me a cheldebecheled.”

17. Ngera sebeched el meruul er ngii sel bo dechebangel a tekoi el domdasu el kmo ngdiak el sebeched el mtekangel?

¹⁷ Kau, ngmekngit a rengum er a kodellel a betik er a rengum? Mongoit a taem el melisiich er  a klaumerang er kau er a okiis loeak sel monguiu a cheldecheduch er a Biblia el kirel a okiis. Kau, ngmekngit a rengum le ngar ngii a chedal a telungalek er kau el mla mesuld a ngklel? Mosuub er a Tekingel a Dios el mo olterekokl er a rengum el kmo ngdiak a mo ungil el ua rolel a Dios a lomesmechokl. Me a ngii di el omelsemai el omchelebangel er ngii mousbech er ngii el techall el mo melisiich er a klaumerang er kau. Moluluuch louchais er a Jehovah aike el rokui el ngar er a rengum. Lak moleakl er kau er a rechad e bai molemolem lolekeed er kau er a rudam me a rudos er kau. (Osi. 18:1, NW) Moruul aike el tekoi el mo ngosukau el outekangel el mo lmuut me a lsekum e ke meruul el merael a iuechel a medam. (Psa. 126:5, 6) Lak mongoit a miting, odingel, me a omengiuem er a Biblia. Molemolem el ulturk osengem er a klengeltengat el bo mngai er a ngar medad. Sel momes er a rolel e a Jehovah a olengeseu er kau, e ngmo smisichii a klaumerang er kau er ngii.

18. A lsekum e ke omelechesiu el kmo a klaumerang er kau a olengesonges e ngngera sebechem el meruul er ngii?

¹⁸ A lsekum a omelsemai el blo mchebangel er a ngar er a mong me a lechub e ngchelechang a ochotii el kmo ngngesonges a klaumerang er kau, e lak bo lemechitechut a rengum. Momes el techall el mo melisiich er a klaumerang er kau. Molengit er a osisiu el tekoi el lullengit er ngii a redisaiplo er a Jesus el kmo: “Mluut el dochel a kloumera er kemam!” (Lk. 17:5, BT) Mdirrek el melatk er tirka el kerebai el ngar tia el suobel. Lak mobes aike el rokui el taem el Jehovah a ullengeseu er kau el ua Miguel me a Yurai. Bo blechoel el meluluuch el mora Jehovah tokubets sel bo mchelebangel er a klou el mondai el ua ngelekel a Vero me a Anel. Mutebengii el kmo a Jehovah a locha mo meskid a ngeso loeak a telungalek er kid me a resechelid el ua Geydi. Sel obecherei a Jehovah me lolengeseu er kau el outekangel a ringel er chelechang, e ngmenga el mo ulterekokl a rengum el kmo ngmo ngosukau loutekangel a ngii di el ringel el bo mchebangel er a ngar medad.

19. A Jesus ngmle ulterekokl a rengul el kirel a ngerang, e ngera sebechel mo ulterekokl a rengum el kirel?

¹⁹ A Jesus a ngilsuterir a redisaiplo er ngii el mo mtab aike el kirir el mo melisiich er a klaumerang er tir er ngii, me nguaisei engdi ngmle ulterekokl a rengul el kmo te mo mesisiich er aike el omelsemai el bo lechebangel loeak a ngelsuil a Jehovah. (Jn. 14:1; 16:33) Ngmle ulterekokl a rengul el kmo ngngar ngii a kloul seked el mesisiich a klaumerang er tir el mo suobel er a kloul ringel. (Och. 7:9, 14, BT) Kau, ke mo teloi er tia el kloul seked? Ngoeak a krasia er a Jehovah e ngsebechem el mo ta er tir a lsekum e ke ousbech a bek el techall el mo mekurulii e smisichii a klaumerang er kau!​—Heb. 10:39.